Йӗпреҫре ваттисен интернатӗнче ҫӗнӗ корпус пулӗ. Проектпа смета документацине экспертиза центрӗ ырланӑ.

Проектпа килӗшӳллӗн, ҫӗнӗ корпусра 100 ҫын валли вырӑн пулӗ. Унта сипленмелли тата пурӑнмалли условисем лайӑхрах пулӗҫ. Сусӑрсем валли те куҫса ҫӳремелли майсем ытларах тӑвӗҫ. Сиплевпе процедура пӳлӗмӗсемсӗр пуҫне физкультура тумалли, кружоксемпе музыка занятийӗсем ирттермелли пӳлӗмсем пулӗҫ. Кашни пӳлӗмре прихожӑй, санузел пулӗ. Унта виҫшер ҫын пурӑнӗ.

Ҫӗнӗ корпуса хӑпартма «Демографи. Аслӑ ӑру» наци проекчӗпе килӗшӳллӗн укҫа уйӑраҫҫӗ.

cap.ru сайтри сӑн

Ҫурла уйӑхӗн 15-мӗшӗнче Республикӑри офтальмологи клиника пульницине амӑшӗ икӗ уйӑхри ачине йӑтса пынӑ. Пепкен куҫӗ хӗрелнӗ, мӑкӑль тухнӑ. Пӗчӗкскер канӑҫсӑрланса макӑрнӑ.

Пӗчӗк пациента пӗр тӑхтамасӑр операци тунӑ. Ҫапла тухтӑрсем куҫҫуль юхмалли канала ӗҫлеттерсе янӑ. Виҫӗ талӑк иртсенех ачан куҫӗ йӗркене кӗнӗ. Тепӗр эрнерен вара ачапа амӑшне киле янӑ.

Инкеклӗ лару-тӑру министерстви сайтри сӑн

Ӗнер каҫхине Хӗрлӗ Чутай районӗнчи Хватукасси ялӗнчи 38 ҫулти арҫын кил хуҫалӑхӗнче улӑм ҫунса кайнӑ. Инкеклӗ лару-тӑру министерстви пӗлтернӗ тӑрӑх, инкек ачасем шӑрпӑкпа алхаснӑран пулнӑ.

Сакӑр тюк улӑм ҫунса кайнӑ. Унтан ҫулӑм кӳршисен хуралтӑ таврашӗ ҫине куҫнӑ. Инкеклӗ лару-тӑру министерствин ӗҫченӗсем вырӑна ҫитсен пушара 20 минутран сӳнтернӗ.

Сӑмах май, ҫулталӑк пуҫланнӑранпа республикӑра 1023 пушар пулнӑ. Вӗсенче 39 ҫын пурнӑҫӗ татӑлнӑ.

Синоптиксем пӗлтернӗ тӑрӑх, кӑҫал ҫуллахи пек ӑшӑ кунсем пулӗҫ-ха. Малтанхи икӗ декадӑра сывлӑш темератури ахаль чухнехинчен ӑшӑрах пулӗ. Уйӑх тӑршшӗпех 15-20 градус пулас шанчӑк та пур. Ҫӗрлесрен те шӑнтмӗ.

Авӑн уйӑхӗн 6-12-мӗшӗсенче, 23-30-мӗшӗсенче ҫумӑр ҫума пултарать. Уйӑх пуҫламӑшӗнче вара чӑн-чӑн ҫулла хуҫаланӗ: 23-28 градус ӑшӑ пулӗ. Уйӑх варринче вара «карчӑк ӑшши» те килмелле.

Больницӑсенче ирттерекен Уҫӑ алӑксен кунӗнче кирлӗ специалист патне лекме ҫӑмӑл.

Авӑн уйӑхӗн 2-мӗшӗнче ун пеккине Республикӑн ветерансен клиника госпиталӗнче йӗркелӗҫ. Асӑннӑ учреждени Шупашкарти Мускав проспектӗнчи 49-мӗш ҫуртра вырнаҫнӑ.

Уҫӑ алӑксен кунне регистратурӑна 8 (8352) 45-05-45, 8(8352) 45-07-70 номерсемпе шӑнкӑравласа ҫырӑнмалла.

Авӑн уйӑхӗн 2-мӗшӗнчи Уӑ аӑксен кунӗнче терапевт, невролог, офтальмолог, хирург, уролог, кардиолог, оториноларинголог, акушер-гинеколог, икӗ эндокринолог йышӑнӗҫ. Терапевт ирхи 8 сехетрен пуҫаса 14 сехетчен ӗҫлӗ, ытти специалистсем — 8 сехетрен пуҫласа 13 сехетчен. Функци диагностикин пӳлӗмӗ те йышӑнӗ.

culture.cap.ru сӑнӳкерчӗкӗ

Чӑваш Енри пичет тата электрон массӑллӑ информаци хатӗрӗсенче, интернет-порталсенче ӗҫлекенсем, блогерсем тата халӑх ушкӑнӗсенче хастар ҫынсем республикӑн Цифра аталанӑвӗн министерстви ирттерекен «Цифрӑллӑ Чӑваш Ен» конкурса хутшӑнма пултараҫҫӗ. Пултарулӑх ӑмӑртӑвне 18 ҫултан аслӑрах авторсем валли йӗркелеҫҫӗ.

Конкурс 4 тӗп тата ҫавӑн чухлех хушма номинаципе иртет. Тӗп номинацисен хушшинче ҫаксем: «Интернет — кашни киле», «Хут укҫасӑр Чӑваш Ен», «Хӑрушсӑр информаци тавралӑхӗ», «Эпӗ ИТ суйлатӑп».

Конкурс авӑн уйӑхӗн 1-мӗшӗччен тытӑнса юпа уйӑхӗн 31-мӗшӗччен пырӗ.

t.me/pro_cheby сӑнӳкерчӗкӗ

Чӑваш Ен хӗрарӑмӗ пуяс тенӗ курӑнать те, анчах Forbes списокне лекеймен.

Чӑваш Енре ҫуралса ӳснӗ хӗрарӑм халӗ Ямал-Ненецк тӑрӑхӗнче пурӑнать. Ҫурла уйӑхӗн пуҫламӑшӗнче тӑван тӑрӑха килсен вӑл мессенджерсенчен пӗринче инвестици компанине укҫа хывма май пурри ҫинчен пӗлтерӳ курнӑ. Хӗрарӑмпа «менеджре» та кӗҫех ҫыхӑннӑ. Газ организацийӗн акцине туянмалла тесе ӑнлантарнӑ хайхине. Ун валли телефонта ятарлӑ приложени вырнаҫтарма хушнӑ. Ҫавӑнта хӗрарӑм 1,1 миллион тенкӗ ытларах хывнӑ. Вӑл шутран 800 пинне кредит илнӗ.

Укҫана каялла илме май ҫуккине ӑнланса илнӗ ыҫҫӑн хӗрарӑм пакунлсем патне васканӑ, вӗсенчен пулӑшу ыйтнӑ.

Шупашкар хула администрацийӗн вӗренӳ управленийӗн пуҫлӑхӗ Елена Сахарова паян ӗҫрен кайнӑ. Вӑл ку управленире 2012 ҫултанпа ӗҫленӗ. 2021 ҫултанпа вара ӑна ертсе пынӑ. Вӑл ку должноҫе Дмитрий Захаров министра куҫсан йышӑннӑ.

Управление киличчен Елена Сахарова Ҫӗмӗрлери тата Шупашкарти ача пахчисенче заведующире ӗҫленӗ. Карьерине Вӑрнарти «Ромашка» ача пахчинче пуҫланӑ. Унта вӑл воспитательте 19 ҫул ӗҫленӗ.

t.me/pro_cheby сӑнӳкерчӗкӗ

Шупашкар хулинче урамри художниксен ӗҫӗпе киленме май пур. Киҫтӗк ӑстисем хулари сӑнсӑр будкӑсене, ытти ҫавӑн пек вырӑнсене хӑйсен пултарулӑхӗпе илемлетеҫҫӗ, ҫӗнӗ, чӗрӗ, сӑн кӗтеҫҫӗ.

Халӗ «Бауман чарӑнӑвӗ» чарӑнупа юнашар «Девушки в хороводе» (чӑв. Вӑййа тухнӑ хӗрсем) стрит-арт пур.

Ӳкерчӗк авторӗ — Юлия Прокопьева художник.

Сӑмах май каласан, Ботаника пахчин картине те урамри художник илемлетнӗ.

Ҫак уйӑхӑн юлашки кунӗнче кӑвак Ййӑх курма май килӗ. Тулли Уйӑх ҫав кун кӑвак пулӗ. Ун пекки ҫутҫанталӑкра сайра тӗл пулать. Астрономсем сӑнанӑ тӑрӑх, икӗ-виҫӗ ҫулта пӗрре ҫеҫ.

Кӑвак Уйӑха ҫурла уйӑхӗн 30-мӗшӗнчи каҫхине курма май килӗ. Ҫурла уйӑхӑхӗнче Уйӑх икӗ хутчен тулӗ. Пӗрремӗш хутчен вӑл ҫурла уйӑхӗн 1-мӗшӗнче тулса ҫитнӗ, тепре ыран каҫ ҫапла пулӗ. Кун пек чухне ӑна кӑвак Уйӑх теҫҫӗ.

Кӑвак Уйӑха бинокль е телескопсӑрах курма май килӗ.