Ҫӑлкуҫ: irorb.ru

2026 ҫулхи ҫу уйӑхӗн 22-мӗшӗнче Пушкӑрт Республикинчи Илеш районӗнчи Тури Яркей ялӗнче тӑван чӗлхесемпе литература вӗрентекенсен куҫса ҫӳрекен методика семинарӗ иртнӗ. Кунта тӗрлӗ наци ҫыннисем пухӑннӑ, тӗп тимлӗхе тӑван чӗлхене тата ӑна шкулсенче вӗрентессин ҫӗнӗ меслечӗсене уйӑрнӑ. Чӑваш ачисене тӑван сӑмаха юратма вӗрентесси — ку тӗлпулури ыйтусенчен пӗри пулнӑ.

Семинарта чӑваш чӗлхипе литературине шкулта вӗрентес ӗҫри ҫӗнӗлӗхсемпе Кырмыскалӑ районӗнчи Тинӗскӳл ялӗнчи вӑтам шкулта вӑй хуракан Людмила Николаевна Павлова паллаштарнӑ. Вӑл чӑваш литератури урокӗсенче «Блум кубикӗпе» усӑ курассин опычӗ пирки тӗплӗн каласа панӑ. Ҫак меслет ачасене чӑваш чӗлхине тарӑнрах пӗлме, тӑван сӑнарлӑх тӗнчине ӑнланма тата хӑйсен шухӑшне чӑвашла ирӗклӗн палӑртма пулӑшнине палӑртнӑ. Ҫакӑн пек инноваци меслечӗсемпе усӑ курни чӑваш чӗлхи урокӗсене кӑсӑклӑрах тата тухӑҫлӑрах тунӑ, ачасен пуплевӗпе чӗлхе компетенцине аталантарнӑ.

Тӑван чӗлхене аталантарассипе ҫыхӑннӑ ҫак семинара Пушкӑртстанри 15 ытла районтан тата хуларан педагогсем, методистсем, методика пӗрлешӗвӗсен ертӳҫисем пухӑннӑ. Вӗсен хушшинче Пишпӳлек, Кырмыскалӑ тата ытти районсенчи вӗрентекенсем пулнӑ. Тӗп пухусене Муса Гареев ячӗллӗ шкулта онлайн-форматпа тата паллӑ вӗҫевҫӗн музейӗнче ирттернӗ. Хутшӑнакансем паттӑр ҫуралнӑ Таш-Чишма ялӗнчи музей филиалне те ҫитсе курнӑ.

Тӗлпулӑва Пушкӑртстанри вӗрентӳ ӗҫне аталантаракан институтӑн пушкӑрт тата ытти тӑван чӗлхесен кафедри йӗркеленӗ. Кунашкал семинарсем тӑван чӗлхепе литературине вӗрентекенсене хӑйсен ӗҫӗнче ҫӗнӗ меслетсем шырама, пӗр-пӗринпе опыт улӑштарма тата чӑваш чӗлхине упраса хӑварас ӗҫе пысӑк тӳпе хывма май панӑ. Илеш районӗн администрацийӗпе вӗрентӳ управленийӗ хӑнасене ӑшшӑн кӗтсе илнӗ, ӗҫлӗхлӗ лару-тӑру йӗркеленӗ.

#Пушкӑртстан, #вӗренӳ, #чӑваш чӗлхи, #Илеш районӗ, #семинарсем, #Тури Яркей, #Тинӗскӳл