behance.net сӑнӳкерчӗкӗ

«S7 Airlines» авиакомпани хӑйӗн самолечӗсене Мускавран Дубая вӗҫтерме тытӑннӑ. Кун пирки авиакомпанин пресс-служби пӗлтернӗ.

Рейссене икӗ аэропорта уҫнӑ: Дубая тата Аль-Мактума. Самолётсем эрнере тӑватӑ хутчен вӗҫӗҫ. Тунтикунсерен — Дубая, Аль-Мактума — юнкунсерен, эрнекунсерен тата вырсарникунсерен.

Юрий Сиволоб архивӗнчи сӑн

«Планета» кондитер производствин заведующийӗ Юрий Сиволоб кулинар пултарулӑхӗнче каллех пысӑк кӑтартусем кӑтартнӑ. GASTRO TUNISIA гастрономи фестивалӗ Тунисра иртнӗ. Сумлӑ мероприятие 20 ытла ҫӗршыври шеф-поварсем, рестораторсем, кулинарсем килнӗ.

Юрий Сиволоб «Арт-класс» номинацире ылтӑн медаль тата диплом ҫӗнсе илнӗ. Сӑмах май, вӑл тӗнче шайӗнчи конкурссенчен яланах тӗрлӗ медальпе таврӑнать. 2022 ҫулта, тӗслӗхрен, Мускавра пекарьсен кондитерсен тата поварсен хушшинче тӗнче шайӗнче иртнӗ конкурсран ылтӑн медальпе таврӑннӑ.

forum.na-svyazi.ru сайтран илнӗ сӑнӳкерчӗк

Ют ҫӗршывсене тухса каякансем хула ҫыннисем хушшинче ялтисенчен ытларах. Ҫакӑн пек пӗлтернӗ «Ҫыхӑнура» форумра Чӑвашстат хыпарланине тӗпе хурса.

Хула ҫыннисем, ялта пурӑнакансемпе танлаштарсан, ют ҫӗршывсене 17 хут ытларах утхса кайнӑ.

2023 ҫулта Чӑваш Енрен 2 496 хула ҫынни тата 146 ял ҫынни тухса кайнӑ. 2022 ҫулат ку уйрӑмлӑх тата пысӑкрах пулнӑ-мӗн — 20 хут (5 104 хула ҫынни тата 251 ял ҫынни).

Пӗлтӗр пирн республикӑран 14 418 ҫын тухса кайнӑ. 11 776 ҫын урӑх региона ҫул тытнӑ, 2 642 —ют ҫӗршыва.

Чӑваш Ене 13 476 ҫын килнӗ. Ҫав шутран 11 091-шӗ — Раҫҫейӗн тӗрлӗ субъектӗнчен, 2 385-шӗ — ют ҫӗршывран.

kp-ru.turbopages.org/turbo/kp.ru сайтри сӑн

Испанире тӗнчери чи ватӑ ҫын пурнӑҫран уйрӑлнӑ. Мария Браньяс Морера 118 ҫула кайнӑ пулнӑ.

Хӑй Мария мӗнле майпа ҫавӑн чухлӗ ҫул пурӑннине ӑнланман та. Вӑл каланӑ тӑрӑх, лӑпкӑ пурӑннӑ, кӑмӑллах мар ҫынсемпе калаҫма тӑрӑшман. Андрей Кондрахин кардиолог вара ҫапла ӑнлантарать: ҫын нумай пурӑнассин 85 проценчӗ генсенчен килет.

Мария Браньяс АПШра ҫуралнӑ, вӑл 8 ҫулта чухне ҫемйи Испание куҫса килнӗ. Кинемей хӑй ӗмӗтленнӗ пекех пурнӑҫран уйрӑлнӑ: ҫывӑрнӑ чухне лӑпкӑн, пӗр асапланмасӑр.

Кандинский нейросеть сӑнӳкерчӗкӗ

Мускавран Балине самолётсем вӗҫме пуҫлӗҫ. Асӑннӑ ҫӗршыва хальхи вӑхӑтра тӳрӗ рейс ҫук. Самолётсене «Аэрофлот» авиакомпани ҫӳретме тытӑнӗ.

Мускавпа Балине тӳрӗ рейспа ҫыхӑнтаракан рейса авӑн уйӑхӗн 17-мӗшӗнче уҫӗҫ.

SU296 рейс пассажирсене Шереметьево аэропортран Денпасара ытларикунпа шӑматкунсерен турттарӗ. Самолёт 14 сехет те 40 минутра ҫула тухӗ. Балинчен каялла юнкунпа вырсарникунсерен 10 сехет те 5 минутра хускалӗ.

Унсӑр пуҫне юпа уйӑхӗн 3-мӗшӗнчен таиа тепӗр рейс хушӑнӗ: Мускавран самолёт кӗҫнерникунсерен вӗҫме пуҫлӗ, Балирен – эрнекунсерен.

"Контактри" сӑн

Олимп вӑййисенче гендер шӑв-шавӗ ҫӗкленнӗ. Хӗрарӑмсен хушшинче бокс енӗпе 1/4 финал пынӑ чухне Итали спортсменки Анжела Карини Алжир спортменкине, хӑйне хӗрарӑм текен арҫынна Имане Хелифа (трансгендер ӗнтӗ), хирӗҫ 46 ҫеккунт ҫеҫ тытӑнса тӑнӑ. Карини малалла кӗрешмен, «Мана питӗ ыраттарать», - тенӗ. Унтан ӑна алӑ та паман.

Сӑмах май, пӗлтӗр Хелифа юнра тестостерон нумай тесе тӗнче чемпионатне кӗртмен, Олимп вӑййисене хутшӑнма вара ирӗк панӑ.

Пресс-конференцире Карини хӗрарӑмсен спортне трансгендерсене хутшӑнмашкӑн чарма чӗнсе каланӑ.

Италири Вальдоббьядене хулин мэрӗ, 47 ҫулти Лучано Фрегонезе, кашни эрнерех ытлашши килограмсене ҫунтарас тӗллевпе хула ҫыннисемпе пӗрле уҫӑлса ҫӳрет. Кун пирки The Guardian пӗлтерет.

Ҫӗртме уйӑхӗнче Фрегнонезене виҫҫӗмӗш хут хула мэрӗ пулма суйланӑ, вӑл хӑйӗн сывлӑхне лайӑхлатма тӑрӑшӑп тесе шантарнӑ. Хула пуҫлӑхӗ каланӑ тӑрӑх, ҫак вырӑна йышӑннӑ вӑхӑтра вӑл 50 килограмм мӑнтӑрланнӑ, халӗ 140 таять.

Чиновник мӑнтӑрланса кайнине «халӑхпа пӗрле пулма юратнипе» тата вӑрах вӑхӑт хушши ӗҫлеме тивнипе ӑнлантарать. Мэр вырӑнне йышӑннӑ хыҫҫӑн унӑн спортпа аппаланма тата хусканусем тума вӑхӑт юлман имӗш. «Тепӗр йывӑрлӑх — эпӗ тутлӑ ӗҫсе ҫиме юрататӑп, кунта вара лайӑх ҫитереҫҫӗ, ӗҫтереҫҫӗ, ҫавӑнпа та диетӑна пӑхӑнма ҫав тери йывӑр», — йышӑнать мӑнтӑрлана кайнине Фрегонезе.

Мӑнтӑрланнине пула уншӑн утма та, сывлама та йывӑр пулса кайнӑ, ҫурӑмпа чӗркуҫҫи те ыратма пуҫланӑ. Хула стени ҫинчи граффити ӳкерни юлашки тумлам пулса тӑнӑ — тахӑшӗ хула пуҫлӑхне «мӑн хырӑм» тесе йӗкӗлтесе илнӗ, сӑнӳкерчӗкӗ вара халӑх тетелӗ тӑрӑх саланнӑ.

Ҫакӑн хыҫҫӑн вӑл 90 килограмм таран начарланма шантарнӑ — мэр вырӑнне пӗрремӗш хут йышӑннӑ чухне шӑпах ҫавӑн чухлӗ вӑл тайнӑ.

Малалла...

Шупашкарти 42 ҫулти Роман Эн («Про Город Чебоксары» хаҫата вӑл хӑйӗнпе ҫавӑн пек паллаштарнӑ, хӑйӗн тулли ятне каламан) Кӑнтӑр Америка тӑрӑх велоиспедпа курса ҫӳрет.

Роман — инженер-электрик. Вӑл Шупашкарти машиностроительство техникумӗнче тата И. Н. Ульянов ячӗллӗ ЧПУра вӗреннӗ. Халӗ арҫын Чилире.

Велоҫулҫӳреве 2022 ҫулти раштав уйӑхӗнче тухса кайнӑ. Ун чухне вӑл Мускавран Венесуэлӑна вӗҫсе кайнӑ, лере велосипед туяннӑ.

Ҫулҫӳрев вӑхӑтӗнче вӑл велосипедпа 14,5 пин ытла километр кайнӑ, кунне 50 километртан пуҫласа 200 киломтер таран ҫӗнет. Паянхи кун тӗлне Кӑнтӑр Америкӑри ултӑ ҫӗршывра пулнӑ.

Ҫул ҫинче вӑл палаткӑра ҫывӑрма тӑрӑшать, ӑна лартма май килмесен хотселсенче те хӑна ҫурчӗсенче ҫӗр каҫать. Уйӑхсерен вӑл 35 пин тенкӗ тӑкаклать. Эрех ӗҫсе, пирус туртса укҫа пӗтермест.

Шупашкар арҫынни сӑнанӑ тӑрӑх, Кӑнтӑр Америкӑри ҫынсем пирӗн патрисемпе танлаштарсан сӑпйалӑ пурӑнаҫҫӗ пулин те ӑшӑ кӑмӑллӑрах.

Африкӑри чиркӳ ҫыннисем Чӑваш Ене килсе ҫитнӗ. Курма мар, вӗренме.

Камерунтан, Кот-д’Ивуартан, Тӗп Африка Республикинчен, Габонтан, Бенинтан тата Буркина-Фасоран ултӑ пачӑшкӑ килнӗ. Вӗсем арҫынсен Ҫветтуй Троицкий мӑнастирӗнче пулӗҫ. Клириксем – Ҫурҫӗр Африка епархийӗнчен. Вӑл Вырӑс православи чиркӗвӗ Африкӑра уҫнӑ икӗ епархирен пӗри.

Африкӑри чиркӳ ҫыннисене Василий атте вӗрентӗ. Аякран килнӗскерсемпе вӑл хрантсусла калаҫӗ. Василий пачӑшкӑ темиҫе ҫул каялла Чӑваш Ене Францирен килнӗ. Малтан вӑл Улатӑрта ӗҫленӗ, халӗ – Шупашкарта. Пирӗн тӑрӑха килсен вӑл вырӑсла вӗреннӗ.

Армени ШӖМӗ тунӑ сӑн

Вӑйлӑ ҫумӑр ҫуса иртнӗ хыҫҫӑн Дебед шывӗ ҫыранӗсенчен тухнӑ.

Арменире Дебед юханшыв ҫырансенчен тухнӑран ял-хуласене шыв илме тытӑннӑ. Кун пирки Армени ШӖМӗн пресс-служби пӗлтернӗ.

Вӑрах вӑхӑт хушши ҫӑвакан ҫумӑрсене пула шыв шайӗ шар кӑтартма пултаракан виҫерен иртнӗ. Хальхи вӑхӑтра шыв айне Алаверди, Ахтала, Ташир хуласем, тата темиҫе поселок пулнӑ.

Грузи енне каякан патшалӑх трассине хупнӑ, Ванадзор – Алаверди автоҫул вырӑнӗ-вырӑнӗпе арканнӑ. Ҫавӑн пекех Каркоп салана ҫыхӑнтаракан Дебед урлӑ хывнӑ кӗпер ишӗлсе аннӑ. Ереван – Тбилиси чукун ҫула та вӑхӑтлӑха хупса хунӑ. «Баграташен» тӗрӗслесе кӑларакан пункт урлӑ иртме май ҫукран Грузие «Гогаван» тата «Бавра» КПП урлӑ лекме пулать.

Юханшыва Opel автомобиль кӗрсе ӳкнӗ, водительпе пӗрлех. Малтанлӑха пӗлтернӗ тӑрӑх, вӑл вилнӗ — ӑна шырас ӗҫ малалла пырать. Шыв илнӗ районсенчен 77 ҫынна эвакуациленӗ. Ҫӑлав службисем хӑйсен ӗҫне малалла пурнӑҫлаҫҫӗ — шар курнисене пулӑшас ӗҫре пурӗ 300 ытла ҫӑлавҫӑ тӑрӑшать.