mintrans.cap.ru сӑнӳкерчӗкӗ

Чӳк уйӑхӗн 17-мӗшӗнче Чӑваш Енри маршруткӑсемпе автобуссен водителӗсене тӗрӗсленӗ. Аса илтерер: халӑхпа ӗҫлекенсен чӳк уйӑхӗн 1-мӗшӗччен вакцинаци витӗр тухмаллаччӗ е вӗсен кӑшӑлвируспа нумаях пулмасть чирлесе ирттернине ҫирӗплетсе паракан справка пулмалла.

Чӑваш Енӗн Транспорт тата ҫул-йӗр хуҫалӑхӗн мнистерствинче пӗлтернӗ тӑрӑх, виҫӗмкун халӑха турттаракан 50 ытла транспорта тӗрӗсленӗ. 4 водитель кӑшӑлвирусран прививка тутарманнине утпса палӑртнӑ. Вӗсен справка та, кӑшӑлвирус ерменнине ҫирӗплетсе паракан ПЦР-тест та пулман. Водительсем тӗлӗшпе акт ҫырнӑ. Материалсене Роспотребнадзорӑн управленине ярса панӑ, унтан суда ҫитерӗҫ.

© StreetVJ / Shutterstock.com

Халӑх маскӑпа усӑ курни кӑшӑлвирус чирне 53% чакарма май пани ҫинчен The Guardian пӗлтерет, ҫакна вӑл British Medical Journal журналта пичетлесе кӑларнӑ тӗнче шайӗнчи тӗпчев пӗтӗмлетӗвӗсем ҫине таянса калать.

Пӗтӗм тӗнчерен пуҫтарнӑ 30 ытла тӗпчев даннӑйӗсене тишкернӗ хыҫҫӑн ҫакӑ палӑрнӑ: маска режимне пӑхӑннӑ чухне COVID-19 чирлесси 53% чакать. Пӗр-пӗринпе ҫуммӑн пулмасӑр ҫӳрени чир-чӗре ертессин шутне 25 процент чакарать.

Алӑ ҫӑвассин тухӑҫлӑхне 50% ытла хакланӑ, анчах та ку тӗлӗшпе ӑсчахсем даннӑйсем ҫителӗксӗр пулнине палӑртнӑ.

Ҫак ӗҫ авторӗсем каланӑ тӑрӑх, ытти социаллӑ йышӑнусене илес пулсан, калӑпӑр, пӗтӗмӗшле локдаун пӗлтерессине е чикӗсене хупнине, вӗсен япӑх тата лайӑх енӗсене пӗлес тесен уйрӑммӑн тӗпчеме тивӗ.

Специалистсем палӑртнӑ тӑрӑх, прививка туни, хӑй тӗллӗн, кӑшӑлвирусран 100 проценчӗпе хӳтӗлеймест, уйрӑмах ҫӗнӗ штаммсем аталаннине шута илме тивсен. Вакцинӑланнипе пӗрлех малалла та маска тӑхӑнса ҫӳремелле, пӗр-пӗринчен дистанци тытса пымалла тата алла час-часах ҫумалла.

cheb-gdb2.med.cap.ru сӑнӳкерчӗкӗ

Кӑшӑлвирус сарӑлма пуҫласанах вӑл чир ачасене шар кӑтартмасть, амак ерсен те вӗсем чире ҫӑмӑллӑн ирттереҫҫӗ тесе калатчӗҫ. Халӗ, ав, кӑшӑлвиурсӑн ҫӗнӗрен те ҫӗнӗ штамӗсем сарӑлса пыраҫҫӗ, шӑпӑрлансем те ковидпа аптӑрама пуҫланӑ. Ҫӗнӗ штампа чирлекен ачасем реанимаци уйрӑмӗсене те лекеҫҫӗ.

Иртнӗ уйӑхра Шупашкар хулинчи 2-мӗш ача-пӑча пульницин инфекци стационарне 3 уйӑхри пепкене илсе пынӑ. Унӑн ӳпки 100 проценчӗпех шыҫнӑ. Пӗчӗкскере тӳрех реанимаци уйрӑмне хунӑ.

Пӗчӗк пациент пурнӑҫӗшӗн врачсем виҫӗ эрне кӗрешнӗ. Ачана пӗрмай кислородпа сывлаттарнӑ. Чӑваш Республикин Сывлӑх сыхлав министертствин штатра тӑман специалсичӗпе — анестезиолог-реаниматологӗпе Дмитрий Лукояновпа, Мускаври специалистсемпе телемедицина мелӗпе канашлама тивнӗ. Тӗрлӗ шайри тухтӑрсем ҫине тӑнипе ачана вилӗмрен ҫӑлса хӑварнӑ.

Халӗ ачан амӑшӗ ачасен ашшӗ-амӑшӗн, вӗсен тӑванӗсен те кӑшӑлвирусран прививка тутармаллах тесе шухӑшлать. Ачасене хальлӗхе ковидран прививка тумаҫҫӗ.

Республикӑра пӗр талӑкра 173 ҫын кӑшӑлвируспа чирленӗ. Вилекенсем 18-ӑн пулнӑ. Юлашки вӑхӑтра чире парӑнтарайманнисен йышӗ пысӑк.

Ку таранччен кӑшӑлвирус 3063 ҫыннӑн пурнӑҫне татнӑ. Пӗтӗмпе 40839 ҫын чирленӗ, вӗсенчен 35674-шӗ сывалнӑ. Юлашки талӑкра чирлекенсен те, сывалакансен те хисепӗ пӗр пек пулнӑ: 173 ҫын.

Хальхи вӑхӑтра стационарсенче тата килте амбулатори мелӗпе 2102 ҫын кӑшӑлвирусран сипленет.

Ирина Павлован Фе6йсбукри страницинчен илнӗ сӑнӳкерчӗк

Шупашкарта пурӑнакан 30 ҫулти художник, Анастасия Степанова, кӑшӑлвируса пула пульницӑри кӑшӑлвирус уйрӑмӗнчи реанимацинче пиллӗкмӗш кун ӗнтӗ выртнине Ирина Павлова журналист ӗнер Фейсбукра пӗлтернӗччӗ. Вӑл хӑйӗн постӗнче ҫырнӑ тӑрӑх, « Настя Шупашкарти художество училищинчен вӗренсе тухнӑ. Пултаруллӑ, ҫепӗҫ те сӑпайлӑ хӗр».

Ӗнерхи постра палӑртнӑ тӑрӑх, тухтӑрсем хӗре кардиодиспансера ЭКМО аппаратпа сывлаттарма куҫарасшӑн. Анчах ун пек аппарат Чӑваш Енре пӗртен-пӗрре иккен те унта лекме йывӑр.

Паян Настьӑн чӗри тапма чарӑннӑ. Кун пирки те Ирина Павлова пӗлтернӗ.

Паянхи кун тӗлне республикӑра 3028 ҫын кӑшӑлвируса пула вилнӗ. Статистика кӑтартнӑ тӑрӑх, чирленӗ кашни 13-мӗш ҫын чире парӑнтарайман. Чӳк уйӑхӗн 15-мӗшӗччен, ҫур уйӑхра, 266 ҫыннӑн пурнӑҫӑ ҫак чире пула татӑлнӑ. Юлашки талӑкра 19 ҫын вилнӗ.

Юлашки талӑкра 175 ҫын чирленӗ, 167 ҫын сывалнӑ. Паянхи кун тӗлне республикӑра 40491 ҫын кӑшӑлвируспа чирленӗ, вӗсенчен 35399-шӗ сывалнӑ.

Хальхи вӑхӑтра стационарсенче тата килте амбулатори мелӗпе 2064 ҫын кӑшӑлвирусран сипленет.

v-kurse.ru сайтри сӑн

Иртнӗ уйӑхра Чӑваш Енре кӑшӑлвируспа чирлисене сиплеме медицина кислорочӗ сахалли пирки калаҫрӗҫ. Дефицит пулнӑ май «Химпром» ӑна кӑлармалли калӑпӑша пысӑклатса пырать.

Кӑшӑлвирус енӗпе лару-тӑру халӗ те лӑпках мар, чирлекенсем сахалланмаҫҫӗ. Вӗсене сиплеме кислород ҫитменни пирки нумаях пулмасть калаҫма пуҫларӗҫ. «Химпром» кӑларнӑ шӗвӗ кислорода пӗр предприятие хатӗрлесе ҫитерме параҫҫӗ, унтан вӑл ЧР Сывлӑх сыхлавӗн министерствин пульницисене ҫитет.

Хальхи вӑхӑтра «Химпром» талӑкра 10-11 тонна кислород кӑларать. Ҫавна май, тӳре-шара ӗнентернӗ тӑрӑх, ҫитес вӑхӑтра ку енӗпе дефицит пулмалла мар.

vedtver.ru сайтри сӑн

Чӑваш Енре кӑшӑлвирусран вакцинациленесси чакнӑ. ЧР Элтеперӗ Олег Николаев пӗлтернӗ тӑрӑх, ковид-каникулччен кунсерен 5,5-6 пин ҫын прививка тунӑ. Юлашки эрнере вара ку 4,8-4,9 пин ҫын анчах вакцинациленнине палӑртнӑ.

Планпа килӗшӳллӗн, республикӑра пурӑнакансен 80 процентне вакцинацилемелле. Ку 761,814 пин ҫынпа танлашать. Ку таранччен 459,4 пин ҫын прививка тунӑ. Ку планӑн 60,3 проценчӗпе танлашать.

Тӑвай, Муркаш, Элӗк, Вӑрнар, Улатӑр, Вӑрмар, Ҫӗрпӳ районӗсенче, Улатӑр тата Ҫӗмӗрле хулисенче вакцинациленессин кӑтартӑвӗ пӗчӗк. Тӳре-шара пӗлтернӗ тӑрӑх, республикӑра вакцина ҫителӗклех. «Спутник Лайт» тӗлӗшпе ҫеҫ йывӑрлӑхсем пур.

Чӑваш Енре пӗр талӑкра 177 ҫын кӑшӑлвируспа чирленине палӑртнӑ. Ҫавӑн чухлех сывалнӑ. 20 ҫын вара вилнӗ. Ку питӗ пысӑк хисеп.

Ку таранччен пирӗн республикӑра 2990 ҫын кӑшӑлвируса парӑнтарайман. Пӗтӗмпе 40140 ҫын чирленӗ. Вӗсенчен 35121-шӗ сывалнӑ. Сӑмах май, икӗ эрне ӗнтӗ талӑкра 170-180 ҫын чирлет.

Палӑртса хӑвармалла: Раҫҫейре 9 миллион ытла ҫын пӗр талӑкра чирленӗ. Вӗсенчен 254 пинӗшӗ вилнӗ.

tarhany-pni.soc.cap.ru сӑнӳкерчӗкӗ. 2020 ҫулхи нарӑс уйӑхӗнче тунӑ сӑн

Патӑрьел районӗнчи Турханти психоневрологи диспансерӗнче кӑшӑлвируспа чирлисене тупса палӑртнӑ. Ҫавна интернатра ӗҫлекенсене тата унта пурӑнакансене планпа килӗшӳллӗн

юпа уйӑхӗн 26-мӗшӗнче тӗрӗсленӗ чух асӑрханӑ. Чир интернатра ӗҫлекен 6 ҫынна ернӗ. Чӑваш Енӗн Ӗҫ тата социаллӑ хӳтлӗх министерствинче ӗнентернӗ тӑрӑх, интернатра ӗҫлекен тата унта пурӑнакан мӗнпур ҫын кӑшӑлвирусран малтан вакцинациленнӗ. Ведомствӑн пресс-службинче хыпарланӑ тӑрӑх, маларах асӑннӑ 6 ҫыннӑн чир палли пулман, вӗсем хӑйсене аванах туяҫҫӗ.

«Интернатра пурӑнакансем хӑйсене аван туяҫҫӗ, вӗсен чир палли сисӗнмест, вӗсене пӳлӗмсем тӑрӑх уйӑрса тухнӑ, столовӑйӗнче вӗсене пӗчӗкшер ушкӑнпа апатлантараҫҫӗ. Мӗнпур ӗҫчене тата интернатра пурӑнакансене учрежденири тата Патӑрьелти район пульницинчи тухтӑрсем тӗрӗслесех тӑраҫҫӗ. Ҫӗнӗрен тест ирттерсен чирлисем тупӑнман», – тесе уҫӑмлатнӑ лару-тӑрӑва Ӗҫ тата социаллӑ хӳтлӗх министерствинче.