t.me/Chuv_today каналтан илнӗ сӑнӳкерчӗк

Канашра ҫуралнӑ Кирилл Баранов «СмартКардио» портативлӑ аппарат шухӑшласа кӑларнӑ. Пӗччен мар. Темиҫен пӗрле пулса.

Мини-гаджет пӗр харӑсах темиҫе ӗҫ пурнӑҫлама пултарать-мӗн: электрокардиограмма ӳкерсе илет, юнри гемоглобинра кислород мӗн чухлине, ӳт температурине, ҫын епле сывланине, юн тымарӗ епле тапнине виҫейрет.

«Халӗ эпир телемедицина сервисне шухӑшласа кӑлараканпа ҫыхӑну тытса ӗҫлетпӗр. ЭКГ ӳкерсе илнӗ хыҫҫӑн ҫывӑх вӑхӑтра онлайн-консультаци илме май килӗ. Ҫакӑ пирӗн прибора ыттисенчен уйрӑлса тӑма май парать, тӗнчере ун пекки ҫук», — тесе каланӑ Кирилл.

Стопкоронавирус.рф сайтри сӑн

Раштав уйӑхӗнче республикӑра 5 ҫын кӑшӑлвирусран вилнӗ, кӑрлач уйӑхӗнче - 9 ҫын. Эппин, ку инфекцирен вилесси 2 хут ӳснӗ.

Стопкоронавирус.рф сайт пӗлтернӗ тӑрӑх, кӑрлачӑн 22-28-мӗшӗсенче 6 ҫыннӑн пурнӑҫӗ татӑлнӑ. Пӗлтӗр юпа уйӑхӗнче 12 ҫын вилнӗ, чӳк уйӑхӗнче - 3 ҫын.

Пандеми пуҫланнӑранпа республикӑра 4706 ҫыннӑн пурнӑҫӗ кӑшӑлвируса пула татӑлнӑ.

cap.ru сӑнӳкерчӗкӗ

Шупашкарти Президент пепкелӗх центрӗнче пӗлтӗр чӳк уйӑхӗнче 890 грамм таякан, 32 сантиметр ҫӳллӗш хӗрача ҫуралнӑ. Амӑшӗ пульницӑна чылай маларах лекнӗ, тухтӑрсем варти пепкене упраса хӑварас тесе тӑрӑшнӑ. Ҫапах ача кун ҫути курма васканӑ - вӑл 28-мӗш эрнере ҫуралнӑ.

Ача 1,5 уйӑх реанимацире выртнӑ. Кайран ӑна тин ҫуралнӑ ачасен патологи уйрӑмне куҫарнӑ. Унта амӑшӗ те пӗрле выртнӑ. Офтальмологсем ачан куҫне операци тунӑ.

Кан хыҫҫӑн виҫӗ эрнерен пепкепе амӑшне киле кӑларнӑ. Ача 2,5 кг тайнӑ, 44 сантиметр тӑршшӗ пулнӑ.

cap.ru сайтри сӑн

Республикӑри ача-пӑча клиника пульницинчи тухтӑрсем ток ҫапнӑ икӗ ачана пулӑшнӑ. Вӗсене халӗ киле янӑ ӗнтӗ.

3-ри арҫын ача тройнике пӑта чикнӗ. Унӑн пӳрнисем пиҫсе кайнӑ. Ачана пульницӑна илсе ҫитернӗ. Юрать-ха, вӑл вӑйлах суранланманни палӑрнӑ.

4 ҫулти хӗрача вара Ҫӗнӗ ҫулта чӑрӑш капӑрлатнӑ чухне шар курнӑ. Юсавсӑр гирляндӑна пула ӑна ток ҫапнӑ.

Тухтӑрсем кун пек чухне пиҫсе кайнӑ вырӑна шыва чикме сӗнеҫҫӗ. Аллерги ҫук пулсан ачана ыратнине ирттерекен эмел пама юрать. Паллах, ҫийӗнчех васкавлӑ медпулӑшу чӗнмелле.

kidsbebus.ru сайтри сӑн

Кӑрлач уйӑхӗн пуҫламӑшӗнче Шупашкарта пӗр хӗрарӑм васкавлӑ медпулашӑва шӑнкӑравланӑ: унӑн 7 уйӑхри ачи япӑх сывлама пуҫланӑ, ӳтне кӑвак тӗс ҫапнӑ. Пепке 40 ҫеккунт сывламанни те пулнӑ.

Васкавлӑ медпулӑшу вырӑна 7 минутран ҫитнӗ. Ҫав вӑхӑтра амӑшне Галина Евдокимова аслӑ тухтӑр телефонпа мӗн тумаллине вӗрентнӗ. Ҫапла тухтӑрсем ҫитиччен ачан сывлав ҫулне кӗрсе ларнӑ япала тухса ӳкнӗ.

Шурӑ халатлисем пепкене тӗрӗсленӗ те Республикӑри ача-пӑча клиника пульницине илсе ҫитернӗ.

Стопкоронавирус.рф сайтри сӑн

Юлашки талӑкра республикӑра кӑшӑлвирусран 2 ҫын пурнӑҫран уйрӑлнӑ. Кун пекки тӑватӑ уйӑх пулман. Юлашки хутчен авӑнӑн 26-мӗшӗнче талӑкра 2 ҫын вилнине палӑртнӑ.

Кӑҫал кӑрлач уйӑхӗнче Чӑваш Енре 7 ҫыннӑн пурнӑҫӗ кӑшӑлвируса пула татӑлнӑ. Кун пек тӗслӗхсем 1-мӗшӗнче, 4-мӗшӗнче, 5-мӗшӗнче, 22-мӗшӗнче, 23-мӗшӗнче тата паян пулнӑ.

Юлашки талӑкра 62 ҫын инфекциленнине палӑртнӑ. 5 ҫынна пульницӑна вырттарнӑ. 51 ҫын вара сывалнӑ.

Пандеми пуҫланнӑранпа республикӑра 4704 ҫын кӑшӑлвирусран вилнӗ.

35media.ru сайтри сӑн

Республикӑра кӑрлачӑн 9-15-мӗшӗсенче 76 ҫын гриппа чирленине палӑртнӑ. Вӗсенчен 57-шӗ - А гриппа, 19-шӗ В гриппа аптӑранӑ.

Ҫак тапхӑрта гриппа чирленисен йышӗнче 35 ача. Ыттисем, 41 ҫын, аслӑ ӳсӗмрисем.

Палӑртмалла: раштав уйӑхӗн 19-25-мӗшӗсенче Чӑваш Енре 77 ҫыннӑн грипп пулнине палӑртнӑ. Вӗсенчен 73-шӗн "сысна грипӗ" пулнӑ.

medicin.cap.ru сӑнӳкерчӗкӗ

«Врач офисӗнче шыв та ҫук, тухтӑр та ҫук» — тесе эпир Улатӑр районӗнчи Киря поселокӗнчи врач офисӗнчи лару-тӑру пирки «Ҫыхӑнура» форум пӗлтерни тӑрӑх ӗнер ирпе хыпарланӑччӗ.

Паян, кӑрлач уйӑхӗн 18-мӗшӗнче, ирхи 8 сехетре республикӑн влаҫ органӗсен официаллӑ порталӗнче асӑннӑ офис ҫынсене ҫак эрнери ытлари кун (кӑрлачӑн 17-мӗшӗнче) йышӑнма тытӑнни ҫинчен ҫырса кӑтартнӑ.

Тухтӑр ҫуртне пынисем офис пирки хавхаланса та ҫунатланса (халӑхра ун пеккине «вӗҫсе каясла» теҫҫӗ) каласа кӑтартнӑ. Сӑмахран, Киря посёлокӗнче пурӑнакан Валентина А, Людмила М. питӗ савӑннӑ. Вӗсем врач офисне ырласа пӗтереймеҫҫӗ.

Офисра врач тата профедура кабинечӗсем, 3 койко-вырӑнлӑх кӑнтӑрлахи стационар пур иккен. Тухтӑр ҫуртне интернетпа ҫыхӑнтарнӑран вырӑнтисем ансӑр специалистсемпе е республика пульницисенчи врачсемпе канашласа илме пултараҫҫӗ.

t.me/enteshsem сӑнӳкерчӗкӗ

Етӗрнери тухтӑрсем кӗрт ӑшӗнче выртакан ҫынна пулӑшнӑ.

Районти тӗп пульницӑра тӑрӑшакан Мария Панова врачпа Любовь Иванова медсестра ӗҫ хыҫҫӑн киле кайма тухнӑ. Утса пынӑ чухне вӗсем ҫул хӗрринче выртакан арҫынна асӑрханӑ. Иртен-ҫӳрен ним пулман пек иртсе ҫӳренӗ, выртакан ҫынна пӗри те пулӑшма шухӑшламан.

Шурӑ халатлисем арҫынна тӑратнӑ, пульницӑн йышӑну уйрӑмне илсе кайнӑ.

Алли-урри, пичӗ шӑнса кӳтнӗ арҫын халӗ пульницӑра сипленет.

21.мвд.рф сӑнӳкерчӗкӗ

Кӑрлач уйӑхӗн 2-мӗшӗнче Шупашкар районӗнче пӗр машина ҫаврӑнса ӳкнӗ.

«Хендай-Cанта Фе» автомобиль «М-7» федераци ҫулӗпе Хусан еннелле васканӑ. Ишлей ҫул ҫаврӑмне ҫитсен вӑл ҫул айккине тухса кайса кювета чӑмнӑ, машина ҫаврӑнса ӳкнӗ.

Руль умӗнче 54 ҫулти водитель пулнӑ. Ӑна тӗрӗсленӗ те, вӑл эрех сыпнине тупса палӑртман. Салонта водителӗн икӗ хӗрӗ: 6 тата 13 ҫулсенчи ачасем — пулнӑ. Вӗсем аманнӑ. Хӗрачасене пульницӑна ӑсатнӑ.