Шупашкарти ача-пӑча центрӗсенчен пӗри кӑшӑлвирусран шикленмен. Вӑл Раҫҫей Президенчӗ канмалли кунсем тесӗ пӗлтернине те, Чӑваш Енре ятарлӑ мерӑсем йышӑннине те пӑхӑнман унта.
Хулари Павлов мичман урамӗнчи «Джуниор» ача-пӑча центрӗ ӗҫленине Роспотребнадзорӑн Чӑваш Енри управленийӗн ӗҫченӗсем тупса палӑртнӑ.
Федерацин суд приставӗсен службин Чӑваш Енри управленийӗнче пӗлтернӗ тӑрӑх, ача-пӑча организациийӗнче дежурство ушкӑнӗ йӗркеленӗ. Тӗрӗслевҫӗсем пынӑ вӑхӑтра унта тӑватӑ ача пулнӑ.
Ача-пӑча центрне Шупашкарти Мускав район сучӗ 31 кунлӑха ӗҫлеме чарнӑ. Ҫавӑн хыҫҫӑн учреждение пырса суд приставӗсем пырса ҫитнӗ. Вӗсем «Джуниор» центра ӗҫлеттерме чарса лартнӑ, унӑн алӑкӗсене хупса хунӑ.
Чӑваш Енри тата тепӗр строительство оргнаизацийӗ панкрута тухнӑ. Ҫак йӗркесен авторне Росреестрӑн Чӑваш Енри управленийӗн пресс-службинче паян пӗлтернӗ тӑрӑх, хальхинче «Три АсС» тулли мар яваплӑ обществӑна республикӑн Арбитраж сучӗ панкрута кӑларма йышӑннӑ. Ҫак организацире халӗ пӗр ҫуллӑха конкурс управленийӗ туса хунӑ. Конкурс управляющийӗ пулма Александр Сапёрова палӑртнӑ.
2019 ҫулхи ҫу уйӑхӗнченпе пирӗн республикӑра виҫҫӗмӗш стройорганизаци панкрута тухнӑ. Росреестрӑн Чӑваш Енри управленийӗн пуҫлӑхӗ Екатерина Карпеева унччен ҫавӑн шӑпа «Суор» тата «Алза» тулли мар яваплӑ обществӑсене пырса тивнине аса илтерет.
«Три АсС» Шупашкарти «Три богатыря» (чӑв. Виҫӗ пӑхаттир) тата «Восточный экспресс» (чӑв. Хӗвелтухӑҫ экспресӗ) ҫурт-йӗр комплексӗсене, Ҫӗнӗ Шупашкарти Симӗс бульварти 2-мӗш позицире ҫурт тума пуҫланӑ.
Асӑннӑ предприятипе ҫыхӑннӑ ыйтусене (8352) 31-71-05, 34-67-55 телефон номерӗсемпе шӑнкӑравлса уҫӑмлатмалла.
Етӗрне районӗнче пурӑнакан хӗрарӑма икӗ ҫуллӑха тӗрмене хупмасӑр айӑпланӑ. Хайхискер наркотиклӑ ӳсен-тӑран ҫитӗнтернӗшӗн явап тытнӑ.
Пӗлтӗрхи ҫуркунне тивӗҫлӗ канӑва тухнӑ хӗрарӑм хӑйӗн пахчинче наркотиклӑ ӳсен-тӑран шӑтнине асӑрханӑ, анчах ӑна тӑпӑлтарса пӑрахман. Ҫурла уйӑхӗн 2-мӗшӗнче йӗрке хуралҫисем хӗрарӑмӑн пахчинче мӑкӑнь ӳснине курнӑ та ӑна туртса илнӗ.
58 ҫулти хӗрарӑм ӑнлантарнӑ тӑрӑх, вӑл мӑкӑне булка пӗҫернӗ чухне усӑ курма ҫитӗнтернӗ. Суд вӑл айӑплӑ тесе йышӑннӑ. Суд йышӑнӑвӗ саккунлӑ вӑя кӗнӗ.
Шупашкарти Ехрем хуҫа бульварӗнчи Пионерсен ҫуртне ҫуталӑкра юсамалла. Ҫакӑн пирки Пӗтӗм Раҫҫейри халӑх фрончӗн регинти уйрӑмӗн пресс-служби пӗлтерет. Вӗсем хыпарланӑ тӑрӑх, культура эткерлӗхӗ шутланакан ҫурт япӑхнине МИХсенче пӗлтернӗ хыҫҫӑн прокуратура тӗрӗсленӗ. Ҫавӑн хыҫҫӑн надзор органӗ суда тавӑҫ тӑратнӑ. Судра культура эткерлӗхне юсамалли ҫинчен калакан йышӑну кӑларнӑ.
Ехрем хуҫа бульварӗнчи 6-мӗш ҫуртра 2014 ҫулта пушар тухнӑ. Ҫурт ҫивиттисӗр тенӗ пек тӑрса юлнӑ.
Малтан ҫуртпа Шупашкар хула администрацийӗ хуҫаланнӑ. Халӗ унта — ҫӗнӗ хуҫа.
1890 ҫулта хута янӑ икӗ хутлӑ ҫуртра унччен складсем пулнӑ, совет саманинче унпа ӗҫ клубӗ, инженерипе техника ӗҫченӗсен ҫурчӗ, Пионерсен ҫурчӗ евӗр усӑ курнӑ.
Пуш уйӑхӗн 10-мӗшӗнче ЧР Аслӑ сучӗ Олег Ладыков тӗлӗшпе кӑларнӑ приговора ҫемҫетнӗ. Суд палӑртнӑ тӑрӑх, Ладыков-кӗҫӗнни айӑплав срокне пӗтӗмӗшле режимлӑ колонире мар, колони-поселенире ирттерӗ. Срока вара ҫаплипех, 3 ҫул та 9 уйӑх, хӑварнӑ.
Аса илтерер: кӑҫал кӑрлач уйӑхӗнче Муркаш районӗн сучӗ Олег Ладыков ҫул ҫинчи аваришӗн айӑплӑ тесе йышӑннӑ, пӗтӗмӗшле режимлӑ колоние 3 ҫул ҫурӑлӑха ӑсатнӑ. Полицейские ҫапнӑшӑн та айӑплӑ пулнине кура срок ҫумне тепӗр 3 уйӑх хушнӑ. Кунсӑр пуҫне унӑн руль умне 3 ҫул ларма юрамӗ. Олег Ладыковӑн аварире шар курнӑ ҫынна 500 пин тенкӗ тӳлемелле. Тата вакат тытса укҫа тӑкакланӑшӑн ҫав ҫынна 100 пин тенкӗ парса саплаштармалла.
Канашра пурӑнакан, ниҫта та ӗҫлемен 27 ҫулти арҫынна суд айӑплӑ тесе йышӑннӑ. Кун пирки РФ Следстви комитечӗн Чӑваш Енри управленийӗн пресс-служби пӗлтерет.
Суд тата следстви палӑртнӑ тӑрӑх, ҫак арҫынна темиҫе преступленишӗн айӑпланӑ. Вӑл тӑван мар икӗ ывӑлне, 9 тата 11 ҫулти ачасене, хӗненине, вӗсен сывлӑхне йывӑр сиен кӳнине палӑртнӑ. Арҫын пӗчӗкскерсене вӗлерессипе те хӑратнӑ. Вӑл арӑмне те хӗненӗ. Ҫитменнине, вӑл ун тӗлӗшпе палӑртнӑ административлӑ надзора пӑхӑнман.
Суд арҫынна ҫирӗп режимлӑ колоние 4,5 ҫуллӑха яма йышӑннӑ. Арӑмӗ халӗ унран уйрӑлма палӑртнӑ.
Шӑмӑршӑ районӗнче пурӑнакан 55 ҫулти арҫын полици уйрӑмне чӗртсе янӑ. Анчах ҫулӑм пысӑк тӑкак кӑтартса ӗлкӗреймен. Пакунлисем пушара вӑхӑтра сӳнтернӗ.
Пӑтӑрмах пӗлтӗрхи юпа уйӑхӗн 15-мӗшӗнче Патӑрьел районӗнчи полицейски уйрӑмӗнче пулса иртнӗ. Шӑмӑршӑ арҫынни полицейскисем ун заявленийӗсем тӗлӗшпе тунӑ йышӑнусемпе килӗшмен. Тавӑрас тесе-ши ӗнтӗ, 2 литр растворитель туяннӑ та полици ҫуртне кӗмелли алӑк умне сапса чӗртсе янӑ.
Арҫын тӗлӗшпе РФ Пуҫиле кодексӗн 214-мӗш статйин 2-мӗш пайӗпе килӗшуллӗн ӗҫ пуҫарнӑ. Вандал-арҫын сывах мар тесе шухӑшлаҫҫӗ иккен. Ҫапла пӗтӗмлетнӗ тухтӑрсем ятарлӑ тӗрӗслев вӑхӑтӗнче. Анчах ӑна ирӗксӗр сипленме ярасси суд йышӑнӑвӗнчен килет. Ӗҫе халӗ суда ярса панӑ.
Прокуратура ыйтнипе Красноармейски районӗнчи пӗр ял тӑрӑхӗн администрацине хуҫасӑр ача-пӑча лапамне хӑйӗн балансӗ ҫине илтернӗ. Ҫапла йышӑну тунӑ суд.
Ача-пӑча лапамӗ шӑпӑрлансен пурнӑҫӗшӗн хӑрушлӑх кӑларса тӑратать. Ӑна юсамалла. Анчах камӑн? Унӑн хуҫи ҫук. Анчах ачасем ӑна-кӑна пӗлмеҫҫӗ вӗт – ҫавӑнтах выляма чупаҫҫӗ.
Прокуратура пӗлтернӗ тӑрӑх, тимӗр тӑвайкки ҫинче сварка тунӑ ҫӗвӗсем уйрӑлса кайнӑ, чуччу ҫинче лармалли ҫук, хӑш-пӗр хатӗре сӑрламалла. Лапама никам та тӗрӗслесе тӑман, ҫавна май вӑл ачасен пурнӑҫӗшӗн хӑрушлӑх кӑларса тӑратать.
Пӗлтӗр нарӑс уйӑхӗн 15-мӗшӗнче Шупашкарти Водопровод урамӗнчи 15-мӗш ҫурт тӑрринчен ача ҫине юр ӳкнӗ. 14 ҫулти арҫын ачан пуҫӗ суранланнӑ. Ӑна Республикӑри ача-пӑча клиника пульницине илсе ҫитернӗ.
Следстви тата Мускав районӗн сучӗ акӑ мӗн палӑртнӑ: «Управдом» управляющи компанийӗн 31 ҫулти участок мастерӗ карниза юртан вӑхӑтра тасатман. Ҫапла майпа мастер ҫын сывлӑхне йывӑр сиен кӳнӗ тесе палӑртнӑ.
Суд постановленийӗпе килӗшӳллӗн, ун тӗлӗшпе пуҫарнӑ пуҫиле ӗҫе чарса лартнӑ, ӑна 20 пин тенкӗ суд штрафӗ тӳлеттерме йышӑннӑ.
Чӑваш Енри пӗр колони ӗҫченӗ унта ларакан арҫынна тартнӑшӑн явап тытнӑ.
Ӗҫ-пуҫ пӗлтӗр утӑ уйӑхӗн 16-мӗшӗнче пулса иртнӗ. Колони ӗҫченӗпе айӑпланнӑ арҫын ӗҫрен таврӑннӑ. Хайхискер киоска лотерея билечӗ кайса туянма ирӗк ыйтнӑ, лешӗ килӗшнӗ.
Анчах хайхи арҫын тарма шутланӑ-мӗн. Колони ӗҫченӗ ҫумра ҫуккипе усӑ курса вӑл куҫран ҫухалнӑ. Анчах нумайлӑха мар – ӑна тепӗр кунхинех тытса чарнӑ. Колони ӗҫченне вара куншӑн лекнӗ - ӑна 120 сехет ӗҫлеттерме йышӑннӑ.
Палӑртмалла: айӑпланакан ҫак ҫын колонирен унччен те тарнӑ. Халӗ унӑн ҫирӗп режимлӑ колонире 4 ҫул те 8 уйӑх ларма тивӗ.
-6.7 °C