Паян, Ҫемье, юрату тата шанчӑклӑх кунӗнче, ЧР Элтеперӗ Олег Николаев Красноармейски округӗнчи Янмурҫин ялӗнче пурӑнакан Ивановсене «Юратупа шанчӑклӑхшӑн» орденпа чысланӑ.
Геннадий Ивановичпа Галина Георгиевна 1972 ҫулта паллашнӑ. Ҫапла 52 ҫул пӗрле вӗсем. Иккӗшӗ те – ӗҫ ветеранӗ. Геннадий Иванович механизаторта 47 ҫул ӗҫленӗ, Галина Георгиевна вӗрентекенре 38 ҫул тӑрӑшнӑ.
Ивановсен – 3 хӗр, кашни аслӑ пӗлӳ илнӗ, пӗри амӑшӗн ҫулӗпе кайса вӗрентекен пулнӑ.
Ивановсем ахаль ларма юратмаҫҫӗ, вӗсем ҫулӗсене пӑхмасӑр пахча ӗҫлеҫҫӗ, выльӑх-чӗрлӗх тытаҫҫӗ.
Сӗнтӗрвӑрри округӗнчи Кушник ялӗнче пурӑнакансем Иван Купала уявӗ ячӗпе пухӑннӑ.
Унта ачасем язычествӑри хӑш-пӗр йӑла-йӗркепе паллашнӑ, кӑшӑлсем ҫыхнӑ, сиплӗ чей ӗҫнӗ.
Кайран вара чечекрен ҫыхнӑ кӑшӑла пуҫа тӑхӑнса вӑйӑ картине тӑнӑ. Ҫапла аслисемпе ачасем Иван Купала уявне хаваслӑ ирттернӗ.
Тутарстанри Сиктӗрме ялӗнче иртнӗ «Уява» 20 пин ытла ҫын хутшӑннӑ.
Аса илтерер: ҫак мероприяти Иван Казанков тӑрӑшнипе тата пулӑшнипе иртет. Вӑл «Звениговский» аш-какай комбиначӗн директорӗ.
Петӗр Хусанкай ҫуралса ӳснӗ яла Раҫҫейри тӗрлӗ регионтан делегацисем, пултарулӑх коллективӗсем килнӗ. Уявра фестиваль-конкурс, спорт ӑмӑртӑвӗсем, ӑсталӑх класӗсем иртнӗ. Кӑҫал «Раҫҫей чӑваш пики» конкурс та йӗркеленӗ. Ҫӗнтерӳҫӗ ятне Елчӗк округӗнчи Виктория Романова тивӗҫнӗ.
Тутарстанри Сиктӗрмере паян Уяв иртнӗ. Ҫавна май унта Чӑваш сӑри фестивалӗ те иртнӗ.
Унта пулса курнӑ Антонина Андреева пӗлтернӗ тӑрӑх, «Чӑваш сӑри» фестиваль лапамне хаклӑ хӑнасем пырса курнӑ.
«Ачак сӑрине вӗретекен «Вирьял» халӑх фольклор ушкӑнӗ (ертӳҫи - Лев Иванов)
авал чӑвашсем мӗнле сӑра туни, мӗнле савӑт-сапапа усӑ курни ҫинчен тӗпӗ-йӗрӗпех кӑтартса пурне те тӗлӗнтернӗ. Хӑшӗсем кун пек савӑтсен ячӗсене те ас тумасть».
Ҫемье тата юратупа шанчӑклӑх кунӗ умӗн республикӑри 50 ҫултан кая мар пӗрле пурӑнакан мӑшӑрсене чысласси йӑлара. Кӑҫал 7 мӑшӑра «Юратупа шанчӑклӑхшӑн» орденне парӗҫ.
Ҫак йышра — Красноармейски округӗнчи Геннадипе Галина Ивановсем тата Владимирпа Галина Филипповсем, Куславкка тӑрӑхӗнчи Евграфипе Людмила Ивановсем, Пӑрачкав округӗнчи Владимирпа Валентина Кулясовсем, Улатӑр округӗнчи Александрпа Лидия Маланьинсем, Елчӗк тӑрӑхӗнчи Петрпа Зоя Поповсем, Хӗрлӗ Чутай округӗнчи Геннадипе Нина Ухлиновсем.
Ҫавӑн пекех 5 ача ҫуратнӑ икӗ хӗрарӑма амӑшӗн мухтавӗн «Анне» паллине чыслӗҫ. Ӑна Хӗрлӗ Чутай округӗнчи Эльвира Платонова тата Куславкка тӑрӑхӗнчи Екатерина Шильгачева тивӗҫнӗ.
РФ Ӗслев министерстви пӗлтернӗ тарах, кӑҫал Ҫӗнӗ ҫул хыҫҫӑн 2 эрнене яхӑн канӑпӑр. Канмалли кунсем раштав уйӑхӗн 31-мӗшӗнчен пуҫласа карлачӑн 11-мӗшӗччен пулӗҫ. Ҫапла 12 кун ӗҫе тухмалла мар.
Ҫулталӑк тӑршшӗпе 3 куна тӑсӑлакан кану кунӗсем 5 хутчен пулӗҫ: кӑрлач уйӑхӗнче Тӑван ҫӗршыв хӳтӗлевҫин явӗнче, пуш уйӑхӗнче Пӗтӗм тӗнчери хӗрарӑмсен кунӗнче, ҫу уйӑхӗнче Ҫуркуннепе Ӗҫ тата Ҫӗнтерӳ кунӗсенче, ҫӗртме уйӑхӗнче Раҫҫей кунӗнче.
Ку – малтанлӑха палӑртнӑ календарь. Хальлӗхе ӑна ҫирӗплетмен.
Республика кунӗнче Чӑваш Республикин тава тивӗҫлӗ артистки Ирина Шоркина та килнӗ. Вӑл хальхи вӑхӑтра Мускавра пурӑнать.
Артистка ятарласа Мускавран уява Етӗрне хулине килнӗ. Вӑл ҫак тӑрӑхра ҫуралса ӳснӗ.
«Республика кунӗ Шупашкарта кӑна мар, тӑван Етӗрнере те иртрӗ. Унта вӑрттӑн, никама систермесӗр кайрӑм. Ҫапах ҫынсем палласа сӑн ӳкерӗнме пычӗҫ», - ҫапла ҫырнӑ юрӑҫ халӑх тетелӗнчи хӑйӗн страницинче.
Шупашкарти ватӑсем Республика кунӗпе хавхаланса республика гимнне шарантарнӑ.
Хулари халӑхӑн социаллӑ ыйтӑвӗсене тивӗстрекен комплекслӑ центрти стационарта пурӑнакан ватӑсем валли паян викторина ирттернӗ, республика кун-ҫулӗпе паллаштаракан документлӑ фильм кӑтартнӑ.
Викторинӑна ирттерекен Наталья Фадеева каласа кӑтартнӑ тӑрӑх, ватӑсем викторина ыйтӑвӗсене кӑсӑкланса хуравланӑ. Гимна юрлама ҫӑмӑлах пулман пулин те пурте тӑрӑшса шарантарнӑ.
Шупашкарта Республика кунӗнче кӑҫал та Фейерверксен фестивалӗ пулмӗ. Вӑл уяв программинче ҫук. Фестиваль пӗлтӗр те иртмен.
Фестиваль пӗрремӗш хут 2008 ҫулхи ҫу уйӑхӗн 9-11-мӗшӗсенче пулнӑ. Кайран ӑна Республика кунӗнче ирттерме тытӑннӑ. Вӑл ҫӗртме уйӑхӗн 23-24-мӗшӗсенче иртнӗ. Пӗлтӗр вара фестивале хӑрушсӑрлӑха пула йӗркелемен. Кӑҫал та ҫаплах.
Аса илтерер: уявра Шупашкара Раҫҫейри паллӑ юрӑҫ Татьяна Куртукава килет. Кунсӑр пуҫне Зыкина ячӗллӗ «Раҫҫей» ансамбль юрӑ-ташӑпа савӑнтарӗ.
Ҫӗртме уйӑхӗн 24-мӗшӗнче Чӑваш автономи облаҫӗ йӗркеленнӗренпе 105 ҫул ҫитнине паллӑ тӑвӗҫ. Влаҫ органӗсен порталӗ пӗлтернӗ тӑрӑх, мероприятисен программи пуян.
Аса илтерер: кӑҫал Шупашкарсӑр пуҫне Республика кунӗ Етӗрне округӗнче иртӗ. Уявра йӑлана кӗнӗ мероприятисем пулӗҫ: «Руҫ ӑстисем», «Раҫҫей ҫӑлкуҫӗсем», «Эпӗ – хӗрарӑм»… Ҫӗртмен 23-мӗшӗнче чӑваш юстрада артисчӗсен концерчӗ пулӗ. Вӑл 21 сехетре пуҫланӗ, унта Сергей Павлов, Алина Федорова, Валентина Кузнецова, Алексей Шадриков, Катя Петрова, Сергей Лекеров тата ыттисем юрлӗҫ.
Ҫӗртмен 24-мӗшӗнче вара каҫхине Хӗрлӗ тӳремри сцена ҫинче Раҫҫейри паллӑ юрӑҫ Татьяна Кортукова концерт лартӗ.
-11.7 °C