21.мвд.рф сӑнӳкерчӗкӗ

Утӑ уйӑхӗн 3-9-мӗшӗсенче пирӗн республикӑра полици, Федерацин хӑрушсӑрлӑх службин, Раҫҫейӗн Шалти ӗҫсен министерствин лини пайӗн ӗҫченӗсем ют ҫӗршыв ҫыннисемлӗ 1,5 пин ытла объекта тӗрӗсленӗ.

Тӗрӗслеве пурӑнмалли ҫуртсенче тата хостелсенче, транспортра, стройкӑра, суту-илӳ тата общество апатланӑвӗн учрежденийӗсенче ирттернӗ.

Операци вӑхӑтӗнче правӑна пӑснӑ 125 тӗслӗхе тупса палӑртнӑ, вӗсенчен чылайӑшӗнче – пирӗн ҫӗршывра саккуна пӑсса пурӑнни. 17 ҫынна тӑван тӑрӑхне кӑларса яма йышӑннӑ, 8-шне вӑхӑтлӑх пурӑнмалли центра вырнаҫтарнӑ, унтан вӗсене те тӑван ҫӗршывӗсене ӑсатӗҫ.

Миграци учётне тӑратнӑ 12 тӗслӗхе тупса палӑртнӑ, пӗр эрнере пуҫиле 2 пуҫарнӑ.

cap.ru сайтри сӑн

Шел те, каллех хурлӑхлӑ хыпар: Ҫӗмӗрле хулинче 35 ҫулти хӗрарӑм путса вилнӗ. Ку инкек ӗнер, ҫӗртме уйӑхӗн 13-мӗшӗнче, пулнӑ.

Унӑн виллине водолазсем шыранӑ. Ӑна паян кӑна ҫыран хӗррине илсе тухнӑ. Халӗ хӗрарӑм мӗнле майпа путнине тӗпчеҫҫӗ.

Палӑртмалла: шыва кӗмелли сезон пуҫланнӑранпа Чӑваш Енре 8 ҫын путса вилнӗ. Аса илтерер: ӗнер Шупашкарти тӗп пляжра 13 ҫулти хӗрача путса пурнӑҫран уйрӑлнӑ.

"На связи" форумри сӑн

Ӗнер 16 сехет тӗлнелле Шупашкарти тӗп пляжра инкек пулнӑ - 13 ҫулти хӗрача путса вилнӗ. Вӑл унта амӑшӗпе, тӑванӗсемпе шыва кӗме килнӗ.

Ача ытлашши шала та ишсе кӗмен - вӑл буйкӑсем патӗнче путнӑ. Вырӑна ҫитнӗ медиксем ӑна реанимаци тума хӑтланнӑ, анчах, шел те, усӑсӑр.

Халӗ Мускав районӗн прокуратури тӗрӗслев ирттерет.

Ӗнер Ҫӗрпӳ округӗнче 43-ри арҫын путса вилнӗ. Ҫӗмӗрлере вара 1970 ҫулта ҫуралнӑ арҫын шыв айне анса кайса пурнӑҫран уйрӑлнӑ.

cap.ru сайтри сӑн

Ӗнер, ҫӗртме уйӑхӗн 12-мӗшӗнче, Атӑл леш енче вӑрманта аҫа ҫапнӑ. Юлашки вӑхӑтра ку – виҫҫӗмӗш тӗслӗх.

Ҫулӑм тухнине 17 сехет тӗлнелле авиопатруль вӑхӑтӗнче асӑрханӑ. Вырӑна пӗр тӑхтамасӑр 4 пушар автоцистерни, 2 МЛПК, 3 трактор, 1 вездеход, 24 ҫын тухнӑ. Пушара 22 сехет те 10 минутра тӗппипех сӳнтернӗ.

Аса илтерер: унччен ҫӗртме уйӑхӗн 5-мӗшӗнче Шӑмӑршӑ тата ҫӗртмен 10-мӗшӗнче Улатӑр вӑрман хуҫалӑхӗсенче аҫа ҫапнине пула пушар тухнӑ.

Кандинский нейросеть сӑнӳкерчӗкӗ

Ҫӗмӗрлере пурӑнакан 47 ҫулти хӗрарӑм эрнере 2 миллион ытла тенкӗсӗр тӑрса юлнӑ.

Ниҫта та ӗҫлемен хӗрарӑм интернет-лапамсенчен пӗринче реклама курнӑ, унта инвестици хывса укҫа ӗҫлесе илме май пуррине пӗлтернӗ. Кун валли уйрӑм менеджерпа канашлама сӗннӗ, вӑл ӑс-тӑн парассине ӗнентернӗ.

«Консультантпа» калаҫа-калаҫа хӗрарӑм пӗр эрнере тӗрлӗ банкра 2 миллион ытла тенкӗ кредит илсе тултарнӑ, укҫана паллӑ мар счётсем ҫине куҫарса янӑ.

minpriroda.cap.ru сӑнӳкерчӗкӗ

Улатӑр муниципаллӑ округӗнче вӑрман ҫунма пуҫланӑ. Пӑтӑрмах сӑлтавӗ — аҫа ҫапни.

Инкеке ӗнер, ҫӗртме уйӑхӗн 10-мӗшӗнче, 15 сехетре асӑрханӑ. Ҫалавҫӑсем пушар вырӑнне вӑхӑтра пырса ҫитсе вут-ҫулӑма ытлашши сарӑлса кайма паман, васкавлӑн сӳнтернӗ.

Эйпеҫ вӑрман хуҫалӑхӗнчи вӑрманти йывӑҫа аҫа ҫапнине пула пушар 0,035 гектар ҫинче алхаснӑ. Вут-ҫулӑма ҫур сехетрен сӳнтернӗ, мӗнпур ӗҫе 17 сехет те 30 минутра вӗҫленӗ.

Ҫак ӗҫе Вӑрман хуралӗн 5 ӗҫченӗ тата вӑрман хуҫалӑхӗнче тӑрӑшакан 10 специалист хутшӑннӑ. Вӗсем техникӑпа, ҫав шутра, плуглӑ тракторпа, ӗҫленӗ.

Кандинский нейросеть сӑнӳкерчӗкӗ

Ултавҫӑсем Шупашкарта пурӑнакан 82 ҫулти кинемее улталама тӑнӑ. Ун патне вӗсем килти телефон ҫине шӑнкӑравланӑ.

Паллӑ мар ҫынсем кинемее ватӑ ҫын ячӗпе такамсем шанчӑк хучӗ илнӗ тесе ӗнентернӗ. Ҫавна май укҫа-тенке хӑрушсӑр счёт ҫине куҫарса хумалла тесе асӑрхаттарнӑ.

Шӑнкӑравлаканни хӑйӗн пирки право хуралӗнче ӗҫлекен ҫын тесе каланӑ. Банка ҫитсе укҫана хӑрушсӑр счёт ҫине куҫарма хушнӑ.

Кредит учрежденийӗнче ӗҫлекенсем кинемее укҫа парас вырӑнне полицие чӗнсе илнӗ. Ҫапла вара ватӑ ҫыннӑн укҫине ултавҫӑсен вӑрлама май килмен.

"Про Город" сайтӗнчи сӑн

Паян Ҫӗнӗ Шупашкарта нумай хваттерлӗ ҫурт ҫывӑхӗнче арҫын виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.

Инкек Тӗкӗрҫ тӑкӑрлӑкӗнчи 3-мӗш ҫурт патӗнче 13 сехет ҫурӑра пулнӑ. Ҫакна курнӑ ҫынсем каланӑ тӑрӑх, арҫын 4-мӗш хутран вӗренпе анма тӑнӑ та аялалла персе аннӑ.

Халӗ Следстви комитечӗн Чӑваш Енри следстви органӗсем тӗрӗслев ирттереҫҫӗ.

cap.ru сӑнӳкерчӗкӗ

Шӑрӑх ҫанталӑкра шывра чӑмпӑлтатас килет. Анчах, шел те, асӑрханмасан инкек пулать.

Ҫӗртмен 8-мӗшӗнче Шупашкарта Пионер пӗвинче 39 ҫулти арҫын путса вилнӗ. Унӑн виллине водолазсем кӑларна.

Паян кӑнтӑрла ҫӑлавҫӑсене Шупашкарти Ботаника садӗнче арҫын шыва кӗнӗ те путма пуҫлани ҫинчен шӑнкӑравласа пӗлтернӗ. Юрать-ха, ӑна вӗсем ҫӑлма ӗлкӗрнӗ.

Палӑртмалла: ҫулталӑк пуҫланнӑранпа шывра 4 ҫын путса вилнӗ.

Кандинский сӑнӳкерчӗкӗ

Хуралҫӑ карчӑк телефонне вӑрланӑ. Пӑтӑрмах Ҫӗнӗ Шупашкарта пулса иртнӗ.

83 ҫулти кинемей асӑннӑ хулари Винокуров урамӗнчи лавккара хӑйӗн телефонне ҫухатнӑ. Вара вӑл йӗрке хуралҫисенчен пулӑшу ыйтнӑ.

Телефона лавккара ӗҫлекен 56 ҫулти хуралҫӑ тупнӑ. Ҫав телефона унӑн арӑмӗ тухса пенӗ. Сӗнтӗрвӑрри районӗнче пурӑнакан хуралҫӑ тӗлӗшпе вӑрланӑшӑн пуҫиле ӗҫ пуҫарнӑ.