Шупашкарта паян пӗри такси водительне пӑвма пуҫланӑ. Пӑтӑрмах К.Иванов урамӗнче пулса иртнӗ.
Водитель йӗрке хуралҫисене пӗлтернӗ тӑрӑх, хыҫалти ларкӑч ҫинче ларса пынӑ клиент таксиста кӳрентерме пуҫласа кайнӑ. Унтан ӑна мӑйӗнчен пӑвма тытӑннӑ.
Усал клиента, 32 ҫулти арҫына, часах тупса палӑртнӑ. Вӑл хӑй ӳсӗр пулнине йышӑннӑ та мӗншӗн усалланнине ӑнлантарса парайман.
Паян, нарӑс уйӑхӗн 15-мӗшӗнче, 17 сехет те 35 минутра «Сӑр» ҫул ҫинче амӑшӗпе хӗрӗн пурнӑҫӗ татӑлнӑ.
Талой ялӗ тӗлӗнче «ВАЗ-2115» автомобиль хирӗҫ килекен ҫул ҫине тухса кайнӑ та «Газель» машинӑпа пырса ҫапӑннӑ.
«ВАЗри» икӗ пассажир — 34 ҫулти хӗрарӑм тата 11 ҫулти хӗрача – вилнӗ. Инкек вӑхӑтӗнче хӗрарӑм малти ларкӑч ҫинче пулнӑ, ача — водитель хыҫӗнче. ВАЗӑн 32-ри водительне пульницӑна ӑсатнӑ.
Шупашкар хулинчи производство предприятийӗсенчен пӗринче рабочи пурнӑҫӗ татӑлнӑ.
Йывӑҫран сӗтел-пукан туса кӑларакан предприятире бункера пӑчкӑ кӗрпинчен пушатнӑ чухне арҫын пухмач ӑшне кӗрсе ӳкнӗ. Пӑчкӑ кӗрпи сывлав ҫулӗсене лекнине пула вӑл чыхӑнса вилнӗ.
Тӗпчевҫӗсем палӑртнӑ тӑрӑх, предприятире ӗҫ сыхлавӗн требованийӗсене пӑснӑ. Халӗ ҫав пӑтӑрмахпа ҫыхӑннӑ пуҫиле ӗҫе тӗпчеҫҫӗ.
Шупашкарта 5 машина инкеке лекнӗ. Пӑтӑрмах Николаев урамӗпе Ленин проспекчӗ хӗресленнӗ вырӑнта нарӑс уйӑхӗн 13-мӗшӗнче пулса иртнӗ.
Автомобильсем ҫав вӑхӑтра светофорӑн хӗрлӗ ҫути ҫуннӑран чарӑнса ларнӑ. Ҫавӑн чухне вӗсем ҫине пӗр машина пысӑк хӑвӑртлӑхпа пырса кӗнӗ. «Лада Гранта» рулӗ умӗнче 21 ҫулти ӳсӗр каччӑ ларнӑ.
Шупашкар хулинчи Гладков урамӗнчи тавар илмелли пунктра пӗр каччӑ 100 пин тенкӗ тӑракан курткӑна тӑхӑнса пӑхатӑп тесе каланӑ та таваршӑн тӳлемесӗрех тухса утнӑ.
Курьер службинче ӗҫлекен хӗрарӑм каччӑна хӑваласа тытайман.
Хаклӑ курткӑна ҫав каччӑ ют ҫын ячӗпе саккас панӑ иккен.
Йӗрке хуралҫисем каччӑна шыраса тупнӑ. Вӑл Хусантан пулнӑ, унта IT-сферӑра ӗҫленӗ. 22 ҫулти каччӑ йӗрке пӑтӑрмаха унччен ҫакланман.
Ӗнер, нарӑс уйӑхӗн 11-мӗшӗнче, Ҫӗнӗ Шупашкарпти ҫуртсенчен пӗринче пушар тухнӑ.
Вут-ҫулӑм каҫхи ҫичӗ сехет тӗлӗнче Строительсен урамӗнчи 50-мӗш ҫуртри пӗр пӳлӗмлӗ хваттерте тухнӑ.
Пӑтӑрмахшӑн кил хуҫи хӑй айӑпла иккен. 61 ҫулти арҫын пирус чӗртсе янӑ та ӑна сӳнтермесӗрех ҫывӑрма кӗрсе выртнӑ. Унӑн матрасӗ ҫунма тытӑннӑ. Тӗтӗм шӑршине сиссен кӳршисем арҫынна вӑратнӑ, пушарпа кӗрешекенсене чӗнсе илнӗ.
Шупашкар хулинче «Лексус» автомобиль пӗр кунхине светофорӑн хӗрлӗ ҫутине пӑхмасӑрах малалла вӗҫтернӗ. Вӑл ҫул урлӑ каҫма тӑнӑ ҫынсене чутах ҫапса хӑварман. Ҫакна Роман Загуменный ятлӑ арҫын асӑрханӑ. Хӑйӗн машининчи видеорегистратор ҫинче сӑнланнӑ пӑтӑрмаха патшалӑхӑн ҫул-йӗр хӑрушсӑрлӑхӗн инспекторӗсене ярса панӑ.
«Лексус» рулӗ умӗнче 39 ҫулти хӗрарӑм пулнӑ иккен. Ӑна 1500 тенке штраф ҫырса панӑ. Пӑтӑрмаха тепре лексен штраф виҫи 7500 тенке пулассине, хӑйне вара 4,5 ҫуллӑха водитель прависӗр хӑварма пултарасси пирки асӑрхаттарнӑ.
Шупашкар хулинче сӗмсӗр пӗр водитель кӳмепе ҫӳрекен сусӑрсене ҫӳремелли тротуара пӳлсе хунӑ. Асӑннӑ парковка хулари поликлиникӑсенчен пӗрин умӗнче пулнӑ.
Ҫавна асӑрханисем сӑн ӳкерсе патшалӑхӑн ҫул-йӗр хӑрушсӑрлӑхен инспекторӗсене ярса панӑ. Инспекторсем «Лада Гранта» автомобилӗн хуҫи 76 ҫулти арсын пулнине палӑртнӑ. Ӑна административлӑ майпа явап тыттарнӑ.
Шупашкарта пурӑнакан 68 ҫулти арҫын Муркаш округне пулла кайсан вилнӗ. Ку шӑматкун ирхине пулнӑ.
Арҫын пулӑ тытнӑ чухне пӑр айне анса кайнӑ. Шел, ҫӑлӑнайман. Унӑн виллине вырӑнти ҫынсем туртса кӑларнӑ.
Сӑмах май, ҫулталӑк пуҫланнӑранпа ҫын путса вилнӗ пӗрремӗш тӗслӗх.
Елчӗк районӗнчи Лащ-Таяпара водитель ҫул урлӑ каҫакан хӗрарӑма кӳрентерсе пӗтернӗ.
Асӑннӑ ялта пурӑнакан 33 ҫулти арҫын ҫынсем ҫул урлӑ каҫмалли вырӑн патнех машинӑпа пырса кӗнӗ. Ҫав вӑхӑтра унтан иртсе пынӑ хӗрарӑм хӑраса ӳкнӗ.
«Тойота Камри» автомбиль водителӗпе 61 ҫулти хӗрарам хушшинче тавлашу сиксе тухнӑ. Арҫын хӗрарӑма кӳрентерсе пӗтернӗ.
Прокуратура арҫын тӗлӗшпе административлӑ ӗҫ пуҫарнӑ. Водителе 4,5 пин тенкӗлӗх штрафлама йышӑннӑ. Кӑмӑл-сипет тӗлӗшӗнчен сиен кӳнӗшӗн суд тепӗр 5 пин тенкӗ тӳлеттермелле тунӑ.
+15.3 °C