"Котактри" сӑн

15 ҫулти Ольга Перепелкина урамра пынӑ чухне пӗр хӗрача тӑрук ӳксе хускалми пулнине асӑрхасан ӑна пӗр тӑхтамасӑр пӗрремӗш медпулӑшу кӳме тытӑннӑ, васкавлӑ медпулӑшу чӗннӗ.

Ольга ҫынна пӗрремӗш медпулӑшу мӗнле памаллине лайӑх пӗлет. Вӑл - «Воин» центр курсанчӗ. «Паллах, ку манекенпа тренировка ирттернинчен йывӑртарах пулчӗ. Анчах шухӑшлама вӑхӑт ҫуккине ӑнланатӑп», - тенӗ Ольга. Тухтӑрсем киличчен 3 минут маларах хӗрача куҫне уҫса сывласа янӑ.

Ольгӑшӑн тактика медицини питӗ интереслӗ. Вӑл шкулта ку енӗпе вӗренӳ проектне те пуҫарнӑ. Унӑн команди пӗрремӗш медпулӑшу парас енӗпе регион шайӗнче иртнӗ чемпионатра пӗрремӗш вырӑн йышӑннӑ. Ольга халӗ Рязаньти сывлӑш десанчӗн училищине е Ҫар-космос академине вӗренме кӗмешкӗн ӗмӗтленет.

vladimir.mk.ru сайтри сӑн

Чӑваш Енри тепӗр икӗ кинемей ҫак кунсенче 100 ҫулхи юбилейне паллӑ тунӑ.

Куславккара пурӑнакан Антонина Ильинична Лебедева 16-ра чухне колхозра ӗҫлеме пуҫланӑ. 1941 ҫулта вӑл Сӑр хӳтӗлев чиккине тунӑ ҫӗре хутшӑннӑ. Халӗ вӑл 98 ҫулти йӑмӑкӗпе пурӑнать.

Канашри Татьяна Васильеана Смагина ӗмӗр тӑршшӗпе вӗрентекенре ӗҫленӗ. Паянхи кун вӑл ҫӗршывӑн тӗрлӗ кӗтесӗнчи нумай ачаллӑ ҫемьесене пулӑшать: утиял ҫӗлесе парнелет.

"Контактри" сӑн

Улатӑрта пурӑнакан Наталья Рябова Пӗрремӗш каналпа кӑтартакан «Асамлӑх уйӗ» кӑларӑмра ҫӗнтернӗ. Телевизорпа ӑна ӗнер, эрнекун, кӑтартнӑ.

Вӑл ыйтӑва тӗрӗс хуравланӑ: ӗлӗк халӑхра муфтӑна мӗнле чӗннӗ? Муфта.

Наталья 4150 очко пухнӑ. Унпа вӑл тӗпелте усӑ курмалли набора суйланӑ.

culture.ru сӑнӳкерчӗкӗ

Раҫҫей Федерацийӗн тата Чӑваш Республикин культурӑн тава тивӗҫлӗ ӗҫченӗ, «Сувар» халӑх ташшин ансамблӗн тата «Суварята» халӑх ташшин ача-пӑча ансамблӗн ертӳҫи Анатолий Музыкантов 75 ҫул тултарнине халалласа Шупашкарта пултарулӑх каҫӗ иртессине эпир унччен пӗлтернӗччӗ-ха.

Ӗнер вара Чӑваш Ен Элтеперӗ Олег Николаев ӑна «Чӑваш Республики умӗнчи тава тивӗҫлӗ ӗҫсемшӗн» орденпа чыслама йышӑннӑ. Хушӑва республикӑн влаҫ органӗсен официаллӑ порталӗнче вырнаҫтарнӑ.

chuvbook.ru сӑнӳкерчӗкӗ

Чӑваш кӗнеке издательствинче В.К. Магницкийӗн «Собрание сочинений в 5 томах» ӗҫӗсен пӗрремӗш томӗ «Труды по этнографии народов Поволжья» ятпа кун ҫути курнӑ. – Кӑларӑма истори наукисен кандидачӗсем Ю.В. Гусаров тата А.А. Чибис пухса хатӗрленӗ.

Василий Магницкий (1839–1901) - этнограф, фольклорист, историк, XIX ӗмӗрти халӑх вӗрентӗвӗн ӗҫченӗ. Халӑх культурипе вӑл студент чухнех кӑсӑкланма пуҫланӑ. Атӑлпа Урал тӑрӑхӗнчи халӑхсен йӑли-йӗркипе культурине тӗпченӗ ӑсчаха чылай ӑслӑлӑх пӗрлӗхӗн йышне илнӗ.

Чӑваш кӗнеке издательствин сайтӗнче пӗлтернӗ тӑрӑх, кӗнекене кӗнӗ ӗҫсенчен чылайӑшне автор ят панӑ евӗрех хӑварнӑ.

chgign.ru сӑнӳкерчӗкӗ

Чӑваш Енри паллӑ критик, литературовед, филологи ӑслӑлӑхӗсен докторӗ, профессор, ЧР Патшалӑх премийӗн лауреачӗ, РФ професси енӗпе аслӑ вӗрентӗвӗн хисеплӗ ӗҫченӗ Юрий Артемьев «Чӑваш Республикин культуран тава тивӗҫлӗ ӗҫченӗ» ята тивӗҫнӗ.

Кун пек хушӑва республика Элтеперӗ Олег Николаев ӗнер, кӑрлач уйӑхӗн 24-мӗшӗнче, ала пуснӑ.

https://vk.com/wall4727590_40725 страницӑран илне сӑнӳкерчӗк

Паян И.Н. Ульянов ячӗллӗ Чӑваш патшалӑх университетӗнчи журналистика кафедринче Герман Желтухин журналист тата писатель ҫуралнӑранпа 80 ҫул ҫитнине асра тытса учёнӑйсем, преподавательсем, студентсем пуҫтарӑннӑ.

Мороприятие кафедра заведующийӗ Анатолий Данилов ертсе пынӑ. Кашниех сӑмах каланӑ. Программӑна Роза Степанова юрӑҫ хитре юрӑсемпе илем кӳнӗ.

Герман Желтухин — Чӑваш Республикин культурӑн тава тивӗҫлӗ ӗҫчене, журналистсен Ҫемен Элкер премийӗн икӗ хут лауреачӗ,Леонид Ильин премийӗн лауреачӗ.

culture.cap.ru сӑнӳкерчӗкӗ

Ӗнер Чӑваш Республикин Композиторсен ассоциацийӗн, Пӗтӗм Раҫҫейри хор обществин пайташне, музыканта, Раҫҫей Федерацийӗн тата Чӑваш Республикин культурӑн тава тивӗҫлӗ ӗҫченне Анатолий Шакина юлашки ҫула ӑсатнӑ.

Анатолий Шакин – Чӑваш патшалӑх педагогика институтӗнчен вӗренсе тухнӑ. Патӑрьел районӗнчи шкулсенче музыка тата юрӑ учителӗ пулса ӗҫленӗ. Вӑлах 1970 ҫулта Патӑрьел районӗнчи Культура ҫуртӗнче юрӑпа ташӑ ансамбльне йӗркелесе кӑҫалчченех ертсе пынӑ. Анатолий Шакин — вокалпа хореографи сюитисен, хор хайлавӗсен авторӗ, халӑх юррисене илемлетнӗ. Районти пӗрлештернӗ хорӑн дирижёрӗ пулнӑ. Ӑна «Чӑваш Республики умӗнчи тава тивӗҫлӗ ӗҫсемшӗна» орден медалӗпе наградӑланӑ.

culture.cap.ru сӑнӳкерчӗкӗ

Паян, кӑрлач уйӑхӗн 23-мӗшӗнче, чӑваш халӑх артистки Татьяна Яфанова 80 ҫул тултарнӑ.

Вӑл Чӑваш Республикин патшалӑх вырӑс драма театрӗнче ӗҫлет. Татьяна Петровна 1945 ҫулта ҫуралнӑ. 1966 ҫулта Куйбышеври драма театрӗ ҫумӗнчи студирен вӗренсе тухнӑ. 1967 ҫулта Шупашкарти Вырӑс драма театрӗнче ӗҫлеме тытӑннӑ. Ҫак ҫулсенче вӑл 80 ытла сӑнара калӑпланӑ.

"Контактри" сӑн

Комсомольски округӗнчи Чурачӑк ялӗнче пурӑнакан Петрпа Зинаида Герасимовсем ылтӑн туйне паллӑ тунӑ. Петр Исаевич шкул хыҫҫӑн Казахстанра тракториста вӗреннӗ, яла таврӑнсан «Заветы Ильича» колхозра вӑй хунӑ. Кайран чылай вӑхӑт почта уйрӑмӗнче водительте тӑрӑшнӑ, тивӗҫлӗ канӑва тухсан Комсомольскинчи вӑрман хуҫалӑхӗнче тӑрӑшнӑ.

Зинаида Михайловна Ҫӗнӗ Выҫли ялӗнче ҫуралнӑ. Шкул хыҫҫӑн «Дружба» колхозра вӑй хунӑ, кайран – строительство организацийӗнче штукатур-малярта. Шӑпах ҫавӑнта паллашнӑ вӑл пулас упӑшкипе. Пӗрлешнӗ хыҫҫӑн мӑшӑр Комсомольскинче тӗпленнӗ.

Герасимовсем виҫӗ хӗр ҫуратса ӳстернӗ. Халӗ вӗсен – 11 мӑнук, 2 кӗҫӗн мӑнук.