Етӗрнере улма-ҫырла сутуҫин ачасене зеленкӑпа ҫӑвӑнтарнӑшӑн явап тыттарнӑ. Суд ӑна 2,5 ҫуллӑха ҫирӗп режимлӑ колоние ӑсатма йышӑннӑ.
Ку пӑтӑрмах кӑҫал утӑ уйӑхӗн 30-мӗшӗнче пулнӑ. Суту-илӳ вырӑнӗ тытса тӑракан арҫын хӑйӗн патӗнче ӗҫлекен сутуҫӑран ҫакна пӗлнӗ: 12-ри тата 13-ри ачасем сентре ҫинчен мандарин вӑрлама хӑтланнӑ иккен. Арҫын вӗсене вӗрентме шухӑшланӑ: ачасене хӑйӗн машинине лартнӑ та вӑрмана илсе кайнӑ, унта ачасене питне зеленкӑпа ҫума хушнӑ. Ҫакна арҫыннӑн хӗрӗ телефон ҫине ӳкернӗ. Кайран вӗсем ачасене ҫавӑнтах хӑварса хӑйсем таврӑннӑ. Пӗртӑвансен каялла хӑйсен тӗллӗн таврӑнма тивнӗ.
Арҫынна 2 эрнерен кӑна тытса чарнӑ. Ҫав вӑхӑт тӗлне вӑл республикӑран кайма ӗлкӗрнӗ. Ҫакна та палӑртмалла: суд унран ачасем валли 440 пин тенкӗ шыраса илме те йышӑннӑ.
Паян Атӑл леш енче, Первомайски поселокӗ ҫывӑхӗнче, 75-ри пулӑҫ путса вилнӗ.
Инкек пулни пирки ҫӑлавҫӑсене паян кӑнтӑрла пӗлтернӗ. Пулӑҫ ҫыран хӗрринчен 300 метр аяккарах пӑр айне кайнӑ. Ҫӑлавҫӑсем унӑн виллине шыраса тупса ҫыран хӗррине илсе тухнӑ.
Палӑртмалла: хӗлле пуҫланнӑранпа Чӑваш Енре шыв-шур ҫинче пулнӑ пӗрремӗш инкек ку.
Паян Шупашкартан Мускава вӗҫекен «Победа» самолет инкек сиксе тухни пирки сигнал панӑ хыҫҫӑн Шереметьево аэропортӗнче авариллӗ майпа анса ларнӑ. Телее, 11:56 сехетре ӑнӑҫлӑ анса ларнӑ, никам та аманман.
Малтанлӑха палӑртнӑ тӑрӑх, Boeing 737 (DP 6808 рейс) самолетӑн малти стойки юсавсӑр пулнӑ.
Шупашкарти предприятисенчен пӗринче ӗҫлекен 48 ҫулти хӗрарам ултавҫӑсемпе явӑҫса кайнӑ та пӑтӑрмахран йӗрке хуралҫисем тытса чарма тӑрсан та итлемен.
Телефонпа шӑнкӑравланӑ палламан ҫынсене вӑл СНИЛС тата ИНН номерне каланӑ. Унтан вӑл ултавҫӑсемпе 3 эрне телефонпа калаҫса пурӑннӑ. Лешсем малтан ӑна патшалӑх укҫа парать тесе хавхалантарнӑ, кайран ун ячӗпе 2 миллион тенкӗ кредит илсе Украинӑна куҫарса ярасшӑн тесе хӑратнӑ.
Хӗрарӑм чӑннипех те кредит та илнӗ, хӑйӗн мӗнпур укҫине те ултавҫӑсене куҫарса панӑ. Пӗтӗмпе 8,5 миллион тенкӗ.
Хӗрарӑма банк ӗҫченӗсем те, йӗрке хуралҫисем те чарас тенӗ, вӑл никама та итлемен, хӑйӗн пекех тунӑ. Тӗрӗсрех каласан, пач палламан ҫынсене ӗненнӗ.
Шалти ӗҫҫен министерствин Канашри пайӗнче ӗҫлекен арҫын тата унӑн икӗ тусӗ тӗлӗшпе пуҫиле ӗҫ пуҫарнӑ. Кун пирки РФ Следстви комитечӗн Чӑваш Енри управленийӗнче пӗлтернӗ.
Пакунлӑ ҫынпа унӑн тусӗсем тӗлӗшпе РФ Пуҫиле кодексӗн 163-мӗш статйин 2-мӗш пайӗпе пуҫиле ӗҫе тӗпчеҫҫӗ.
Тӗпчевҫӗсем шухӑшланӑ тӑрӑх кӑҫалхи юпа-чӳк уйӑхӗсенче хайхисем салтакран укҫа туртса илмелли меслет шухӑшласа тупнӑ. Чӳк уйӑхӗн 27-мӗшӗнче пакунли салтак ҫумӗнче наркотик тупнӑҫи тунӑ. Унтан тусӗсемпе пӗрле ӑна хӑратса укҫа шӑйӑрса илесшӗн пулнӑ, 500 пин тенкӗ пама ыйтнӑ, салук вырӑнне машинине илсе кайнӑ.
Шупашкар хулинче пурӑнакан вӑйпитти арҫын, ӳсӗрскер, фельдшера тапӑннӑ.
Пӑтӑрмах раштав уйӑхӗн 15-мӗшӗнче каҫхине пулса иртнӗ. 35 ҫулти арҫынпа пӗрле пурӑнакан хӗрарӑм ӳсӗр арҫынна япӑх пулса кайнӑран тухтӑрсене чӗнсе илнӗ. Васкавлӑ пулӑшу тухтӑрӗсем ӑна тӑна кӗме пулӑшнӑ хыҫҫӑн хайхискер ҫӗҫӗ ярса илсе 39 ҫулти фельдшера вӗлерессипе хӑратма пуҫланӑ. Бригадӑн пӗр пайӗ балкон ҫине тухса тарнӑ, хӗрарӑм-тухтӑр подъезда тухса тарса йӗрке хуралҫисене чӗнсе илнӗ.
Усал арҫын тӗлӗшпе халӗ ҫынна вӗлерессипе хӑратнӑшӑн пуҫиле ӗҫ пуҫарнӑ.
Ӗнер Шупашкар округӗнчи Чӑрӑшкасси ҫывӑхӗнче, «Шупашкар — Сӑр» ҫул ҫинче, авари пулни пирки пӗлтернӗччӗ. Унта Пӑрачкав округӗн администрацийӗн ӗҫченӗсем вилнӗ.
Аса илтеретпӗр: «Тойота» хирӗҫ ҫул ҫине тухса «Лада Грантӑпа» ҫапӑннӑ. «Грантӑра» округ администрацийӗн пуҫлӑхӗн экономика, АПК тата финанс енӗпе ӗҫлекен заместителӗ Татьяна Галахова, Ял хуҫалӑх, экономика тата инвестици ӗҫӗн управленийӗн пуҫлӑхӗн заместителӗ Елена Абрамова, администраци водителӗ Александр Горский пулнӑ.
Паян 14:30 сехетре «Шупашкар — Сӑр» автоҫул ҫинче, Чӑрӑшкасси ялӗнчен инҫех мар, авари пулнӑ. Унта, шел те, 3 ҫыннӑн пурнӑҫӗ татӑлнӑ.
Малтанлӑха пӗлтернӗ тӑрӑх, «Тойота» рулӗ умӗнче ларнӑ 41-ри арҫын, хирӗҫ ҫул ҫине тухса «Грантӑпа» ҫапӑннӑ. «Гранта» водителӗ тата унти 2 пассажир ҫавӑнтах вилнӗ. Иномаркӑра пулнӑ хӗрарӑма пульницӑна илсе ҫитернӗ.
Шупашкар хулинчи 28 шкулти 80 класа каратина хупнӑ. Вӗсене халӗ инҫет сыхӑну мелӗпе вӗрентеҫҫӗ. Хулари 3-мӗш лицей пӗтӗмпех дистанци мелӗпе вӗренет.
Сӑмах май каласан, ОРВИпе тата гриппа чирлекен нумай. Юлашки икӗ эрнере грипа тата ОРВИне пула пульницӑна лекнисен йышӗ Чӑваш Енре 1,8 хут ӳснӗ.
Шупашкарти 20-ри хӗр пӗрле пурӑнакан хӗр тусӗн апачӗ ҫине ҫывӑратакан эмел янӑ та унӑн 5 пин ытла тенкине вӑрланӑ.
Шар курнӑ хӗрарӑм укҫа ҫухалсан полицие кайнӑ. Йӑлтах каласа кӑтартнӑ: 5 пин те 400 пин тенке вӑл хваттер илме пухнӑ, ӑна банкра упранӑ. Кӑшт маларах унран пӗрле пурӑнакан 20 ҫулти хӗр укҫа ыйтнӑ иккен. Ҫавӑнпа полици укҫана вӑл вӑрлама пултарать тесе шухӑшланӑ.
Чӑнах та, кайран ҫакӑ палӑрнӑ: 20-ри хӗр патне ултавҫӑсем шӑнкӑравланӑ, вӗсене ӗненсе вӑл хӑйӗн 700 пин тенкине куҫарса панӑ. Лешсем ӑна тусӗн укҫине те «деклараци» тумаллине ӗнентернӗ, укҫана курьера пама, Чулхулана кайса унта «ФСБ ӗҫченӗсенчен» хушу кӗтме хушнӑ. Хӗр тусӗ нимӗн те ан систӗр тесе вӑл унӑн апачӗ тата чейӗ ҫине ҫывӑратакан эмел янӑ. Лешӗ ҫывӑрнӑ чухне ултавҫӑсем хушнине пурнӑҫланӑ та.
20-ри хӗр тӗлӗшпе пуҫиле ӗҫ пуҫарнӑ.
-4.7 °C