Авӑн уйӑхӗн 1-мӗшӗнчен Шупашкарти шкулсенче апатлану хакӗ ӳсет. Хушӑва хула пуҫлӑхӗ Владимир Доброхотов алӑ пуснӑ.
1-4 классем валли ирхи апат 40-рен 49 тенке ҫитӗ, кӑнтӑрлахи – 90-ран 110 тенке.
5-11-мӗш классенче вӗренекенсем ирхи апатшӑн 50 мар, 61 тенкӗ тӳлеме тытӑнӗҫ. Кӑнтӑрлахи апатшӑн 100 тенкӗ вырӑнне 122 тенкӗ кӑларса хума тивӗ.
Палӑртмалла: пӗлтӗрхи вӗренӳ ҫулӗпе танлаштарсан, хаксем 49-74 процент ӳснӗ.
Лидия Филиппова журналист, публицист, сӑвӑҫ, радио- тата телеертӳҫӗ тата тепӗр ҫӗнӗ ӑсталӑха алла илнӗ. Талпӑнуллӑ, ҫӗннине пӗлме-вӗренме ӑнтӑлакан Лидия Ивановна экскурсовода (профессиллӗ гида) вӗренсе тухнӑ.
«Сана мӗн тума кирлӗ? Эсӗ писатель, журналист вӗт», — тесе хӑйне калакансем пулнине Лидия Ивановна пытармасть. Вӑл вӑхӑт хӗҫек пулин те вӗренсе тухма кӑмӑл тунӑ. Икӗ-виҫӗ занятие сиктерме тиврӗ пулин те ҫӗнӗ пӗлӗве ҫине тӑрсах ӑша хывнӑ. «Ӑслӑ преподавательсемпе экскурсоводсем лекрӗҫ», - хыпарланӑ Лидия Филиппова халӑх тетелӗнчи хӑйӗн страницинче.
Экскурсовод, Лидия Ивановна калашле, вӗренсе тухнӑ текста каласа кӑтартакан ҫын ҫеҫ мар. Вӑл кӑсӑклантарса яма пултаракан ҫын та. Унсӑр пуҫне вӑл психолог та, тепӗр чухне артист та.
К.В. Иванов ячӗллӗ Чӑваш патшалах академи драма театрӗ ҫамрӑксене Мускава вӗренме яма суйласа илессине эпир унччен пӗлтернӗччӗ-ха. Халӗ эпир телейлисем камсем иккенне те пӗлтӗмӗр. Ун пирки Марина Карягина халах тетелӗнчи хӑйӗн страницинче пӗлтернӗ.
Мускаври Щукин ячӗллӗ Театр институтӗнче Анастасия Азанова, Александр Кузьмин, Елена Михайлова, Степан Никифоров, Анастасия Пашкова, Нина Яковлева Мускавра тӳлевсӗр вӗренӗҫ. Тепӗр тӑватӑ ҫултан вӗсем К.В.Иванов ячӗллӗ Чӑваш патшалӑх академи драма театрне таврӑнӗҫ.
«Яндекс Учебниксем» конференцире Раҫҫейри чи лайӑх информатика вӗрентекенӗсене палӑртнӑ. Палӑртма кӑмӑллӑ: 20 ҫӗнтерӳҫӗ йышӗнче пирӗн 3 ентеш пур.
Ҫак йыша Ҫӗнӗ Шупашкарти Ольга Перепёлкина, Шупашкарти Алексей Владимиров, Канашри Ольга Плешанова кӗнӗ. Вӗсем «Кадр резервӗсем» программӑпа килӗшӳллӗн наградӑсене тивӗҫнӗ. Пирӗн ентешсене профессионаллӑхшӑн, цифра вӗрентӗвне тӳпе хывнӑшӑн тата вӗренекенсене хавхалантарма пӗлнӗшӗн палӑртнӑ.
Лауретсен тӗп парни — Мускаври IT-компанире стажировка тухасси.
Шупашкарти Ленин районӗнчи прокуратура хулари 36-мӗш ача пахчи япӑхса кайни пирки халӑх тетелӗнче ҫырни тӑрӑх пӗлнӗ те тӗрӗслев ирттернӗ.
1950 тата 1975 ҫулсенче туса лартнӑ корпуссенчен тӑракан ача пахчинче, чӑн та, тӗплӗ юсава ҫурта хута янӑранпа та ирттермен иккен. Кӑлтӑк ача пахчи патне пымалли ҫул япӑхса кайнинченех пуҫланнӑ. Вӑл темиҫе ҫул каяллах шӑтӑк-путӑкланса пӗтнӗ пулин те вӗренӳ учрежденийӗн ертӳҫисем кун пирки яваплисене пӗлтермен, кӑлтӑка пӗтерме ҫине тӑман-мӗн. Шалта вара стена та, урай та, мачча та, чӳрече рамисем те япӑхса пӗтнӗ. Унсӑр пуҫне кантӑк ваннӑ вырӑнсем те пулнӑ.
Прокуратура кӑлтӑка пӗтерме ыйтса хула администрацине хут ҫырса панӑ.
Нумаях пулмасть Шупашкарти ӳнер музейӗнче унтан кӑҫал вӗренсе тухнисене чысланӑ. Пурӗ 59 ҫамрӑк дизайнерпа художник дипломне илнӗ.
Дипломлӑ специалистсене саламлама республикӑн культура министрӗн ҫумӗ Татьяна Казакова пырса ҫитнӗ. Пиллӗкпе ҫеҫ вӗреннисене вӑл дипломсемпе хавхалантарнӑ.
Училище директорӗ Владимир Ануфриев саламлан, ӳнер училищине ан манса кайӑр, килсех ҫӳрӗр тесе чӗнсе каланӑ май такӑр ҫул суннӑ.
Ҫӗнӗ Шупашкарти «Никольский» микрорайнти шкула авӑн уйӑхӗн 1-мӗшӗ тӗлне уҫма хатӗрленеҫҫӗ. Тӗп ӗҫсене вӗҫленӗ ӗнтӗ. Халӗ оборудование илсе килсе вырнаҫтараҫҫӗ.
Анчах куншӑн яваплӑ подрядчик графикрен самаях юлса пырать. Мӗншӗнне уҫӑмлатаҫҫӗ.
Шкул ҫӗнӗ вӗренӳ ҫулӗ тӗлне уҫӑлтӑр тесе объектри специалистсен шутне ӳстерме палартнӑ. Ҫав вӑхӑтрах документацие хатӗрлеҫҫӗ. Шкул строительстви мӗнле пынине тӳре-шара тӗрӗслесе тӑрать.
Ҫӗрпӳ округӗнчи Чурачӑк шкулӗн директорне суд тунӑ, штраф тӳлеттерме йышӑннӑ.
Суд палӑртнӑ тӑрӑх, вӑл пӗр вӗрентекене ҫур ставкӑпа вожатӑя вырнаҫтарнӑ, анчах шалӑвне хӑйне парса тӑмалла тунӑ. Директор каланӑ тӑрӑх, укҫа шкул валлиех кайнӑ. Вӗрентекен те вожатӑйра ӗҫлемен тесен те юрать.
Ҫапла Ҫӗрпӳ округӗн хыснине 197 пин ытлалӑх тӑкак кӳнӗ. Директор тӑкака хӑйӗн ирӗкӗпе саплаштарнӑ, хӑйӗн айӑпне йышӑннӑ. Суд ӑна 50 пин тенкӗ штарф тӳлеттермелле тунӑ.
Шупашкарти 1-мӗш гимназирен вӗренсе тухнӑ Ярослава Гурьева икӗ экзаменра 200 балл пухнӑ. Кӑҫал кун пек тӗслӗх республикӑра – пӗрремӗш хут.
Ярослава вырӑс чӗлхипе тата информатика предмечӗпе Патшалӑхӑн пӗрлехи экзаменӗсене лайӑх тытнӑ. Вӑл кашни экзаменра чи пысӑк балл пухнӑ.
Чӑваш Енри пултаруллӑ каччӑ Данил Тарасов компьютер спорчӗпе иртнӗ Раҫҫей чемпионатӗнче финала тухнӑ.
Данил кӑҫал Комсомольскинчи 1-мӗш шкултан вӗренсе тухнӑ. Унӑн вӗрентекенӗ – «Точка роста» центрти Петр Родионов. Ун патӗнче вӑл иккӗмеш ҫул ӑсталӑхне туптать. Сӑмах май, Данил чемпионата пӗлтӗр те хутшӑннӑ, ун чухне 4-мӗш вырӑн йышӑннӑ.
Финал утӑ уйӑхӗн 19-мӗшӗнче Мускавра иртӗ.
-10.7 °C