Чӑваш Енри Туризма атлантарас енӗпе ӗҫлекен агентствӑна ҫӗнӗ ҫын ертсе пырӗ. Унчченхи пуҫлӑх кайнӑранпа ҫулталӑк ҫурӑ иртнӗ. Тинех ертӳҫӗ тупӑннӑ.

Агентствӑна 43 ҫулти Ольга Седых ертсе пырӗ. Унччен вӑл Мари Элти Экспорт аталанӑвӗн агентствине ертсе пынӑ.

Сӑмах май, Туризма аталантаракан агентствӑна 2021 ҫулта туса хунӑ. Ӑна унччен «Кванториума» ертсе пынӑ Мария Гришинӑна шаннӑ. 2022 ҫулхи раштав уйӑхӗнче ӑна ӗҫрен кӑларнӑ. Ҫӗнӗ ертӳҫе ҫавӑнтанпа шыранӑ.

Эльвира Тимофеева халӑх тетелӗнчи страницинчен илнӗ сӑнӳкерчӗк

Чӑваш радиовне итлекенсенчен Эльвира Тимофеевӑна пӗлмен ҫын ҫук та пулӗ. Радиокӑларӑмсене вӑл хӑйӗн илемлӗ сассипе ертсе пырать.

Чӑваш Ен Элтеперӗн хушӑвӗпе Эльвира Тимофеевӑна «Чӑваш Республикин культурӑн тава тивӗҫлӗ ӗҫченӗ» хисеплӗ ят пама йышӑннӑ. Вӑл документа Олег Николаев Элтепер паян, утӑ уйӑхӗн 25-мӗшӗнче, алӑ пуснӑ.

Эльвира Владимировна – «Чӑваш Ен» патшалӑх телерадиокомпанийӗн радиовещани пайӗн пуҫлӑхӗ тата телевиденипе радиовещанин информаци тата тематика программисен службин пуҫлӑхӗн ҫумӗ.

"Контактри" сӑн

Чӑваш Енри шкул ачи Карина Николаева Ҫурҫӗр Корейӑри «Сондовон» уйлӑха лекнӗ. Унта Раҫҫейри 250 ҫамрӑк кӗнӗ. Унта лекес тесен вара пысӑк конкурс витӗр тухмалла пулнӑ.

Ҫурҫӗр Корейӑри ачасемпе пӗрле вӗсем «Раҫҫей кунне» тата «Корея кунне» паллӑ тӑвӗҫ. Ҫавӑн пекех спорт ӑмӑртӑвӗсем, пултарулӑх конкурсӗсем иртӗҫ. Ачасем ҫав ҫӗршыври паллӑ вырӑнсемпе, унти культурӑпа, историпе паллашӗҫ.

Уйлӑх смени ҫурла уйӑхӗн 2-мӗшӗччен пулӗ.

cap.ru сӑнӳкерчӗкӗ

Утӑ уйӑхӗн 17-мӗшӗнче Атӑлҫи федераци округӗнчи Роскомнадзорӑн Чӑваш Енри управленийӗн пуҫлӑхӗ Татьяна Евдокимова 65 ҫул тултарнӑ. Юбилей кунхине ӑна «Чӑваш Республикин хисеплӗ связисчӗ» ята панӑ.

Татьяна Львовна текех ӗҫлемӗ. Вӑл тивӗҫлӗ канӑва кайнӑ. Татьяна Евдокимова ҫыхӑну федераци службинче 13 ҫул ӗҫленӗ. Вӑл - 2-мӗш класлӑ патшалӑх советникӗ.

Каласа хӑварар: Татьяна Львовна 1959 ҫулхи утӑ уйӑхӗн 17-мӗшӗнче Муркаш районӗнчи Ман Сӗнтӗрте ҫуралнӑ.

"Про Город" сайтӗнчи сӑн

Шупашкарти арҫын хӑй тӗллӗн виҫӗ кустӑрмаллӑ электросамокат ӑсталанӑ. Владислав Аркадьев хӑй вӑхӑтӗнче ҫар штурманӗ пулнӑ.

Электросамокатпа вӑл хӑй ҫӳрет. Экологи тӗлӗшӗнчен таса, кирек ӑҫта та чарӑнма меллӗ, «пӑкӑра» лармалла мар - ҫаксене пула Владислав электросамокат суйлать.

Халӗ вӑл виҫӗ кустӑрмаллӑ тепӗр электросамокат ӑсталать. Унта икӗ ҫын ларма пултарать. Анчах Владислав пӗчченех ҫӳресшӗн - капла хӑрушлӑх тухса тӑмасть.

Маргарита Мельникова сӑнӳкерчӗкӗ

Шупашкарта пурӑнакан Елена Палейкина паян, утӑ уйӑхӗн 20-мӗшӗнче, 103 ҫул тултарнӑ. Кинемее республикӑн ӗҫ тата социаллӑ хӳтлӗх министрӗ Алёна Елизарова саламланӑ.

«Елена Дмитриевна – тӗлӗнмелле хӗрарӑм. Йывӑрлӑх пулсан та вӑл ялан вӑйлӑ та ҫирӗп кӑмӑллӑ пулнӑ. 10 ҫултах фермӑра ӗҫлеме пуҫланӑ», — пӗлтернӗ министр Телеграмри хӑйӗн страницинче.

Елена Дмитриевна Хӗрлӗ Чутай районӗнче ҫуралнӑ. Тӑван мар амӑшӗпе ӳснӗ. Пӗрремӗш упӑшки вӑрҫӑра ҫухалнӑ. Иккӗмӗш упӑшки офицер, разведчик-связист пулнӑ. Федор Порфирьевичпа 5 ача ҫуратнӑ. Иккӗшӗ ҫамрӑклах вилнӗ.

"Контактри" сӑн

Вера Сергеева мӗн те пулин ҫӗленӗ хыҫҫӑн юлнӑ пусма татӑкӗсене пӑрахмасть. Вӑл вӗсенчен те хӑйне евӗр илемлӗ япаласем ҫӗлет.

Сӗтел ҫине ҫав татӑксене хурать те вӗсене мӗнле сыпӑнтармалли пирки шутлать. Ӑна ҫак ӗҫ питӗ килӗшет. Ҫавӑнпа вӑл нихӑҫан та тунсӑхламасть.

Вера Сергеева ыттисене те юратнӑ ӗҫпе аппаланма сӗнет. Вӑл каланӑ тӑрӑх, ку ҫынна питӗ хавхалантарать.

Ваза, карҫинкка, ҫӑпата... - Улатӑр округӗнчи Кивӗ Эйпеҫ ялӗнче пурӑкан Виталий Андреев хӑваран тӗрлӗ япала ӑсталать. 84-ри Виталий Афанасьевича таврара лайӑх пӗлеҫҫӗ, мӗн те пулин ӑсталаса пама ыйтаҫҫӗ.

Вӑл мӗн ачаранах хӑваран тӗрлӗ япала ӑсталать. Вӗсем пилӗк пӗртӑван ашшӗсӗр ӳснӗ. Ҫӑмӑл пулман. Виталий Андреев 5-мӗш класрах ҫӑпата хуҫма вӗпеннӗ.

Виталий Афанасьевич ҫуркунне хӑва касма пуҫлать те хӗлӗпех тӗрлӗ япала ӑсталать. 10 ҫул каялла вӑт Хусан театрӗ валли 85 мӑшӑр ҫӑпата ӑсталаса панӑ.

forum.na-svyazi.ru сӑнӳкерчӗкӗ

Чӑваш Енри паллӑ журналистӑн, Алёна Оленован, пурнӑҫӗ татӑлнӑ. Алёна Дмитриевна 66 ҫулта пулнӑ, вӑл чылай вӑхӑт чирленӗ.

Алена Ткач (Оленова) 1958 ҫулхи утӑ уйӑхӗн 3-мӗшӗнче Чита облаҫӗнчи Петровск-Забайкальский хулинче ҫуралнӑ. Мускаври М.В. Ломоносов ячӗллӗ патшалӑх унивреситечӗн журналистика факультетӗнчен вӗренсе тухнӑ.

Журналистикӑри карьерине вӑл «Советская Чувашия» хаҫатран пуҫланӑ, 1988 ҫултанпа «Чӑваш Ен» ПТРКра тӑрӑшнӑ. 2004-2006 ҫулсенче РФ Пичет ӗҫӗн, телерадиовещанин тата МИХ енӗпе ӗҫлекен министерствӑра тӑрӑшнӑ. Кайран «Отличное телевидение» тӗп редакторӗ пулнӑ, унтан каллех «Советская Чувашия» хаҫата таврӑннӑ.

forum.na-svyazi.ru сӑнӳкерчӗкӗ

Улатӑрти хӗрарӑмсен Киев-Николаев мӑнастирӗнче 15 ҫул ытла пурӑннӑ Любовь Стриженева актриса ҫут тӗнчерен уйрӑлса кайнӑ. Вӑл 83 ҫулта пулнӑ. Кун пирки Аристоклий Набокин манах хыпарлани тӑрӑх «Ҫыхӑнура» форумра пӗлтернӗ.

Любовь Васильевна 1940 ҫулхи ҫурла уйӑхӗн 6-мӗшӗнче Мускавра ҫуралнӑ. 1963 ҫулта МХАТӑн шкул-студийӗнчен вӗренсе тухнӑ. Мускаври художество академи театрӗнче, вӑл икке пайланса Горький ячӗллӗ МХАТра ӗҫленӗ. 1997 ҫулта ӑна Раҫҫей халӑх артисткин ятне панӑ.

Пултаруллӑ артистка СССР Патшалӑх телерадиокомпанийӗн Пӗтӗм союзри радиовӗнче «Взрослым о детях» кӑларӑма ертсе пынӑ. «Вечный зов», «Каникулы Кроша», «Земля, до востребования», «Стежки-дорожки», «Бесы» тата ытти кинокартинӑра вылянӑ.

2008 ҫулта мӑнастире тухса кайнӑ, унта Иудифь ятпа Турра юрӑхлӑ пулса пурӑннӑ.

Хӑй вӑхӑтӗнче вӑл Владимир Земляникин тата Олег Стриженов паллӑ актерсен арӑмӗ пулнӑ. Любовь Стриженеван ывӑлӗ Александр Стриженов.