Виҫӗмкун Чӑваш Енре ҫуллахи чи шӑрах кун пулнӑ. Сывлӑш температури 35,2 градуса ҫитнӗ. Унашкалли 2010 ҫултанпа пулман.

Ҫав кунах шӑрӑха пула тачка пӗлӗтсем капланнӑ, аслатиллӗ ҫумӑр ҫунӑ, ҫил вӑйланнӑ. Паян вара питӗ лайӑх ҫанталӑк: уҫӑ ҫил пур, 20-25 градус ӑшӑ. Ҫӗрле вара 10 градус ҫеҫ ӑшӑ пулӗ. Эрнекун каҫхине тата ҫӗрле каллех ҫумӑр ҫӑвӗ.

Канмалли кунсенче каллех шӑрӑх ҫитӗ: сулхӑнра та 28-33 градус пулӗ. Ытларикун каллех ҫумӑр вырӑнӑн-вырӑнӑн ҫӑвӗ. Кун хыҫҫӑн эрне тӑршшӗпех 25-30 градус шӑрӑх тӑрӗ. Ахӑртнех, ку ҫуллахи юлашки шӑрӑх пулӗ. Ҫурлан иккӗмӗш ҫурри ҫумӑрлӑ тата сивӗрех килмелле.

Ӗнер, ҫурла уйӑхӗн 3-мӗшӗнче, вӑйлӑ ҫил Етӗрнери Красноармейски урамӗнчи 5-мӗш ҫурт адреспа вырнаҫнӑ коммерци банкӗн ҫивиттине сӳсе кайнӑ. Пӑтӑрмах 16 сехет тӗлӗнче пулнӑ. Ҫил ҫав вӑхӑтра ҫеккунтра 17 метр хӑвӑртлӑхпа вӗрнӗ.

Кредит учрежденийӗн ҫивиттийӗ Етӗрнери пуҫламӑш шкулӑн территорине пырса выртнӑ.

Етӗрне район администрацийӗнче ӗнентернӗ тӑрӑх, вӗренӳ учрежденийӗ хытах сиенленмен, мӗншӗн тесен ҫивитти тимӗр карта ҫине ӳкнӗ. Халӗ яваплисем пӑтӑрмаха сирессипе ӗҫлеҫҫӗ.

Эльвира Хмелёва журналистӑн Фейсбукри страницинчи сӑнӳкерчӗк

Юлашки вӑхӑтра ҫутҫанталӑк хӑйӗн вӑйне хытах кӑтартма пуҫларӗ. Ҫил-тӑвӑл, шыв-шур, вут-кӑвар этеме — пуян-и вӑл е чухӑн-и, ӑслӑ-и е айван-и, пысӑк вырӑн йышӑнать е хура ӗҫе пурнӑҫлать-и — никама та уяса-суйласа тӑмасть. Алхасса кайсан пурин пурлӑхне те пӗр пек ишет-ватать, ҫӗмӗрет-ҫӗрпе танлаштарать.

Ҫутҫанталӑк тата технологи лару-тӑрӑвӗ ҫурт-йӗре, хваттере, ытти пурлӑха сиен кӳнине саплаштарассипе пирӗн республикӑра ятарлӑ программа йышӑнма палӑртнӑ. Ҫурла уйӑхн 2-мӗшӗнче ку ыйтупа Чӑваш Ен Правительствин ҫуртӗнче тӳре-шара канашлӑва пухӑннӑ. Сергей Артамонов вице-премьер ертсе пыракан мероприятие страхлакан компанисенче ӗҫлекенсем те хутшӑннӑ.

Сӑмах май каласан, ӗнер те пирӗн тӑрӑхра вӑйлӑ ҫил алхасрӗ. Шупашкарта, ав, «Пичет ҫурчӗ» чарӑнӑва тӳнтерсе янӑ.

Ҫурла уйӑхӗ те пире ӑшӑ та хӗвеллӗ ҫанталӑкпа савӑнтарӗ-и? Синоптиксем пӗлтернӗ тӑрӑх, сывлӑш температурин вӑтам кӑтартӑвӗ нормӑран 2-3 градус ӑшӑрах пулӗ, ҫумӑр ытларах ҫӑвӗ.

Уйӑхӑн пӗрремӗш ҫурринче 27-32 градус ӑшӑ тӑрӗ. Хӗвел пӑхӗ, ҫумӑр ытлах ҫумӗ.

Иккӗмӗш ҫурри вара ҫумӑрлӑ килӗ. Анчах, синоптиксем пӗлтернӗ тӑрах, сывлӑш температури те сивех пулмӗ, 20-25 градус тӑрӗ.

Ҫак кунсенчи ҫанталӑк кӗр енне сулӑннине аса илтерет. Апла пулин те синоптиксем Чӑваш Ене каллех шӑрӑх ҫанталӑк килессине систереҫҫӗ.

Утӑ уйӑхӗн 28-мӗшӗччен пирӗн тӑрӑхра сывлӑш температури уҫӑрах тӑрӗ-ха. Кӑнтӑрла 21-26 градус ӑшӑ пулӗ. Ытларикун аслатиллӗ ҫумӑр ҫӑвӗ, вӑйлӑ ҫил тухӗ. Юнкун ҫумӑр ҫумӗ, анчах пӗлӗтлӗ ҫанталӑк тӑрӗ.

Кӗҫнерникун каллех ӑшӑ фрончӗ килӗ. Вӑл кун уяртса тӑракан пӗлӗтлӗ ҫанталӑк пулӗ, ҫумӑр ҫуса иртӗ. Ҫумӑр эрнекун та ҫума пултарӗ, сывлӑш температури 23-28 градуспа танлашӗ. Канмалли кунсенче ҫанталӑк 30 градус таран ӑшӑтӗ.

Малтанласа шухӑшланӑ тӑрӑх, ҫитес эрне пуҫламӑшӗнче пирӗн патра 35 градус таран шӑрӑх пулӗ. Анчах вӑл 1-2 кунран ытла тӑмӗ.

Ку эрнере тинех ҫанталӑк сивӗтет, шӑрӑх каять. Паянхи пек ҫанталӑк ыран ҫеҫ тӑрӗ. Кӑнтӑрла хыҫҫӑн вырӑнӑн-вырӑнӑн аслатиллӗ ҫумӑр ҫӑвӗ, ҫил вӑйланӗ.

Кӗҫнерникунпа эрнекун каллех вӑйлӑ ҫумӑр ҫӑвӗ. Хӑш-пӗр районта пӗр тӑваткал метр ҫине 60 литр шыв лекӗ. Эрнекун 14-16 градус ҫеҫ ӑшӑ пулӗ.

Вырсарникун каҫхине чи сивӗ ҫанталӑк пулӗ. Ҫитес эрнере каллех шӑрӑх таврӑнӗ, ҫил лӑпланӗ, ҫумӑр ҫумӗ.

Чӑваш Енре шӑрӑх ҫанталӑк тӑрать. Синоптиксем пӗлтернӗ тӑрӑх, вӑл ҫак кунсенчех вӗҫленмест. Тунтикунчен кӑнтӑрласерен 27-32 градус тӑрӗ.

Ҫитес эрне пуҫламӑшӗнче 35 градус таранах ӑшӑтӗ. Атмосфера пусӑмӗ пӗчӗкленет, ҫавна май вырӑнӑн-вырӑнӑн ҫумӑр ҫума пултарӗ. Хӑш-пӗр вырӑнта пӑр та ӳкӗ. Ҫумӑр хыҫҫӑн та ҫанталӑк уҫӑлмӗ, пачах тепӗр май, пӑчӑланӗ. Ҫӗрлесерен 16-17 градус ӑшӑ пулӗ.

Ытларикун тата юнкун уҫӑрах пулӗ, ҫумӑр нумай ҫӑвас, ҫил вӑйланас хӑрушлӑх пур. Сывлӑш 20-25 градус ҫеҫ ӑшӑнӗ, ирсерен 10 градус кӑна пулӗ. Анчах шӑрӑх утӑ уйӑхӗн вӗҫӗнче каллех таврӑнӗ.

pogoda21.ru сайтри сӑн

Утӑ уйӑхӗн шӑрӑх пулассине систереҫҫӗ синоптиксем. Ыран ҫумӑр, пӑр ҫума пултарӗ, 30 градусран шӑрӑхрах пулӗ.

Вырсарникун кӑшт уҫӑлтарӗ, ҫӗрле 12 градус ҫеҫ ӑшӑ пулӗ. Ытларикунпа юнкун аслатиллӗ ҫумӑр ҫӑвас хӑрушлӑх пур. Ун хыҫҫӑн сывлӑшри нӳрӗк ӳснӗ май тата пӑчӑланӗ.

Ытларикунран пуҫласа республикӑра шӑрӑх ҫанталӑк тӑрӗ. Ҫӗрлесерен те 20 градус ытла пулӗ. 2010 ҫулта 38–40 градус таран шӑрӑх пулнӑччӗ. Хальхинче те иккӗмӗш декада вӗҫӗнче 35 градуса ҫитме пултарӗ.

Синоптиксем палӑртнӑ тӑрӑх, ҫӗртме уйӑхӗнчи пек шӑрӑх ҫанталӑк 30 ҫул пулман. Ҫӑмӑллӑн сывлама пулать: ҫитес 10 кунра республикӑра кӑштах уҫӑрах пулӗ.

Эрне вӗҫӗнче ҫеҫ аслатиллӗ ҫумӑр ҫӑвас хӑрушлӑх пур. Канмалли кунсенче 20-25 градус ӑшӑ тӑрӗ. Вырсарникун 11-16 градус ҫеҫ ӑшӑ тӑрӗ. Ҫитес эрне пуҫламӑшӗнче ҫурҫӗр енчен ҫил вӗрӗ. Ҫавна май кӑштах сивӗрех пулӗ, анчах юнкун каллех 30 градус шӑрӑх таврӑнӗ.

Малтанлӑха пӗлтернӗ тӑрӑх, чи шӑрӑх кунсем утӑ уйӑхӗн 9-10-мӗшӗсенче пулӗҫ.

Мускавпа Раҫҫейӗн Тӗп пайне утӑ уйӑхӗнче типӗ ҫанталӑк кӗтме пултарать. Кун пирки «Фобос» ҫанталӑк центрӗн ертсе пыракан ӗҫтешӗ Евгений Тишковец каласа панӑ. Типӗ ҫанталӑк тӑнине пула утӑ уйӑхӗнче ҫумӑрӑн уйӑхри норминчен 30% ҫеҫ ҫума пултарӗ.

Раҫҫейӗн тӗп пайӗнче утӑ уйӑхӗнче 94 мм ҫумӑр ҫумалла, кӑҫал вара, тип ҫанталӑка пула, 20-30% ҫеҫ ҫӑвӗ, ҫурҫӗр-анӑҫ пайне илес пулсан вара — унта уйӑх пачах та ҫумӑрсӑр иртме пултарӗ.

Евгений Тишковец пӗлтернӗ тӑрӑх утӑ уйӑхӗнче ҫакнашкал ҫанталӑк 1972 ҫулта (ун чухне 16 мм ҫунӑ), 1992 ҫулта (23,3 мм), 1997 ҫулта (6 мм), 2002 ҫулта (23,8 мм), 2010 ҫулта (12 мм) тата 2014 ҫулта (4 мм) пулса иртнӗ.

Утӑ уйӑхӗнче уяр кунсен шучӗ вӑтам кӑтартуран пысӑкрах, сывлӑш температури те вӑтамминчен 0,5-1 градус ӑшӑрах пулӗ.