Синоптиксем пӗлтернӗ тӑрӑх, республикӑра ҫак кунсенче самаях сивӗтет. Паян ҫанталӑк кӑштах ӑшӑтнӑ. Анчах ыранах пирӗн пата антициклон килӗ.

Ҫитес 3 кунра ҫӗрлесерен 20 градус таран сивӗтӗ. Хӑш-пӗр вырӑнта 25-26 градус таранах пулма пултарать. Кӑнтӑрла ӑшӑрах - 10 градус сивӗ. Сивӗ те уяр ҫанталӑк эрне тӑршшӗпех пулӗ. Пӗрремӗш декада вӗҫӗнче кӑна ӑшӑтӗ, юр ҫӑвӗ. Анчах кӑштахран каллех сивӗтӗ.

Ҫак канмалли кунсенче атмосфера пусӑме 770 мл таран хӑпарӗ.

Паян ҫанталӑк ӑшӑрах-ха, ирхине ҫумӑр пекки те вӗтӗртетрӗ. Ыран-паян ҫавӑн пекех пулӗ. Шӑматкун каҫхине тӗтре карса илӗ, ирпе ҫеҫ сирӗлӗ. Кун хыҫҫӑн вара сивӗтме тытӑнӗ.

Тунтикун уяр ҫанталӑк тӑрӗ. Каҫсерен 20 градус таран сивӗтме тытӑнӗ, кӑнтӑрла 5-10 градус сивӗ пулӗ.

Синоптиксем малтанлӑха пӗлтернӗ тӑрӑх, уяр та сивӗ ҫанталӑк раштавӑн пӗрремӗш декади вӗҫлениччен пулӗ.

chgtrk.ru сайтри сӑн

Паян республикӑра пӑрлӑ ҫумӑр ҫӑвать. Вӑл Мускавран килесси пирки синоптиксем пӗлтернӗччӗ.

Инкеклӗ лару-тӑру министерстви пӗлтернӗ тӑрӑх, пӑрлӑ ҫумӑра пула Чӑваш Енри 4 районта хӑш-пӗр ял-салара ҫутӑ сӳннӗ. Ку Комсомольски, Патӑрьел, Красноармейски районӗсене пырса тивнӗ. Ведомство пӗтӗмпе 8 ял электроэнергисӗр юлнине пӗлтерет. Ҫак 8 ялта 950 ҫурт шутланать, вӗсенче 2 пин ытла ҫын пурӑнать.

Хальхи вӑхӑтра ҫутӑсӑр юлнӑ ялсенче аварисене сирекен бригадӑсем ӗҫлеҫҫӗ.

pikabu.monster сайтри сӑн

Республикӑра эрне варринче пӑрлӑ ҫумӑр ҫума пултарасси пирки сайтра пӗлтернӗччӗ. Чӑнах та пулӗ-ши?

Паян Мускавра пӑрлӑ ҫумӑр ҫунӑ. "Чӑваш Енри ҫанталӑк" проект авторӗсем пӗлтернӗ тӑрӑх, пӑрлӑ ҫумӑр пӗлӗчӗсем Чӑваш Еннелле килеҫҫӗ. Ҫавна май ыран кӑнтӑрла хыҫҫӑн пӑрлӑ ҫумӑр ҫӑвас хӑрушлӑх питӗ пысӑк пулӗ. Пралуксем, йывӑҫсем пӑрланса ларма пултараҫҫӗ. Ҫитменнине, ҫил те кас-кас вӑйланӗ. Каҫ енне термометр 0 градусран ӑшӑрах кӑтартӗ, ҫумӑр ӳкме пуҫлӗ.

Пӑрлӑ ҫумӑр кӑнтӑр енчи районсенче ытларах ҫума пултарӗ, Шупашкар енче вара юр ӳкӗ ахӑртнех.

Тинех юр ҫурӗ. Халӗ урамра хӗлле пекех туйӑнать. Синоптиксем пӗлтернӗ тӑрӑх, ку юр ҫуркуннеччен ирӗлмӗ. Хальхи вӑхӑтра юр хулӑнӑшӗ 3-6 сантиметр ҫӳллӗш.

Паян ҫӗрле те юр ҫӑвӗ. Канмалли кунсенче вӑл самай хулӑнланӗ. Сывлӑш температури те сивӗ пулӗ. Шӑматкун ҫӗрле вара пушшех те сивӗтӗ, вырӑнӑн-вырӑнӑн 20 градус пулӗ. Канмалли кунсенче тӳпере хӗвел тухӗ.

Тунтикун ӑшӑтма пуҫлӗ. Хушӑран пӑрлӑ ҫумӑр та ҫӑвӗ. Юнкун вара пӑрлӑ ҫумӑр республикипех ҫума пултарӗ. Унтан каллех кӑшт юр ҫӑвӗ те чӳкӗн 26-27-мӗшӗсем валли 15-20 градус сивӗтӗ.

Паян ҫанталӑк сивӗтрӗ. Ыран татах сивӗтме пуҫлӗ. Анчах юр сахал ҫурӗ-ха. Синоптиксем пӗлтернӗ тӑрӑх, вӑл кӗҫнерникун е эрнекун ҫӑвӗ.

Чӳкӗн 17-18-мӗшӗсенче ҫил каллех вӑйланӗ, ҫеккунтра 16 метр таран вӗрӗ.

Юнкун тата шӑматкун кӑна пире ҫилсӗр ҫанталӑк савӑнтарӗ. Ыран тата тепӗр кун хӗвел пӑхӗ. Кӑнтӑрла та, ҫӗрле те сивӗ пулӗ. Ҫитес 10 кунра республикӑра кӑнтӑрла – 1-6 градус, ҫӗрле 12 градус таран сивӗ тӑрӗ.

pg21.ru сайтран илнӗ сӑнӳкерчӗк

Паян пирӗн тӑрӑхра вӑйлӑ ҫил алхасассине синоптиксем малтанах пӗлтерчӗҫ-ха. Инкеклӗ ӗҫсен министерстви ҫынсене СМС-ҫырусем те ярса панӑччӗ. Паян, чӳк уйӑхӗн 13-мӗшӗнче, ҫил ҫеккунтра 20-22 метр хӑвӑртлӑхпа вӗрессине систернӗччӗ.

Красноармейски районӗнче, ав, вӑйлӑ ҫил пӗрисен пахчинчи теплицӑна илсе ывӑтнӑ, чӳрече кантӑксӗсене ватнӑ. Кун пирки массӑллӑ информаци хатӗрӗсенчен пӗрне пӗлтерекен тупӑннӑ, сӑмахне ӗнентерме сӑнӳкерчӗк ярса панӑ.

«Ирхине пахчана тухрӑмӑр та теплица кӳршӗсен картине ҫитсе выртнӑ, чӳрече кантӑкне ватнӑ», — пӗлтернӗ Кивӗ Йӗкӗт ҫынни.

Чӳк уйӑхӗн пуҫламӑшӗ нормӑран сивӗрех пулнӑ – ҫапла пӗлтереҫҫӗ синоптиксем. Канмали кунсенче те ӑшах тӑрӗ, ҫумӑр ҫӑвӗ. Шупашкарта ҫак кунсенче 1 тӑваткал метр ҫине 20 литр шыв ӳкме пултарӗ.

Тунтикунран сивӗтме пултарӗ. Кунӑн пӗрремӗш ҫурринче юр ҫӑвӗ, ҫил-тӑман вӗҫтерӗ. Ытларикунпа юнкун та кӑштах ҫума пултарӗ. Эрне варринче типӗ ҫанталӑк тӑрӗ, хӗвел те тухӗ. Ҫӗрлесерен 10 градус таран шӑнтма пултарӗ, кӑнтӑрла 2-5 градус сивӗ тӑрӗ.

cap.ru сӑнӳкерчӗкӗ

Гидрометеологипе тӑван тавралӑха сӑнакан Чӑваш Енри центрта пӗлтернӗ тӑрӑх, паян тата ыран пирӗн тӑрӑха тӗтре карса илӗ.

Ҫанталӑк кӗҫӗр, чӳк уйӑхӗн 9-мӗшӗнче, тата ыран, чӳк уйӑхӗн 10-мӗшӗнче, талӑкӗпех тӗтреллӗ тӑрӗ. Тӗтре Шупашкара тата республикӑн хӑш-пӗр вырӑнне карса илӗ. Ҫавна май ҫынсене, уйрӑмах водительсемпе пассажирсене, ҫулта-йӗрте асӑрхануллӑ пулма ыйтаҫҫӗ.

Чӳк уйӑхӗннче мӗнле ҫанталӑк пулӗ? Юпа уйӑхӗ, синоптиксем пӗлтернӗ тӑрӑх, нормӑран ӑшӑрах пулнӑ.

Чӳк уйӑхӗн пӗрремӗш декадинче пирӗн пата антициклон килӗ: юр та, ҫумӑр та ҫумӗ, типӗ ҫанталӑк тӑрӗ. Хӑш чухне хӗвел те пахӗ.

Иккӗмӗш декадӑра ӑмӑрланӗ, ытларах ҫумӑр ҫӑвӗ. Ҫиллӗ пулӗ, ҫапах ҫанталӑк ӑшӑ тӑрӗ. Унччен синоптиксем пӗрремӗш юр ирӗлмессине пӗлтернеччӗ. Халӗ вара вӑл ирӗлсе пӗтессине калаҫҫӗ.

Виҫҫӗмӗш декадӑра юр нумай ҫӑвӗ. Ҫӗр шуралӗ, 10-15 сантиметр ҫӳллӗш юр ӳкӗ. Уйӑх вӗҫне 20 градус таран сивӗтме пултарӗ.