«Контактри» сӑн

Республикӑра ҫак кунсенче ҫӗнӗ ФАПсем уҫӑлнӑ. Патӑрьел округӗнчи Кивӗ Катек ялӗнчи ФАП пысӑк – 80 тӑваткал метр. Унта Брайль шрифчӗпе навигаци системи те пур. Ку ФАПра 400 ытла ҫынна медпулӑшу парӗ.

Вӑрнар округӗнче вара Уйкас Кипекре тата Хирупуҫра ФАПсем уҫӑлнӑ. Ҫак икӗ медпункта пӗтӗмпе 600 яхӑн ҫын ҫӳрӗ.

Сӑмах май, Вӑрнар округӗнче 39 ФАП ӗҫлет. Юлашки 5 ҫулта унта 14 медпункт хута янӑ.

gov.cap.ru сӑнӳкерчӗкӗ

Сӗнтӗрвӑрри тӑрӑхӗнчи ҫӑлавҫӑсем кӑмпана кайнӑ хӗрарӑма килне илсе ҫитернӗ.

73 ҫулти хӗрарӑм вӑрмана кӑмпана кайнӑ. Анчах вӑл унта сарӑмсӑр пусса яра урине ыраттарнӑ. Вӑл килне хӑй тӗллӗн ҫитеймен. Вара хайскиер 112 номерпе шӑнкӑравлама тӑн ҫитернӗ.

Республикӑн шыравпа ҫӑлав службин Сӗнтӗрвӑрринчи станцийӗн ӗҫченӗсем ватӑ ҫынна килне илсе ҫитернӗ.

"Контактри" сӑн

Канаш округӗнчи хӗрарӑма тӑрук япӑх пулса кайнӑ. Тухтӑрсем унӑн чӗрипе кӑлтӑксем пулнине тупса палӑртнӑ. Ӑна пӗр тӑхтамасӑр кардиолог пулӑшӑвӗ кирлӗ пулнӑ.

Хӗрарӑм хӑйне япӑхрах та япӑхрах туйса пынӑ. Машинӑпа Шупашкара кайма вара часах мар. Ҫапла санавиаци яма йышӑннӑ.

Вертолет килсе пациента хулана ҫур сехетре илсе ҫитернӗ. Унти тухтӑрсем ӑна тӳрех сиплеме пуҫланӑ.

istockphoto.com сайтри сӑн

Ҫӗнӗ Шупашкарти нумай ача ашшӗ С гепатита парӑнтарнӑ. Ӑна ҫак хӑрушӑ чире парӑнтарма «Вӑрӑм та хастар пурнӑҫ» федераци проекчӗ пулӑшнӑ.

Ултӑ ача ашшӗ ҫак чирпе 2017 ҫултанпа шутра тӑнӑ. Юлашки ҫулсенче унӑн пӗвер циррозӗ аталаннӑ. Ку вилӗмпе те вӗҫленме пултарать.

Ҫуркунне арҫыннӑн Ҫӗнӗ Шупашкарти стационарта сипленме май пулнӑ. Унта виҫӗ хутчен выртса тухнӑ хыҫҫӑн вӑл анализ панӑ та – вирус тухман.

cap.ru сайтри сӑн

Етӗрне районӗн тӗп пульницине ҫамрӑк тухтӑр ӗҫлеме килнӗ. Вӑл терапевт тивӗҫӗсене пурнӑҫлать.

Ольга Романова тӗллевлӗ майпа медицина пӗлӗвне илнӗ. Унӑн амӑшӗ медсестрара тӑрӑшнӑ. Шкулта вӗреннӗ чухне те Ольга химипе, биологипе тата анатомипе кӑсӑкланнӑ.

Ҫамрак тухтӑр тунмасть: пӗрремӗш пациентсене йышӑннӑ чухне вӑл хумханнӑ. Ӑна ӗҫтешӗсем пулӑшса пыраҫҫӗ, ҫавӑнпа вӑл ӗҫе хӑвӑртах хӑнӑхнӑ.

Вӑрнар районӗн больницине ҫамрӑк специалистсем ӗҫлеме килнӗ. Вӗсем хирургра вӑй хурӗҫ.

Ҫак ҫамрӑк специалистсем — Руслан Халековпа Анас Сулейман. Хӑйсем каланӑ тӑрӑх, вӗсем шавлӑ хулара мар, ялта пурӑнасшӑн.

Руслан – И.Н.Ульянов ячӗллӗ Чӑваш патшалӑх университетӗнчен вӗренсе тухнӑ. Анас вара Мари патшалӑх университетӗнче диплом илнӗ. Вӗсем иккӗшӗ те ординатурӑра хирурги енӗпе пӗлӗвне тарӑнлатнӑ.

Ҫамрӑк специалистсем ҫак кунсенче больницӑра хирурги уйрӑмӗнче ӗҫлеме тытӑннӑ.

"Контактри" сӑн

12-ри арҫын ача чупнӑ чухне ӳкнӗ те суранланнӑ. Анчах вӑйлӑ ыратнипе тепӗр кунхине кӑна ӑна пульницӑна илме кайнӑ. Унӑн янах шӑмми хуҫӑлнӑ иккен.

Республикӑри ача-пӑча клиника пульницин тухтӑрӗсем ҫӑварӗ урлӑ ӑна операци тунӑ. Уйӑхран сиплев пуҫланнӑ. Ҫур ҫултан вара пластинӑна илнӗ – шӑмӑ сыпӑннӑ. Пичӗ ҫинче нимӗнле суран йӗрӗ те юлман.

Халӗ арҫын ача унчченхи пурнӑҫ патне майӗпен таврӑнать. Тухтӑрсем вӑл каллех йӑл кулма пултарасса шантараҫҫӗ.

chuvashia.sledcom.ru сӑнӳкерчӗкӗ

Шупашкар районӗнчи Мӑн Карачура ялӗнче 54 ҫулхи уйрӑм усламҫӑ килӗнче ӗҫленӗ чухне вилмеллех аманнӑ.

Инкек утӑ уйӑхӗн 22-мӗшӗнче пулса иртнӗ. Вӑл хӑйӗн хуҫалӑхӗнче йывӑс ҫурнӑ. Вута ҫурмалли станокпа ӗҫленӗ чухне асӑрханса ҫитереймен вӑл. Аманса пӗтнӗскер инкек вырӑнӗнчех вилсе кайнӑ.

forum.zarulem.ws сайтран илнӗ сӑнӳкерчӗк

Ӗнер, утӑ уйӑхӗн 24-мӗшӗнче, Канашра икӗ ача маршрутка урапи айне пулнӑ.

Улттӑмӗш класра вӗренекен икӗ арҫын ача ҫуран ҫӳрекенсене касмалли вырӑнтан, анчах светофор ҫук ҫӗртен, каҫма тӑнӑ. Ачасем электросамокатпа пулнӑ. Вӗсем маршрутка урапи айне лекнӗ.

Арҫын ачасенчен пӗри суранланнӑ, тепри урине хуҫнӑ.

Инекек вӑхӑтӗнче маршруткӑра ҫынсем пулман. Транспорт техникӑна юсаттарма кайма тухнӑскер пулнӑ.

Республикӑри офтальмологи больницин сӑнӳкерчӗкӗ

Йӗпреҫ районӗнчи Алшик ялӗнче пурӑнакан 99 ҫулти ватта операци тума хатӗрленеҫҫӗ. Василий Иванов вӑрҫӑ ветеранӗн икӗ куҫӗ те япӑхнӑ. Унӑн катаракта пулнине палӑртна.

Республикӑри офтальмологи больницинчи тухтӑрсем катарактӑна тасатса ятарлӑ линза лартса янӑ хыҫҫӑн мучи унчченхинчен лайӑхрах курма пуҫланӑ. Унӑн куҫ чире тата пулнине кура ҫамрӑк чухнехи пек витӗр курма пуҫламан-ха, анчах унччен 8 процент ҫеҫ курна пулсан, хале 20 процент курать. Ҫавна май ватӑ ҫын тепӗр куҫне те операци тутарасшӑн. Тухтӑрсем вара хирӗҫ мар.