Ирина Васильева. cap.ru сайтри сӑн

Республикӑри офтальмологи клиника пульницин тӗп тухтӑрне палӑртнӑ. Вӑл - Ирина Васильева. Унччен ку должноҫе Дмитрий Арсютов йышӑннӑ, вӑл халӗ «С.Н.Федоров ячӗллӗ куҫ микрохирургийӗнче» тӗп директорта ӗҫлет.

Ирина Вячеславовна унччен тӗп тухтӑрӑн медицина енӗпе ӗҫлекен ҫумӗ пулнӑ. Вӑл И.Н.Ульянов ячӗллӗ ЧПУра «Сиплев ӗҫӗ» енӗпе вӗреннӗ. Офтальмологра 2000 ҫултанпа вӑй хурать.

Ирина Васильева – ЧР Сывлӑх сыхлавӗн штатра тӑман тӗп специалист офтальмологӗ, Раҫҫейри офтальмологсен общество пайташӗ.

РФ Следстви комитечӗн Чӑваш Енри следстви управленийӗн ӗҫченӗсем Ҫӗнӗ Шупашкарта пурӑнакан 100 ҫулти ветерана, Анна Ивановна Январевӑна, Ҫӗнтерӳ кунӗпе саламланӑ. Ветеран пӗлтӗр раштав уйӑхӗн 20-мӗшӗнче 100 ҫулхи юбилейне паллӑ тунӑ. Вӑл Пӑрачкав районӗнчи Кожевенное ялӗнче ҫуралнӑ.

Анна Ивановна 1941 ҫулта фронта кайнӑ, госпитальте ӗҫленӗ. Кайран прожектор полкӗнче ҫар тивӗҫне пурнӑҫланӑ, Мускава фашистсенчен хӳтӗленӗ. Вӑрҫӑран 1945 ҫулхи утӑн 7-мӗшӗнче таврӑннӑ.

Следстви управленийӗн ӗҫченӗсем ветерана парне панӑ, ачасем вара сӑвӑсем вуланӑ.

cap.ru сайтри сӑн

Улатӑр районӗнчи Калинино поселокӗнче пурӑнакан Екатерина Келяшова 102 ҫулта пулсан та пурнӑҫӗнчи нумай япалана астӑвать. Вӑл вӑрҫӑ вӑхӑтӗнче окоп чавнӑ. Екатерина ун чухне 15-ре кӑна пулнӑ. «Сивӗччӗ, эпӗ хӗр туспа ҫапатапа кӑначчъ. Алӑ шӑнатчӗ, хырӑм выҫӑччӗ, анчах плана яланах тултарнӑ», - аса илнӗ ватӑскер. Унӑн мӑшӑрӗ вӑрҫӑ ветеранӗ пулнӑ.

Екатерина Келяшова 5 ачаллӑ арҫынна качча кайнӑ. Лешӗн арӑмӗ вилнӗ. Арҫын ырӑ кӑмӑллӑ пулнӑран Екатерина унпа пурӑнма килӗшнӗ. Вӗсем 5 арҫын ачана тӗрӗс-тӗкел ӳстернӗ. Халӗ кинемей мӑнукӗсемпе, вӗсен ачисемпе савӑнса пурӑнать.

t.me/kanashen_gazeta каналти сӑн

Канаш хулинче пӗртен-пӗр ветеран Владимир Рожков юлнӑ. Ӑна вырӑнти культура ҫурчӗн «Фронт бригади» ушкӑн тата хӑнасем саламлама ятарлӑ грузовикпа пынӑ. Ун валли ҫурт картишӗнчех концерт лартнӑ.

Кӑҫал ветеран раштав уйӑхӗнче 100 ҫул тултарать. Вӑл концерт лартакансене Тӑван ҫӗршывӑн Аслӑ вӑрҫи пирки каласа кӑтартнӑ, хӑйне тимлӗх уйӑрнӑшӑн тав тунӑ.

epp.genproc.gov.ru сӑнӳкерчӗкӗ

Воронежра прокурор пулса тӑрӑшнӑ ҫынна Шупашкара ӗҫлеме куҫарнӑ.

Раҫҫейӗн генпрокурорӗн приказӗпе Шупашкар хулинчи Калинин районӗн прокурорӗ пулма юстицин аслӑ советникне Роман Лаща ҫирӗплетнӗ.

Роман Сергеевич 1987 ҫулта Карачай-Черкесск Республикинчи Черкесск хулинче ҫуралнӑ. Раҫҫейӗн Шалти ӗҫсен министерствин Волгоградри академийӗнче вӗреннӗ хыҫҫӑн хӑйӗн тӑван республикинчи прокуратура тытӑмне ӗҫе вырнаҫнӑ. Кайран вӑл Мускав облаҫӗнчи прокуратурӑра тӗрлӗ должноҫе тӑрӑшнӑ. 2022 ҫултанпа Воронежра прокурорта тимленӗ.

Николай Николаве страницинчен илнӗ сӑнӳкерчӗк

Николай Николаева тухтӑра «Чӑваш Республики умӗнчи тава тивӗҫлӗ ӗҫсемшӗн» орден медалӗпе чыслама йышӑннӑ. Хушӑва Чӑваш Ен Элтеперӗ Олег Николаев ӗнер, ҫу уйӑхӗн 2-мӗшӗнче, алӑ пуснӑ.

Николай Станиславович Федерацин травматологи, ортопеди тата эндопротезировани центрне ертсе пырать, асӑннӑ учреждение уҫнӑранпах тӗп врач пулса тӑрӑшать. Унсӑр пуҫне Николай Николаев Чӑваш Енӗн Патшалӑх Канашӗн депутачӗ те.

ЧР архитекторсен пӗрлешӗвӗн председателӗ Сергей Лукиянов пурнӑҫран уйрӑлса кайнӑ. Вӑл йывӑр чир хыҫҫӑн сывлама пӑрахнӑ. Сергей Пантелеймонович 64 ҫулта пулнӑ.

Вӑл 1958 ҫулта Комсомольскинче ҫуралнӑ. Хӑйӗн ӗҫ биографине «Чӑвашгражданпроектра» пуҫланӑ. Ҫав вӑхӑтра Сергей Пантелеймонович Чӑваш Енри ял-хула валли, ҫав шутра – Шупашкар та, пӗлтерӗшлӗ проектсем хатӗрленӗ. Вӑл тӑрӑшнипе И.Н.Ульянов ячӗллӗ ЧПУн строительство факультетӗнче архитектура кафедри йӗркеленнӗ.

Сергей Лукияновпа ыран 10-11 сехетсенче Шупашкарти Граждан урамӗнчи 19-мӗш ҫуртра сывпуллашӗҫ.

culture.cap.ru сӑнӳкерчӗкӗ

Ака уйӑхӗн 26-мӗшӗнче Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче тӑван халӑхӑмӑрӑн патриархӗн Иван Яковлевӑн мӑнукӗн ывӑлӗпе тӗл пулу иртнӗ.

Владимир Павловӑн кукамӑшӗ Лидия Ивановна Яковлева (Некрасова) Иван Яковлевӑн хӗрӗ пулнӑ, вӑл 1906 ҫулта ҫуралнӑ. Владимир — Лидия Ивановнӑн хӗрӗн Екатеринӑн ывӑлӗ. Владимир 1940 ҫулта Мускавра ҫуралнӑ. Владимир Всеволодович — Раҫҫей тава тивӗҫлӗ арисчӗ, М.Н. Еромолова ячӗллӗ театрти ертсе пыракан актёрсенчен пӗри.

culture.cap.ru сӑнӳкерчӗкӗ

Атӑл тӑрӑхӗнчи вак халӑхсене ҫутта кӑларассишӗн ырми-канми тӑрӑшнӑ мухтавлӑ чӑваш ывӑлӗ Иван Яковлев ҫуралнӑранпа кӑҫалхи ака уйӑхӗн 25-мӗшӗнче 175 ҫул ҫитрӗ. Ҫавна май Чӑваш Енӗн Наци вулавӑшӗ ыран, ака уйӑхӗн 28-мӗшӗнче, Раҫҫейӗн патшалӑхӑн истори библиотекинче (Мускав) «Гений места. Технология работы с наследием И.Я. Яковлева в современных архивах, музеях и библиотеках» ятпа регионсем хушшинчи ҫавра сӗтел ирттерӗ.

Унта республикӑн культура министрӗ Светлана Каликова; маларах асӑннӑ Мускаври ҫав вулавӑш директорӗ, педагогика наукисен кандидачӗ Михаил Афанасьев; Раҫҫейӗн наукӑсен академийӗн ӗҫченӗ, философи наукисен кандидачӗ Юрий Черный; Мускаври чӑваш культурин обществин правленийӗн председателӗ Лира Смирнова; Мускаври, Чӑваш Енри, Чӗмпӗр облаҫӗнчи патшалӑх музейӗсен, архивсен, вулавӑшсен специалисчӗсем хутшӑнӗҫ.

smotrim.ru сайтри видеоран илне сӑнӳкерчӗк

Ӗнер «Культура» телеканал чӑвашсене тата Атӑл тӑрӑхӗнчи ытти вак халӑха ҫутта тухма пулӑшнӑ Иван Яковлев ҫуралнӑранпа 175 ҫул ҫитни ҫинчен сюжет кӑтартнӑ.

Иван Яковлев сумлӑ педагог, ҫыравҫӑ, тӑлмачӑ, хальхи чӑваш алфавитне йӗркелекенӗ тата пӗрремӗш чӑваш шкулне уҫаканӗ пулнӑ.

Аслӑ патриархӑмӑр хӑй пурӑннӑ вӑхӑтра 400 ытла шкул уҫса хӑварнӑ. Чӑваш ачисем валли ҫеҫ мар, ытти халӑхсенни валли те.

Ҫуралсан виҫӗ кунтан тӑлӑха юлнӑскер ырӑ ҫемьене лекнӗ. Каярах ӑна темле ура хума хӑтланакан та пулнӑ, анчах Иван Яковлевӑн ырӑ ячӗ тата ырӑ ӗҫӗсем упранса юлнӑ.