Ҫӗнӗ Шупашкарти 18-мӗш лицейре ӗнер «Чӑваш ёлки» иртнӗ.
Уява вырати шкулта пӗлӳ илекенсем ҫеҫ мар, хулари 14-мӗш шкулӑн вӗренекенӗсемпе чӑваш чӗлхипе литератури вӗрентекенӗсем те хутшӑннӑ.
Телеграмри «Пуринчен малтан. Ҫывӑрса юлмасан» каналта пӗлтернӗ тӑрӑх, ачасем чӑрӑш тавра чӑвашла юрланӑ, ташланӑ, вӑйӑсем вылянӑ. Вӗсен савӑнӑҫлӑ сӑн-пичӗ тӑрӑх ҫакӑ паллӑ: уяв пурне те килӗшнӗ.
Иртнӗ эрнекун Шупашкарти Иван Франко урамӗнчи скверта Ҫӗнӗ ҫул уявӗ пулнӑ. Унта Хӗл мучипе Юр пике килсе ҫынсене савӑнтарнӑ. Ачасем тупмалли юмахсен тупсӑмӗсене пӗлнӗ, ташӑ батлне хутшӑннӑ. Спорт конкурсӗсем те иртнӗ.
Ҫитес уяв ыран, раштавӑн 25-мӗшӗнче, пулӗ. Хальхинче - Трактор тӑвакансен проспектӗнчи 58-мӗш ҫурт патӗнче. Вӑл 18 сехетре пуҫланӗ. Унта та Хӗл мучипе Юр пике килӗҫ. Чӑваш эстрада артисчӗсем вара юрӑ-ташӑпа савӑнтарӗҫ.
Ҫӗнӗ Шупашкарта Ҫӗнӗ ҫул троллейбусӗ икӗ кун ҫӳрӗ. Салонра пассажирсене Хӗл мучипе Юр пике кӗтсе илӗҫ.
Акцин пӗрремӗш кунӗ паян иртет. Уяв троллейбусӗ 54-мӗш маршрутпа ҫӳрет. Троллейбус номерӗ - 1091.
Троллейбус паян 11 сехет те 14 минутра «Иваново» чарӑнуран ӗҫлеме пуҫланӑ.
Ҫӗнӗ ҫул троллейбусӗ тепрехинче ҫитес ҫул кӑрлачӑн 26-мӗшӗнче ҫула тухӗ.
Ыран Чӑваш Енре Телейлӗ ачалӑх ҫулталӑкне хупӗҫ. Савӑнӑҫлӑ мероприяти ыран, раштавӑн 8-мӗшӗнче, Шупашкарти Трактор тӑвакансен культура керменӗнче иртӗ. Унта 1000 яхӑн ача хутшӑнӗ.
ЧР Вӗренӳ министерстви пӗлтернӗ тӑрӑх, уявра тӗрлӗ мероприятие хастар хутшӑннӑ ачасене тав тӑвӗҫ, республикӑри мероприятисенче хастар пулнӑ шӑпӑрлансене те хавхалантарӗҫ.
Аса илтерер: 2023 ҫул – Чӑваш Енре Телейлӗ ачалӑх ҫулталӑкӗ. Ӑна пуш уйӑхӗн 20-мӗшӗнче официаллӑ майпа уҫнӑ.
Чӑваш Енӗн ӗҫ тата социаллӑ аталану министрӗ Алёна Елизарова Телеграмри хӑйӗн каналӗнче Чӑваш тӗррин кунӗпе чӑвашла саламланӑ.
«Пӗлменӗн пӗр тӗрӗ, пӗлекенӗн ҫӗр тӗрӗ теҫҫӗ...
Чӑваш тӗрри – мӗн тери илемлӗ те чуна тыткӑнлакан ӑсталӑх.
Хисеплӗ ентешсем! Сире Чӑваш тӗррин кунӗпе чунтан саламлатӑп!
Чӑваш ҫӗрӗ мӗн авалтан ҫӗр пин сӑмахпа, ҫӗр пин юрӑпа, ҫӗр пин тӗрӗ-эрешпе пуян пулнӑ. Ҫак пуянлӑх ламран лама куҫса пырать. Чӑваш тӗрринче тӑван халӑхӑн пуян историйӗ упранать. Несӗлсен ӑсталӑхӗ паянхи кун ҫӗнӗлле вӑй илсе пырать. Унӑн пӗлтерӗшне упраса хӑварас, анлӑрах сарас тӗллевпех республикӑра чӑваш тӗррин кунне те никӗсленӗ.
Чӑваш тӗрри асамлӑ та илӗртӳллӗ. Тӗрӗ тӑрӑх «вулама» пулать тӗнӗ ватӑсем. Йӑх-несӗл, управ паллисене паянхи кун та ӑстасем пир ҫине тирпейлӗн вырнаҫтараҫҫӗ, хайсен ӗҫӗсемпе тыткӑнлаҫҫӗ. Ҫак пуянлӑх, хаклӑ тупра упранасса, пулас ӑру патне те ҫитессе шанас килет.
Уяв ячӗпе, чӑваш тӗррине кӑмӑллакансем!» — ӑшшӑн саламланӑ министр.
Чӳк уйӑхӗн 26-мӗшӗнче Чӑваш тӗррин кунне уявланӑ май тӗрлӗ ҫӗрте тӗрлӗ мероприяти ирттереҫҫӗ.
Шупашкар муниципаллӑ округӗнчи Ишлейри ял вулавӑшӗнче авалхи чӑваш тумӗсене кӑтартнӑ. Вӗсене Роза Карикова Римма Сорокина кӑтартнӑ.
Римма Леонидовна (сӑнӳкерчӗкре сылтӑм енче) валли чӑваш кӗпине 1983 году амӑшӗ, Вера Волкова, ҫӗлесе панӑ. Вера Прокопьевна тумӗпе Римма Леонидовна хӑйӗн туйӗн иккӗмӗш кунӗнче ҫынсен умне тухнӑ.
Роза Карикова (сӑнӳкерчӗкре сулахай енчи) ҫипуҫне те амӑшӗ, Фёкла Яковлевна, хатӗрлесе панӑ. Ку вӑл 1955 ҫулта пулнӑ.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта тӑрӑшакансем паян ӗҫе чӑваш эрешӗллӗ тумпа пынӑ. Ятарлӑ ҫипуҫ ҫуккисем хӑйсен тумне тӗрленӗ алшӑллисемпе илемлетнӗ.
«Ӗҫе тӗрӗпе» республика акцине эпир хаваспах хутшӑнатпӑр. Ҫипуҫ ҫумне илемлӗн ҫыпӑҫтарса хунӑ пӗчӗк сӑмса тутри те илем кӳрет, сӑн ҫуталсах каять», — тенӗ центрта ӗҫлекен Татьяна Ильина.
Унсӑр пуҫне центра куравсем те уҫӑлнӑ. Унта учреждение ҫӳрекен кинемейсемпе мучисем ӑсталанӑ хитре япаласемпе паллаштараҫҫӗ.
Ҫитес ҫул Республика кунӗ йӑлана кӗнӗ тӑрӑх Шупашкарта тата пӗр муниципаллӑ округра иртӗ. Хальхинче Тӑвай муниципаллӑ округне суйланӑ. Ҫавна май Шупашкарпа ҫак округӑн уява хатӗрленме тытӑнмалла.
Палӑртмалла: Тӑвай муниципаллӑ округӗнче Республика кунӗ 2013 ҫулта иртнӗ. Кӑҫал вара уяв Ҫӗнӗ Шупашкарта пулнӑ. Пӗлтӗр Республика кунӗнче Куславкка округӗнче савӑннӑ. Ун умӗн, 2021 ҫулта, уява Ҫӗмӗрле районӗнче йӗркеленӗ.
Халӑхсен пӗрлӗхӗн кунӗ, чӳкӗн 4-мӗшӗ, ҫывхарать. Апла эрнере пилӗк кун ӗҫлекенсене канмалли кунсем кӗтеҫҫӗ.
Чук уйӑхӗн 4-мӗшӗнчен пуҫласа 6-мӗшӗччен (шӑматкун, вырсарникун тата тунтикун) ӗҫе тухмалла мар. РФ Ӗҫ кодексӗпе килӗшӳллӗн, эрнекун ӗҫ кунӗ 1 сехет кӗскерех пулӗ.
Вӑраха тӑсӑлакан тепӗр канмалли кунсем Ҫӗнӗ ҫулта пулӗҫ.
Паян — ял хуҫалӑхӗчен тата тирпейлекен промышленноҫра ӗҫлекенсен професси уявӗ. Ҫав ятпа вӗсене республика Элтеперӗ Олег Николаев саламланӑ.
«Сирӗн ӗҫӗр – професси кӑна мар, вӑл эсир хӑвӑр валли юратса суйласа илнӗ пурнӑҫ йӗрки те. Агропромышленноҫ комплексӗнче ӗҫлеме иксӗлми вӑй-хал, яваплӑхпа тӑрӑшулӑх кирлӗ. Чӑваш Ен апат-ҫимӗҫ хӑрушсӑрлӑхне тивӗҫтерессишӗн 20 пине яхӑн ҫын ырми-канми вӑй хурать.
Ял хуҫалӑх ӗҫченӗсем ҫӗр пулӑхлӑхне ӳстерессишӗн ҫине тӑраҫҫӗ, выльӑх-чӗрлӗх ӗрчетеҫҫӗ, пысӑк тухӑҫ туса илеҫҫӗ, ҫапла майпа Чӑваш Енре тата Раҫҫейӗн ытти регионӗсенче пурӑнакансене пахалӑхлӑ та усӑллӑ апат-ҫимӗҫпе тивӗҫтереҫҫӗ. Тирпейлекен предприятисем вара регион экономикине аталантарма, ҫӗнӗ ӗҫ вырӑнӗсем йӗркелеме тата ҫынсен пурнӑҫне лайӑхлатма пулӑшаҫҫӗ», — тенӗ саламра.
-1.7 °C