Алексей Афанасьевӑн «Юманлӑх ҫулҫӑ тӑкмарӗ» романӗ кун ҫути курнӑ.
Чӑваш кӗнеке издательствин ӗҫченӗ Ольга Иванова «Контактри» хӑйӗн страницинче пӗлтернӗ тӑрӑх, романӑн пӗрремӗш кӗнеки 2023 ҫулта кун ҫути курнӑ, пӗлтӗр – иккӗмӗшӗ, нумаях пулмасть, ав, виҫҫӗмӗшӗ пичетленсе тухнӑ.
Алексей Афанасьев Тутарстанри Потап-Тӑмпӑрлӑ чӑваш ялӗнче ҫуралса ӳснӗ. Вӑл — прозаик, поэт тата куҫаруҫӑ. Пултаруллӑ ҫав ҫын вырӑсла та, удмуртла та лайӑх пӗлнӗ, ҫамрӑк чух шкулта ачасене удмурт чӗлхине вӗрентнӗ.
Николай Ытарай сӑвӑҫӑн кӗнекине куҫ начар куракан ачасем валли пичетлесе кӑларнӑ. Унпа Л.Н. Толстой ячӗллӗ вулавӑшра паллашма пулать.
Кӗнекери сӑвӑсене брайлер шрифчӗпе пичетленӗ. Кӑларам ячӗ — «Чӗр чунсем – пирӗн туссем» = «Животные – наши друзья». Ӑна ҫыравҫӑ ҫуралнӑранпа 100 ҫул ҫитнине халалласа кун ҫути кӑтартнӑ. Сӑмах май каласан, Николай Васильевичӑн кӗнекине унччен апла шрифтпа пичетлесе кӑларман.
Иртнӗ ҫул Чӑваш кӗнеке издательстви вырӑссен аслӑ поэчӗ А.С. Пушкин ҫуралнӑранпа 225 ҫул ҫитнине халалласа «Я помню чудное мгновенье… Асрах асамӗ ҫав самантӑн…» сӑвӑ пуххине икӗ чӗлхепе пичетлесе кӑларчӗ. Чӑвашла ӑна Василий Кошкин-Кервень сӑвӑҫ куҫарнӑ. Кӗнеке тухнӑ ятпа йӗркеленӗ хӑтлавра, хаҫат-журналти рецензисенче, радиопа телевидени передачисенче асӑннӑ издание пысӑка хурса хакларӗҫ. Куҫаруҫӑ вырӑссен аслӑ поэчӗн сӑввисен тарӑн шухӑшне тата санарлӑхне чӑвашла вырӑнлӑ та виҫеллӗ куҫарнине, сӑвӑсен формине пысӑк ӑсталӑхпа тытса пынине палӑртрӗҫ.
Ҫак кунсенче асӑннӑ кӗнекене Раҫҫӗй ҫыравҫисен Союзӗн секретариатӗнче сӳтсе явнӑ, вырӑс генийӗн пултарулӑхне халӑх хушшинче сарас ӗҫри ҫитӗнӳсемшӗн Василий Кошкин-Кервене Пушкин ылтӑн медальне памалла тунӑ.
Шупашкарӑн туризм карттине пичетлесе кӑларнӑ. Кун пирки Туризма аталантармалли агентство пӗлтернӗ.
Асӑннӑ кӑларӑмра хулари мӗнпур паллӑ вырӑнсене тата туристсен тӗп маршручӗсене кӑтартнӑ. Унпа паллашсан кӑсӑклӑ вырӑнсем пирки пӗлме май килӗ.
Пирӗн республика туристсене илӗртмессипе нумай ӗҫлеҫҫӗ. Чӑваш Енпе ытти тӑрӑхри ҫынсем те килсе ҫӳреҫҫӗ.
Шупашкарта пурӑнакан 92 ҫулти Галина Маскевич темиҫе ҫул каялла кӗнеке пичетлесе кӑларнӑ. Галина Фёдоровнӑна пӗлтӗрхи утӑ уйӑхӗнченпе Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн социаллӑ ӗҫченӗ Анна Христофорова пӑхса тӑрать.
Чӗмпӗр облаҫӗнче ҫуралнӑ хӗрарӑм Канашри педагогика училищинче веренне, кайран вӑл Ҫӗпӗре тухса кайнӑ. Унта педагогика институтӗнче куҫӑнсӑр майпа вӗреннӗ. Унтах вырӑнти каччӑпа паллашна, унпа вӗсем Чӑваш Ене куҫса килнӗ.
Хӗрарӑм Варнарти ял хуҫалӑх техникумӗнче преподавательте ӗсленӗ, литература кружокне ертсе пынӑ. Тава тивӗҫлӗ канӑва тухса вӑл Шупашкарти ача пахчисенчен пӗринче (унта чирле ачасем ҫӳренӗ) 72 ҫула ҫитиччен тӑрӑшнӑ.
2017 ҫулта кинемей «Исповедь души» кӗнеке кун ҫути кӑтартнӑ. Ӑна пичетлеме унӑн веренекенӗсем пулнисем пулӑшнӑ.
❗️«Варкӑш» литература клубӗнче Олеся Михайловӑн кӗнекине пахаланӑ
«Варкӑш» литература клубӗнче Олеся Михайловӑн «Пӗрремӗш ҫӗнтерӳ» кӗнекине хӑтланӑ. Вӑл – унӑн пӗрремӗш кӗнеки. Кӑларӑм 2024 ҫулта Чӑваш кӗнеке издательствинче пичетленсе тухнӑ.
«Кӗнеке ҫырасси – питӗ йывӑр ӗҫ. Пӗрре ларсах пулмасть. Тен, марафон чупса тухасси ҫӑмӑлрах та пуль», – тенӗ ҫамрӑк ҫыравҫӑ.
Палӑртмалла: Олеся – армрестлинг енӗпе Раҫҫей спорт мастерӗ, Европа чемпионӗ.
Кӗнекене сӳтсе явнӑ чухне автор яка ҫырнине, лайӑх ӳкерчӗксем тума пултарнине палӑртнӑ.
Чӑваш Енӗн Ача-пӑчапа ҫамрӑксен вулавӑшӗнче Улькка Эльменӗн «Интернетри юрату» кӗнекине хӑтланӑ. Унта кӗнеке редакторӗ Ольга Австрийская тата ҫыравҫӑсемпе поэтсем хутшӑннӑ.
Вулавӑшӑн краеведенипе наци литературин пайӗн заведующийӗ Эвелина Малеева палӑртса хӑварнӑ тӑрӑх, «Интернетри юрату» кӗнеке ача-пӑчапа ҫамрӑксем валли ҫырнӑ кӗнекесен алҫырӑвӗсенчен конкурсӗнче ҫӗнтернӗ.
Ҫӗнӗ кӑларӑм Чӑваш кӗнеке издательствинче 2024 ҫул вӗҫӗнче пичетленсе тухнӑ. Кӗнекери тӗп сӑнарсем – хулари шкулта 10-мӗш класра вӗренекенсем: Дима Егоров, Катя Кулагина, Коля Петров, Лариса Игнатьева.
Нарӑс уйӑхӗн 14-мӗшӗнче 16 сехетре Чӑваш патшалӑх ӳнер музейӗнче Александр Мухин-Чебоксарский художникӑн куравӗ уҫӑлӗ. Курава Чӑваш Республикин тава тивӗҫлӗ художникӗн 65 ҫулхине халалланӑ.
Автор портрет миниатюрин, натюрморт, пейзаж, кӗнеке иллюстрацийӗн жанрӗсемпе ӗҫлет. Пӗчӗк япаласем ӳкерме калама ҫук чӑтӑмлӑх, пултарулӑх, тимлӗх, асталӑх кирлӗ. Куравра унӑн чи пӗчӗк портречӗ те пулӗ. «Студентка Катя Сидорова» ӗҫӗ калӑпӑшӗ 5,5х5,5 мм калӑпӑшлӑ. Унпа вӑл Раҫҫейри художниксен союзӗн рекордсменӗ пулса тӑнӑ.
Чӑваш кӗнеке издательствинче «Ҫӑлкуҫ» кӑларӑм кун ҫути курнӑ.
Унӑн авторӗ – Владимир Кузьмин ҫыравҫӑ.
Кӗнеке издательствинче пӗлтернӗ тӑрӑх, кӗнекене «Ҫӑлкуҫ» роман, очерксем тата калавсем кӗнӗ. Роман вулакана Шупашкарта промышленность тракторӗсен заводне тунипе паллаштарать иккен.
«Ҫӑлкуҫ» романра 5-мӗш стройтреста ертсе пынӑ В.П. Демин; Р.И. Томашов парторг, «Тракторострой» идеологӗ И.В. Львов; СССР строительство министрӗн ҫумӗ А.Е. Якубанец; КПСС обком секретарӗ П.А. Чичикин; И.И. Долгушин – трактор заводне ертсе пыракансенчен пӗри; Э.А. Аблякимов, А.Г. Щекин, В.К. Горобец инженерсем; В.Н. Николаев, А.М. Захаров, Е.И. Сергеев, В.Н. Земченков, А.Е. Шариков, Ю.Б. Яковлев, О.Н. Кузьмина бригадирсем сӑнарланнӑ.
Ярса паман ҫыру
2, нарӑс, 2025
Вӑрмар, Чупай ялӗ, В.Е.Цыфаркина
Василий Егорович, хисеплӗ ӑсчахӑм!
Ҫырӑвна тата Валентин Урташа халалланӑ «Тусӑм, эсӗ тусна, тусна аса ил» кӗнекӳне илтӗм, вуларӑм, пӑхса тухрӑм. Кӗтнӗ паха кӗнеке. Чӑваш шӑпчӑкӗн поэзири пултару еткерне, вӑрҫӑри, пурнӑҫри синкерне туллин те тӗрӗс кӑтартакан кӗнеке. Ентешӳ ятне унӑн 100 ҫулӗ тӗлне чыслӑн хакласа палӑртрӑн, яшлӑхри сӑмахна ҫирӗп тытрӑн. Тав сана, мухтав!
Кӗнекере хамӑн ята та куртӑм (Герман Желтухин ҫырнинче), анчах вӗрентӗкре пичетленнӗ тӗрленчӗке пухча кӗртмен. Ахалех! Унта ыттисем каламаннине кӗскен калама пултарнӑ! Вӗренӳ программине ҫӗнӗлле турӑм, вӗрентӗке ӑна санпа пуҫласа кӗртрӗмӗр, ентешӳн «Пурӑнас килет» поэми питӗ вырӑнлӑ пулчӗ. Халӗ Максим Горькие, Александр Фадеева, герой-пионерсене, Урташа вӗренӳрен кӑларса пӑрахнӑ. Чӑваш сӑмахлӑхне кӗҫех шкултан та, пурнӑҫран та сирпӗтес теҫҫӗ тӗнче либералӗсем. Чӑвашра вӗсен вӑртахӗсен В.А.Урташ ҫырнисен тулли пуххине кӑларас шухӑш пачах та ҫук.
+1.3 °C