Тӗнче тетелӗнче Петр Краснов депутат "Хыпар" Издательство ҫуртне тапӑннине хӗрӳ сӳтсе яваҫҫӗ. Ку ӑнланманлӑх тахҫанах сиксе тухнӑ-мӗн, "Хыпар" ертӳлӗхӗ ӑна обществӑна кӑларман кӑна.

"Эпир, "хыпарҫӑсем", ку ыйтӑва обществӑна кӑларасшӑн марччӗ. Анчах депутат унччен, 3 ҫул, ҫыру ҫырса ӑнлантарма, тӗрӗслевсем пуҫарма ыйтнӑ пулсан халӗ ҫынсен умӗнче республика прокуратурине "Хыпар" тӗлӗшпе пуҫиле ӗҫсем пуҫарма ыйтни патне ҫитрӗ", - ҫапла ҫырнӑ Издательство ҫурчӗ Телеграмра тытса пыракан "Хыпар - Вести Чувашии" каналта. Ҫине-ҫине тӗрӗслевсем пулни кулленхи ӗҫе йӗркелесе пыма чӑрмантарнине палӑртнӑ унта.

Нумаях пулмасть Патшалӑх Канашӗн сессийӗнче Петр Краснов депутат каллех (вӑл кашни сессирех "Хыпар" пирки япӑх калаҫать-мӗн) трибуна умне тухса хаҫата "ислетнӗ", прокуратурӑна 6 пуҫиле ӗҫ пуҫарма ыйтнӑ. Кунсӑр пуҫне пӗтӗм депутат умӗнче вӑл Издательство ҫурчӗн директорӗ-тӗп редакторӗ Татьяна Вашуркина пирки каланӑ чухне ӑна "эта дамочка" тенӗ. Ҫак видеопа ку хыпара илнӗ ҫӑлкуҫра паллашма пулать.

cheb-centr.soc.cap.ru сайтран илнӗ сӑнӳкерчӗк

Халӗ Шупашкарта пурӑнакан вулавӑш ӗҫӗн ветеранӗ Евдокия Тихонова юратнӑ ӗҫӗнче виҫӗ теҫетке ҫула яхӑн тӑрӑшнӑ. Пӗтӗм Раҫҫейри библиотекӑсен кунӗ (ӑна ҫу уйӑхӗн 27-мӗшӗнче палӑртаҫҫӗ) апла пулсан уншӑн та уяв.

Евдокия Тихоновна кӗнеке вулама ачаранпах юратнӑ. Ҫавӑнпах вӑл ӗҫне те вулавӑшпа ҫыхӑнтарнӑ. 1968 ҫулта Муркаш районӗнчи Тойкилтри вулавӑшра ӗҫлеме тытӑннӑ. Ҫав вӑхӑтра библиотека фончӗ палӑрмаллах ӳснӗ. Вулавӑш валли тимӗр ҫӳлӗксем, ҫӗнӗ сӗтел-пукан вырнаҫтарса тухнӑ. Ҫынсем вулавӑша йышлӑн ҫӳреме тытӑннӑ. Библиотекӑра ирттерекен мӗнпур мероприятие вырӑнти тӳре-шарапа шкулта ӗҫлекенсемпе вӗренекенсем хутшӑннӑ.

Кинемей паян та кӗнекесӗр лармасть. Хӑйне пӑхакан социаллӑ ӗҫчене вӑл яланах кӗнеке илсе пырса пама ыйтать.

Улатӑр районӗнчи Иваньково-Ленино ялӗнчи палӑк-самолета хӑтлӑлатӗҫ. Ҫавӑнпа ятарласа аукцион ирттереҫҫӗ. Ку ӗҫшӗн 999 пин те 997,93 тенкӗ тӳлеме хатӗр.

Подрядчикӑн фюзеляж геометрине йӗркене кӗртмелле, чӳречесем тата алӑксем вырнаҫтармалла, самолета сӑрламалла, ҫутӑ тата видеосӑнав вырнаҫтармалла. Кунсӑр пуҫне таврари территорие хӑтлӑх кӗртӗҫ.

Аукциона ҫӗртмен 6-мӗшӗнче пӗтӗмлетӗҫ. Ӗҫсене вара ҫурла уйӑхӗн 15-мӗшӗччен вӗҫлемелле.

Палӑртмалла: ҫак Ил-16 самолетпа Тӑван ҫӗршывӑн Аслӑ вӑрҫи хыҫҫӑн чӑваш летчикӗ Федот Орлов вӗҫнӗ.

ЧР прокуратури тунӑ сӑн

Ӗнер Канаш районӗнче 8-9 ҫулсенчи 3 хӗрача шыва путса вилнӗ. Кун пирки РФ Следстви комитечӗн Чӑваш Енри управленийӗ хыпарлать.

Вӗсем кӑнтӑрла Шӑхасан ялӗнчен инҫех мар юхса выртакан Кӗҫӗн Ҫавала шыва кӗме кайнӑ. Каҫхине хӗрачасен виллисене ҫыран хӗррине кӑларнӑ. Вӗсен кӗлетки ҫинче криминал йӗрӗ ҫук. Тумтирӗ, харпӑр япалисем тата телефонӗсем ҫыран хӗрринчех пулнӑ.

Вырӑна оперативлӑ следстви ушкӑнӗ ҫитнӗ. Халӗ ӗҫ-пуҫа уҫӑмлатаҫҫӗ.

cap.ru сӑнӳкерчӗкӗ

Чӑваш Енре ӗҫлесе пурӑнакан тата тепӗр темиҫе ҫынна тава тивӗҫлӗ ятсем панӑ.

Элӗк районӗнчи тӗп клуб тытӑмӗнчи халӑх театрӗн режиссёрне Инна Афанасьевӑна тата Шупашкарти ача-пӑча ӳнерӗн 1-мӗш шкулӗн преподавательне Ольга Рудаковӑна «Чӑваш Республикин культурӑн тава тивӗҫлӗ ӗҫченӗ» хисеплӗ ят пама йышӑннӑ. Хушӑва республика Элтеперӗ Олег Николаев ҫу уйӑхӗн 25-мӗшӗнче алӑ пуснӑ.

Элӗкри халӑх театрӗ пирки темиҫе сӑмахпа та пулин тӗплӗнрех пӗлтерес килет. Асӑннӑ театра В.И. Волков ятлӑ ҫын 1934 ҫулта пуҫарса янӑ. Хӑй тӗллӗн вӗреннӗ атистсем 1968 ҫулта А. Эсхел ӗҫӗ тӑрӑх «Виҫӗ туй» спектакль лартнӑ. Ҫав ҫулах коллектива халӑх ятне панӑ.

2007 ҫултанпа коллектива Инна Афанасьева ертсе пырать. Инна Витальевна Хусанти культура институтӗнче вӗреннӗ.

"На связи" форумри сӑн

Ҫӗртме уйӑхӗ вӗҫлениччен Шупашкарти 35-мӗш маршрутпа ҫӳрекен автобуса «Университет» микрорайона ҫити ярӗҫ. Ҫапла вӑл Миначев урамне ҫитӗ.

Ку маршрут перевозчикӗ автобуса ҫав микрорайона яма 2021 ҫултах ыйтнӑ. Анчах 32-мӗш тата 52-мӗш маршрутсен хуҫисем хирӗҫленипе ыйтӑва тивӗҫтермен. Пӗлтӗр ку ыйтӑва татах ҫӗкленӗ. Хула администрацийӗн пуҫлӑхӗ Денис Спирин тинех документа алӑ пуснӑ. Ҫапла 35-мӗш автобус «Хӗвеллӗ бульвар - Вӑрманлӑх» маршрутпа ҫӳрӗ.

vk.com/gov_cap_ru страницӑран илнӗ скриншот

Чӑваш Енре пурӑнакансем чӑвашла тумланса ҫемье ҫавӑрма кӑмӑллаҫҫӗ. Пурте мар-ха, анчах наци стилӗпе туй ирттерессипе кӑсӑкланакансем пур.

Ун пек туйсенче ҫӗнӗ ҫынсем ҫеҫ мар, хӑнасем те чӑвашла тумланма тӑрӑшаҫҫӗ.

ЗАГС органӗсенче вара чӑваш йӑли-йӗркине пӑхӑнса ҫырӑнтарма тата ҫырӑнтарнипе ҫыхӑннӑ пулӑма чӑвашла йӗркелеме пултараҫҫӗ. Кун пирки республикӑн влаҫ органӗсем халӑх ушкӑнӗсенчи хӑйсен страницисенчен пӗринче пӗлтернӗ.

Сӑмах май каласан, кӑҫалхи пӗрремӗш кварталта пирӗн республикӑра 878 мӑшӑр ҫемье ҫавӑрнӑ. Чи аслӑ каччӑ 89 ҫулта пулнӑ, хӗр – 77-ре. Ҫемье ҫавӑракансен вӑтам ҫулӗ — 24 ҫул.

vk.com/mintrud_21 страницинчен илнӗ сӑнӳкерчӗксем

Кӳкеҫри ачасен интернат-ҫуртӗнче пурӑнакансем «Национальное достояние – 2023» (чӑв. Наци пуянлӑхӗ — 2023) Пӗтӗм тӗнчери телевидени конкурс-фестивалӗнче лауреат ятне ҫӗнсе илнӗ.

Конкурсӑн финалӗ ака уйӑхӗн 28-мӗшӗнчен пуҫласа ҫу уйӑхӗн 1-мӗшӗсенче Шупашкарта иртнӗ. Конкурса хутшӑнакансене Мускаври профессиллӗ тӳресем хакланӑ.

Конкурса хамӑр ҫӗршыври тӗрлӗ регионтан тата ют ҫӗршывсенчен хутшӑннӑ.

Кӳкеҫри ачасен интернат-ҫуртӗнче пурӑнакансем «Ӳнер тата декораципе прикладной пултарулӑх» номинацире хӑйсен тантӑшӗсен хушшинче I степеньлӗ лауреат ятне тата кубока ҫӗнсе илнӗ.

Ольга Крайкина тата Валентина Морышкина сусӑр ачасем Татьяна Афанасьевӑпа Татьяна Харитонова педагогсем ертсе пынипе чӑваш пуканисене ӑсталанӑ, конкурса ҫавӑнпа хутшӑннӑ.

t.me/pro_cheby каналтан илнӗ сӑнӳкерчӗк

Шупашкар хулинче пӗр ӳсӗр арҫын палламан хӗрарӑма вӗлернӗ.

Пӑтӑрмах ҫу уйӑхӗн 20-мӗшӗнчи каҫхине пулса иртнӗ. Ӳсӗр этем хӗрарӑма тапӑннӑ, ӑна тапса та ҫапса пӗтернӗ. Хӗнекен ҫын хӗрхенсе ҫапмасть ҫав ӗнтӗ. Хӗрарӑма вилмеллех хӗненӗ. Шар курни инкек вырӑнӗнчех куҫне ӗмӗрлӗхе хупнӑ.

Усал арҫын вилене Граждан урамӗнчи гаражсем патӗнче пӑрахса хӑварнӑ.

Хӗрарӑма хӗнесе вӗлернӗ тесе шухӑшлакан ҫынна йӗрке хуралҫисем кӑштахран тупса палӑртнӑ, ӑна вӗсем тытса чарнӑ.

Ҫынна вӗлернӗ тӗслӗхпе пуҫарнӑ тӗпчев халӗ малалла пырать.

Телеграмри t.me/pro_cheby канатан илнӗ сӑнӳкерчӗк

Чӑваш Енре пурӑнакансем планетӑсен парадне курайӗҫ. Кун пирки Телеграмри каналсенчен пӗринче, «Чебоксары в курсе» ятлинче, пӗлтернӗ.

Унта хыпарланӑ тӑрӑх, асӑннӑ пулӑм — питех те сайра-хура пулаканскер. Тата тӗрӗсрех каласан, 20 ҫулта пӗрре.

Планетӑсем парада ҫу уйӑхӗн 29-мӗшӗнче тӑрса тухӗҫ. Тӑрса мар-ха. Парада тӑнӑн йӗркипе курӑнӗҫ.

Пӗр йӗр ҫинче ҫав кун Сатурн, Нептун, Юпитер, Меркурий тата Уран курӑнӗ.

Ҫутҫанталӑкри сайра тӗл пулакан пулӑма асӑрхас тесен ятарлӑ хатӗр кирлӗ мар. Планетӑсен парадне нимсӗрех курма май килӗ. Пӑхма манса каймалла мар кӑна.