chv.aif.ru сайтран илнӗ сӑнӳкерчӗк

Чӑваш Енре Лару-тӑру центрӗ (вырӑсла ӑна Ситуационный центр тенӗ) уҫӑлнӑ. Хушӑва регион ертӳҫи Олег Николаев алӑ пусса ҫирӗплетнӗ.

Центр ертсе пырассипе, лару-тӑрӑва сӑнаса тӑрассипе, ыйтуллӑ самантсене палӑртассипе тата тишкерессипе паха йышӑнусем хатӗрлеме кирлӗ-мӗн. Унсӑр пуҫне центр инкеклӗ лару-тӑруран асӑрханассипе тата ӑна сирессипе ӗҫлӗ.

Вырӑнти хӑйтытӑмлӑх органӗсенчи лару-тӑрӑва пӗр ҫӗре пухса хатӗрлеме пӗрлехи платформа ӗҫлесе кайӗ.

Центр ӗҫӗшӗн Чӑваш Ен Элтеперӗн Администрацийӗ тата Цифра аталанӑвӗн министерстви яваплӑ пулӗҫ.

www.ntrk21.ru видеовӗнчен илнӗ сӑнӳкерчӗк

Нумаях пулмасть Шупашкарти «Каскад» суту-илӳпе кану центрӗнче «В тишине» (чӑв. Шӑплӑхра) Мускаври музейӑн куравӗ уҫӑлнӑ. Вӑл кӑрлач уйӑхӗн 29-мӗшӗччен ӗҫлӗ.

Асӑннӑ музея икӗ ҫул каярах Мария Айзина уҫнӑ. Маларах курав 9 хулара ӗҫленӗ, халӗ, ав, — Шупашкарта.

Курава пыракансен алӑпа кӑтартса пӗр-пӗринпе калаҫмалла, куҫпа пӑхса пӗрне-пӗри ӑнланмалла, ӳт-пӳ хусканӑвне сӑнамалла.

Куравра интерактивлӑ 4 лапам ӗҫлет.

t.me/enteshsem сӑнӳкерчӗкӗсем

Хальхи вӑхӑтра ҫынсем хӗрсе кайсах Ҫӗнӗ ҫула хатӗрленеҫҫӗ. Ҫав уява пуринчен ытла пӗчӗккисем хавасланса кӗтеҫҫӗ.

Шӑпах вӗсене чӑваш теттипе савӑнтарма шухӑш тытнӑ та Элӗк районӗнчи «Ҫӑлкуҫ» ача пахчинче ӗҫлекенсем.

Шкул ҫулне ҫитменнисен учрежденийӗнче ёлка вырнаҫтарнӑ, ӑна чӑвашла теттесемпе капӑрлатнӑ. Тӑван халӑхӑмӑра хисеплесе, унӑн йӑли-йӗркине сума суса хатӗрленӗ ёлка питех те хитре пулса тухнӑ. Вӑл ачасене те, аслисене те килӗшӗ.

Вӑрнар районӗнчи Малтикас ялӗнче 23 ҫулти каччӑ хӑйӗн килӗнче ют ҫӗршыв ҫыннисене пропискӑна тӑратнӑ. Хӑй вӑл Шупашкарта пурӑнать.

Ҫурчӗ 16 тӑваткал метр кӑна. Ҫитменнине, пурӑнма та юрӑхлӑ мар. Каччӑ вара унта ют ҫӗршыв ҫыннисене пропискӑна тӑратма пултарнӑ. Ҫапла вӑл тӑватӑ ҫын валли документ туса панӑ вӑл.

Каччӑ тӗлӗшпе пуҫиле ӗҫ пуҫарнӑ.

Суд приставӗсен архивӗнчи сӑн

Канашра пурӑнакан 38 ҫулти арҫын хӑйӗн кил картишӗнче видеокамера вырнаҫтарнӑ. Пӗр камери кӳршисен пахчине те сӑнанӑ. Ҫакӑ кӳршисен суда ҫитмелли сӑлтав пулнӑ.

Вӗсем ӑнлантарнӑ тӑрӑх, видеокамера сӑнани такамсем, ют ҫынсем, пӑхнипе танах. Пристав камера хуҫине суд йышӑнӑвӗпе паллаштарнӑ хыҫҫӑн та нимӗн те улшӑнман. Ун тӗлӗшпе исполнительнӑй сбор 5 пин тенкӗ илессине пӗлтерсен тин вӑл видеокамерӑна урӑх вырӑна куҫарнӑ.

Инкеклӗ лару-тӑру министерстви тунӑ сӑн

Ӗнерхи каҫ тӗлне республикӑри виҫӗ районти хӑш-пӗр ялта электричество пулман. Муркаш, Вӑрмар тата Шӑмӑршӑ районӗсенче пурӑнакансем ҫутӑ ҫукки пирки шӑнкӑравласа пӗлтереҫҫӗ.

Паянхи ир тӗлне тӑватӑ ялта ҫутӑ пулман. Вӗсенче – 677 кил, унта 1 пин те 321 ҫын пурӑнать. Хальхи вӑхӑтра республикӑра авариллӗ 4 бригада ӗҫлет. Пӗтӗмпе – 11 ҫын, 4 техника.

akinshin-roman сайтри сӑн

Паян республикӑра каллех пӑрлӑ ҫумӑр ҫунӑ. Каллех ялсем электричествӑсӑр юлнӑ.

ЧР Элтеперӗ Олег Николаев хӑйӗн Телеграм-каналӗнче пӗлтернӗ тӑрӑх, 6 районта пӑрлӑ ҫумӑра пула ҫутӑ сӳннӗ: Пӑрачкав, Красноармейски, Вӑрнар, Вӑрмар,Ҫӗрпӳ тата Йӗпреҫ районӗсенче. Пӗтӗмпе 225 ялта пурӑнакан 2 пин ытла ҫын (2729 кил) электричествӑсӑр юлнӑ.

Авариллӗ бригадӑсем вырӑнта ӗҫлеҫҫӗ.

cap.ru сӑнӳкерчӗкӗ

Паян Чӑваш Ен Элтеперӗ Олег Николаев «Ертӳҫӗсен команди-2022» республикӑри конкурс ҫӗнтерӳҫисемпе финалисчӗсене чысланӑ.

Ҫӗнтерӳҫӗ ятне «Чӑваш Енри экспорт енӗпе ӗҫлекен пӗчӗк тата вӑтам усламҫӑсене пулӑшакан центр» организацин директорӗн заместителӗ Владимир Терентьев, Шупашкарти стоматологи поликлиникин тӗп врачӗн заместителӗ Милана Быстрова, «Релематика» обществӑн реклама менеджерӗ Евгения Иванова, Улатӑр районӗнчи Ахматово шкулӗн директорӗ Татьяна Емельянова, Шупашкарти 45-мӗш вӑтам шкул директорӗ Татьяна Юдина тивӗҫнӗ.

Туризм

Хальлӗхе йывӑҫ ҫуртра та — ҫӑтмах!

Туризма аталантармалли программӑпа килӗшӳллӗн, ҫывӑх ҫулсенче Баскак паҫҫулккинче виҫӗ хутлӑ эко-гостиница тума палӑртнӑ.

Ҫук, ку пӗрре те шӳтлесе калани мар: пирӗн тӑрӑх туристсем валли ҫав тери илемлӗ пулнине Мускав та ӑнланса илнӗ. «Чӑваш вӑрманӗ» Наци паркӗ малашне Раҫҫейри чи илемлӗ вырӑнсенчен пӗри пулмалла.

Проектпа смета документацине хатӗрлес ӗҫ пуҫланнӑ та ӗнтӗ. Строительствӑри мӗнпур вӑрттӑнлӑха уҫса памӑпӑр — асаттесем тытман упа тирне сӳме хушманнине асра тытар. Ҫакна ҫеҫ калар: хӑна ҫурчӗн комплексӗн пӗтӗмӗшле хакӗ 50 миллион тенкӗрен кая лармӗ. «Мускавшӑн ҫак укҫа нумай-и вӑл?» — тейӗҫ хӑшӗсем. Бюджет укҫи питӗ шутлӑ пулнине, ҫиччӗ виҫсе пӗрре касма тивнине манар мар.

Туризма аталантарас тесен, районта тирпей-илем енӗпе ҫав тери нумай ӗҫлемелле. Шӑтӑк-путӑк ҫулсемпе, ҫӳп-ҫап тӑкса тултарнӑ ҫырмасемпе, хыт-хура ҫеҫ ашкӑрса ӳсекен пушӑ ҫуртсен пахчисемпе эпир туристсене илӗртме пултарӑпӑр-ши?

Тирпей тума чӑн малтан район центрӗнчен пуҫламалла.

Малалла...

cap.ru сӑнӳкерчӗкӗ

Ӗнер кӑна республикӑра электролинисене юсаса пӗтерни пирки хыпарларӑмӑр. Ӗнер каҫхинех ялсенче каллех ҫутӑ сӳнме пуҫланӑ иккен.

Канаш, Вӑрмар тата Ҫӗрпӳ районӗсенче пурӑнакансем килте электричество ҫукки пирки пӗлтерме тытӑннӑ. Ҫак тӑрӑхсенче авари бригадисем ӗҫлеҫҫӗ. Электролинисене ҫывӑх вӑхӑтра йӗркене кӗртме шантарнӑ.

Аса илтерер: республикӑра ҫил-тӑман вӗҫтернӗ, пӑрлӑ ҫумӑр ҫунӑ хыҫҫӑн электролинисем йывӑҫсем ӳкнипе татӑлма пуҫланӑ.