Нимӗҫ овчарки, Виджи ятлӑ йытӑ, вӑхӑтлӑх усрамалли изоляторта службӑра пулнӑ. Вӑл 9 ҫул тултарсан ӑна тивӗҫлӗ канӑва янӑ. Чӑваш Республикин ШӖМӗн кинологи службин центрӗ ун валли ҫӗнӗ хуҫа шыранӑ.
Виджие илес текен нумай пулнӑ. Анчах кинологсем ун валли хуҫана тӗплӗн суйланӑ, ӑна лайӑх пӑхчӑр тенӗ.
Халӗ Виджи Муркаш округӗнчи Мӑн Сӗнтӗр ялӗнче арҫынсен Александр Невский мӑнастирӗнчи лаша ферминче пурӑнать. Ҫӗнӗ хуҫа каланӑ тӑрӑх, йытӑ ҫӗнӗ ҫӗре хӑвӑртах хӑнӑхнӑ, чӗрчунсемпе туслашнӑ. Халӗ вӗсемпе хаваспах вылять.
Виджи шӑпишӗн пӑшӑрханакансене ҫӗнӗ хуҫа хӑйӗн патне хӑнана чӗнет.
Шӑплӑхра пулӑ тытса ларнӑ вӑхӑтра… пӑши ишсе пынӑ. Кун пекки Ҫӗнӗ Шупашкарта пурӑнакан Валериан Григорьевпа пулса иртнӗ.
Вӑл ирхине Атӑлта кимӗ ҫинче пулӑ тытса ларнӑ. Ҫав вӑхӑтра инҫех мар лапкӑн кӑна пӑши ишсе иртнӗ. Пулӑҫ ӑна телефонӗ ҫине ӳкернӗ.
Малтанах чӗрчун ҫыран хӗрринелле ишнӗ. Анчах палаткӑсем курсан Ҫавал пуҫламӑшӗ патнелле пӑрӑннӑ.
Специалистсем палӑртнӑ тӑрӑх, ҫуркунне вӗҫӗнче ҫамрӑк пӑшисем ҫӗнӗ территорисемпе паллашаҫҫӗ. Пӑшисем лайӑх ишеҫҫӗ, чылай чухне апат шараса юханшыв урлӑ та ишсе каҫаҫҫӗ.
Шупашкарта вӑрӑм тунасене тата сӑвӑссене пӗтерес ӗҫ малалла пырать. Общество вырӑнӗсене ятарлӑ препаратсемпе сапаҫҫӗ.
Специалистсем ку ӗҫе парксенче, скверсенче тата йывӑҫ-тӗмлӗ вырӑнсенче тунӑ ӗнтӗ. Хальхи вӑхӑтра Мускав ҫыран хӗррине тата пляж ҫывӑхӗнчи территорие сапаҫҫӗ. Ача-пӑча лапамӗсене уйрӑмах тимлӗх уйӑраҫҫӗ.
Кун валли хальхи йышши препаратсемпе, сивӗ тата вӗри тӗтре генераторӗсемпе усӑ кураҫҫӗ. Вӗсем ҫынсемшӗн тата чӗрчунсемшӗн хӑрушӑ мар, анчах вӑрӑм тунасемпе сӑвӑссене тӗп тӑваҫҫӗ.
Пӗтӗмпе 614 муниципаллӑ объекта сапма палӑртнӑ.
Шупашкарта кӑҫал та йытӑсен парачӗ пулӗ. Кӑҫалхипе вӑл 4-мӗш хут иртӗ.
Йытӑсене парада ҫу уйӑхӗн 23-мӗшӗнче кӳлмек хӗррине, «Каскад» суту-илӳ центрӗ патне, чӗнеҫҫӗ. Регистраци унта 9 сехет ҫурӑра пуҫланать те 10-ра вӗҫленет. 10:15 сехетре йытӑсем парадра утма пуҫлӗҫ, «Пионерсен ҫыран хӗрри - Театр ҫыран хӗрри – Юрӑ уйӗ маршрутпа» кайӗҫ. Унтан концерт пулӗ.
Мероприятире йытӑсемпе ташланине, вӗсем трюксем тунине тата ыттине курма май пулӗ. Креативлӑхпа палӑрма юратакансене хӑйне евӗр костюмсемпе кӗтеҫҫӗ.
Паян Шупашкарта велосипедпа пыракан ҫынна пӑши амантнӑ.
38 ҫулти арҫын «Роща» ҫул ҫаврӑмӗ тӗлӗнчи Никольски проспектпа пынӑ. Вӑрҫӑ ветеранӗсен госпиталӗнчен инҫех мар велосипед умне кӗтмен-туман ҫӗртен пӑши сиксе тухнӑ.
Тискер чӗрчун ҫине пырса кӗрес мар тесе арҫын руле пӑрса янӑ, анчах хӑй асфальт ҫине хыттӑн персе аннӑ.
Инкек кӑнтӑрла иртни 12 сехет те 45 минутра пулса иртнӗ.
Мӑйракаллӑ ҫак чӗрчун йӗрке хуралҫисемпе тухтӑрсем пырасса кӗтсе тӑман — ҫывӑхри вӑрмана тарса кӗнӗ.
Шар курнӑ велосипедиста васкавлӑ медицина пулӑшӑвӗ паракан пульницӑна илсе кайнӑ, ӑна унти тухтӑрсем пулӑшаҫҫӗ.
«Сӑрҫи» заповедникри упасем хӗл ыйхинчен вӑраннӑ. Унта пурӑнакан утамансем фотокапкӑна лекнӗ.
Чи малтан фотокапкӑна хӑмӑр упа лекнӗ. Кӑҫал вӑл ытти чухнехинчен каярах вӑраннӑ. Анчах кадрсем ҫав тери илемлӗ пулса тухнӑ.
Ҫав кунах 300 метр аякра вырнаҫтарнӑ тепӗр камерӑна ҫамрӑк упа лекнӗ. Заповедникӑн тепӗр вырӑнӗнче инспекторсем упа амипе ҫурин йӗрӗсене асӑрханӑ.
Аса илтерер: Шупашкарти А.Г.Николаев ячӗллӗ ача-пӑча паркӗнче нумаях пулмасть икӗ дикобраз пурӑнма пуҫланӑ.
Дикобраз курас тесен Шупашкарти Андриян Николаев ячӗллӗ паркра вырнаҫнӑ «Ковчег» зоокӗтесе каймалла.
Дикобразсем унта нумаях пулмасть пурӑнма тытӑннӑ. Вӗсем Тося тата Фрося ятлӑ. Парк администрацийӗ вӗсене ӑҫтан илсе килни пирки хыпарламан.
Сӑмах май, «Ковчег» зоокӗтесре юлашки хутчен ҫӗнӗ чӗрчунсем 2024 ҫулхи ҫулла тупӑннӑ. Ун чухне икӗ ҫӳлевӗҫ ҫурине илсе килнӗ: ама тата аҫа. Вӗсене зоокӗтес ӗҫченӗсем Дуняша тата Яша тесе ят панӑ.
Палӑртса хӑварар: «Ковчег» кашни кунах ӗҫлет.
Шупашкарти А.Г.Николаев ячӗллӗ ача-пӑча паркӗнче вырнаҫнӑ «Ковчег» зоокӗтесре йыш хушӑннӑ. Парк пресс-служби пӗлтернӗ тӑрӑх, Камерун качакисен ҫемйинче тӳрех виҫӗ путек ҫуралнӑ.
Путексем ҫут тӗнчене килнӗ чухне кашни 350 грамм кӑна тайнӑ. Анчах темиҫе сехетрен ура ҫине тӑнӑ, каҫ еннелле вара сиккелеме, чупма тытӑннӑ.
Палӑртса хӑварар: Камерун качаки Анӑҫ Африка енчи чӗрчун. Вӗсем пысӑк мар, 65-70 сантиметр тӑршшӗ кӑна. Качакисем 12-15 килограмм кӑна таяҫҫӗ, такисем – 20–25 килограмм, хӑш чухне 35 килограмм тайма пултараҫҫӗ. Вӗсем ҫынпа питӗ хутшӑнма юратаҫҫӗ. Вӗсене йытӑсем пек дрессировка тума та пулать.
Юр кайса пӗтмен-ха, анчах Чӑваш Енре хура ҫӗленсем хӗл ыйхинчен вӑраннӑ.
Ун пек ҫӗлене «Сӑрҫи» зповедникӑн Улатӑр пайӗнче асӑрханӑ. Ӑна унта тӑрӑшакан специалистсем курнӑ.
Хура ҫӗлен ӑшӑ асфальт патне шуса тухнӑ. Хӑрушлӑх пуррине сиссен кӗпер айне пытаннӑ. Кайран вара, темиҫе минутран, каялла таврӑнса ҫӑмхаланса выртнӑ.
Ҫанталӑк сивӗрех пулнӑран хальлӗхе ҫӗленсем питех хастар мар.
Канаш округӗнчи Яманкассинче пурӑнакан Олег Сергеев кашни ҫулах кайӑксемпе чӗрчунсемшӗн тӑрӑшать — вӗсем валли сырӑшсем ӑсталать.
Вӑл сырӑшсем ӑсталама питӗ ӑста. Вӗсене хӑмаран касса кӑларса питӗ илемлӗ тӑвать. Нумаях пулмасть Олег Сергеев вӑрманти пакшасене тутлӑ апатпа сӑйлас тенӗ. Вӑл хӑй ӑсталанӑ ҫӗнӗ сырӑша мӑйӑр хунӑ та ӑна хырлӑхра ҫакса хӑварнӑ.
Сӑмах май, Олег Сергей общество ӗҫӗсенче те маттур. Вӑл — ял старости.
+2.3 °C