Ҫулталӑк вӗҫлениччен Шупашкарти Хусанкай ячӗллӗ культура керменне юсаса ҫӗнетӗҫ. Ӗҫе раштав уйӑхӗн 30-мӗшӗччен вӗҫлемелле.
Халӗ унта юсав ӗҫӗсем пыраҫҫӗ ӗнтӗ. Подрядчик тӗп алӑк патӗнчи стенана ҫӗнетет. Ҫавӑн пекех фасада юсаҫҫӗ. Хальлӗхе тӳре-шаран ыйтусем ҫук, ӗҫсен ҫуррине вӗҫленӗ. Объекта Шупашкар хула администрцийӗн пуҫлӑхӗ Алексей Ладыков ҫитсе курнӑ, ӗҫпе кӑмӑллӑ юлнӑ.
«Премьер» тулли мар яваплӑ общество юсав ӗҫӗсене пурнӑҫлама 57,5 млн тенкӗлӗх клӗшӳ алӑ пуснӑ.
Раштав уйӑхӗн 4-мӗшӗнче Шупашкарта кӗслеҫӗсен фестивалӗ иртет. Кӑшӑлвируса пула ӑна онлайн тата офлайн форматпа йӗркелеҫҫӗ.
Кӑҫал фестиваль Чӑваш автономи облаҫне йӗркеленӗренпе 100 ҫул ҫитнине халаллӗҫ. Палӑртмалла: ӑна пӗрремӗш хут 16 ҫул каялла ирттернӗ.
Фестиваль савӑнӑҫлӑ лару-тӑрура уҫӑлӗ, унтан пултарлӑх ушкӑнӗсем концерт кӑтартӗҫ, ӑсталӑх класӗсем иртӗҫ. Ҫавӑн пекех курав тата ҫавра сӗтел йӗркелӗҫ. Вӗсенче кӗслене кӑна мар, халӑхӑн ытти инструментне те сӳтсе явӗҫ.
Шупашкар хулинчи Ярославль урамӗнчи ҫуртсенчен пӗрин ҫывӑхӗнчи пӗчӗк вӑрманта ача виллине тупнӑ. Тин ҫеҫ ҫуралнӑскере полиэтилен хутаҫа чикнӗ. Ача виллине асӑрханӑ вырӑна пакунлисем васкаса ҫитнӗ.
РФ Следстви комитечӗн Чӑваш Енри управленийӗнче пӗлтернӗ тӑрӑх, тин ҫеҫ ҫут тӗнчене килнӗ хӗрачана амӑшӗ наушник пӑралукӗпе пӑвса вӗлернӗ.
Пӗчӗк ачана вӗлернине пӗлсен тӗпчевҫӗсем пуҫиле ӗҫ пуҫарнӑ. Халӗ вӗсем хӗрарӑма шыраҫҫӗ. Хӑй тӗпренчӗкӗ ҫине алӑ хума хӑйнӑ амӑшне пӗлекенсене йӗрке хуралҫисемпе ҫыхӑнма сӗнеҫҫӗ.
Чӑваш патшалӑх оперӑпа балет театрӗн тӗп художникӗ Валентин Федоров кӑ,алхи утӑ уйӑхӗн 2-мӗшӗнче 60 ҫул тултарнине эпир пӗлтернӗччӗ. Юбилее театрта ӗнер паллӑ тунӑ. Унта Петр Чайковскин «Спящая красавица» балетне кӑтартнӑ.
Художник тӗрлӗ жанрлӑ (опера, балет, оперетта, мюзикл, драма спектаклӗ, концерт) ӗҫсене илемлетнӗ. Вӗсене Мускаври, Ҫӗнҫӗпӗрти, Курскри, Екатеринбургри, Чулхулари, Улан-Удэри, Аҫтӑрханти, Кемӗрти, Шупашкарти ҫеҫ мар, Америкӑри Пӗрлешӳллӗ Штатсенчи сценӑсем ҫинче лартнӑ. Ӳнер ӑстисем каланӑ тӑрӑх, «Спящая красавица» балет художникӑн ҫапах та чи вӑйлӑ ӗҫӗсенчен пӗри шутланать. Унпа Пӗтӗм тӗнчери XX балет фестивальне уҫнӑ.
Шупашкарти Хӗрлӗ тӳремре йывӑҫ-тӗм лартма тытӑннӑ. Республикӑн Ҫутҫанталӑк ресурсӗсен тата экологи министерствинче пӗлтернӗ тӑрӑх, Хӗрлӗ тӳремре ҫӑка, хӑва, шурӑ сирень тата ыттисем ӳсӗҫ. Кӗркунне лартмалли йывӑҫ-тӗмсене халех лартнӑ.
Йывӑҫ лартма Чӑваш Ен Элтеперӗ Олег Николаев та хутшӑннӑ. Вӑл тата хулари тӳре-шара юман лартнӑ.
«Юман – республика элемӗ, ӑна герб ҫине ӳкерсе хунӑ. Раҫҫейри чи паллӑ йывӑҫ пирӗн тӑрӑхра ӳсет. Юманпа тӗрлӗ халап ҫыхӑннӑ. Республикӑн Хӗрлӗ тӳремӗнче ӑна лартни ытахальтен мар», – тенӗ Олег Николаев.
Шупашкарта халӑх йышлӑ вырӑнсенче маска тӑхӑнман, кӑшӑлвирусран хӳтӗленмелли правилӑсене пӑхӑнман ҫынсене штрафлаҫҫӗ.
Л.И. Арапова уйрӑм усламҫӑн «Красотка» парикмахерскийӗнче ҫӳҫ касакансен ӳт температурине виҫменнине тупса палӑртнӑ. Пӳлӗме сиенсӗрлетнине те унта ҫырса пыман. Т.Г. Петровская усламҫӑн «Акуна Матата» ача-пӑча канӑвӗн центрӗнче ҫынсен пӗр-пӗринпе юнашар тӑма юраманнине асӑрхаттаракан паллӑсем пулман.
«Не Горюй» кафе хуҫисем те йӗркене пӑхӑнман.
Общество транспорчӗн чарӑнӑвӗнче маскӑсӑр ҫынна тытса чарса акт ҫырнӑ.
Шупашкар хулинчи Калинин районӗнчи ЗАГСра ачасене епле ят панине эрнесерен тишкереҫҫӗ.
Иртнӗ эрнере ҫутӑ тӗнчене килнӗ пепкесенчен пӗрне чӑвашла ят хунӑ. Арҫын ачана Атнер тесе чӗнӗҫ.
Сайра тӗл пулакан ятсенчен ЗАГС ӗҫченӗсем ҫавӑн пекех Агата, Злата тата Алисия ятсене асӑннӑ. Ачасенчен чылайӑшӗ тулли ҫемьере ҫуралнӑ.
Сӑмах май, иртнӗ эрнере ҫут тӗнчене хӗрачасем нумайрах килнӗ: Калинин районӗнче 27 хӗрачапа 20 арҫын ача ҫуралнӑ. Хула ҫыннисем ывӑлӗсем валли ытларах чухне Кирилл, Максим, Павел, Тимофей ятсем суйланӑ, хӗрӗсем валли – Александра, Виктория, Ксения тата Эмилия.
Шупашкар хулин хисеплӗ ҫыннине Роберт Ильяноя орденпа чысланӑ. Хушӑва Чӑваш Республикин Элтеперӗ Олег Николаев чӳк уйӑхӗн 5-мӗшӗнче алӑ пуснӑ.
Роберт Ильяной нумаях пулмасть 90 ҫул тултарнӑ. Вӑл 1930 ҫулта Ставрополь облаҫӗнчи Минеральные Воды хулинче ҫуралнӑ. Ремесла училищинче, Мускаври инженерипе строительство институтӗнче вӗреннӗ. Чӑваш Республикине ӑна 1958 ҫулта чӗнсе илнӗ. Чӑваш обкомӗнче строительство пайне ертсе пынӑ, Шупашкарта хула ӗҫтӑвкомӗнче ӗҫленӗ, 1982-1995 ҫулсенче – жилкомхоз министрӗнче.
Юбиляра «Чӑваш Республики умӗнчи тава тивӗҫлӗ ӗҫсемшӗн» орденпа чысланӑ.
Шупашкар хулинче Урамри баскетболӑн пӗтӗм тӗнче шайӗнчи центр тӑвасшӑн. Ӑна кредит учрежденийӗсенчен пӗрин, «Промсвязьбанкӑн», «ПСБ – детям» (чӑв. ПСБ – ачасем валли) Пӗтӗм Раҫҫейри спорт проекчӗпе килӗшӳллӗн тума хатӗр.
Нумаях пулмасть республикӑн Правительство ҫуртӗнче Олег Николаев Элтепер тата РФ Патшалӑх Думин финанс рынокӗ енӗпе ӗҫлекен комитечӗн ертӳҫи Анатолий Аксаков «Промсвязьбанк» председателӗпе Петр Фрадковпа тӗл пулнӑ.
Кредит учрежденийӗ республикӑри инвестици проекчӗсене укҫа хывма хатӗррине пӗлтернӗ. Унсӑр пуҫне вӑл ҫӑмӑллӑхлӑ ипотека парасси пирки те шухӑшласа пӑхма хатӗр.
Чӳк уйӑхӗн 7-мӗшӗнче республикӑри икӗ ҫын ултавҫӑсене 500 пин тенкӗ ытла куҫарса панӑ. Шел те, хӑйсемпе банк ӗҫченӗ тесе паллаштарнӑ ҫынсене халӗ те ӗненеҫҫӗ, вӗсен вӑлтине ҫакланаҫҫӗ.
Шупашкарти 30 ҫулти хӗрарӑм тата Шупашкар районӗнчи 47-ри арҫын та ҫак мелпех улталаннӑ. Вӗсем патне хӑйсемпе банк ӗҫченӗ тесе паллаштарнӑ ҫынсем шӑнкӑравланӑ, карточкисем ҫинче иккӗленӳллӗ операци пулнине пӗлтернӗ. Укҫа ҫухаласран сыхланас тесен нухрата резерв счет ҫине куҫарма сӗннӗ.
30-ти хӗрарӑм 124 пин тенкӗсӗр юлнӑ. Арҫын вара ултавҫӑсене 400 пин тенкӗ куҫарса панӑ. Ку тӗслӗхсем тӗлӗшпе пуҫиле ӗҫ пуҫарнӑ.
-4.7 °C