Красноярск хулинче пуш уйӑхӗн 1-мӗшӗнче пуҫланнӑ XXIX Пӗтӗм тӗнчери хӗллехи Универсиадӑра Чӑваш Енӗн тӑватӑ спортсменӗ вӑй виҫнине Чӑваш халӑх сайчӗ пӗлтернӗччӗ_.
Пирӗннисенчен ӑмӑртӑва чи малтан Кристина Кускова хутшӑннӑ. Чӑваш Енӗн Спорт министерстви пӗлтернӗ тӑрӑх, йӗлтӗрпе тупӑшакансем персьютра 5 тата 10 километра ирӗклӗ мелпе чупнӑ. Пирӗн ентешӗмӗр ҫиччӗмӗш вырӑна тухнӑ. Апла пулсан Кристина Кускова XXIX Пӗтӗм тӗнчери хӗллехи Универсиадӑра чи вӑйлӑ 10 йӗлтӗрҫӗ шутне лекнине эпир хӑпартлансах пӗлтеретпӗр.
Аса илтерер, Чӑваш Республикинчен кӑҫалхи хӗллехи Универсиадӑна Лана Прусаковӑпа Дмитрий Мулендеев фристайлҫӑсем, Кристина Кускова йӗлтӗрҫӗ тата Алексей Петров биатлонист хутшӑнаҫҫӗ.
Паян, пуш уйӑхӗн 1-мӗшӗнче, Красноярск хулинче XXIX Пӗтӗм тӗнчери хӗллехи Универсиада пуҫланнӑ, унта Чӑваш Енӗн тӑватӑ спортсменӗ вӑй виҫет. Кун пирки республикӑн Физкультурӑпа спорт министерстви хыпарлать.
Хайхи ҫӑлкуҫ пӗлтернӗ тӑрӑх, кӑҫалхи Универсиадӑра ӑмӑртмашкӑн ҫӗршывӑн пӗрлештернӗ ушкӑнне Чӑваш Республикинчен тӑватӑ спортсмен кӗнӗ. Ҫапла майпа Универсиада ӑмӑртӑвӗсене Лана Прусаковӑпа Дмитрий Мулендеев фристалҫӑсем, Кристина Кускова йӗлтӗрҫӗ тата Алексей Петров биатлонист хутшӑнаҫҫӗ.
Палӑртса хӑвармарни вырӑнлӑ пулмалла, кӑҫалхи Универсиадӑра 50 ытла ҫӗршывран килнӗ 3 пине яхӑн спортсмен тупӑшать, вӗсем медальсен 76 комплектне ҫӗнсе илессишӗн хӑйсен ӑсталӑхне 11 тӗрлӗ спортра кӑтартӗҫ.
Ӗнер Шупашкарта шкул ҫулне ҫитмен сусӑр ачасен пӗчӗк паралимп вӑййисем иртнӗ. Ӑна республикӑн тӗп хулинчи 158-мӗш ача пахчинче савӑнӑҫлӑ лару-тӑрура уҫнӑ. Ҫавӑнта 141-мӗш, 145-мӗш тата 158-мӗш ача пахчине ҫӳрекен шӑпӑрлансем пухӑннӑ.
Пӗчӗк паралимп вӑййисене уҫма тӳре-шара та пырса ҫитнӗ. Вӗсен шутӗнче Раҫҫейӗн Патшалӑх Думин депутачӗ Леонид Черкесов (маларах вӑл Шупашкар хула пуҫлӑхӗ пулнӑччӗ) тата Шупашкар хула администрацийӗ вӗренӳ управленийӗн пуҫлӑхӗн ҫумӗ Елена Сахарова пулнӑ.
Ӑмӑртма пухӑннӑ ачасене хавхалантарма Тӗнче тата Европа чемпионки, хӑвӑрт утассипе Олимп вӑййисен кӗмӗл призерӗ ята тивӗҫнӗ Олимпиада Иванова тата спорт гимнастики енӗпе СССР спорт маҫтӑрӗ Надежда Кальметова ҫитнӗ.
Пӗчӗкскерсем биатлон, ҫуна спорчӗ, кёрлинг, следж-хоккей, йӗлтӗр ӑмӑртӑвӗ енӗпе тупӑшнӑ.
Эрӗнпур облаҫӗн спорт кӗрешӗвӗн федерацийӗн президенчӗн Евгений Сусоевӑн парнисене ҫӗнсе илессишӗн иртнӗ Атӑлҫи тӑрӑхӗнчи ӑмӑртура Чӑваш Ен спортсменӗсем 6 ылтӑн, 4 кӗмӗл тата 5 бронза медаль ҫӗнсе илнӗ. Кун пирки Чӑваш Енӗн спорт министерстви пӗлтерет.
Ирӗклӗ кӗрешӳ ӑмӑртӑвӗ нарӑс уйӑхӗн 13-15-мӗшӗсенче Эрӗнпур хулинче иртнӗ, унта Мари, Тутар, Мордва, Удмурт, Чӑваш республикисенчен, Сарӑту, Чулхула, Пенза, Киров, Самар, Чӗмпӗр облаҫӗсенчен 250 спортсмен хутшӑннӑ. 19-20 тата 16-17 ҫулсенчи ҫамрӑксем 11 виҫе категорийӗнче вӑй виҫнӗ.
Палӑртса хӑвармалла, Чӑваш Ен спортсменӗсенчен ылтӑн медале Екатерина Жирнова, Надежда Матвеева, Анна Иванова, Юлия Кириллова, Виктория Александрова тата Елизавета Смирнова тивӗҫнӗ.
Кӑҫал йӑлана кӗнӗ «Раҫҫей йӗлтӗр йӗрӗ» нарӑс уйӑхӗн 9-мӗшӗнче иртӗ. Ӑмӑрту Шупашкарта аэропорт ҫывӑхӗнче пулӗ.
Спорт уявне кирек кам та хутшӑнма пултарать. Мандатлӑ комисси нарӑсӑн 5-8-мӗшӗсенче «Энергия» стадионта ӗҫлӗ. Ӑмӑртӑва хутшӑнма заявка парас тесен унта 10-16 сехетсенче ҫитмелле е ку ӗҫе старт кунӗнче, нарӑсӑн 9-мӗшӗнче, вырӑнта 8-11 сехетсенче тума пулать. Регистраци 10 сехетре пуҫланать, йӗлтӗр сырнӑ ҫынсем старта 2 сехетре тухӗҫ.
Кӑҫал 2019 метрлӑ, 3 тата 5 ҫухрӑмлӑ дистанцисене (2001 ҫулта ҫуралнисем тата ҫамрӑкарххисем) чупӗҫ. 2000 ҫулта ҫуралнисем тата аслӑрахисем 10 ҫухрӑма парӑнтарӗҫ. Кунсӑр пуҫне йӗлтӗр сырнӑ чи ҫамрӑк тата чи ватӑ ҫынна суйлӗҫ.
Белгород облаҫӗнчи Кивӗ Оскол хулинче йывӑр атлетика енӗпе иртекен Раҫҫей первенствинче Елчӗк районӗнче ҫуралса ӳснӗ, халӗ Шупашкарти Олимп хатӗрленӗвӗн училищинче вӗренекен Полина Андреева темиҫе медаль ҫӗнсе илнӗ, ҫӗршыври пилӗк рекорда ҫӗнетнӗ. Кун пирки Чӑваш Енӗн спорт министерстви хыпарлать.
13-17 ҫулсенчи ҫамрӑксен хушшинче иртекен ӑмӑртусене ҫӗршыври 220 хӗрпе каччӑ хутшӑнать, вӗсенчен улттӑшӗ — Чӑваш Енрен: Полина Андреева, Ксения Александрова, Александра Степанова, Артур Никонов, Андрей Портнов тата Максим Матвеев. Геннадий Иванов тренерӑн вӗренекенӗ Полина Андреева тӗрлӗ меслетпе вӑй виҫсе икӗ ылтӑн тата пӗр кӗмӗл медаль ҫӗнсе илнӗ. Унсӑр пуҫне чӑваш спортсменки 17 ҫулти хӗрсен йышӗнче — виҫӗ, 20 ҫултисен хушшинче ӑмӑртса икӗ рекорда ҫӗнетнӗ.
Шупашкарти Хӗллехи спорт тӗсӗсен центрӗнче ӗнер, кӑрлачӑн 27-мӗшӗнче, Чӑваш Ен Элтеперӗн парнисене ҫӗнсе илессишӗн спорт ҫемйисен ӑмӑртӑвӗ иртнӗ. Унта ытти ҫул та ӑмӑртӑва хутшӑннӑ, анчах ҫӗнтерме май килмен Красновсене ӑннӑ. Мӑшӑрсем — биатлон енӗпе спорт мастерӗсем. Светлана Краснова пӗлтернӗ тӑрӑх, ытти ҫул ӑмӑртӑва вӗсем аслӑ хӗрӗпе тухнӑ. Халӗ вӑл ӳснӗ ӗнтӗ, ун вырӑнне вӑталӑххи тӑнӑ. Кӗҫех вӗсен ывӑлӗ те тӗрекленӗ — ӳлӗмрен ӑна та ӑмӑртӑва илсе тухма пуҫлӗҫ.
Элтепер парнисемшӗн ирттернӗ ӑмӑртӑва 5 ушкӑнпа йӗркеленӗ: 10 тата 15 ҫулсемчченхи пӗрер ачаллӑ ҫемьесем, икшер ачаллисем, виҫшер ачаллисем, тӑватшар ачаллисем.
Шӑмат кун Элтепер парнисемшӗн ветерансем ӑмӑртнӑ. Унта 89 ҫулти Пимен Петров 1938 ҫулта тусс кӑларнӑ йӗлтӗр сырса тухнине Чӑваш халӑх сайчӗ пӗлтернӗччӗ. Вӑл «76 ҫултан аслӑраххисем» категорире чи асли пулнӑ.
Паян пирӗн ҫӗршывра Студентсен кунне паллӑ тӑваҫҫӗ. Ҫавна май ӗнер, кӑрлач уйӑхӗн 24-мӗшӗнче, республикӑн тп хулинчи «Шупашкар – Арена» пӑр керменӗнче хоккей выляссипе юлташла матч ирттернӗ. Пӑр ҫине Чӑваш Енӗн Правительствипе республикӑри студентсен пӗрлештернӗ ушкӑнӗ тухнӑ.
Министрсен Кабинечӗн хоккей ушкӑнне яланхиллех Чӑваш Ен Пуҫлӑхӗ Михаил Игнатьев ертсе пынӑ.
Студентсен командинче республикӑри аслӑ шкулсенче вӗренекен каччӑсем пулнӑ. Сав шутра — И.Н. Ульянов ячӗллӗ Чӑваш патшалӑх университечӗн «Мамонты – ЧГУ», Чӑваш патшалӑх ял хуҫалӑх академийӗн «Академия», Шупашкарти коопераци институчӗн «Коопер» тата Раҫҫейӗн халӑх хуҫалӑхӗн тата патшалӑх службин академийӗн Шупашкарти филиалӗн «С.К.А.Л.А» командин пайташӗсем.
Вӑйӑ туслӑх ҫӗнтернипе вӗҫленнӗ.
Ну, маттур, чӑн-чӑн фристайлҫӑ вӑл – Дмитрий Мулендеев. Пирӗн ентеш каллех ылтӑн медаль ҫӗнсе илнӗ. Вӑл нумаях пулмасть ӑмӑртура пӗрремӗш вырӑн йышӑннине тин кӑна хыпарларӑмӑр – Дмитрий вара пире тепӗр ҫӗнтерӳпе савӑнтарма та ӗлкӗрчӗ.
Аса илтерер: Дима Мулендеев Челепи облаҫӗнче иртекен Раҫҫей Кубокне хутшӑнать. Ӑмӑрту «Солнечная долина» курортра иртет. Хальхинче вӑл биг-эйр дисциплинӑра тупӑшса пьедесталӑн пӗрремӗш картлашки ҫине хӑпарнӑ. Унччен Дмитрий слоуп-стайлра мала тухнӑ.
Челепи облаҫӗнче фристайл енӗпе иртнӗ ӑмӑртура пирӗн ентеш Дмитрий Мулендеев маттурлӑхӗпе палӑрнӑ. Вӑл слоуп-стайл дисциплинӑра ылтӑн медаль ҫӗнсе илнӗ.
Дмитрий – Олимп резервӗсен 2-мӗш спорт шкулӗн воспитанникӗ. Ыран, кӑрлач уйӑхӗн 18-мӗшӗнче, вӑл каллех ӑмӑртӑва тухӗ. Хальхинче пирӗн ентеш биг-эйр дисцирлинӑра тупӑшӗ.
Дмитрий Мулендеев Интаграмри страницинче пӗлтернӗ тӑрӑх, ку ӑмӑртура унӑн тренерӗ Никита Васильев ҫук. Вӑл Лана Прусаковӑпа пӗрле АПШна тупӑшӑва кайнӑ.
+11.3 °C