www.cap.ru сӑнӳкерчӗкӗ

Шупашкарта куҫ микрохирургийӗн музейне уҫасшӑн. Вӑл С.Н. Фёдоров академикӑн «Куҫ микрохирургийӗ» МНТКн Шупашкарти филиалӗнче пулӗ. Музея уйрӑм вырнаҫнӑ нумай ӗҫ пурнӑҫлакан ҫуртра уҫӗҫ.

Музей уҫас пирки Чӑваш Енӗн экономика аталанӑвӗн тата пурлӑх хутшӑнӑвӗсен министрӗ Дмитрий Краснов телеграм-каналта пӗлтернӗ.

Асӑнна филиал — пысӑк шайри офтальмологи пулӑшӑвӗ кӳрекен ҫӗршыври тӗп центрсенчен пӗри. Пӗлтӗр унта 38 пин ытла операци тунӑ. Филиал 37 ҫул хушши ӗҫленӗ вӑхӑтра филиал тухтӑрӗсем пулӑшнипе 900 пин ытла ҫын лайӑхрах курма пуҫланӑ.

Дмитрий Краснов шухӑшланӑ тӑрӑх, микрохирурги музейӗ туристсене те илӗртме пултарӗ. Космонавтика тата трактор историйӗн музейӗсенчен халӑх татӑлмасть-ҫке.

cap.ru сӑнӳкерчӗкӗ

Улатӑрти тухтӑрсем 92 ҫулти кинемей пурнӑҫне ҫӑлса хӑварнӑ. Пульницӑнӑ илсе ҫитерсе операци тунӑ хыҫҫӑн тепӗр икӗ сехетренех ватӑ палатӑра пулнӑ.

Ватӑ ҫынна ӗҫ кунӗ вӗҫленнӗ вӑхӑтра хырӑмӗн аял енчи пайӗ сулахай енчен хытӑ ыратнипе илсе пынӑ. Кинемее компьютер томографийӗ туса тӗрӗсленӗ те шыҫӑ (грыжа) тупса палӑртнӑ. Кинемее часрах операци сӗтеле ҫине вырттарнӑ.

cap.ru сӑнӳкерчӗкӗ

Улатӑр округӗнчи Стемас ялӗнче ҫӗнӗ фельдшерпа акушкр пункчӗ тума палӑртнӑ. Ку ӗҫе «Вӑрӑм та хастар пурнӑҫ» наци проекчӗпе килӗшӳллӗн пурнӑҫлаҫҫӗ.

ФАП ку тӑрӑзра пурӑнакан 1100 ҫынна медицина пулӑшӑвӗ парӗ. Вӑл тӗп урамра пулӗ. Ҫывӑхрах – почта, лавккасем, автобус чарӑнӑвӗ, ача-пӑча лапамӗ.

Ӗҫе пуҫӑннӑ ӗнтӗ. Паян строительсем вырӑна ҫитсе свайӑсем ҫапма тытӑннӑ.

vk.com/gov_cap_ru сӑнӳкерчӗкӗ

Чӑваш Енре пурӑнакан пӗр хӗрарӑмӑн кӑкӑр ракӗ тупӑннӑ. Ӑна васкавлӑн операци тумалла пулнӑ. Пӗр амакӗ ҫитмен, тепри тупӑннӑ. Хӗрарӑм чӗре чирӗпе нушаланать иккен.

Республикӑри онкологи диспансерӗн тата Республикӑри кардиологи дсипансерен врачӗсем пӗр-пӗринпе тӗплӗн канашласа пӑхнӑ хыҫҫӑн икӗ операцие пӗр харӑс тума йышӑннӑ.

Операци тӑватӑ сехете яхӑн тӑсӑлнӑ. Малтан митраль клапанне ылмаштарнӑ, унтан мастэктоми текен операцие туса ирттернӗ.

cap.ru сайтри сӑн

Улатӑр районӗн тӗп пульницин хирургӗсем ватӑ хӗрарӑма операци туса пурнӑҫне ҫӑлнӑ. Халӗ вӑл хӑйне аванах туять.

Галина Парфеновнӑн ӳт температури хӑпарнӑ, хырӑмӗ ыратнӑ, кӑмӑлӗ пӑтраннӑ. УЗИ тунӑ хыҫҫӑн унӑн ват хӑмпинчен чулсем пулни палӑрнӑ. Пациентӑн ӳсӗмне кура тухтӑрсем малтан ӑна сиплеме йышӑннӑ. Анчах ку пулӑшман, чул ват хӑмпинчех юлнӑ.

Теветкеллӗ пулсан та кинемее операци тума тивнӗ. Телее, вӑл ӑна чиперех чӑтса ирттернӗ, майӗпен утса ҫӳреме пуҫланӑ. Тухтӑрсем ӑна кӑшт сӑнанӑ хыҫҫӑн киле янӑ.

cap.ru сӑнӳкерчӗкӗ

Кӑҫал Канаш округӗнче икӗ ҫӗнӗ фельдшерпа акушер пункчӗ пулӗ: Ҫӗнӗ Мамире тата Кӑшаруйра.

Ҫак икӗ ялта 500 яхӑн ҫын пурӑнать. Ҫӗнӗ ФАПсенче халӑха тивӗҫлӗ медицина пулӑшӑвӗ пама пӗтӗм услови пулӗ. Хальхи йышши оборудовани вырнаҫтарӗҫҫ, эмелсене упрамалли ятарлӑ вырӑн пулӗ. Унта вакцинаци тума, диспансеризацин малтанхи тапхӑрӗ витӗр тухма та условисем тӑвӗҫ.

ФАП сусӑрсене кӗрсе ҫӳремешкӗн те меллӗ пулӗ.

"Контактри" сӑн

Мари Элте пурӑнакан арҫынна Республикӑри кардиологи диспансерне илсе килнӗ. Вӑл хӑйне питӗ япӑх туйнӑ: йывӑррӑн сывланӑ.

Диагностика унӑн чӗрин клапанӗпе япӑх пулнине кӑтартнӑ. Операци тумасан арҫын темиҫе эрне ҫеҫ пурӑнма пултарнине каланӑ.

Кӳршӗ республика ҫыннине часрах операци тунӑ. Опытлӑ кардиохирургсен командине Николай Трофимов ертсе пынӑ. Операци 4 сехет пынӑ.

«Клапана юсаса мана пурнӑҫа каялла тавӑрчӗҫ», - пӗлтернӗ Иван ятлӑ пациент. Вӑл халӗ хӑйне аванах туять.

Кӑҫалхи иккӗмӗш эрнере республикӑра гриппа чирленӗ 12 ҫынна тупса палӑртнӑ. Вӗсен йышӗнче ачасем пур. Роспотребнадзор пӗлтернӗ тӑрӑх, пӗри те грипран прививка туман.

Гриппа чирленӗ ҫынран 6-шӗ – ачасем: 5-шӗ 14 ҫул тултарманнисем, пӗри 15-17 ҫулти.

Иртнӗ эрнере ОРВИпе чирленӗ 3266 тӗслӗхе шута илнӗ. Ку, унчченхи ҫулсенчи вӑтам кӑтартупа танлаштарсан, 24,8 процент пӗчӗкрех.

Сӑмах май, 2024 ҫулхи раштавӑн 20-мӗшӗ тӗлне республикӑра 518580 ҫын грипран прививка тутарнӑ.

"Контактри" сӑн

Патӑрьел тӑрӑхӗнчи 57-ри арҫын кӑрлачӑн 9-мӗшӗнче иккӗмӗш ҫуралнӑ кунне паллӑ тӑвать. Васкавлӑ медпулӑшупа пульницӑна кайнӑ чухне унӑн чӗри 4 хутчен чарӑнса ларнӑ. Фельдшерсем кашнинчех ӑна пурнӑҫа тавӑрнӑ.

Медпулӑшу машинин водителӗ Канашри пульницӑна вӗҫтернӗ чухне фельдшерсем пациент пурнӑҫӗшӗн кӗрешнӗ. Вӗсен пысӑк ӑсталӑхне пула арҫын чӗрӗ юлнӑ. Кайран ӑна пульницӑра операци тунӑ. Халӗ вӑл вӑй пухать.

cap.ru сайтран илнӗ сӑнӳкерчӗк

Шупашкарти стоматологи поликлиникин тухтӑрӗсем 2024 ҫулта 51 пин ачана пулӑшнӑ.

Асӑннӑ поликлиникӑн тӗп направленийӗсенчен пӗри — ача-пӑча стоматологийӗ. Стоматологсем сакӑр подразделенире — пилӗк уйрамра тата 3 сиплевпе профилактика пӳлӗмӗнче — пулӑшаҫҫӗ. Унсӑр пуҫне шкулсенче те стоматологи пӳлӗмӗсем ӗҫлеҫҫӗ. Ун пеккисем хулара — 42.