ВКонтакте сӑнӳкерчӗкӗ

Пирӗн республикӑри хӑш-пӗр муниципалитетра ыркӑмӑллӑх центрӗсем ӗҫлеҫҫӗ. Унта ҫынсем хӑйсем унччен тӑхӑннӑ, анчах япӑхса кайман ҫипуҫа илсе пырса параҫҫӗ. Вӗсене хими хатӗрӗсемпе тасатнӑ хыҫҫӑн кирек кам та илсе кайса тӑхӑнма пултарать.

Шупашкарти ыркӑмӑллӑх центрӗсем ҫак адрессемпе вырнаҫнӑ:

1. 139-мӗш стрелоксен урамӗ, 22 («Байкал» суту-илӳ ҫурчӗ, 1-мӗш хут). Ӗҫ графикӗ: ытларикун-эрнекун – 13:00 сехетрен 19:00 сехетчен; шӑматкун – 11:00 сехетрен 16:00 сехетчен.

2. Декабристсен урамӗ, 18А.

Ӗҫ вӑхӑчӗ: ытларикун-эрнекун – 13:00 сехетрен 19:00 сехетчен; шӑматкун – с 11:00 сехетрен 16:00 сехетчен.

3. Энтузиастсен урамӗ, 34-мӗш ҫурт («Москва» (чӑв. Мускав) суту-илӳ центрӗ, 1-мӗш хут).

Ӗҫ вӑхӑчӗ: тунтикун-эрнекун – 11:00 сехетрен 17:00 сехетчен.

4. Шупашкар, И. Яковлев проспекчӗ, 3-мӗш ҫурт («Универ21Маг» суту-илӳ ҫурчӗ, 2-мӗш).

Ӗҫ вӑхӑчӗ: тунтикун-эрнекун – 15:00 сехетчен 19:00 сехетчен.

5. Трактор тӑвакансен проспекчӗ, 73 («Хӗрлӗ хӗрес» организаци).

Ӗҫ вӑхӑчӗ: 08:00 сехетрен пуҫласа 18:00 сехетчен. Телефон номерӗ 89871230814.

Унсӑр пуҫне ыркӑмӑллӑх центрӗсем Ҫӗнӗ Шупашкарпа Шупашкар районӗнче пур.

Малалла...

kanashen.ru сайтри сӑн

Кӑҫал Чӑваш патшалӑх оперӑпа балет театрӗ 62-мӗш ҫуралнӑ кунне паллӑ тӑвать. Унӑн алӑкӗ 1960 ҫулхи ҫу уйӑхӗн 22-мӗшӗнче пӗрремӗш хут уҫӑлнӑ. Ун чухне Федор Васильевӑн "Шывармань" наци оперине лартнӑ.

Ҫуралнӑ кун ячӗпе ыран оперӑпа балет театрӗнче гала-концерт пулӗ. Унта театрӑн опера тата балет, симфони оркестрӗн солисчӗсем хутшӑнӗҫ.

Ку таранччен театрта 160 ытла опера балет, оперетта, мюзикл, ача-пӑча спектаклӗ, юрӑ-кӗвӗ камичӗ лартнӑ.

cap.ru сӑнӳкерчӗкӗ

ЧР Элтеперӗ Олег Николаев пӗлтӗр мӗн чухлӗ ӗҫлесе илнине декларацире кӑтартнӑ.

Документра палӑртнӑ тӑрӑх, Олег Алексеевич 2021 ҫулта 5 миллион та 896 пин тенкӗ ӗҫлесе илнӗ. Виҫӗмҫулхипе танлаштарсан 350 пин тенкӗ ытларах.

Олег Николаевӑн харпӑрлӑхӗнче 1200 тӑваткал метр ҫӗр пур.

Элтеперӗн мӑшӑрӗ декларацире 418 пин те 937 тенкӗ кӑтартнӑ. Унӑн харпӑрлӑхӗнче икӗ ҫӗр лаптӑкӗ, 240 тӑваткал метрлӑ ҫурт пур. Кунсӑр пуҫне Николаевсем декларацире пӗр машина, Хендай, кӑтартнӑ. Вӑл - Наталья Николаевӑн.

Паян "Чӗмпӗрти чӑваш вӗрентекенӗсен шкулӗ. Иван Яковлев хваттерӗ" музейре чӑваш алфавитӗнчи Ӑ саспаллине халалланӑ палӑка уҫнӑ. Ку чӑваш ҫырулӑхӗ пуҫланса кайнӑранпа 150 ҫул ҫитнипе ҫыхӑннӑ.

Палӑка хута ямашкӑн 1,8 миллион тенкӗ кирлӗ пулнӑ. Ӑна халӑх пуҫтарнӑ.

Палӑка уҫнӑ ҫӗре Чӑваш Ен Элтеперӗ Олег Николаев та хутшӑннӑ.

www.chuvbook.ru сӑнӳкерчӗкӗ

Станислав Никоноров (Сатур) поэт кӗнеке хыҫҫӑн кӗнеке кун ҫути кӑтартать. Нумаях пулмасть унӑн тепӗр сӑвӑ пуххийӗ пичетленсе тухнӑ. Вӑл «Кӗр ванчӑкӗ» ятлӑ.

Станислав Сатур 1959 ҫулхи чӳк уйӑхӗн 5-мӗшӗнче Канаш районӗнчи Ушанарта ҫуралнӑ. Ҫӗнӗ Шупашкарти 14-мӗш профессиллӗ техника училищине пӗтернӗ хыҫҫӑн пӗр хушӑ стройкӑра платник-монтажник пулса ӗҫленӗ, ҫар хӗсметӗнче пулнӑ. Тӗрлӗ ҫӗрте вӑй хунӑ. Ӗҫленӗ хушӑрах вӑл хӑйӗн пӗлӗвне И.Н. Ульянов ячӗллӗ Чӑваш патшалӑх университетӗнче, Хусанта зонӑри комсомол шкулӗнче, Мускавра Пӗтӗм Союзри комсомолӑн курсӗнче ӳстернӗ. Ҫав вӑхӑтрах Чӑваш Республикин писательсен союзӗ ҫумӗнчи «Сунтал» литература пӗрлешӗвне ҫӳренӗ. Хальхи вӑхӑтра Мускаври М.В. Фрунзе ячӗллӗ ҫар академийӗнче пушар хӗсметӗнче тӑрать.

gcheb.cap.ru сӑнӳкерчӗкӗ

Шупашкар хула администрацийӗнче тӳре-шара кирлӗ. Кадр резервне кӗртме кандидатсенчен документсене ҫу уйӑхӗн 31-мӗшӗччен йышӑнаҫҫӗ.

Хула администрацийӗн пуҫлӑхӗ Денис Спирин пӗлтернӗ тӑрӑх, резерва лекнӗ ҫынсен кайран муниципалитетри должноҫа йышӑнас шанчӑк пур. Специалистран пуҫласа ертсе пыракан вырӑн таранах.

Кадр резервне кӗмелли вакансисемпе должноҫсен списокӗпе ҫак каҫӑпа http://www.gcheb.cap.ru/vacancies/721e5614-7cad-40bc-86ca-dcfebcffa554 иртсен паллашма пулать.

Чӑваш патшалӑх академи юрӑпа ташӑ ансамблӗ Чӗмпӗрти Акатуя тата унта иртекен Халӑхсен туслӑхӗн кунӗпе саламлама концертпа тухса кайӗ. Уяв ыран, ҫу уйӑхӗн 21-мӗшӗнче, «Винновская роща» культурӑпа кану паркӗнче иртӗ. Акатуй 11 сехетре пуҫланӗ.

Уява Тутарстанри, Оренбург, Чӗмпӗр тата Самар облаҫӗсенчи коллективсем хутшӑнӗҫ.

Чӗмпӗрсем чӑваш Акатуйне кӑҫалхипе 32-мӗш хут пуҫтарӑнаҫҫӗ. Кӑҫалхи ҫав уяв «Чӗмпӗрти учительсен чӑваш шкулӗ. Иван Яковлев хваттерӗ» музей территорийӗнче чӑваш ҫырулӑхӗн палӑкне уҫнипе пӗр килӗ.

forum.zarulem.ws сӑнӳкерчӗкӗ

Чӑваш Енӗн Элтеперӗн Администрацийӗ 6 миллион тенкӗ тӑракан кроссовер туянасшӑн.

«Hyundai Palisade» автомобилӗн пуҫламӑш хакӗ 6,29 млн тенкӗ тӑрать. Ку хакпа тулли приводлӑ хура кроссовер, дизель двигателӗллӗ автомбиль илесшӗн. Тӳре-шара машинӑра 7 вырӑн, 3 рет пултӑр тесе ӗмӗтленет.

«Руль умӗнче» порталта пӗлтернӗ тӑрӑх, ҫулталӑк ҫурӑ каялла Чӑваш Ен Элтеперӗн Администрацийӗн гаражӗ 3,2 миллион тенкӗ парса «Genesis G-80» автомобиль туяннӑ, ӑна полпреда турттарма Мускава ӑсатнӑ. Республика ертӳҫи Олег Николаев хальхи вӑхӑтра «Genesis G-90» машинӑпа ҫӳрет. Ӑна «Ипотека корпорацийӗ» туяннӑ, ӑна вӑл тӳре-шарана усӑ курма арендӑна панӑ.

sunhome.ru сайтри сӑн

Ашшӗне вӗлерсе ӑна вакласа шыва пенӗ ҫынна суд тунӑ. Ӗҫ-пуҫ мӗнле пулса иртни тинех уҫӑмланнӑ.

2020 ҫулхи чӳк уйӑхӗн 8-мӗшӗнче ҫамрӑк арҫын ашшӗпе хирӗҫсе кайнӑ та ӑна аптӑрипе темиҫе хут чикнӗ. Лешӗ вилнӗ. Хайхискер вилле пӑчкӑпа касса вакланӑ, кашни пайне полимер хутаҫа чикнӗ те вӗсене Шупашкар районӗнчи пӗве патне виҫӗ кун турттарнӑ. Унта вӑл общество транспорчӗпе ҫитнӗ.

Пӗве хӗрринче вӑл хутаҫ ҫумне тимӗр-тӑмӑр ҫыхнӑ та путарнӑ. Йӗр ҫухалтӑр тесе ашшӗн телефонне «Шупашкар – Мускав» маршрутпа ҫӳрекен пуйӑса кайса пӑрахнӑ, ашшӗ шапаша кайнӑ тесе ҫӳренӗ.

Ҫулталӑкран пӗвери виле пайӗсене тупнӑ. Ывӑлне тискер преступленишӗн 10 ҫуллӑха тӗрмене хупнӑ.

salsknews.ru сайтри сӑн

Ҫу уйӑхӗн 17-мӗшӗнче ҫур ҫӗрте Шупашкарта пӗччен пурӑнакан хӗрарӑм васкавлӑ медпулӑшӑва шӑнкӑравланӑ. Вӑл диспетчерпа калаҫнӑ хушӑрах тӑнне ҫухатма пуҫланӑ.

Фельдшерсем 6 минутран ҫитнӗ. Анчах хӗрарӑм патне тӳрех кӗреймен, домофон пулман. Вӗсем кӗриччен пациентӑн чӗри чарӑнса ларнӑ, унӑн клиника вилӗмӗ пулнӑ.

Ҫав вӑхӑтрах хыҫран реанимаци бригади ҫитнӗ. Фельдшерсем чӗрине массаж тунӑ, искусствӗннӑй майпа сывлаттарнӑ. Юрать, тухтӑрсем ӑна тӑна кӗртме пултарнӑ. Халӗ хӗрарӑм пульницӑра.