Кирилл Данилов «Муркаш Улӑпӗ–2023» номинацие тивӗҫнӗ. Кун пирки Муркаш муниципаллӑ округӗ официаллӑ сайчӗ пӗлтерет.
«Муркаш Улӑпӗ–2023» конкурс канмалли кунсем умӗн, нарӑсӑн 21-мӗшӗнче Муркашри культура ҫуртӗнче иртнӗ. «Чӑваш пики» конкурсра хӗрсем ӑмӑртаҫҫӗ пулсан, ку конкурса вара каччӑсемшӗн йӗркеленӗ. Хӑйсен маттурлӑхне тӑватӑ конкурсра ҫирӗплетмелле пулнӑ. Чи малтанах вӗсен хӑйсем пирки каласа пама тивнӗ, кайран — Раҫҫей армийӗпе ҫыхӑннӑ ыйтусем ҫине хуравлама. Унтах хӑйсен ҫаврӑнаҫулӑхӗпе тӗл пеме пултарассине дартс вӑййинче кӑтартма тивнӗ. Ҫаван пекех пултаруллӑ пулнине те ҫирӗплетсе памалла пулнӑ.
Ҫапла май вара «Муркаш Улӑпӗ–2023» ята Муркаш территори пайӗнчи Кирилл Данилов ҫӗнсе илнӗ. Турай территори пайӗнчи Ростислав Семенов «Тавҫӑруллӑ Улӑп» ята тивӗҫнӗ; Йӳҫкасси территори пайӗнчи Данил Барминов — «Пултаруллӑ Улӑп» ята; Хорнуй территори пайӗнчи Сергей Павлов — «Патвар Улӑп» ята; Оринин территори пайӗнчи Никита Павлов — «Спортпа туслӑ Улӑп» ята.
Уява ача-пӑчасен «Фантази» хореографи ансамблӗн номерӗсем илемлетнӗ. Ҫавӑн пекех Муркаш тӑрӑхӗнчи ытти пултарулӑх ушкӑнӗсем те юрӑ-ташӑпа савӑнтарнӑ.
Чӑваш Ен хӗрӗ ылтӑн медале тивӗҫнӗ. Тӗмен хулинче фристайл енӗпе Раҫҫей кубокӗн виҫҫӗмӗш тапхӑрӗ иртнӗ. «Слоуп-стайл» дисциплинӑра Лана Прусакова ылтӑн медале тивӗҫнӗ.
2018 ҫулхи хӗллехи Олимпиадӑна хутшӑннӑ хӗр унччен «биг-эйр» дисциплинӑра ҫӗнтернӗ. Халӗ, ав, слоуп-стайл енӗпе те ӑна ҫитекен пулман.
Раҫҫей кубокӗн унчченхи икӗ тапхӑрӗнче те пирӗн ентешӗмӗр биг-эйр енӗпе ылтӑн медальсене тивӗҫнӗ.
Ҫак канмалли кунсенче Чӑваш Енре спортсменсем йытӑ кӳлсе чупӗҫ. Ӑмӑрту Атӑл леш енче «Нартаван» туризм базинче иртӗ.
Шӑматкун тупӑшу 11 сехет ҫурӑра пуҫланӗ, вырсарникун – 9 сехетре. 7500 метр тӑршшӗ трасса ҫине спортсменсем тӑватӑ ураллӑ тусӗсемпе тухӗҫ. Ҫӗнтерӳҫене тӑватӑ дисциплинӑра палӑртӗҫ: «Йӗлтӗр-спринт 1 йытӑ», «Нарта-спринт 2 йытӑ», «Нарта-спринт 4 йытӑ» тата «Нарта-спринт 6 йытӑ».
Иккӗмӗш кунхине эстафета тата ача-пӑча старчӗ пулӗҫ. Вӗсем 3 пин ҫухрӑма парӑнтарӗҫ. Ӑмӑртӑва 12-17 ҫулсенчи ачасем хутшӑнӗҫ.
Сӗнтӗрвӑрринче ҫуралнӑ спортсмен тӗнче шайӗнче ҫӗнтернӗ.
Дмитрий Геращенко Бразили джиу-джитсувӗ енӗпе тӗнче чемпионатне хутшӑннӑ. Ӑмӑрту Питӗр хулинче иртнӗ. Унта тӗнчери 3300 спортсмен пуҫтарӑннӑ.
Тепӗр майлӑ каласан, Чӑваш Ен каччи Бразилири, Мексикӑри, Америкӑри Пӗрлешӳллӗ Штатсенчи тата ытти нумай ҫӗршыври спортсменпа вӑй виҫнӗ. Вӗсене вӑл хӑйӗн ӑсталӑхӗпе вӑйне кӑтартса панӑ – ҫӗнтерӳҫӗ пулса тӑнӑ.
Нарӑс уйӑхӗн 4-мӗшӗнче Чӗмпӗрте кӗпӗрнаттӑр парнине ҫӗнсе илессишӗн юланутҫӑсен тупӑшӑвӗ иртнӗ. Унта Чӑваш Ен юланутҫи ҫӗнтернӗ.
Ӑмӑртӑва Чӗмпӗр облаҫне йӗркеленӗренпе 80 ҫул ҫитнине халалланӑ. Юланутҫӑсен тупӑшӑвне Тутарстанран, Сарту тата Тамбов облаҫӗсенчен пырса ҫитнӗ.
2400 метрлӑ ӑмӑртура кӗпӗрнаттӑр парнине, 87 пин тенкӗ укҫана, Евгений Матьяновӑн «Арсенал» лаши тивӗҫнӗ. Евгений — 2-мӗш категориллӗ юланутҫӑ.
Чӑваш Ен спортменки Новосибирскра фристайл енӗпе иртнӗ ӑмӑртура ылтӑн медаль ҫӗнсе илнӗ. Кун пирки ЧР спорт министрӗ Василий Петров Телеграм-каналӗнче пӗлтернӗ.
Лана Раҫҫей Кубокӗнче "биг-эйр" дисциплинӑра ӑмӑртса пурне те хыҫа хӑварнӑ.
Палӑртса хӑварар: Лана Прусакова 2018 ҫулта Олимп вӑййисене хутшӑннӑ. 2019 ҫулта хӗллехи Универсиадӑна хутшӑнса Раҫҫей спорт мастерӗ пулса тӑнӑ.
Чӑваш Ен спортсменки Полина Андреева Тула хулинче чӳкӗн 12-20-мӗшӗсенче йывӑр атлетика енӗпе иртекен Раҫҫей первенствине хутшӑнать.
Пӗрремӗш кунхинех пирӗн спортсменка 49 килограмм тайманнисен виҫе категорийӗнче тупӑшса Раҫҫей рекордне ҫӗнетнӗ. Вӑл Раҫҫей первенствинче 3 ылтӑн медаль ҫӗнсе илнӗ. Тулӑрах иртнӗ пӗтӗм тӗнчери ӑмӑртура та вӑл малта пулнӑ: ылтӑн медале тивӗҫнӗ.
Палӑртмалла: Полина Олимп резервӗсен Ҫӗнӗ Шупашкарти 3-мӗш спорт шкулӗнче ӑсталӑхне туптать.
Чӑваш Енре спорт гимнастики енӗпе республика ӑмӑртӑвӗ иртнӗ. Спортӑн ҫак енӗпе туслисем тата спорт гимнастикине юратакансем Шупашкарти Олимп резервӗн 6-мӗш спорт шкулне пуҫтарӑннӑ.
Раҫҫей спорт мастерӗсен икӗ кунхи ӑмӑртӑвӗнче Никита Леснов пӗрремӗш вырӑн йышӑннӑ.
Спорт мастерӗсен кандидачӗсенчен Антон Антонова ҫитекен пулман. Асӑннӑ категорире кӗмӗл медале Андрей Кривошеев, бронзӑна Даниил Лисицын ьивӗҫнӗ.
1-мӗш спорт разрячӗн программинче ылтӑн медале Дмитрий Максимов ҫӗнсе илнӗ. кӗмӗле — Александр Пузырев, бронзӑна — Максим Замахов.
2-мӗш спорт разрячӗн программинче Иван Щербаков ҫӗнтернӗ. Сергей Раськин иккӗмӗш вырӑн йышӑннӑ, виҫҫӗмӗшӗнче — Илья Лавров.
Юпа уйӑхӗн 16-мӗшӗнче Чӑваш Енре пулӑ тытма юратакансем ӑмартӗҫ. Вӗсем катушкӑллӑ вӑлтапа пулӑ тытассинче тупӑшӗҫ.
Кӑҫал унта чи вӑйлӑ спортсменсем хутшӑнассине пӗлтереҫҫӗ. Вӗсем Атӑл юханшывӗнче пулӑ тытӗҫ. Пӗр кунра икӗ тур иртӗ, кашни 4 сехете тӑсӑлӗ. Апла пӗтӗмпе – 8 сехет.
Ӑмӑртӑва 18 ҫултан аслӑраххисен хутшӑнма ирӗк пур. Регистраци ирхи 5 сехетре пуҫланӗ. Ҫур сехетрен ӑмӑрту савӑнӑҫлӑ лару-тӑрура уҫӑлӗ. Пӗрремӗш тур 6-ра пуҫланать, 10-ра ӑна пӗтӗмлетӗҫ. Иккӗмӗш тур 11-те пуҫланать. 15 сехетре ҫӗнтерӳҫӗсене чыслӗҫ.
Чӑваш Ен спортсменки Полина Андреева Беларуҫре ылтӑн медаль ҫӗнсе илнӗ. Вӑл 49 килограмм тайманнисен виҫе категорийӗнче мала тухнӑ.
Беларуҫри Минск хулинче йывӑр атлетика енӗпе пӗтӗм тӗнчери турнир иртет. Полина икӗ енлӗ кӗрешӳре пӗтӗмӗшле 166 килограмм ҫӗкленӗ. Ӑна ҫитекенни пулман. Спортсменка Геннадий Иванов тренер патӗнче ӑсталӑхне туптать.
Полинӑн ку пӗрремӗш награди мар. Кӑҫал ҫулла вӑл йывӑр атлетика енӗпе иртнӗ Раҫҫей ӑмӑртӑвӗнче 23 ҫула ҫитменнисен йышӗнче ылтӑн медаль илнӗ, сакӑр рекорд лартнӑ.
+14.3 °C