Авӑнӑн 13-мӗшӗнче Чӑваш Ен Элтеперӗн суйлавӗ пулчӗ. Кӑшӑлвируса пула вӑл виҫӗ куна тӑсӑлчӗ, маларах пуҫланчӗ.
Чӑваш Енри юрист Сергей Ванюков суйлав саккуна пӑсса иртнӗ тесе ӗнентересшӗн. Вӑл каланӑ тӑрӑх, суйлава маларах пуҫӑнма юранине регионти саккунра палӑртман. Ҫавна май юрист ЧР Аслӑ судне республикӑри Тӗп суйлав комиссийӗ тӗлӗшпе административлӑ тавӑҫ тӑратнӑ.
Аса илтерер: суйлава килнисен 75 проценчӗ Олег Николаевшӑн сасӑланӑ. Халӗ вӑл ЧР Элтеперӗн пуканне йышӑннӑ.
ЧР экономика аталанӑвӗн экс-министрӗ Владимир Аврелькин тӗрмере ларать. Ҫулталӑк пусламӑшӗнче суд ӑна унта 4,5 ҫуллӑха ӑсатма йышӑннӑ. Кӗҫех, ултӑ кунран, ун тӗлӗшпе каллех суд пулмалла. Юпа уйӑхӗн 9-мӗшӗнче каллех приговор вулӗҫ.
Аса илтерер: Владимир Аврелькина дожноҫпе усӑ курнӑшӑн айӑпланӑ. Аврелькинпа пӗрле ҫак ӗҫе тунӑ икӗ ҫын тата строительство фирмин пуҫлӑхӗ те явап тытаҫҫӗ.
Экс-министр патшалӑх субсидийӗсем пама посредниксем урлӑ икӗ миллион тенкӗ ыйтса илнӗ. Тата пӗр миллион тенкине ҫав строительство организацийӗнченех тепӗр тӳре-шарана памалле тесе илнӗ. Анчах ҫакна тума хатӗрленмен те вӑл.
Астӑватӑр пулӗ: кӑҫал утӑ уйӑхӗн 7-мӗшӗнче «Спиртсавут» ҫывӑхӗнче 15 ҫулти хӗрачана ҫапса кайнӑччӗ. Шел те, вӑл ун чухнех вилнӗ.
Авари ҫапла пулса иртнӗ: «Солярис» машина пулӗ умӗнче ӳсӗр водитель ларнӑ. Вӑл ҫулӑн тепӗр енне тухса кайса хӗрача ҫине кӗрсе кайнӑ.
27 ҫулти водитель тӗлӗшпе пуҫиле ӗҫ пуҫарнӑ. Ӗҫе тишкерсе пӗтернӗ, суда ярса панӑ. Куншӑн ӑна тӗрмене 5-12 ҫуллӑха хупма пултараҫҫӗ.
Авари пулнӑ вырӑнта 9-мӗш класра вӗреннӗ хӗрачан сӑнӳкерчӗкӗпе баннер вырнаҫтарнӑ. Унта «Газ ан пус, пире пурне те килте кӗтеҫҫӗ» тесе ҫырнӑ. Ҫакна ашшӗ-амӑшӗн пуҫарӑвӗпе тунӑ.
Хӗрлӗ Чутай районӗнче 28 ҫулти арҫын, Турхан ялӗнче пурӑнаканскер, Йӳҫпан ял тӑрӑхӗн пуҫлӑхне кӳреннӗ те клуба чӗртсе янӑ.
Ҫак арҫын ялти ӗҫлемен клубӑн чӳречине ҫӗмӗрнӗ те ҫунакан шӗвеке шала пенӗ. Хайхискер мӗн хӑтланнине ӑнланнӑ пулмалла – хӑйех пушарнӑйсене чӗннӗ.
Клубӑн кадастр хакӗ 1,5 миллион тенкӗпе танлашать. Ҫурт ҫунса кайса ӗлкӗреймен, пушарнӑйсем вырӑна ҫитнӗ.
Арҫынна вара суд тунӑ. Ӑна тӗрмене хупмасӑр 1 ҫуллӑха айӑпланӑ. Тӗрӗслев срокӗ – 1 ҫул.
Шупашкарта пурӑнакан каччӑ ҫармӑс хӗрне хӗненӗ. Уншӑн ӑна тӗрмене хупса хурӗҫ.
Каччӑ кӳршӗ регионта пурӑнакан 14 ҫулти хӗрпе туслӑ пулнӑ. Туслӑ кӑна та мар, лешӗ унран йывӑр ҫын пулса тӑнӑ. Пӑтӑрмах 2019 ҫулхи чӳк уйӑхӗнчен пуҫласа 2020 ҫулхи ака уйӑхӗччен тӑсӑлнӑ. Каччӑ ӗҫсе лартнӑ хыҫҫӑн савнийӗпе ялан харкашнӑ. Ун ҫине алӑ та час-часах ҫӗкленӗ. Хӗре каччӑ хӑйӗн килӗнче те, амӑшӗ патӗнче хӗненӗ.
Пӗрмай патак ҫитерсе пурӑнакан каччӑ тӗлӗшпе тӗпчевҫӗсем пуҫиле ӗҫ пуҫарнӑ. Халӗ ӗнтӗ суд та пулнӑ. Ҫамрӑка пӗтӗмӗшле режимлӑ колоние ҫулталӑк ҫурӑлӑха ӑсатмай йышӑннӑ.
Ҫӗрпӳ хулинче килсӗр-ҫуртсӑр пӗр арҫын хӑйӗн ар хатӗрне ачасене кӑтартнӑ. Ҫавӑншӑн ӑна хупса хумалла тунӑ.
Раҫҫей Следстви комитечӗн Чӑваш Енри управленийӗнче пӗлтернӗ тӑрӑх, пӗлтӗрхи утӑ уйӑхӗн 25-мӗшӗнче 53 ҫулти арҫын 8-11 ҫулсенчи 4 хӗрача патне пынӑ. Вӗсем нумай хваттерлӗ ҫурт картишӗнче вылянӑ. Арҫын ар хатӗрне уҫса кӑтартнӑ хыҫҫӑн таҫта кайса ҫухалнӑ. Ачасенчен пӗри киле кӗрсен ашшӗне евитленӗ. Арҫын пакунлисене пӗлтерме васканӑ.
Пӑтӑрмахчен 6 кун маларах арҫын хуран вӑрланӑ. Хуҫи тӑкака 2,5 пин тенкӗ ытла тесе пӗлтернӗ.
Килсӗр-ҫуртсӑр арҫын унччен те судпа темиҫе хутчен айӑпланнӑ. Ӑна 13,5 ҫуллӑха ҫирӗп режимлӑ колоние ӑсатма йышӑннӑ.
Йӗпреҫ поселокӗнче пурӑнакан 33 ҫулти арҫын тӗлӗшпе пуҫиле ӗҫ пуҫарнине эпир унччен пӗлтернӗччӗ-ха. Аса илтерер: эрех ӗҫме юратакан, киккирикне хӗртсен усалланса каякан пӗр арҫын ывӑлне хӗненӗ, арӑм пулнӑ хӗрарӑма вӗлерессипе хӑратнӑ. 10-ри ачана ачана амӑшне хӳтӗлеме тӑнишӗн патак лекнӗ. Пӑтӑрмах Йӗпреҫре пулса иртнӗ.
Ниҫта та ӗҫлемен вӑйпитти арҫынна РФ Пуҫиле кодексӗн 117-мӗш статйин 2-мӗш пайӗн «г» пункчӗпе (ҫул ҫитмен ачана пӗрмай хӗненӗшӗн) тата 119-мӗш статьян 1-мӗш пайӗпе (вӗлерессипе хӑратнӑшӑн) айӑпланӑ. Ӗҫсен хайне пачах тытма пӗлмен этеме суд тӗрмене хупмасӑр 3 ҫул та 7 уйӑхлӑха ирӗкрен хӑтарма йышӑннӑ.
Йӗпреҫ районӗнче пурӑнакан 63 ҫулти арҫынна хӗрӗн кил-ҫуртне чӗртсе янӑшӑн суд тунӑ. Вӑл айӑплӑ тесе йышӑннӑ. Арҫынна тӗрмене хупмасӑр 2 ҫуллӑха айӑпланӑ.
Следстви палӑртнӑ тата суд ҫирӗплетнӗ тӑрӑх, кӑҫал ака уйӑхӗн 24-мӗшӗнче ҫак арҫын ӳсер пулнӑ, Шӑрттан ялӗнчи хӗрӗ патне кӗнӗ. Хайхискерсем тем пайлайман пул, арҫын урайне бензин тӑкса шӑрпӑк тивертнӗ.
Кил-ҫурт пурӑнма юрҫахсӑра тухнӑ, ашшӗ хӗрне 550 пин тенкӗлӗх тӑкак кӳнӗ.
Вӑрнар районӗнче пурӑнакан 42 ҫулти арҫын суд сакки ҫине ларнӑ. Ун тӗлӗшпе приговор вуланӑ – ӑна тӗрмене хупмасӑр 1 ҫул та 6 уйӑхлӑха айӑпланӑ.
Ҫак арҫын ватӑ тӑванне тимӗр костыльпе хӗненӗ. Шар курнӑ 73 ҫулти арҫын – унӑн ҫывӑх тӑванӗ. Ҫамрӑкки ватӑраххин сывлӑхне самай сиен кӳнӗ, сылтӑм аллине суранлатнӑ.
Арҫын хӑйӗн айӑпне йышӑннӑ. Суд унӑн 18 ҫул тултарман ача пуррине шута илсе судья ҫӳлерех асӑннӑ приговор кӑларнӑ. Приговор саккунлӑ вӑя кӗмен-ха.
Чӑваш Ен Аслӑ судӗнче Красноармейски районӗнче пурӑнакан ҫамрӑк хӗрарӑмпа ҫыхӑннӑ ӗҫе пӑхса тухнӑ.
27 ҫулти амӑшне ачисене алимент тӳлеменшӗн РФ Пуҫиле кодексӗн 157-мӗш статйин 1-мӗш пайӗпе явап тыттарма йышӑннӑ. Алимент парӑмӗллӗ виҫӗ ачаллӑ хӗрарӑма Красноармейски районӗн сучӗ ӗҫлесе юсантарас тенӗ.
Анчах вырӑнти прокуратура айӑплава ытла та ҫемҫе тесе аппеляци мелӗпе республикӑн Аслӑ судне ҫитнӗ.
Алимент тӳлеменшӗн хӗрарӑма унччен явап тыттарнӑ. Унӑн парӑмӗ 461 пин тенке ҫитнӗ. Амӑш прависӗр юлнӑскер тӗпренчӗкӗсем пирки пачах та шухӑшламан тейӗн. Унсӑр пуҫне вӑл ют пурлӑха вӑрласа судпа айӑпланнӑ.
Чӑваш Ен Аслӑ сучӗ хӗрарӑма пӗтӗмӗшле режимлӑ колоние 4 уйӑхлӑха ӑсатма йышӑннӑ.
⠀
-6.7 °C