Авӑн уйӑхӗн 17-мӗшӗнче Республикӑри клиника онкодиспансерӗнче пуҫ тата мӑй усал шыҫҫисене малтанхи тапхӑрта тупса палӑртмалли кун ирттерӗҫ. Ҫынсем ҫав кун онкологпа ятарлӑ направленисӗр тӗл пулса калаҫма пултарӗҫ.
Йышӑну ирхи 8 сехетрен пуҫласа 14 сехетчен пулӗ. Пациентсемпе Елена Колчина тата Дмитрий Кононцев консультаци ирттерӗҫ.
Ҫак тухтӑрсем патне лекес тесен электронлӑ регистратура урлӑ ҫырӑнма май пур. Республикӑри клиника онкодиспансерӗ Шупашкарти Гладков урамӗнчи 31-мӗш ҫуртра вырнаҫнӑ.
Кӑҫал Шупашкарти Мускав районӗнче тӑххӑрмӗш ача пульницӑра мар, килте ҫуралнӑ. Ҫут тӗнчене килнӗ пепкене ЗАГС пайӗнче регистрациленӗ.
Ача килте ҫуралнине ашшӗ тата унпа пӗрле килнӗ кӳнтелен ҫирӗплетнӗ. Арҫын ача, ҫемьери пӗрремӗш пепке, авӑн уйӑхӗн 4-мӗшӗнче кун ҫути пурнӑ. Ҫакна кӳнтелен те ҫирӗплетнӗ.
Ашшӗ-амӑшӗ хӑйсен пӗрремӗш пепкине Тимур ят панӑ.
Шупашкарти 24-мӗш шкул РФ Ҫутӗҫ министерствин грантне ҫӗнсе илнӗ. Сахал мар – 5,8 миллион тенкӗ.
Ленин проспектӗнче вырнаҫнӗ шкул конкурса «Шкул класӗнчен – ӗҫ вырӑнне» проект тӑратнӑ. Гранта «Цифра экономики валли кадрсем» федераци проекчӗпе килӗшӳллӗн тивӗҫнӗ.
24-мӗш шкулта «Коллабораци» цифра шкулне йӗркелеме палӑртнӑ. Унта инноваци цифра пронстранствине виҫӗ енпе пуҫарма палӑртнӑ: «Математика», «Технологи», «Информатика». Лабораторисене пӗр стильпе тӑвӗҫ.
Чӑваш Енри икӗ районпа хула гранта тивӗҫнӗ. 5 миллион тенке виҫҫӗшне пайласа парӗҫ. Постановлени проектне паян ЧР Министрсен Кабинечӗн ларӑвӗнче пӑхса тухнӑ.
Шупашкар хули 2 миллион та 202 пин тенкӗ гранта тивӗҫнӗ. Районсен хушшинче вара Елчӗк тата Вӑрнар районӗсем телейлисен йышне лекнӗ. Елчӗк районне – 1 миллион та 578 пин тенкӗ, Вӑрнар районне 1 миллион тенкӗ те 220 пин тенкӗ уйӑрса парӗҫ.
Палӑртмалла: ку гранта муниципалитетсене ахальтен памаҫҫӗ. Вӗсем пӗлтӗр вырӑнти хӑйтытӑмлӑх органӗсен ӗҫ-хӗлӗнче чи лайӑх кӑтартупа палӑрнӑ.
«Халӑх участковӑйӗ» конкурс пуҫланнӑ. Вӑл яланхи пекех виҫӗ тапхӑрпа иртӗ. Кашнинчех онлайн-сасӑлав пулӗ.
Пӗрремӗш тапхӑрта чи лайӑх участковӑйсене шалти ӗҫсен органӗсен территори сайтӗнче палӑртӗҫ. Иккӗмӗш тапхӑрта, юпан 7-26-мӗшӗсенче, регион шайӗнчи ҫӗнтерӳҫе суйлӗҫ. Виҫҫӗмӗш тапхӑр чӳк уйӑхӗн 1-10-мӗшӗсенче иртӗ. Раҫҫей шайӗнчи тапхӑра кашни регионтан пӗрер участковӑй хутшӑнӗ.
Палӑртмалла: пӗлтӗр республика чысне Шупашкарти 1-мӗш полици пайӗн майорӗ Леонид Сазонов хӳтӗленӗ. Тӗп хулари 4-мӗш полици уйрӑмӗн участковӑй Эдуард Мышов темиҫе балл ҫеҫ пухса ҫитереймен. Вӑл кӑҫал та конкурса хутшӑнӗ. Сӑмах май, вӑл 2017 ҫулта 15 кушака выҫӑ вилесрен ҫӑлнӑ. Лешсем темле майпа мусоропроводӑн ҫӑрапа питӗрнӗ шахтине лекнӗ.
Шупашкарти пӗр урама истори ӑслӑлӑхӗсен докторӗн Василий Димитриевӑн ячӗпе хисеплеме сӗннӗ. Ку шухӑша Чӑваш патшалӑх гуманитари ӑслӑлӑхӗсен институчӗ пӗлтернӗ.
Шупашкар хула администрацийӗ «Уҫӑ хула» порталта сасӑлав ирттерет. Унта эсир те хӑвӑрӑн шухӑша пӗлтерме пултаратӑр. Хальлӗхе сасӑлава 916 ҫын хутшӑннӑ, вӗсенчен 794-шӗ ку шухӑша ырланӑ.
Василий Димитриев 300 ытла ӑслӑлӑх ӗҫӗсен авторӗ. Вӗсен йышӗнче – 19 монографи, 14 брошюра. Вӑл 2013 ҫулта пурнӑҫран уйрӑлнӑ, 89 ҫулта пулнӑ.
«Коммерсант» хаҫат пӗлтернӗ тӑрӑх, Чӑваш Енри икӗ спортсмен Пензӑри марафона хутшӑнса 500-шер пин тенке тивӗҫнӗ. Сӑмах май, ку марафон виҫҫӗмӗш хут иртнӗ.
Авӑн уйӑхӗн 8-мӗшӗнче Перьмре иртнӗ пӗтӗм тӗнчери марафона Шупашкарти Александр Новиков хутшӑнса абсолютлӑ чемпион ятне тивӗҫнӗ. Вӑл 42 ҫухрӑма 2 сехет те 20 минут та 17 ҫеккунтра парӑнтарнӑ.
Хӗрарамсен йышӗнче те Шупашкар спортсменки ҫӗнтернӗ. Вӑрмар районӗн хӗрӗ, Олимп вӑййисен призерӗ Татьяна Архипова ҫак дистанцие 2 сехет те 30 минут та 4 ҫеккунтра парӑнтарнӑ. Вӑл хӗрарӑмсен йышӗнче сезонри чи лайӑх кӑтартупа палӑрнӑ.
Пӗлетӗр ӗнтӗ: ЧР Элтеперӗ Михаил Игнатьев Инстаграмра хӑйӗн страницине тытса пырать. Страницӑна пӑхса тӑракансем нумай. Ҫынсем унта Элтепер патне тӗрлӗ ыйтпу ҫырса яраҫҫӗ. Ҫамрӑк мӑшӑр вара хӑйсене туйпа саламлама ыйтнӑ.
Михаил Игнатьев ҫак ҫамрӑксен ӗмӗтне пурнӑҫланӑ: туй кунхине, аванӑн 7-мӗшӗнче, хӗрпе каччӑ Правительство ҫуртӗнче, 17-мӗш хутра, пулнӑ, Элтеперпе сӑн ӳкерӗннӗ. Михаил Васильевич вӗсеме калаҫнӑ, ҫемье ҫавӑрнӑ ятпа саламланӑ.
Шупашкарӑн ҫуралнӑ кунӗнче вара Элтепер хулара пурӑнакан Петр Корняковӑн ӗмӗтне пурнӑҫланӑ. Вӑл «Вӗршӗнсем» пилотаж ушкӑнӗпе тӗл пулма ӗмӗтленнӗ-мӗн.
«Халӑх тетелӗсенче пирӗн #мечтыдолжнысбываться хештегпа акци пуҫланнӑ. Эпир Чӑваш Енре пурӑнакансен ырӑ ӗмӗчӗсене пурнӑҫлатпӑр», - ҫапла пӗлтернӗ Элтеперӗн пресс-секретарӗ Олег Сидоров.
Ҫурла уйӑхӗн 29-мӗшӗнчен пуҫласа авӑнӑн 4-мӗшӗччен республикӑра 71 ҫын сӑвӑс кӗрсе ларнӑран пулӑшу ыйтма килнӗ. Вӗсенчен 18-шӗ – ачасем. Кун пирки Роспотребнадзорӑн Чӑваш Енри управленийӗ пӗлтерет.
Ведомство пресс-служби хыпарланӑ тӑрӑх, ҫынсенчен кӑларнӑ 178 сӑвӑса тӗпченӗ. Тӑваттӑшӗнче энцефалит вирусне тупнӑ, тӑхӑрӑшӗнче – боррелиоз.
Палӑртмалла: кӑҫал пӗтӗмпе 1872 ҫын сӑвӑс кӗрсе ларсан пульницӑна пулӑшу ыйтма пынӑ. Вӗсенчен 909-шӗ – Шупашкар ҫыннисем. Асӑрханӑр: сӑвӑссем халӗ те пур.
Ҫитес вӑхӑтра кашни шӑматкун, авӑн уйӑхӗн 14, 21 тата 28-мӗшӗсенче Шупашкарта «Хула чӗри» туризм маршручӗпе экскурсисем ирттерӗҫ. Унта хутшӑнакансен хулари паллӑ вырӑнсемпе паллаштарӗҫ, вӗсен историне каласа кӑтартӗҫ. Ку йӑлтах - тӳлевсӗр.
Экускурсисене 10 ҫын е ытларах пухӑнсан ирттерӗҫ. Хула тӑрӑх ҫуранах утма тивӗ. Малтан Хӗрлӗ тӳремре Контсантин Иванов палӑкӗ патӗнче пухӑнӗҫ. Палӑртнӑ вӑхӑт: кӑнтӑрлахи 12 сехет.
Экскурсие ҫак номерсемпе шӑнкӑравласа ҫырӑнма пулать: (8352) 23-20-30, 23-20-32. Е tic-cheb@mail.ru электрон почтӑна «экскурси» тесе палӑртса заявка ямалла.
-2.7 °C