ШӖМ тунӑ сӑн

Шупашкарти хӗрарӑм банк карттине ҫухатнӑ. Ӑна вара 51 ҫулти арҫын тупнӑ. Анчах арҫын карттӑна тавӑрса пама шутламан та – унти укҫапа вӑл 4 кун лавккана йӑркканӑ.

Ҫав кунсенче арҫын 12 пин тенке яхӑн тӑкаклама ӗлкӗрнӗ. Хӑй ӑнлантарнӑ тӑрӑх, ытларах вӑл ют ҫын укҫи-тенкипе эрех туяннӑ.

Тытса чарнӑ чухне арҫын ҫумӗнче хӗрарӑмӑн карттине тупнӑ. Вӑрланӑ тесе ун тӗлӗшпе пуҫиле ӗҫ пуҫарнӑ. Шар курнӑ хӗрарӑмӑн тӑкакне саплаштарас тесе йӗрке хуралҫисем унӑн телевизорне конфискациленӗ.

Шупашкарта 12 ҫулти арҫын ача ҫемье укҫи-тенкине ҫӑлас тесе... ултавҫӑсене 175 пин тенкӗ куҫарса панӑ.

5-мӗш класра вӗренекен арҫын ача патне мессенджерта палламан ҫын ҫырнӑ, ашшӗ-амӑшӗн укҫине ҫӑлмалла тесе ӗнентернӗ. Вӑл килте укҫа ӑҫта упраннине пӗлнӗ. Ҫав вырӑнтан укҫана илнӗ те накама ним каламасӑр ҫывӑхри банкомата кайнӑ, унта палламан ҫын каласа тӑнипе 175 пин тенке «хӑрушсӑр счет» ҫине куҫарнӑ.

Ҫакна пурнӑҫласанах мессенджерта ҫырӑнни хуралнӑ. Арҫын ачан кун пирки амӑшне каласа пама тивнӗ.

Ку тӗслӗх тӗлӗшпе пуҫиле ӗҫ пуҫарнӑ.

Прокуратура архивӗнчи сӑн

Шупашкарти Калинин районӗн прокуратури Шупашкарти ЖКХ тата тирпей-хӑтлӑх управленийӗпе, «Халӑх фрончӗ» общество юхӑмӗпе пӗрле ҫӳп-ҫапа контейнерӗсене мӗнле тытнине тӗрӗсленӗ.

Тӗрӗслев вӑхӑтӗнче нумай ҫитменлӗх тупса палӑртнӑ: ҫӳп-ҫапа пуҫтарман, вӑхӑтра илсе тухман. Кун пек тӗслӗхсене «Ҫӗнӗ хула» микрорайонта, Шумилов, Р.Зорге, Кадыков урамӗсенче, Эгер бульварӗнче тупса палӑртнӑ.

Ҫӳп-ҫап илсе тухассишӗн яваплӑ организацисене должноҫри ҫынсем тӗлӗшпе административлӑ ӗҫсем пуҫарнӑ.

ast.mk.ru сайтри сӑн

Шупашкарта студенткӑна банкомат умӗнчех ҫаратса кайнӑ.

Ку нарӑс уйӑхӗн 12-мӗшӗнче Шупашкарти суту-илӳ ҫуртӗнче пулса иртнӗ. 16 ҫулти хӗр банкомат патне пырса 95 пин тенкӗ илнӗ. Хайхискер телефон туянасшӑн пулнӑ иккен.

Анчах... Укҫана алла тытнӑ кӑна – хыҫалта тӑракан арҫын 95 пин тенке туртса илнӗ те тарнӑ. Хӗр ун хыҫҫӑн чупнӑ, анчах хӑваласа ҫитеймен. Ҫапла унӑн полицие кайма тивнӗ.

Полицейскисем кеҫех вӑрра, 30 ҫулти арҫынна, тытнӑ. Ун тӗлӗшпе пуҫиле ӗҫ пуҫарнӑ.

cap.ru сайтри сӑн

Ҫӗнӗ Шупашкарта ҫурт тӑррин пӗр пайӗ йӑтӑнса аннӑ. Каллех – юр йывӑрӑшне пула. Ку Энергетиксен тӑкӑрлӑкӗнчи 5-мӗш ҫуртра пулнӑ.

Ҫурт 1971 ҫулта хута янӑскер. Вырӑнта комисси тӗрӗслевӗ ирттернӗ. Инкеклӗ лару-тӑру министерствин ӗҫченӗсем те ҫитнӗ.

Сӑмах май, кун пекки спутник хулара унччен те пулнӑ. Иртнӗ канмалли кунсенче Силикат урамӗнчи 12-мӗш ҫурт тӑрри йӑтӑнса аннӑ.

Ҫанталӑк ӑшӑтсан Шупашкарти Хевеш урамӗнчи 7-мӗш ҫуртра пурӑнакансем шар курма тытӑннӑ.

Ку ҫурт тӑрринчен шыв анма пуҫланӑ. Унта пурӑнакансем каланӑ тӑрӑх, шыв фасад тӑрӑх кӑна юхмасть, вӑл подъезда та кӗрет – стенасем йӗпенеҫҫӗ, маччаран шыв тумлать. Нӳрӗке пула электропралук тата шалти отделка сиенленесрен хӑраҫҫӗ ҫынсем.

cap.ru сайтри сӑн

Шупашкарти Хӗвелтухӑҫ поселокӗнчи нумай хваттерлӗ ҫуртӑн тӑррин пӗр пайӗ юр йывӑрӑшне чӑтаймасӑр йӑтӑнса аннӑ.

Ҫак 20-мӗш ҫурта «Текстильщик» УК пӑхса тӑрать. Шупашкар пуҫлӑхӗ вырӑна ҫитсе курнӑ. Кун хыҫҫӑн телеграм-каналӗнче ҫапла пӗлтернӗ: тӑрӑ йӑтӑнса ансан ӑшӑтмалли тытӑм сиенленнӗ, ҫавна май пӗр подъезд ӑшӑсӑр тӑрса юлнӑ.

Халӗ ҫурт тӑррине юсассине тӗрӗслесе тӑрӗҫ.

uchiprof.ru сайтри сӑн

Шупашкарти тухтӑр, 67-ри хӗрарӑм, ултавҫӑсене 3 млн тенкӗ ытла куҫарса панӑ.

Ӑна полицейскисем, банк ӗҫченӗсем, ӗҫтешӗсем укҫа куҫармалла мар тесе ӳкӗте кӗртме тӑрӑшнӑ. Анчах вӑл никама та итлемен. Ывӑлне кун пирки пӗр уйӑхран кӑна каласа кӑтартнӑ. Кун хыҫҫӑн ывӑлӗ ҫине тӑрса ӑна полицие кайма ыйтнӑ. Тинех килӗшнӗ вӑл.

Акӑ мӗн пулса иртнӗ: хӗрарӑм патне «пенси фончӗн ӗҫченӗсем», «Роскомнадзор, ФСБ, Тӗп банк ӗҫченӗсем» пӗр вӗҫӗм шӑнкӑравланӑ, ултавҫӑсем унӑн укҫине Укаринӑна пулӑшма ярасшӑн тесе хӑратса пӗтернӗ, счет ҫинчи пухнӑ укҫине, пӗлӗшӗсенчен кивҫен илсе йӑлтах «резерв фонда» куҫарма хушнӑ.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта паян ҫӑкӑр пӗҫернӗ. Тӗрӗссипе каласан, ку вӑл психолог унта ӗҫлекенсемпе ирттернӗ тренингӑн пӗр пайӗ шутланать.

Йывӑрлӑхри хӗрарӑмсене пулӑшакан пай психологӗ Елена Филиппова шухӑшланӑ тӑрӑх, социаллӑ сферӑра ӗҫлекенсен ҫынна пулӑшнипе пӗрлех хӑйсен та вӑй-хал пухма пӗлмелле. Ҫакна тӗрлӗ мелпе тума пулать, ҫав шутра чун киленӗҫӗпе те. Тӗрӗс апатланни те питех те пӗлтерӗшлӗ. Психолог меслечӗпе ҫӑкӑр пӗҫерме вара ӑсталӑх лаҫҫинче хӑнӑхнӑ.

Шупашкарта «В.Н.Тарасов строитель скверӗ» пулӗ. Ҫӗнӗ вырӑна ҫапла ят парасси пирки йышӑнӑва Шупашкар мэрӗ Станислав Трофимов алӑ пуснӑ.

Сквер «Богданкӑра» 8-мӗш микрорайонта пулӗ. Сквера ҫапла ят парассине адрес комиссийӗнче пӑхса тухнӑ, нихӑш пайташ та хирӗҫ пулман.

Хальлӗхе ҫав вырӑнта – уй.