Ҫурла уйӑхӗн 25-мӗшӗнче Вӑрмар поселокӗнче Совет урамӗнче 15 ҫулти каччӑ мопедпа пынӑ чухне темӗн ҫине кӗрсе кайнӑ. Хӑй аманман. Анчах 14 ҫулти пассажир ӳкнӗ те вилмеллех аманнӑ.

Мопед водителӗ вырӑнтан тарса ҫухалнӑ. Анчах ӑна йӗрке хуралҫисем часах тытса чарнӑ. Аслисем пур чухне унран ку инкек пирки тӗпчесе пӗлнӗ. Ҫакӑ паллӑ: ҫамрӑксем иккӗшӗ те мотошлемсӑр пулнӑ.

pulse.mail.ru сайтри сӑн

«Чечексем вырӑнне - ачасем». Аня Чижова ячӗллӗ ыркӑмӑллӑх фончӗ ҫакнашкал акцие авӑнӑн 1-мӗшӗнче ирттересси йӑлана кӗнӗ. Унпа килешӳллӗн, ачасем вӗрентекене класс ятӗнчен пӗр чечек ҫыххи парнелеҫҫӗ. Перекетленӗ укҫа-тенке вара йывӑр чирпе нушаланакан ачасене сиплеме параҫҫӗ.

Ку акцие ҫултан-ҫул ытларах та ытларах шкул хутшӑнать. Кӑҫал 30 шӑпӑрлана пулӑшма палӑртнӑ. Пӗтӗмпе 2 миллион ытла тенкӗ пухасшӑн. Нимеҫӗсем шкулсем кӑна мар, усламҫӑсем те пулӑшасса шанаҫҫӗ.

Пӗлтӗр акцие Чӑваш Енри 350 класс хутшӑннӑ. Йӗркелӳҫӗсем авӑнӑн 1-мӗшӗнче шкулсенче «Ыркӑмӑллӑх урокӗ» ирттерме сӗнеҫҫӗ. Унта чирлӗ ачасене пулӑшни мӗн тери кирлӗ пулнине каласа кӑтартчӑр.

cap.ru сӑнӳкерчӗкӗ

Чӑваш Енре пурӑнакансем кӑҫал пуҫласа инҫет ҫыхӑну мелӗпе электрон сасӑлава хутшӑнайӗҫ.

Авӑн уйӑхӗн 8-10-мӗшӗсенче Чӑваш Енри 9 муниципалитет пӗрлешӗвӗнче 15 депутата суйламалла.

Сасӑлава 17,5 пин ытла ҫын хутшӑнӗ.

Электрон мелпе ҫав шутран 2,4 пин ытларах ҫын сасӑлама палӑртса хунӑ. Ку вӑл мӗнпур суйлавҫӑн 13,6 проценчӗ пулать.

Сасӑлав электрон мелпе хутшӑнас текенсен заявленине Патшалӑх пулӑшӑвӗсен порталӗнче авӑн уйӑхӗн 4-мӗшӗнчи 24 сехетчен йышӑнӗҫ.

t.me/pro_cheby сӑнӳкерчӗкӗ

Лапсар посёлокӗнче пурӑнакан ҫынсем урамра ҫӳп-ҫап купаланса выртнишӗн пӑшӑрханаҫҫӗ. Пӑшӑрханса кӑна лармаҫҫӗ-ха вӗсем, ку ыйтупа вырӑнти управляющи компание те ҫитнӗ. Анчах унтисем: «Сирӗн ӗҫ ҫук», — тесе касса татнӑ-мӗн.

Урама икӗ эрне ытла сӑнсӑрлатса выртакан ҫуп-ҫап пирки вӗсем Телеграмри каналсенчен пӗрне пӗлтернӗ. Хӑйсен сӑмахне ӗнентерме вӗсем сӑнӳкерчӗксене те ярса панӑ.

ШӖМ тунӑ сӑн

Паян 11 сехет ҫурӑра М-7 ҫулӑн 576-мӗш ҫухрӑмӗнче авари пулнӑ. Малтанлӑха пӗлтернӗ тӑрӑх, "Даф" грузовик водителӗ светофор хӗрлӗ ҫутнӑ вӑхӑтра чарӑннӑ та малта ларакан "ВАЗ-2115" машина ҫине пырса кӗнӗ.

Аварире ҫӑмӑл машина водителӗ аманнӑ. Икӗ водитель те урӑ пулни паллӑ. Халӗ ӗҫ-пуҫа уҫӑмлатаҫҫӗ.

vk.com сайтри сӑн

Ҫурла уйӑхӗн 26-мӗшӗнче республикӑра каллех Сывлӑхпа спорт кунӗ иртӗ. Ҫав кун ҫынсем катоксене, бассейнсене, тренажер залӗсене тата ытти спортобъекта тӳлевсӗрех кӗме пултараҫҫӗ.

Палӑртмалла: Сывлӑхпа спорт кунне Чӑваш Енре кашни уйӑхрах ирттереҫҫӗ. Ыранхи программӑна хатӗрленӗ. Тӗслӗхрен, ун чухне Ҫӗнӗ Шупашкарти манежра лашапа ярӑнма, бассейнра ишме, теннисла выляма пулать.

ЧР Спорт министерстви пӗлтернӗ тӑрӑх, Сывлӑхпа спорт кунне аслӑ ӳсӗмрисем те, ҫамрӑксем те хастар хутшӑнаҫҫӗ.

agro.cap.ru сӑнӳкерчӗкӗ

Чӑваш Ене сыр пӗҫерекен Раҫҫейри паллӑ ҫын килсе ҫитнӗ. Вӑл Фермерсен слётне хутшӑнать.

Аса илтерер: паян, ҫурла уйӑхӗн 25-мӗшӗнче, Етӗрне районӗнче фермерсем слёта пуҫтарӑннӑ.

«Русский пармезан» (чӑв. Вырӑс пармезанӗ) сыр пӗҫерекен предприятие уҫнӑ Олег Сирота Фермерсен слетӗнче хӑйӗн ӗҫӗ-хӗлӗпе паллаштарать.

Хӑна «Халӑх фермерӗ» ассоциацие те кӗрӗ-мӗн.

forum.na-svyazi.ru сӑнӳкерчӗкӗ

Шупашкар хулинче офиссенчен пӗрне чӗртсе янӑ.

Президент бульварӗнче вырнаҫнӑ «Волна» управляющи компанин пурлӑхне такам юри шар кӑтартасшӑн пулнӑ. Пушар ытлашши алхасман — офисӑн чӳрече рами ҫеҫ сиенленнӗ.

Такам юри тивертсе янине пула управляющи компание миҫе тенкӗлӗх тӑкак кӑтартнине специалистсем шутласа кӑларӗҫ.

Халӗ урамра кӗркуннехи пекех сивӗ. Синоптиксем вара пире савӑнтараҫҫӗ. Кӗр пуҫламӑшӗнче республикӑра ҫуллахи ҫанталӑк хуҫаланӗ.

Канмалли кунсенче циклон килӗ, вырсарникун ҫумӑр ҫӑвӗ, 12-14 градус ӑшӑ пулӗ. Ҫитменнине, ҫил вӑйланӗ. Шӑматкун 13-19 градус кӑна ӑшӑ тӑрӗ.

Ытларикунран ҫанталӑк ӑшӑтма пуҫлӗ. Эрне варринче кӑнтӑрла 15-20 градус ӑшӑ пулӗ, ҫурлан 31-мӗшӗнче – 25 градус таран. Авӑнӑн 1-мӗшӗнче тата ӑшӑрах – 24-29 градус.

Синоптиксем малтанлӑха пӗлтернӗ тӑрӑх, кун пек ӑшӑ ҫанталӑк авӑнӑн пӗрремӗш декади тӑршшӗпех тӑма пултарӗ.

t.me/pro_cheby сӑнӳкерчӗкӗ

Паян ирхи 9 сехет те 5 минутра вӗҫсе каймалли самолёта тытса чарнӑ иккен.

«ДП-6808» рейс Шупашкартан Мускава илсе ҫитерет. Анчах самолётӑн техника кӑлтӑкӗ пулнӑран самолёт вӑхӑтра вӗҫсе каяйман.

«Тӗп аэропортран килсе ҫитнӗ авиатехниксен бригади кӑлтӑка юсасан самолёт вӗҫсе кайӗ», — хыпарланӑ Телерамри каналсенчен пӗринче.