Ӗнер, нарӑс уйӑхӗн 8-мӗшӗнче Чӑваш Енӗн Стройминӗн «Биологилле тасатмалли сооружени» патшалӑхӑн унитарлӑ предприятийӗн директорне Юрий Алексеева ӗҫрен кӑларнӑ. Ӗҫлӗ хута республика ертӳҫи Олег Николаев алӑ пуснӑ, документа влаҫ органӗсен официаллӑ порталӗнчи «Саккунсем» ярӑмра вырнаҫтарнӑ.
Тӗнче тетелӗнчи МИХсем пӗлтернине ӗненсен, Юрий Иванович тӗлӗшпе маларах пуҫиле ӗҫ пуҫарнӑ. Вӑл ӗҫ вырӑнӗпе усӑ курнӑ тесе шухӑшлаҫҫӗ.
Эрнекун, нарӑс уйӑхӗн 4-мӗшӗнче, Чӑваш Енӗн Культура, национальноҫсен ӗҫӗсен тата архив ӗҫӗн министерствинче кадр улшӑнӑвӗ пулса иртнӗ, министр ҫумӗнче шӑп та лӑп пӗр ҫулталӑк ӗҫленӗ Георгий Богуславский министерствӑри пукансӑр юлнӑ тесе эпир хыпарланнине пирӗн вулакансем астӑваҫҫӗ пулӗ. Анчах ҫав кунах республика ертӳҫи тепӗр йышӑнӑва алӑ пуснӑ. Унпа килӗшӳллӗн Георгий Богуславский министр заместителӗнчех ӗҫлӗ.
Ӗҫлӗ документ пирки Олег Николаев Инстаграмри хӑйӗн страницинче нарӑс уйӑхӗн 5-мӗшӗнче уҫӑмлатнӑ. Унта вӑл ӑнлантарнӑ тӑрӑх, Богоуславскийпе алӑ пуснӑ контракт вӑхӑчӗ вӗҫленнӗ, халӗ унӑн ӗҫ вӑхӑтне ҫӗнӗ йышӑнупа тӑсса панӑ. Ку вӑл — крлӗ юридици процедури ҫеҫ.
Нарӑс уйӑхӗн 2-мӗшӗнче Шупашкарти «Аспект» вӗренӳпе методика центрне Иван Архипов ертсе пыма тытӑннӑ. Кун пирки Чӑваш Енӗн Ӗҫ тата социаллӑ хӳтлӗх министерстви Инстаграмра паян пӗлтернӗ.
«Аспект» вӗренӳпе методика центрӗ эпир маларах асӑннӑ ведомствӑна пӑхӑнать. Вӑл ҫынсене ҫӗнӗ профессие алла илме пулӑшать, хушма пӗлӳ илсе професси шайне ӳтерме те унта май пур. Ӗҫсӗр ҫынсем патшалӑх шучӗпе вӗреннипе пӗрлех «Аспектра» кирек кам та тӗрлӗ ӑсталӑха укҫа тӳлесе илейрет.
Коллектива ҫӗнӗ ертӳҫӗпе республикӑн ӗҫ тата социаллӑ хӳтлӗх министрӗн ҫумӗ Александр Колесников паллаштарнӑ. Сӑмах май, Колесников хӑй те унччен «Аспектра» ӗҫленӗ, унта директор пулнӑ. Иван Архипов пирки каласан, вӑл маларах Чӑваш Енӗн Правительствинче тимленӗ.
Чӑваш Республикин халӑхӑн ӗҫлӗх центрне ертсе пыма Виктор Ковалёва ҫирӗплетнӗ. Унпа коллектива республикӑн ӗҫ тата социаллӑ хӳтлӗх министрӗ Алёна Елизарова нарӑс уйӑхӗн 2-мӗшнче паллаштарнӑ. Виктор Михайлович асӑннӑ центрта унччен ертӳҫӗ тивӗҫне пурнӑҫланӑ. Ҫавӑнпа та коллективра тӑрӑшакансем ӑна япӑх мар пӗлеҫҫӗ.
Виктор Ковалёв ӗҫлӗх службинче 1999 ҫултанпа тӑрӑшать. Малтан специалист пулнӑ, унтан Ӗҫлӗх центрӗн Етӗрне районӗнчи пайне ертсе пынӑ. Республикӑн Ӗҫ тата социаллӑ хӳтлӗх министерствинче ӗҫлесе те вӑл самай опыт пухнӑ.
Ӗнер, нарӑс уйӑхӗн 2-мӗшӗнче, Шупашкарти вырӑс драма театрӗнче ҫӗнӗ тӗп режиссёрпа паллаштарнӑ. Тилхепене 50 ҫулти Александр Кладькона тыттарнӑ.
Александр Иванович — театрпа кино актёрӗ тата режиссёрӗ. Вӑл 1971 ҫулта Украинӑри Одесса хулинче ҫуралнӑ. Питӗрти театр ӳнерӗн академийӗнче, каярах унтах режиссура кафедринчи аспирантурӑра вӗреннӗ. Фонтанкӑри Ҫамрӑксеен театрӗнче артистра ӗҫленӗ, Псковри А.С. Пушкин ячӗллӗ академи драма театрӗн тӗп режиссёрӗнче ӗҫленӗ. Вӑл режиссёр пулса лартнӑ ӗҫсем тӗрлӗ конкурсра ҫӗнтернӗ.
Шупашкар хула администрацийӗн пуҫлӑхӗ Денис Спирин общество транспортӗнче билет хакланасси пирки систернӗ. Ку кӗҫех пулмалла.
Хакӗ ӳсӗ, анчах 4 тенкех мар – ҫапла пӗлтернӗ Денис Спирин. Ара, халӑхра билет 4 тенкӗ хакланасси пирки сас-хура ҫӳренӗ. Сити-менеджер вара ку иккӗленӗве сирнӗ.
Перевозчиксене мӗн чухлӗ тӑкак пулни пирки информаци хатӗрлеме каланӑ. Анчах чылайӑшӗ ҫакна туман. Администрацие ку хыпара троллейбус управленийӗ тата темиҫе перевозчик ҫеҫ илсе ҫитернӗ. Ҫавна май хальлӗхе билет хакӗ мӗн чухлӗ ӳсесси паллӑ мар.
Чӑваш Республикин автомобиль ҫулӗсен управленийӗн директорӗн тивӗҫӗсене пурнӑҫлама паянтан, нарӑс уйӑхӗн 1-мӗшӗнчен, Юрий Шилова шаннӑ. Йышӑнӑва республика ертӳҫи Олег Николаев алӑ пуснӑ.
Юрий Александрович 1966 ҫулхи кӑрлач уйӑхӗн 5-мӗшӗнче ҫуралнӑ. 1990 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. Унта вӑл инженер-электрик пӗлӗвне илнӗ. Тепӗр 7 ҫултан, 1997 ҫулта, Питӗрти патшалӑх техника университетӗнчен экономист дипломӗпе вӗренсе тухнӑ.
Малтанласа вӑл тӗрлӗ предприятире директор, директорӑн ҫумӗ, коммерци директорӗ, финанспа экономика директорӗ пулса ӗҫленӗ. 2002 ҫулта ӑна Шупашкар хула администрацийӗн Ленин районӗн администрацийӗн пуҫлӑхӗ пулма шаннӑ, 2002-2005 ҫулсенче Шупашкар хула администрацийӗн Мускав районӗн администрацийӗн пуҫлӑхӗнче тӑрӑшнӑ.
Юрий Шиловӑн «Контактра» страницинче (унта вӑл кӑҫалхи кӑрлачӑн 24-мӗшӗнченпе кӗмен) ӗҫ вырӑнне «Дорисс» акционер обществи тесе кӑтартнӑ.
Эрнекун, кӑрлач уйӑхӗн 28-мӗшӗнче, Чӑваш Енӗн вӗренӳ тата ҫамрӑксен политикин министрӗн заместителӗ пулма Алексей Иванова шаннӑ. 48-мӗш номерлӗ хушӑва республика ертӳҫи Олег Николаев алӑ пуснӑ. Документа влаҫ органӗсен офицаллӑ порталӗнчи «Саккунсем» ярӑма вырнаҫтарнӑ.
Паянхи куна илсен, Чӑваш Енӗн вӗренӳ тата ҫамрӑксен политикин министрӗн Дмитрий Захаровӑн виҫӗ заместитель: Алексей Лукшин (пӗрремӗш заместитель), Ольга Хлебникова тата Алексей Иванов.
Иркутск тӑрӑхӗнчи чӑвашсен «Юлташ» ассоциацине йӗркеленӗренпе 30 ҫул ҫитнӗ. Ӑна 1990 ҫулхи раштав уйӑхӗн 29-мӗшӗнче пуҫарса янӑ. 2001 ҫулта «Юлташ» культура центрӗнчен наципе культура автономийӗ туса хунӑ.
Паллӑ кунпа ассоциаци ертӳҫине Вероника Тимофеевӑна Иркутск облаҫӗн кӗпӗрнаттӑрӗ Игорь Кобзев саламланӑ май Тав хучӗпе чысланӑ. Чӑваш Ен Элтеперӗ Олег Николаев та йӑхташӑмӑрсене саламланӑ. Кун пирки Вероника Тимофеева Фейсбукра ӗнер, кӑрлач уйӑхӗн 26-мӗшӗнче, хыпарланӑ.
Иркутск тӑрӑхӗнчи йӑхташӑмӑрсен ассоциацийӗн пӗрремӗш ертӳҫи Михаил Романов пулнӑ. Вӑл Пушкӑртстанри Пелепей районӗнчи Семёновка ялӗнче ҫуралнӑ, Тӑван ҫӗршывӑн аслӑ вӑрҫине хутшӑннӑ. 1999 ҫулхи чӳк уйӑхӗнчи йӑхташӑмӑрсен пӗрлешӗвне Александр Иванов ертсе пыма тытӑннӑ.
Шупашкар хула администрацийӗн вӗренӳ управленийӗн пуҫлӑхӗ заместительсемсӗр тӑрса юлнӑ. Кун пирки «Ҫыхӑнура» форум управлени сайтӗнчи хыпар тӑрӑх пӗлтернӗ. Сайтра кӑтартнӑ тӑрӑх, штатра икӗ заместитель пулмалла, анчах вӗсем пушӑ.
Вӗренӳ управленийӗн пуҫлӑхӗ пулса 2021 ҫулхи раштав уйӑхӗнченпе Елена Сахарова тӑрӑшать. Унчен вӑл унта пуҫлӑхӑн ҫумӗ пулнӑ. Управленире 2020 ҫулхи кӗркуннеренпе заместитель пулса ӗҫленӗ Наталья Поздеева Чӑваш Енӗн Вӗренӳ министерствинче воспитанипе ҫамрӑксен политкин управленине ертсе пыма тытӑннӑ.
Ҫапла вара халӗ Шупашкар хула администрацийӗн вӗренӳ управленийӗнче заместительсен пуканӗсем пушӑ лараҫҫӗ.
-6.7 °C