severpost.ru сайтри сӑн

Ывӑлне хӗненӗ амӑшӗ тӗлӗшпе приговор вуланӑ. Ӑна пӗтӗмӗшле режимлӑ колоние 1 ҫул та 11 уйӑх та 15 кунлӑха янӑ.

Прокуратура пӗлтернӗ тӑрӑх, ҫу уйӑхӗн 6-мӗшӗнче хӗрарӑм Ҫӗрпӳре килте эрех ӗҫнӗ. Ҫакна 18 ҫул тултарман ывӑлӗ курнӑ та ӑна асӑрхаттарнӑ. Хӗрарӑма ку килӗшмен – арҫын ачана хӗненӗ: ӑна кӑкӑрӗ тӗлӗнчен 3 хутчен ҫапнӑ.

Сӑмах май, хӗрарӑма унччен те хӗненӗшӗн суд ӗҫлеттерме йышӑннӑ, анчах вӑл ку тивӗҫе пурнӑҫламан. Хальхинче явап тытатех.

Сӑр тата Хусан хӳтӗлев чиккисене чавнӑ ҫынсен паттӑрлӑхне халалланӑ палӑк Куславкка районӗнчи Куснар ялӗ ҫывӑхӗнче пулӗ. Пӗрремӗш чула ҫурла уйӑхӗн 6-мӗшӗнче хунӑ. Унта ЧР Элтеперӗ Олег Николаев та хутшӑннӑ.

Анчах палӑк ҫитес ҫул ҫеҫ пулӗ. «Пысӑк объектсене, Сӑр тата Хусан хӳтӗлев чиккисене, пирӗн ентешсем виҫӗ уйӑх ҫурӑра чавса пӗтернӗ. Ҫавна май асӑну палӑкне те ҫавӑн чухлӗ вӑхӑт тума палӑртатпӑр», - тенӗ Олег Алексеевич.

Ҫапах палӑка кӑҫалхи юпа уйӑхӗнче уҫмӗҫ. Строительство министрӗ Павел Данилов пӗлтернӗ тӑрӑх, кӑҫал пӗрремӗш тапхӑр ҫеҫ – лапама хатӗрлесси, хӑтлӑх кӗртесси – вӗҫленӗ. Палӑка ҫитес ҫул хӑпартӗҫ.

Республикӑра каллех шӑрӑх ҫанталӑк тӑрать. Синоптиксем пӗлтернӗ тӑрӑх, унашкал ҫанталӑк тепӗр темиҫе кун пулӗ.

Кӗҫнерникун Атӑлҫи тӑрӑхӗнче Вӑтам Азирен ӑшӑ сывлӑш килӗ. Ҫавна май республикӑра ҫав кун 38 градус таран шӑрӑх тӑма пултарӗ. Шупашкарта сулхӑнра 33-35 градус пуласса пӗлтереҫҫӗ.

Сывлӑш температури талӑкри рекордран пысӑкрах пулӗ ахӑртнех. 2011 ҫулта ку кӑтарту 33,2 градуспа танлашнӑ. Эрнекун ҫумӑр ҫӑвӗ, ҫил вӑйланӗ. Канмалли кунсенче сывлӑш температури 23-28 градуспа танлашӗ, уяр ҫанталӑк тӑрӗ.

"За рулем" порталти сӑн

Ҫурла уйӑхӗн 8-мӗшӗнче 14 сехет те 20 минутра Ҫӗмӗрле районӗнче ҫул ҫинче авари пулнӑ. ШӖМ пӗлтернӗ тӑрӑх, унта ачасем шар курнӑ.

Малтанлӑха пӗлтернӗ тӑрӑх, «Киа» машина рулӗ умӗнче ларнӑ 31 ҫулти хӗрарӑм транспорта итлеттереймен – кювета чӑмнӑ. Машинӑра виҫӗ ача пулнӑ: 2-ри хӗрача, 5-ри тата 6 ҫулти арҫын ачасем. Вӗсене пульницӑна илсе ҫитернӗ. Ачасем хыҫалта ятарлӑ креслӑсӑрах ларнӑ.

Ку кӑна мар, салонра аслӑ ӳсӗмри тепӗр 3 ҫын пулнӑ: водитель, унӑн упӑшки тата хунямӑшӗ. Водитель хӑй урӑ пулнӑ.

Сергей Ильин

Паян Шупашкар хулин администрацийӗнче кадр улшӑнӑвӗ пулса иртнӗ. Кун пирки Алексей Ладыков сити-менеджер Инстаграмри хӑйӗн страницинче пӗлтернӗ.

Паянтан хулари Мускав районӗн администрацине ҫӗнӗ ҫын ертсе пыма тытӑннӑ. Тилхепене Сергей Ильина тыттарнӑ.

Сергей Вячеславович «Трактор савучӗсем» концернра, «Волгостальконструкция» предприятире тата ытти хӑш-пӗр вырӑнта самай яваплӑ вырӑн йышӑннӑ. 2012 ҫултанпа вӑл «Городская реклама» (чӑв. Хула реклами) муниципалитетӑн хысна учрежденине ертсе пынӑ. Вӑл тӑрӑшнипе хыснана ҫулталӑкра укҫа кӗресси 11-12 миллион тенкӗрен 5 хут ӳссе 50 миллион тенке ҫитнӗ.

rg.ru, chgtrk.ru, www.youtube.com/watch?v=ivVsQC0t7AU ҫӑлкуҫсенчен скриншотсемпе усӑ курса хатӗрленӗ коллаж

Мускавра пурӑнакан 9 ҫулти Алиса Теплякова пирки юлашки вӑхӑтра чылай МИХ хыпарларӗ пулӗ. Вӑл Мускаври патшалӑх университетне кӗме экзамен тытнӑ. Ача психологи факультетӗнче вӗренесшӗн иккен.

Ачана ятарлӑ программӑпа ашшӗ-амӑшӗ килте вӗрентнӗ. Алиса шкул программине ӑша хывса ӗлкӗрнӗ, экзаменсене аван тытнӑ.

Пултаруллӑ ачан кукашшӗпе кукамӑшӗ — Вера Ивановнӑпа Аркадий Евсеевич Миневичсем — Шупашкарта 40 ҫул ытла пурӑнаҫҫӗ иккен. Вӗсем кунта аслӑ шкултан вӗренсе тухнӑ хыҫҫӑн направленипе килсе ҫитнӗ. Чӑваш Енре мӑшӑрӑн икӗ хӗр: Жанна тата Наталия (Алиса Теплякован амӑшӗ) — ҫуралнӑ. Наташа та пӗчӗкренех ӑслӑ пулнӑ иккен. Вӑл механикӑпа математика факультететӗнчен вӗренсе тухнӑ, Финанс университетӗнчи магистратурӑра пӗлӳ илнӗ. Маларах банкра ӗҫленӗ.

Наташа пулас мӑшӑрӗпе Женьӑпа 2011 ҫулта паллашнӑ. Паян вӗсем 7 ача ӳстереҫҫӗ. Женя Мускаври патшалӑх университетӗнчен вӗренсе тухнӑ. Ҫамрӑк мӑшӑр пӗр вӑхӑтра та Китайра та пурӑннӑ.

Атӑл леш енчи «Чувашия» (чӑв. Чӑваш Ен) санатори ҫумӗнчи «Сувар» этнопаркри кӳлепесем япӑхса пыни пирки Фейсбукра ятарлӑ пост вырнаҫтарнӑ.

Унта ҫырнӑ тӑрӑх, «тарӑн шухӑшлӑ, сӑнарлӑ кӳлепене ӳнерҫӗсем ӑсталаса вырнаҫтарнӑранпа ҫирӗм ҫул та иртнӗ. Чӑваш йӑли-йӗркипе ҫыхӑннӑ мифологиллӗ сӑнарсем, йывӑҫран тунӑскерсем майӗпен ҫӗрӗшсе кивелеҫҫӗ, ача-пӑча хӑпарса ларнипе те силленсе ӳкме пуҫланӑ.

Хӑй малтан чунра темиҫе ҫул йӑтса ҫӳренӗ, кайран проект туса чӑваш ӳнерҫисем пулӑшнипе пурнӑҫа кӗртнӗ сӑваплӑ вырӑншӑн Николай Михайлович Балтаев ӳнерҫӗн, паллах, чӗри ыратать. Вӑл ҫавӑнпа та кӳлепесене май килнӗ таран юсаса тӑрать.

Анчах та пӗччен суран типсе ларать, халӑх сурать — кӳлӗ пулать тенӗ пек этнопаркра пурин те пӗрле тӑрӑшса нимелле йӗрке тумалла».

Чӑваш кӗнеке издательствинче нумаях пулмасть Юрий Сементерӗн ҫӗнӗ кӗнеки пичетленсе тухнӑ.

«Параппанлӑ Митраппан» кӑларӑма сӑвӑсем кӗнӗ. Кӗнекене 1 пин тиражпа кун ҫути кӑтартнӑ. Ҫӗнӗ кӑларӑмӑн редакторӗ – Ольга Иванова, художникӗ – Екатерина Васильева.

«Параппанлӑ Митраппан» кӗнекене кӗҫӗн ҫулсенчи шкул ачисем юратса вуласса шанаҫҫӗ. Асӑннӑ ӗҫ ача-пӑчапа ҫамрӑксем валли ҫырнӑ ал ҫырусен 2020 ҫулхи республикӑри конкурсӗнче ҫӗнтернӗ май ӑна хысна шучӗпе пичетленӗ.

Чӑваш халӑх поэчӗ Юрий Сементер ача-пӑча валли сахал мар кӗнеке кӑларнӑ. Вӗсене Шупашкарта та пичетленӗ, Мускавра та. Поэт Шупашкарти Ҫеҫпӗл Мишши ячӗллӗ вулавӑшпа туслӑ ҫыхӑну тытать, шкул ҫулне ҫитмен шӑпӑрлансемпе тата шкул ачисемпе тӑтӑшах тӗлпулусем ирттерет.

zvezdagukovo.ru сайтри сӑн

Икӗ ҫамрӑк аслашшӗн /е кукашшӗн/ банк картти ҫинчен укҫа вӑрланӑ. Сахал мар – 244 пин тенкӗ. Вӗсен тӗлӗшпе пуҫарнӑ пуҫиле ӗҫе кӗҫех Ҫӗнӗ Шупашкар хулин сучӗ пӑхса тухӗ.

Хӗрпе каччӑ 15-ре тата 16-ра. Вӗсем аслашшӗн карточкине сӑн ӳкернӗ те сарӑмпа усӑ куса счет ҫинчен тепӗр карта ҫине укҫа куҫарнӑ та куҫарнӑ. Ака уйӑхӗн 1-мӗшӗнчен тытӑнса ҫу уйӑхӗн 9-мӗшӗччен вӗсем 244 пин тенкӗ ытла йӑкӑртнӑ. Укҫана хӑйсем пӗлнӗ пек тӑкакланӑ.

Ватӑ ҫын укҫа ҫухалнине курсан полицие кайнӑ. Вӑрӑсене часах тупнӑ.

"Про Город" сайтран илнӗ сӑн

Ҫӗнӗ Шупашкарта хӗрарӑм чӳречерен тухма хӑтланнӑ та аялалла персе аннӑ. Ҫакна иртер-ҫӳрен видео ӳкернӗ, кайран «Про Город» хаҫат корреспонденчӗсене панӑ.

Ӗнер каҫхине Винокуров урамӗнче пӗр хӗрарӑм хваттертен чӳрече урлӑ тухма пуҫланӑ. Ӑна пӗлӗшӗ пулӑшнӑ. Халӑх корреспонденчӗ пӗлтернӗ тӑрӑх, иккӗшӗ те урӑ пулман-тӑр.

Анчах ӗҫ чутах инкекпе вӗҫленмен. Хӗрарӑм пӗлӗшӗпе аялалла персе аннӑ. Юрать-ха, ӑнӑҫлӑ ӳкнӗ. Хӗрарӑма васкавлӑ медпулӑшупа пульницӑна илсе кайнӑ.