vk.ru/gov_cap_ru сӑнӳкерчӗкӗ

Сӗнтӗрвӑрринче йӗлтӗр спорчӗпе кӑсӑклантарма земство тренерӗ пулӑшать. «Земство тренерӗ» программӑпа унта Марина Латышева ӗҫе кӳлӗннӗ.

Вырӑнтисем пӗлтернӗ тӑрӑх, ку хула тахӑҫан Чӑваш Енри йӗлтӗр кадрӗсене туптакан вырӑн шутланнӑ. «Матрешка» йӗлтӗр йӗрӗ ҫинче республика шайӗнчи ӑмӑртусем иртнӗ, вырӑнти спортсменсем республика чысне сумлӑн хӳтӗлекенсен йышӗнче пулнӑ. Анчах юлашки ҫулсенче сӗнтӗвӑррисен иртсе кайнӑ ырӑ вӑхӑта аса илсе ассӑн сывласси ҫеҫ юлать.

Халӗ ку йӗлтӗр йӗрӗн ҫӗнӗрен вӑй илес шанчӑк пур. Елена Николаева ячӗллӗ спорт шкулӗнче Марина Латышева тренер-преподаватель ӗҫе кӳллӗннӗ. Хӗрарӑм пуян опытлӑскер, унӑн ӗҫ стажӗ — 32 ҫул. Сӗнтӗрвӑррине вӑл «Земство тренерӗ» федераци программипе ӗҫлет.

Марина Латышева — Чӑваш Енӗн йӗлтӗр спорчӗн пӗрлештернӗ командин тренерӗ, Йӗлтӗр ӑмӑртӑвӗн федерацийӗн правленийӗн пайташӗ, пӗрремӗш категориллӗ судья.

«Контактра» халӑх тетелӗнчи сӑн

Раҫҫейри фигуристка Камилла Нелюбова Ҫӗнӗ Шупашкар хулине килнӗ, «Сокол» кермене ҫитсе курнӑ.

Вӑл унта ҫамрӑк спортсменсемпе тӗл пулнӑ, вӗсемпе уҫӑ тренировка ирттернӗ, спортри хӑйӗн вӑрттӑнлӑхӗсемпе пайланнӑ.

Спортсменка пӑр ҫинче виҫҫӗллӗ аксель тунӑ, ачасене пӑр тӑрӑх шуса ярӑнмалли техника пирки каласа кӑтартнӑ.

Палӑртмалла: кӑҫалхи сезонран пуҫласа Камилла Нелюбова Чӑваш Ен чысне Раҫҫейри ӑмӑртусенче хӳтӗлет. Нарӑс уйӑхӗнченпе вӑл Олимп резервӗсен 4-мӗш спорт шкулӗнче ӑсталӑхне туптать. Шкул ӑна экипировкӑпа тата костюмсемпе тивӗҫтерет. Ку уйӑхран спортсменка Чӑваш Республикин Элтеперӗн стипендине илсе тӑма тытӑннӑ.

«Контактри» сӑн

Чӑваш Енри велочупуҫӑсем тӗнче шайӗнчи ӑмӑртуран ылтӑн тата пӑхӑр медальсемпе килнӗ.

Маунтинбайк енӗпе пулнӑ тупӑшу Челепи облаҫӗнче иртнӗ. Унта спортсменсем «кросс-кантри» дисциплинӑра вӑй виҫнӗ. Старта ҫӗршывари чи вӑйлӑ спортсменсем тухнӑ. Пирӗн спортсменсем те лайӑх кӑтартусемпе палӑрнӑ.

Шупашкарти 7-мӗш спорт шкулӗнче ӑсталӑхне туптакан Элина Семенова 17-19 ҫулсенчи юниоркӑсемпе тупӑшнӑ, чи йывӑр трассӑна парӑнтарса финиша пӗрремӗш ҫитсе пьедесталӑн пӗрремӗш картлашки ҫине хӑпарнӑ. Алина Карлова вара хӗрарӑмсен хушшинче ӑмӑртнӑ, виҫҫӗмӗш пулнӑ. Ҫапла вӑл пӑхӑр медаль ҫӗнсе илнӗ.

мӗш Олимп резервӗн спорт шкулӗн сӑнӳкерчӗкӗ

Шупашкарта Чӑваш Енри чи вӑйлӑ биатлонистсен ӑмӑртӑвӗ иртӗ. Ӑмӑрту утӑ уйӑхӗн 20-22-мӗшӗсенче 2-мӗш Олимп резервӗн спорт шкулӗнче пулӗ. Вӑл хулари Станци ҫумӗнчи урамри 10-мӗш В ҫуртра вырнаҫнӑ.

Биатлон енӗпе Чӑваш Енӗн чемпионачӗпе ӑмӑртӑвне тӑватӑ категорири спортсменсем хутшӑнӗҫ:

— арҫынсемпе хӗрарӑмсем (2005 ҫулта тата унччен ҫуралнисем);

— 19-20 ҫулсенчи (2006–2007 ҫулсенче ҫуралнисем) юниор хӗрсемпе каччӑсем;

— 17-18 ҫулсенчи (2008–2009 ҫулсенче ҫуралнисем) яшсемпе пикесем;

— 15-16 ҫулсенчи (2010–2011 ҫулсенче ҫуралнисем) арҫын ачасемпе хӗрачасем.

Ӑмӑрту икӗ куна пырӗ. Утӑ уйӑхӗн 21-мӗшӗнче спортстменсен роллер-спринта тухмалла. Утӑ уйӑхӗн 22-мӗшӗнче кросс-спринтра ӑмӑртӗҫ.

Ӑмӑрту 10 сехетре пуҫланӗ.

Шупашкар округӗнче «Сыр Кубокӗ» шахмат турнирӗ иртӗ. Унта утӑ уйӑхӗн 12-мӗшӗнче ҫитсе курма сӗнеҫҫӗ.

Мероприяти Станьял ялӗнчи «Чӑваш Кӗрӗм» этнографи комплексӗнче иртӗ. Унта шахматла вылякансем пухӑнӗҫ. Ӑмӑртӑвӑн хӑйне евӗрлӗхӗ – кубока лайӑх пахалӑхлӑ сыртан хатӗрлӗҫ. Хальхи вӑхӑтра ӑна тума тытӑннӑ ӗнтӗ. Ку ӗҫе Станьялта Алексей Андреев патӗнче ӗҫлекен сыр пӗҫерекен ӑстасем хатӗрлеҫҫӗ. Тупӑшӑва хутшӑнакансем пушӑ алӑпа каймӗҫ. Кашнине сырсем парнелӗҫ.

Ку кӑна мар. Хӑнасемпе экскурси ирттерӗҫ, чӑваш халӑхӗн йӑли-йӗркипе тата культурипе паллаштарӗҫ. Ҫавӑн пекех ӑстасен ярмӑркки иртӗ.

«Контактра» халӑх тетелӗнчи сӑн

Пирӗн республикӑри спортсменка Варвара Зайцева Эренпур хулинче пауэрлифтинг енӗпе иртнӗ ӑмӑртура харӑсах икӗ рекорда ҫӗнетнӗ!

Унта Раҫҫейри 50 регионти 300 ытла атлет хутшӑннӑ. Пирӗн ентеш 47 килограмм тайманнисен виҫе категорийӗнче вӑй виҫнӗ.

Варвара штангӑна выртса 97,5 килограмм йӑтнӑ. Ҫапла вӑл кӗмӗл медаль ҫӗнсе илнӗ тата Чӑваш Енри юниоркӑсен хушшинче рекорда ҫӗнетнӗ.

Штангӑна классика мелӗпе йӑтса пирӗн ентеш 70 килограма парӑнтарнӑ. Ку категорире вӑл пӑхӑр медаль илнӗ, хальхинче вара Чӑваш Енри хӗрарӑмсен хушшинчи рекорда ҫӗнетнӗ.

Ҫакӑн пек ҫитӗнӳсем туса Варвара Зайцева Раҫҫейӗн пӗрлештернӗ тӗп команди йышне кӗнӗ.

Палӑртса хӑварар: спортсменкӑна Дмитрий Соловьев тренер ӑмӑртусене хутшӑнма хатӗрлет.

«Контактри» сӑн

Иртнӗ канмалли кунсенче республикӑра Пӗтӗм Раҫҫейри профсоюзсен велочупӑвӗ иртнӗ. Вӑл кӑҫалхипе ҫиччӗмӗш хут йӗркеленнӗ. Велочупу «100 ҫухрӑм – мӗншӗн тесен эпир пӗрле» ятлӑ пулнӑ.

Велочупӑва Раҫҫейри 20 ытла регионтан хутшӑннӑ. 200 ытла велочупуҫӑ 120 ҫухрӑма парӑнтарнӑ. Вӗсен маршручӗ Комсомольски, Патӑрьел, Елчӗк патӗнчен иртнӗ. Финиш Комсомольскинчех пулнӑ.

Велочупӑва ҫамрӑкксем те, аслӑ ӳсӗмри ҫынсем те хутшӑннӑ. Пӗрисем пӗрремӗш хут старта тухнӑ, теприсем вара пӗр велочупӑва та сиктермен.

Маршрута лекнӗ ялсенчи ҫынсем вара спорта юратакансене ӑшшӑн кӗтсе илнӗ. Пӗрле сӑнӳкерчӗк тума та ӗлкӗрнӗ вӗсем.

«Контактри» сӑн

Анатолийпе Виталий Глазковсене пауэрлифтинг енӗпе «Раҫҫей спорт мастерӗ» ята панӑ. Хушӑва РФ Спорт министерстви алӑ пуснӑ. Каччӑсем Суздаль хулинче иртнӗ Раҫҫей кубокӗнче пысӑк кӑтартусемпе палӑрнӑ.

Анатолипе Виталий — йӗкӗреш. Куславкка каччисем Шупашкарти транспорт тата строительство технологийӗсен техникумӗнче вӗреннӗ. Халӗ ӗҫлеҫҫӗ, ҫав вӑхӑтрах спорт валли вӑхӑт тупаҫҫӗ: ҫамрӑксем ӑсталӑхне Шупашкарти В.С.Соколов ячӗллӗ спорт шкулӗнче аталантараҫҫӗ.

Виталий – паурлифтинг енӗпе Ази первенствин ҫӗнтерӳҫи, Анатолий Раҫҫейри ӑмӑртусен ҫӗнтерӳҫи тата призерӗ шутланать.

Шупашкарти Олимп резервӗн 2-мӗш спорт шкулӗн сӑнӳкерчӗкӗ

Чӑваш Енре тинех биатлон енӗпе ӑмарту иртӗ. Хӗллехи биатлон енӗпе мар-ха, ҫуллахи.

Лапсарта биатлон комплексне чылай ҫул нушаланса хута ячӗҫ. Кайран тусан пӗтерсен те унта кӑлтӑк тупӑнни пирки Чӑваш халӑх сайчӗ те пӗлтернӗччӗ.

Кӑҫалхи ака уйӑхӗн вӗҫӗнче Раҫҫейӗн биатлонистсен союзӗпе «МАТЧ» спорт каналӗ унта килнӗччӗ. Курма мар, тӗрӗслевпе. Вӗсем Шупашкарти Олимп резервӗн 2-мӗш спорт шкулӗн Лапсарти биатлон комплексне тӗрӗсленӗ.

Асӑннӑ комплексра малтан Атӑлҫи тӑрӑхӗнчи регионсен биатлон ӑмӑртӑвӗ иртӗ. Вӑл ҫурла уйӑхӗн 20-24-мӗшӗсенче пулӗ. Унтан, авӑн уйӑхӗн 14-21-мӗшӗсенче, биатлон енӗпе Раҫҫей чемпионачӗ иртӗ.

cap.ru сайтри сӑн

Ыран, ҫӗртме уйӑхӗн 20-мӗшӗнче, республикӑра йӑлана кӗнӗ сывлӑхпа спорт кунӗ иртӗ. Сывӑ пурнӑҫ йӗркине пӑхӑнакансем республикӑна тата муниципалитета пӑхӑнакан спорт обьекчӗсене тӳлевсӗр кӗме пултараҫҫӗ.

Каток, бассейн, транажер тата фитнес залсем, стадион... – пӗтӗмпех тӳлевсӗр пулӗҫ. Акцие пӗтӗмпе 4,6 пин ытла лапам хутшӑнать.

Сывлӑха ҫирӗплетме килекенсем валли программа хатӗрленӗ. Тренерсем ӑсталӑх класӗсем ирттереҫҫӗ, уҫӑ тренировкӑсем пулаҫҫӗ.

Мероприятисен тулли планӗпе ЧР Спорт министерствине пӑхӑнакан организацисен сайтӗнче тата халӑх тетелӗнче паллашма пулать.