Шупашкарти 10-мӗш шкул умне Андриян Николаев космонавтӑн бюстне лартнӑ. Ӑна Андриян Григорьевичӑн ҫуралнӑ кунӗнче, авӑн уйӑхӗн 5-мӗшӗнче, вырнаҫтарнӑ.
Унӑн бюсчӗ унта унччен те пулнӑ-ха, анчах хӑш-пӗр пайӗ хӑйпӑнса ӳкнӗ. Ачасемпе вӗрентекенсем ӑна хӑйсен вӑйӗпе реставраци тума хӑтланнӑ, анчах ку пулӑшман. Кӑҫал вара ҫӗнӗ бюст лартнӑ.
Палӑртмалла: 10-мӗш шкул 1999 ҫултанпа Андриян Николаев ячӗпе хисепленет. Космонавт ҫуралнӑранпа кӑҫал 95 ҫул ҫитнӗ.
Чӑваш Енри виҫӗ ҫурта культура еткерлӗхӗсен шутне кӗртнӗ. Кун пирки ЧР Культура министерстви пӗлтерет.
Пӗрремӗшӗ – Вӑрмар округӗнчи Кавал шкулӗ. Ӑна 1012 ҫултах тума тытӑннӑ. Ун чухнехи фасачӗ тата шалти планировки паянхи кунччен сыхланса юлнӑ. Ҫурт стилӗ – эклектика.
Ҫавӑн пекех Шупашкарти 12-мӗш шкул тата 36-мӗш ача пахчи культура еткерлӗхӗ шутланаҫҫӗ. Вӗсене классика стилӗпе конструктивизм стилӗпе усӑ курса хута янӑ.
Ҫӗнӗ вӗренӳ ҫулӗнчен Шупашкарти 2-мӗш лицейра прокурор класӗ ӗҫлеме тытӑнӗ. Унта ку енӗпе пӗр 10-мӗш класс пулӗ, класри ачасем юриспруденцие тарӑнрах вӗренӗҫ. Вӗренӳ планне хатӗрленӗ. Ҫак класра яш-хӗре вырӑс чӗлхине, историе, бществознание тӗплӗнрех вӗрентӗҫ. Хушма дисциплинӑсем те пулӗҫ: «Правоведени» тата «Прокурор тӗрӗслевӗ».
Тӑватӑ енлӗ килӗшӗве ҫурла уйӑхӗн 28-мӗшӗнче алӑ пуснӑ: Чӑваш Ен прокуратури, ЧР Вӗренӳ министерстви, Шупашкар администрацийӗн вӗренӳ управленийӗ тата И.Н.Ульянов ячӗллӗ Чӑваш патшалӑх университечӗ.
Шупашкарти «Университет» микрорайонти шкула планпа килӗшӳллӗн кӑҫал уҫмалла, ачасен ҫӗнӗ вӗренӳ ҫулне унта пуҫламалла. Паян унта Патшалӑх Канашӗн депутачӗсем, Тӗрӗслевпе шутлав палати, министерствӑсемпе мэри ҫыннисем ҫитсе курнӑ.
Унччен каланӑ тӑрӑх, унти стройка ӗҫӗсене утӑн 31-мӗшӗччен вӗҫлемелле пулнӑ. Кайран тепӗр вӑхӑта куҫарнӑ: авӑнӑн 1-мӗшӗччен. «ТУС» тӗп директорӗ Николай Угаслов пӗлтернӗ тӑрӑх, строительствӑпа монтаж ӗҫӗсене вӗҫленӗ, унта халӗ клининг компанийӗ ӗҫлет, вӗренӳ оборудованине кӳрсе килеҫҫӗ. Объекта йышӑнас тапхӑр пырать халӗ. Николай Угаслов каланӑ тӑрӑх, ку кӑткӑс ӗҫ, ун валли татах вӑхӑт кирлӗ. Ҫавӑнпа шкул ачасене хӑҫан йышӑнасси пирки татӑклӑн каламан.
Шупашкарти олимп резервӗн 2-мӗш спорт шкулӗнче фристайл-парк уҫӑлнӑ. Унта аэроминтер тата кантра ҫулӗ уҫӑлнӑ.
Ку проекта спонсорсем пулӑшнипе пурнӑҫа кӗртме пултарнӑ. Ҫакӑн пек пӗлтернӗ Чӑваш Ен Элтеперӗ Олег Николаев.
Асӑннӑ паркра спортсменсем фристайл енӗпе ӑмӑртайӗҫ.
Фристайл-паркри аэроминтер калӑпӑшӗ — 55х25 метр. Унта спортсменсем дисциплинах «слоуп-стайл» тата «биг-эйр» дисциплинӑсенче хӑйсен пултарулӑхне туптаҫҫӗ.
Кӑҫал авӑн уйӑхӗн 1-мӗшӗ, Пӗлӳ кунӗ, вырсарникуна лекет. Ҫавна май шкулти линейкӑсене тунтикун, авӑн уйӑхӗн 2-мӗшӗнче, ирттерӗҫ. Ҫакна РФ Ҫутӗҫ министерстви сӗнӗвӗпе пурнӑҫлаҫҫӗ.
Кӑҫал ресрубликӑра 14 пине яхӑн ача парта хушшине пӗрремӗш хут ларӗ.
Сӑмах май, Шупашкарти «Садовый» микрорайонти шкул авӑнӑн 1-мӗшӗнче уҫӑлмӗ. Вӑл ӗҫлеме пуҫланӑ, анчах суд ӑна саккуна пӑсса хута янӑ тесе хупма йышӑннӑ. «Университет» микрорайонти шкул, унччен пӗлтертӗмӗр ӗнтӗ, раштав уйӑхӗнче уҫӑлӗ.
Кӑҫал Шупашкарти «Университет» микрорайонти шкул алӑкне уҫмалла. «Тус» компани ӗҫсене вӗҫлесе пырать, шкула Вӗренӳ министерствине пама хатӗрленет.
Строительство организацийӗ строительствӑпа монтаж ӗҫӗсене пурнӑҫлать. Сӗтел-пуканпа, оргтехникӑпа тивӗҫтересси - хула администрацийӗн вӗренӳ управленийӗн тивӗҫӗ.
Аса илтерер: шкула 2022 ҫулхи кӗркунне тума пуҫланӑ.
Чи малтан шкула кӑҫал утӑ уйӑхӗнче туса пӗтерме палӑртнӑ. Анчах кайран пӗлтернӗ тӑрӑх, шкула кӑҫал раштав уйӑхӗнче кӑна уҫӗҫ.
Чӑваш Енри шкулсемпе Раҫейӗн Патшалӑх Думин депутачӗ Ирина Филатова кӑсӑкланнӑ. Вӑл Телеграмри хӑйӗн страницинче пӗлтернӗ тӑрӑх, республикӑра пурӑнакансенчен ҫӑхав нумай ҫитнӗ.
Депутат Раҫҫейӗн ҫутӗҫ министрӗ Сергей Кравцов патне информацие ҫитернӗ, хӑш-пӗр объекта тӗрӗслесе тӑма ыйтнӑ.
«Унти хӑш-пӗр шкул тӗлӗшпе ҫивӗч ыйту пур. Шкулсенчен чылайӑшӗ ҫӗнӗ, пӗрне халь ҫеҫ тума тытӑннӑ», — тесе пӗтӗмлетнӗ Ирина Филатова.
Тӗслӗх вырӑннӗ вӑл Сӗнтӗрвӑрринчи К.Д. Ушинский ячӗллӗ шкула илсе кӑтартнӑ. Ӑна уҫнӑ, анчах пушар хӑрушсӑрлӑхӗ енчен кӑлтӑксем тупӑннӑ. Район прокуратури хула администрацине ҫыру ҫырса янӑ, анчах вырӑнти тӳре-шара хускалма васкамасть-мӗн.
Е тата Шупашкарти Таллеров урамӗнчи шкул. Асӑннӑ ҫӗр лаптӑкӗ ҫинче ӑна тума хула администрацийӗ ирӗк паман иккен, анчах строительствӑна пуҫӑннӑ.
Чӑваш Енри педагогсене — тӗрлӗ конкурс ҫӗнтерӳҫисене — преми парса хавхалантарма йышӑннӑ.
150 пин тенке Ҫӗнӗ Шупашкарти 18-мӗш лицейри истори учителӗ, «Чӑваш Енри ҫулталӑк учителӗ» Артём Максимов тивӗҫнӗ. Улатӑрти «Теремок» 1-мӗш ача пахчинче воспитательте ӗҫлекен Любовь Дубровскаяна, «Чӑваш Енри ҫулталӑк воспитательне», 100 пин тенкӗ пама йышӑннӑ.
50-шар пин тенке Шупашкар муниципаллӑ округӗнчи Тренккассинчи вӑтам шкулти класс ертӳҫине Анна Степановӑна, Шупашкарти 2-мӗш вӗпенӳ центрӗн социаллӑ педагогне Дария Волковӑна, Шупашкарти 23-мӗш ача пахчинчи Анастасия Степанова педагог-психолога, Ҫӗнӗ Шупашкарти 6-мӗш гимназин директор ҫумне Александр Карпова, Шупашкарти сывлӑх енчен хавшак ачасен 2-мӗш шкулӗнчи музыка учительне Наталья Яровӑна, Сывлӑх енчен хавшак ачасен вӗренӳ центрӗн тьюторне Галина Степановӑна, Шупашкарти 59-мӗш вӑтам шкулти пуҫламӑш классен учительнеКарина Гордеевӑна, Шупашкарти 205-мӗш ача пахчин учитель-логопедне Екатерина Мурчинӑна, Шупашкарти 62-мӗш вӑтам шкулти чӑваш чӗлхи тата литературин учительне Людмила Николавӑна парӗҫ.
Шупашкар муниципаллӑ округӗнчи Кӳкеҫре тума пуҫланӑ ҫӗнӗ шкулта пушар тухнӑ.
Чӑваш Енӗн Инкеклӗ ӗҫсен министерствинче пӗлтернӗ тӑрӑх, унти ҫынсене, строительсене, урама кӑларнӑ.
Пушар паян, утӑ уйӑхӗн 24-мӗшӗнче, алхасма тытӑннӑ. Пушар сӳнтерекенсене инкек пирки 10 сехете те 2 минутра пӗлтернӗ. Ҫуртӑн пӗрремӗш хутӗнчи утеплитель ҫунма пуҫланӑ. Пушара алхасма паман, часах сӳнтернӗ.
-2.7 °C