Шупашкарта наци культурисен «Хула пикникӗ» фестивалӗ иртӗ. Ӑна Чӑваш Енӗн тӗп хулин кунне халалланӑ. Мероприяти ҫурла уйӑхӗн 9-мӗшӗнче Лакрей вӑрманӗнче пулӗ. Вӑл 12-рен пуҫласа 18 сехетчен иртӗ.
«Хыпар» издательство ҫурчӗн халӑх тетелӗнчи пабликӗнче пӗлтернӗ тӑрӑх, уявра пирӗн республикӑра пурӑнакан тӗрлӗ халӑхӑн культурипе ҫывӑхрах паллашма май килӗ. Тӗрлӗ халӑхӑн наци апатне астивсе пӑхма, халӑх ӑстисен ӗҫӗсемпе паллашма, ӑсталӑх лаҫҫисене хутшӑнма, наци вӑййисенче тата спорт ӑмӑртӑвӗсенче тупӑшма май килӗ.
Унсӑр пуҫне тӗрлӗ халӑхӑн юрри-ташшипе киленме май туса пырӗҫ.
Уяв, тепӗр хутчен аса илтерер, Лакрей вӑрманӗнче ҫурла уйӑхӗн 9-мӗшӗнче пулӗ. Ку вӑл — вырсарни кун. Кӑмӑл пулсан ҫитсе курма май пур.
Улатӑр хули 474-мӗш ҫуралнӑ кунне паллӑ тунӑ. Уяв мероприятийӗсене Чӑваш Ен Правительствин делегацийӗ те хутшӑннӑ.
Ҫак кун Улатӑрта А.Г.Николаев летчик-космонавт ячӗллӗ 1-мӗш спорт шкулне тӗпрен юсанӑ хыҫҫӑн уҫнӑ. Ӑна ҫӗнетме тата хальхи йышши спорт инвентарӗсемпе тивӗҫтерме республика хыснинчен 72,5 миллион тенкӗ уйӑрнӑ. Шкулта ачасем валли пӗтӗм условие туса панӑ: спорт гимнастикипе, ирӗклӗ кӗрешӳпе, бокспа тата футболпа туслашма йӑлтах пур халӗ.
ЧР Министрсен Кабинечӗн председателӗ Сергей Артамонов улатӑрсем ӗҫлеме, чемпионсене воспитани пама пӗлнине палӑртнӑ, малашне те пулӑшассине каланӑ. Вӑл каланӑ тӑрӑх, 2027 ҫулта хулара футбол уйӗ тума палӑртнӑ. Унта искуственнӑй курӑк, чупмалли ҫулсем, ГТО лапамӗсем тата канмалли зонӑсем пулӗҫ.
Утӑ уйӑхӗн 25-мӗшӗнче Ӗренпур облаҫӗнчи Грачевка ялӗнче чӑваш культурин праҫникӗ «Уяв» иртнӗ. Унта Чӑваш Енри, Пушкӑртстанри, Ӗренпур облаҫӗнчи пултарулӑх ушкӑнӗсем хутшӑннӑ.
Артистсем сцена ҫинче чӑвашла юрӑсем шӑрантарнӑ. Мероприяти хаваслӑ та кӑсӑклӑ иртнӗ: йӗркелӳҫӗсем этнокартишсем хатӗрленӗ, куравсем, ӑсталӑх класӗсем, спорт ӑмӑртӑвӗсем ирттернӗ. Ҫавӑн пекех наци апат-ҫимӗҫне тутанса пӑхма май пулнӑ, ҫавӑнтах чӑваш сувенирӗсене сутнӑ.
«Уява» Чӑваш Республикинчен Вӑрнар округӗнчи пултарулӑх ушкӑнӗ кайнӑ.
Муркаш районӗнчи Очӑкасси ял клубӗнче кӗнеке хӑтлавӗ иртнӗ. Ҫавна май Муркаш районӗнчи тӗп вулавӑш тата Очӑкассинчи ял вулавӑшӗ вулав конференцийӗ йӗркеленӗ.
Леонид Морозов ятлӑ автор «Слово ученика об учителях» кӗнеке кун ҫути кӑтартнӑ. Тиражӗ пысӑк мар-ха. 100 экземпляр. Сӑмах май каласан, Леонид Петрович 15 кӗнеке авторӗ иккен.
Леонид Петрович Морозов хӑйӗн пӗрремӗш кӗнекинче («Малая родина Оточево», 2014 ҫул) Шурик Матвеев ҫывӑх юлташӗ пирки пичетлесе кӑларнӑ. Александр Витальевич — инженер тата конструктор. Александр Витальевич сӑвӑ та ҫырать иккен. «Мой мир в рифмах» сӑвӑсен пуххине вӑл 30 экземплярпа тӑванӗсем валли кӑларнӑ. Кӗнеке 198 страницӑран тӑрать, унта 150 ытла сӑвӑ.
Муркаш муниципалитет округӗн администрацийӗн культура тата архив ӗҫӗсен пайӗн пуҫлӑхӗ Любовь Рыжкова Л. П. Морозова тата А. В. Матвеева Муркаш тӑрӑхӗн пуҫлӑхӗн Тав хучӗпе чысланӑ.
Иртнӗ шӑматкун Красноармейски районӗнчи Ҫырмапуҫӗнче ял кунне ирттернӗ. Вырӑнти хастар Зинаида Михайлова халӑх тетелӗнчи хӑйӗн страницинче пӗлтернӗ тӑрӑх, ҫырмапуҫсем хӑнасене ҫавра ҫӑкӑрпа та чӑваш сӑрипе кӗтсе илнӗ.
Ял уявне Карай территори пайӗн ертӳҫи Геннадий Сверчков уҫнӑ. Вӑл хӑнасене, ял-йыша паллӑ кунпа саламланӑ, пурне те ӑнӑҫуллӑ ӗҫлесе пыма, ытлӑ-ҫитлӗ те ӑраскалпа пурӑнма ҫирӗп сывлӑхпа ҫитӗнӳ суннӑ.
Ҫырмапуҫ ялӗн историйӗпе ҫак ялта ҫуралса ӳснӗ Виталий Михайлов, Нестер Янкас ячӗллӗ пӗрлӗх ертӳҫин ҫумӗ, Красноармейски округӗн энциклопедийӗн тӗп редакторӗ, хисеплӗ тавра пӗлӳҫӗ, Чӑваш наци академикӗ каласа кӑтартнӑ. Сӑмах май каласан, педагогика ветеранӗ эпир маларах асӑнса хӑварнӑ Зинаида Михайлован мӑшӑрӗ пулать.
Ял уявне Красноармейски тӑрӑхӗн пуҫлӑхӗн ҫумӗ Олег Николаев та ҫитнӗ, вӑл вырӑнти хастарсене, ятлӑ-сумлӑ ҫынсене Тав хучӗпе чысланӑ.
Сӑмах май каласан, вырӑс чӗлхи ялсенче те чӑваш чӗлхипе тупӑшсах янӑрать те, ҫырмапуҫсем те ял кунӗ валли хатӗрленӗ баннера «С праздником» тесе вырӑсла ҫырса хунӑ.
Шупашкар хулинчи ҫемьене «Ашшӗ-амӑшӗн мухтавӗ» орден медальне панӑ. Тӗрӗсрех каласан, вӗсене чысласси пирки малтанах хушу тухнӑ. Халӗ вара орден медальне утӑ уйӑхӗн 8-мӗшӗнче, Ҫемье тата юратупа шанчӑклӑх кунӗнче, алӑран тыттарнӑ.
Сӑмах – Терентьевсем пирки. Валерипе Анна пилӗк ачана воспитани параҫҫӗ: виҫӗ ывӑл та икӗ хӗр. Вӗсене «Ашшӗ-амӑшӗн мухтавӗ» орден медалӗпе чысласси пирки Раҫҫей президенчӗ пуш уйӑхӗн 30-мӗшӗнче хушӑва алӑ пуснӑ.
Палӑртса хӑварар: Валерий Николаевич «ЭКРА» предприятин ӑслӑлӑхпа производство департаментне ертсе пырать. Пушӑ вӑхӑтра спортпа кӑсӑкланать, юрӑ-кӗвве юратать, гитара калать. Анна Зафуровна – кил ӑшшин управҫи, ҫав вӑхӑтрах ӗҫлесе те ӗлкӗрет.
Канаш округӗнчи Усман Эскеровпа Дарья Садовская Мускав хулинче пӗрлешнӗ.
Ӗнер, Ҫемье тата юратупа шанчӑклӑх куненче, тӗп хуламӑрти Наци центрӗнче «Раҫҫей. Чӗресене пӗрлештерсе» форум иртнӗ, унта тӗрлӗ регионти мӑшӑрсем пӗрлешнӗ. Пирӗн Чӑваш Енрен Усман Эскеровпа Дарья Садовская кайнӑ.
Усманпа Дарья — юристсем, вӗссем чӑваш культурине упрама тӑрӑшаҫҫӗ: чӑвашла юрлаҫҫӗ, ҫулсерен Акатуя хутшӑнаҫҫӗ, тетрсемпе музейсене ҫӳреҫҫӗ.
Сӑмах май, иртнӗ ҫулсенче Мускавра иртнӗ «Раҫҫей. Чӗресене пӗрлештерсе» форума Шупашкар хулинчи Максим тата Анастасия Горскисем, Елчӗк округӗнчи Александр тата Анна Кривововсем, Тӑвай округӗнчи Анна тата Алексей Андреевсем, Шупашкар хулинчи Алексей тата Юлия Комлевсем хутшӑннӑ.
Чӑваш Ен Элтеперӗ Олег Николаев республикӑн влаҫ органӗсен официаллӑ порталӗнче Ҫемье, юрату тата шанчӑклӑх кунӗпе саламланӑ.
«Кашни халӑхӑнах ҫемье пирки каланӑ ытарлӑ сӑмахсем пур. Пирӗн ваттисен сӑмахӗ вара ҫапла палӑртать: «Кил-ҫурт пуянлӑхӗ – кил-йыш кӑмӑлӗнче». Ҫакӑ илемлӗ каларӑш ҫеҫ мар, вӑл пирӗн пурнӑҫӑн тӗшши.
Ҫемье – кашни ҫыннӑн тӗп пуянлӑхӗ. Ҫывӑх ҫынсем ҫумра чухне чун хӑпартланса каять, хурлӑх та манӑҫать. Шӑпах килте, ҫывӑх ҫынсен ҫумӗнче эпир ҫӗнӗ ҫитӗнӳсем тума вӑй-хал илетпӗр. Кунта ачасем Тӑван ҫӗршывӑмӑра юратма, аслисене хисеплеме вӗренсе ӳсеҫҫӗ.
Пӗр ӳстермесӗр калатӑп, ҫемье – чи кирли тата Чӑваш Ен тӗрекӗ. Эпир нумай ачаллӑ ҫемьесен шучӗ ҫултан-ҫул ӳссе пынине, ҫемье институчӗ мӗнлерех ҫирӗпленнине тата пулӑшу памалли тытӑм аталаннине куратпӑр», — тенӗ саламра.
Улатӑр районӗнче пурӑнакан Таисия Кожинова матрос-моторист пулса ӗҫленӗ. Ӗнер, утӑ уйӑхӗн 5-мӗшӗнче, унӑн професси уявӗ пулнӑ: Юханшыв тата тинӗс флотӗнче ӗҫлекенсен кунӗ. Ҫавна май ун ҫинчен республикӑн влаҫ органӗсен халӑх тетелӗнчи страницинче каласа кӑтартнӑ.
Таисия Кожинова кимӗ-карап романтикине хӑйӗн пурнӑҫӗн 40 ытла ҫулне халалланӑ.
Унӑн упӑшки капитан пулнӑ. Вӑл шыва юратма матросссемпе штурмансене ҫеҫ мар, хӑйӗн мӑшӑрне те хӑнӑхтарнӑ.
Ҫапла вара ҫамрӑк хӗрарӑм «Ядрин» (чӑв. Етӗрне) теплоход штрувалӗ умне тӑнӑ. Матрос-моторист профессине алла илсе хӗрарӑм упӑшкипе Атӑлҫи тӑрӑхӗнчи юханшывсем тӑрӑх нумай ҫӳренӗ. Вӗсен рейсӗсем двигатель шавӗпе ҫеҫ мар, балалайкӑпа калакан такмаксемпе те тулнӑ. Мӑшӑр юрра-кӗвве юратнӑ.
Таисия Яковлевна хӑйсен экипажне Андриян Николаев, Валерий Быковский, Валентина Терешкова космонавтсене те турттарма шаннине паян та ӑшшӑн аса илет.
Шупашкар хулинчи Лакрей вӑрманӗнче «Пеледыш пайрем» наци уявӗ иртнӗ. Унта мари ҫыннисем пухӑннӑ. Ку уява ҫурхи ӗҫсем вӗҫленсен паллӑ тӑваҫҫӗ. Йӑлана кӗнӗ тӑрӑх, ҫӗртме уйӑхӗнче.
Пирӗн республикӑра ҫак халӑх ҫыннисем сахал мар. Нумайӑшӗ кӳршӗ Мари Эл республикинчен пирӗн пата вӗренме е ӗҫлеме килет, теприсем ҫемье ҫавӑрса кунтах тӗпленеҫҫӗ. Надежда Шуйцевӑпа та ҫапла пулса тухнӑ ав. Вӑл 27 ҫул каялла качча тухнӑ та кунта тӗпленнӗ, ҫапах тӑван тӑрӑхӗ, Мари Эл, пирки манмасть.
Палӑртса хӑварар: официаллӑ даннӑйсем тӑрӑх, пирӗн республикӑра 3 пине яхӑн мари ҫынни пурӑнать.
+14.3 °C