Шупашкарти Мӑшӑрлану керменне, Мускав проспектӗнчи 38-мӗш ҫуртӑн 1-мӗш корпусӗнче вырнаҫнӑскере, юсаса ҫӗнетӗҫ. Проект экспертиза витӗр тухнӑ.
Холлра, фойере, кӗнӗ ҫӗрте, пӗрремӗш хутри санузелсенче, иккӗмӗш хутри регистраци залӗнче тӗплӗ юсав тата ахаль юсав тӑвӗҫ.
Сӑмах май, унччен Шупашкарта Мӑшӑрлану керменӗ Володарски (халӗ Воробьев композиторсен) урамӗнче пулнӑ. Ӑна 1966 ҫулта уҫнӑ. Хальхи Мӑшӑрлану керменӗ 1992 ҫулта ӗҫлеме тытӑннӑ.
«Старость в радость» (чӑв. Ватлӑх савӑнма) ыркӑмӑллӑх фончӗ Чӑваш Енри пӗчӗк тупӑшлӑ пӗччен пурӑнакан ватӑсемпе сусӑрсене хальхинче апат-ҫимӗҫ туянма электрон сертификатсем уйӑрса панӑ. Кашнине — 5-шер пин тенкӗлӗх. Шупашкарта ун пек пулӑшупа 68 ҫын усӑ курӗ.
Сертификатпа тавара «Пятерочка» лавккасенче туянма юрать. Анчах эрех-сӑра, пирус туянмалла мар, куллен кирлӗ апат-ҫимӗҫ илмелле. Фонд сӗннине шута илсе. Лавккана ҫитме пултаракан ватӑсем хӑйсем кайса илеҫҫӗ, каяйманнисене социаллӑ центр ӗҫченӗсем туянса килне леҫсе параҫҫӗ.
«Тӗлӗнмелле савӑнтӑм. Кун чухлӗ апат-ҫимӗҫ хӑҫанччен ҫитӗ», — савӑнса тав тунӑ Шупашкарта пурӑнакан Елена Орлова иккӗмӗш ушкӑнри сусӑр.
Шупашкарта Энгельс тата Чапаев урамӗсенче кӗнеке йышӑнмалли шкапсем вырнаҫтарнӑ.
Мӗн тӗллевпе тетӗр-и? Эсир унта кирлӗ мар кӗнекесене кайса хума пултаратӑр. Кайран вӗсене ялти вулавӑшсене парӗҫ. Вӗсем ан япӑхланччӑр тесе хутаҫа чикме сӗнеҫҫӗ.
Ҫывӑх вӑхӑтра хулара ҫавӑн йышши 50 шкап вырнаҫтарасшӑн.
Шупашкарта пурӑнакан 85 ҫулти кинемей хӑйӗн Шупашкарти пер пӳлӗмлӗ хӑтлӑ хваттерне ялти кӳршисене парнеленӗ. Лешсем ӑна пӑхса пурӑнма тата укҫа-тенкӗ енчен пулӑшма шантарса хваттере хӑйсене парнелеме чылай вӑхӑт ӳкӗтлесе пурӑннӑ.
Варнар районӗнчи пӗр ялта ҫуралнӑ ҫав ватӑ хваттере рентӑна паратӑп тесе шухӑшланӑ, 2024 ҫулта нумай ӗҫ пурӑҫлакан центра кайса пӗр пӳлӗмлӗ хваттере куршисене куҫарса панӑ. Кайран кинемее ӑс паракан пулнӑ курӑнать, вӑл хваттере парнеленине ӑнланса илнӗ.
Халӗ ватӑ ҫынна прокуратура хӳтӗлесе суда тавӑҫпа тухнӑ, асӑннӑ документа пӑрахӑслаттарасшӑн.
Шупашкарта тепӗр мурал пулӗ. Ӑна Хӗвеллӗ урамӗнче ӳкерӗҫ. Мурал «Хальхи тата иртни» ятлӑ пулӗ. Авторӗ — «ФормаАРТ» фестивале хутшӑнакан Яна Ежова.
Атӑлҫи тӑрӑхӗнче «ФормАРТ» фестиваль улттӑмӗш хут иртет. Унта 18-35 ҫулсенчи ӳнерҫӗсем хутшӑнаҫҫӗ. Кӑҫал фестивале Тӑван ҫӗршыв хӳтӗлевҫин ҫулталӑкне халалланӑ. Ҫӗнтерӳҫе 200 пин тенкӗ преми парӗҫ. Иккӗмӗшпе виҫҫӗмӗш вырӑншӑн – 150 тата 100 пин тенкӗ.
Яна Чӑваш патшалӑх ӳнер музейӗнче ӗҫлет, И.Я.Яковлев ячӗллӗ ЧППУра магистратурӑра вӗренет.
Ҫӗртмен 27-мӗшӗнче Пӗтӗм Раҫҫейри «Работа России. Время возможностей» ярмӑрккӑ иртӗ.
Тӗп лапам ЧР Наци библиотекинче пулӗ. Кунсӑр пуҫне ярмӑрккӑ Ҫӗнӗ Шупашкарти, Канашри, Ҫӗмӗрлери, Етӗрнери тата Кӳкеҫри «Раҫҫейри ӗҫ» кадр центрӗсенче ӗҫлӗ. Унта пыракансем ӗҫпе тивӗҫтерекенсемпе, пушӑ вакансисем пирки ыйтса пӗлме пултараҫҫӗ. Ҫавӑнтах ӑсталӑх класӗсемпе тренингсем иртӗҫ.
Ярмӑрккӑ 10 сехетрен пуҫласа 19 сехетчен ӗҫлӗ. Унта опытлӑ специалистсем кӑна мар, аслӑ классенче вӗренекенсем, студентсем, тивӗҫлӗ канурисем, сусӑрсем те хутшӑнма пултараҫҫӗ. Тӗплӗнрех «хӗрӳ линие» 8-800-350-80-58 (тӳлевсӗр) номерпе шӑнкӑравласа ыйтса пӗлме пулать.
Шупашкарти халӑхӑн социаллӑ ыйтӑвӗсене тивӗҫтерекен комплексла центрен ӗҫчӗнӗсем тӗрлӗ хулара иртекен семинарсене час-часах хутшӑнаҫҫӗ. Унта учреждени директорӗ те, специалсичӗсем те кайса пӗлӗве анлӑлатаҫҫӗ.
Хальхинче ватӑ ҫынсене вӑрах вӑхӑт пӑхакан уйрӑмсен заведующийӗсем Надежда Шикарева тата Надежда Мастерова Санкт-Петербругра вӗренеҫҫӗ. Ватӑ ҫынсене тӗрӗс пӑхма вӗсем Санкт-Петербургри медицинӑпа социаллӑ институтра 4 кун вӗренеҫҫӗ. с
Шупашкарта пурӑнакан хусах хӑй мӗншӗн авланайманнине пӗлес тесе юмӑҫа кайнӑ. 40-ри арҫын тӗнче тетелӗнче витӗр куракан, пурне те пӗлекен юмӑҫ пӗлтерӗвне асӑрханӑ.
Хайхи «маҫтӑр» арҫынна сӑнӳкерчӗк ярса пама ыйтнӑ. Сӑнӳкерчӗке курсан хӗрарӑм хусаха такам пӑснине, ӑна тасатмаллине ӗнентернӗ. Кун пек ӗҫе ахаль тӑвайӑн-и — укҫа тӳлемелле. Нумай тӳлемелле.
Арсын микрофинанс организацийӗсенчен кивҫен илсе тултарнӑ. 1,3 миллион ытларах тенкӗ укҫана сеанс ирттерекене куҫарса панӑ. Лешӗ ӑна ӗҫе вӗҫлесен каялла куҫарса пама шантарнӑ-ҫке. Хусаха пулӑшас тесе тар тӑкнине ӗнентерме хӗрарӑм видеосем ярса панӑ. Унта вӑл ҫӑва тӑрӑх ҫуртапа ҫӳренӗ. Медиафайлсене ҫийӗнчех телефонтан тасатма ыйтнӑ, пӑсса пани унсӑрӑн сарӑлса каяссине пӗлтернӗ.
Сеанс хыҫҫӑн укҫана тавӑрмалли икӗ эрне иртнӗ хыҫҫӑн (ара, юмӑҫ ҫапла каланӑ-ҫкӗ) хӗрарӑм ҫыхӑнӑва тухма пӑрахсан арҫын хӑй улталаннине ӑнланса илнӗ.
Ӗнер, ҫӗртме уйӑхӗн 17-мӗшӗнче, Шупашкар хулинчи ватӑсем пӗрле пуҫтарӑнса Йошкар-Олана кайнӑ. Ватӑсене пӗрле пухаканни — халӑхӑн социаллӑ ыйтӑвӗсене тивӗҫтерекен комплекслӑ центр. Унта «Социаллӑ туризм» проект пурнӑҫа кӗнӗ май ватӑсене хамӑр республика тӑрӑх илсе ҫӳреҫҫӗ ҫеҫ мар, кӳршӗллӗ регионсене те илсе кайса кӑтартаҫҫӗ.
Учрежденире ӗҫлекен Валентина Ильина специалист пӗлтернӗ тӑрӑх, ватӑсене Мари Эл тӗп хули питех те килӗшнӗ. «Экскурссовод пулӑшнипе эпир кӳршӗллӗ республикӑмӑрӑн историйӗпе паллашарӑмӑр, Йошкар Ола тӑрӑх киленсе те савӑнса ҫӳрерӗмӗр», — каласа кӑтартнӑ вӑл центрӑн пресс-службине.
Шупашкарта пурӑнакан Ольга Упман «Раҫҫей наци супермоделӗ» онлайн конкурса хутшӑнать.
Вӑл 46 ҫултан аслӑрах хӗрарӑмсен хушшинче тупӑшать.
Ҫӗнтерӳҫе кӗҫех, утӑ уйӑхӗн 1-мӗшӗнче, палӑртӗҫ. Мала тухнӑ чиперкке диадемӑна, диплома тата Мускаври илем конкурсне хутшӑнма май паракан сертификата тивӗҫӗ. Ку кӑҫа мар, ҫӗнтерӳҫӗн сӑнӳкерчӗкне «Раҫҫей наци илемӗ» журналта пичетлесе кӑларӗҫ.
Пирӗн ентеш тӗлӗнмелле хӗрарӑм. Вӑл пӗр ҫулта 26 илем конкурсӗнче ҫӗнтернӗ. Ҫапла Раҫҫейри рекордсен кӗнекине кӗнӗ.
+12.3 °C