Паян, утӑ уйӑхӗн 26-мӗшӗнче, Шупашкарти нумай хваттерлӗ ҫуртсенчен пӗринче пушар алхасма тытӑннӑ.
Вут-ҫулӑм Ленинла комсомол урамӗнчи 62-мӗш ҫуртра алхаснӑ. Вут-ҫулӑмпа кӗрешекенсене инкек пирки 7 сехет те 10 минутра пӗлтернӗ. Пушар ҫиччӗмӗш хутра вырнаҫнӑ икӗ пӳлӗмлӗ хваттерте тухнӑ.
9 хутлӑ ҫуртри подъездран 25 ҫынна эвакуациленӗ. Пушара 7 сехет те 49 минут тӗлне сӳнтернӗ.
Инкек сӑлтавне тӗпчевҫӗсем палӑртӗҫ.
Ҫӗнӗ Шупашкар хулинче пурӑнакан 36 ҫулти арҫын пӗлӗшне асӑрханмасӑр вӗлернӗ. Пӑтӑрмах сӑлтавӗ — кӗвӗҫӳ.
Арҫын асӑннӑ хулари общежитисенчен пӗринче тусӗ патӗнче пулнӑ. Пӑтӑрмах кӑҫалхи ҫу уйӑхӗн 2-мӗшӗнче пулса иртнӗ. Пӗлӗшне вӑл хӑйӗн хӗрӗ ҫумне кӗвӗҫнӗ. Арҫынна хайхи питӗнчен икӗ хутран кая мар ҫапса янӑ, унтан аллипе ҫипуҫӗнчен ярса илнӗ те тӗксе янӑ. Кил хуҫи пуҫӗпе урайне ҫапӑннӑ. Пуҫ мимине чӗтретнӗскер кӑштахран вилсе кайнӑ.
Кӗвӗҫ арҫын тепӗр усал ӗҫ те тунӑ. Унччен маларах вӑл хӑйӗн хӗрӗн тусӗн сумкинчен карас телефонне вӑрланӑ.
Арҫынна суд ҫирӗп режимлӑ колоние 3 ҫуллӑха ӑсатма йышӑннӑ.
Муркаш районӗнчи Шупуҫӗнче пӗлтӗрхи ҫурла уйӑхӗн 15-мӗшӗнче пӗр водитель хӑйӗн машинипе курнӑҫланас тенӗ.
Ӳсӗр водитель, унччен судпа темиҫе хутчен те айӑпланнӑскер, ҫурҫӗр тӗлӗнче тусӗсене« ВАЗ-21124» автомобиле лартса ҫурҫӗр тӗлӗнче ял тӑрӑх вӗҫтерсе пынӑ. Машинӑна вӑл сехетре 140 километр хӑвӑртлӑхпа хӑваланӑ. Автомобильпе кӗсех малтан йывӑс ҫине пырса тӑрӑннӑ, унтан — газ пӑрӑхӗн юпи ҫине. Салонти пӗр пассажир вырӑнтах вилсе выртнӑ, тепри йывӑр суранланнӑ.
Суд водителе 7 ҫуллӑха колони-поселение ӑсатма йышӑннӑ.
Ҫӗнӗ Шупашкар арҫынни Мускаври театрсенчен пӗрне кайса спектакль курма билет туянас тенӗ. Анчах вӑл суя сайт ҫине лекнӗ. Ултавҫӑсем унӑн 9 пин тенкине вӑрланӑ.
39 ҫулти арҫын сайтра спектакль кунне тата вӑхӑтне, ҫаван пекех хӑйне килӗшекен вырӑнсене суйланӑ. Банк картти ҫинчен укҫа тӳленӗ чухне телефон ҫине килнӗ кода кӑтартнӑ хыҫҫӑн сайт ӗҫлеми пулса кайнӑ. Арҫын укҫа тӳлеме тата тепӗр икӗ хутчен те хӑтланса пӑхнӑ, анчах май килмен.
Техника пулӑшӑвӗ паракан тытӑма ҫырса янӑ хыҫҫӑн ӑна икӗ билет вырӑнне 6 билетшӑн укҫа илнӗ тесе ӑнлантарса панӑ. Карттӑн реквизитне каласан укҫана тавӑрса пама шантарнӑ. Арҫын укҫа ҫук карттӑн реквизичӗсене пӗлтернӗ, ун патне такам укҫа илме хӑтланни ҫинчен смс-хыпар ҫитнӗ. Вара арҫын ултавҫӑсен капкӑнне ҫакланнине ӑнланса илнӗ те йӗрке хуралҫисенчен пулӑшу ыйтнӑ.
Ҫанталӑк шӑрӑх тӑрать, шывра чӑмпӑлтатас килет. Ӗнер республикӑра 3 ҫын путса вилни пирки хыпарлать Инкеклӗ лару-тӑру министерствин Чӑваш Енри тӗп управленийӗ.
Муркаш районӗнче Сурӑм юханшывӗнче 27 ҫулти арҫын путса вилнӗ. Вӑл Элӗк районӗнчи Мӑн Шӗвӗш ҫынни пулнӑ. Малтанлӑха пӗлтернӗ тӑрӑх, вӑл юраман ҫӗрте шыва кӗнӗ, хӑй ӳсӗр пулнӑ.
Ҫӗмӗрлере 17-ри каччӑн пурнӑҫӗ татӑлнӑ. Унӑн виллине паян шывран кӑларнӑ. Улатӑр районӗнче пулӑҫ путса вилнӗ. Унӑн кимми ҫаврӑнса ӳкнӗ.
Кӑҫал республикӑра 20 ҫын путса вилнӗ. Вӗсенчен 3-шӗ - ачасем.
Шупашкарта подъезд тӑрринче ҫамрӑк хӗрарӑм виллине тупнӑ.
Вилене паян ирпе, 6 сехет те 48 минутра, Кадыков урамӗнчи 30-мӗш ҫуртра асӑрханӑ. Ҫамрӑк хӗрарӑм подъезд тӑрринче выртнӑ.
Ҫамрӑк хӗрарӑм виллине асӑннӑ ҫуртра пурӑнакан арҫын курнӑ, вӑл пакунлисем патне ҫийӗнчех шӑнкӑравланӑ. Вӗсем вырӑна пырса ҫитнӗ. Вилӗм сӑлтавне йӗрке хуралҫисем палӑртӗҫ.
Ҫӗнӗ Шупашкарти ача ҫуратмалли ҫурт ҫывӑхӗнче хӗрарӑм виллине тупнӑ. Халӗ РФ Следстви комитечӗн Чӑваш Енри следстви органӗсем ӗҫ-пуҫа уҫӑмлатаҫҫӗ.
Хӗрарӑм виллине паян 10 сехет ҫурӑра асӑрханӑ. Хӑй 50 ҫулти пек курӑнать. Малтанлӑха пӗлтернӗ тӑрӑх, хӗрарӑм 5-мӗш хутран ӳкнӗ.
Ҫакӑ паллӑ: хӗрарӑма ача ҫуратмалли ҫурта экстреннӑй шӑнкӑрав пулнӑ хыҫҫӑн илсе ҫитернӗ. Вӑл ҫӗре ӳксенех вилнӗ.
Шупашкар хулинче пӗр арҫын бетон карта ҫинчен Атӑла сикнӗ. Арҫынна тухтӑрсен пулӑшӑвӗ кирлӗ пулса тухнӑ.
Утӑ уйӑхӗн 21-мӗшӗнче Шупашкарти юханшыв порчӗ патӗнче пӗр арҫын бетон карта ҫинчен Атӑла сикнӗ. Пӗлнӗ-пӗлмен тата пули-пулми вырӑнта шыва сикмелле марри пирки шухӑшламан ҫав этем шывран тухайманине кура ҫынсем ҫӑлавҫӑсене чӗнсе илнӗ.
Республикӑн шыравпа ҫалав службинче пӗлтернӗ тӑрӑх, ҫӑлавҫӑсем арҫын патне кимӗпе пырса ӑна шывран туртса кӑларнӑ, унтан васкавлӑ пулӑшу тухтӑрӗсене чӗнсе илнӗ.
Утӑ уйӑхӗн 21-мӗшӗнче Шупашкар районӗнчи Ҫӗнӗ Тутаркассинче пахча-ҫимӗҫ управӑшӗ ҫуннӑ. Пушарпа кӗрешекенсем вут-ҫулӑма сӳнтерес тесе икӗ сехет таран тӑрӑшнӑ.
Пушар пирки каҫхи пилӗк сехет ҫурӑ тӗлӗнче пӗлтернӗ. Ҫӑлавҫӑсем вырӑна васкавлӑн тухса кайнӑ. Вут-ҫулӑма сӳнтерме 10 машина тата 50 ҫын пырса ҫитнӗ. Пушара 19 сехет те 45 минут тӗлне сӳнтернӗ.
Вут-ҫулӑм пахча-ҫимӗҫ управӑшӗн ҫивиттине пурӗ 550 тӑваткал метр лаптӑкра сиенлетнӗ.
Инкек сӑлтавне тата вут-ҫулӑм миҫе тенкӗлӗх сиен кӳнине экспертсем палӑртӗҫ.
Шупашкар районӗнче пурӑнакан пӗр арҫын командировкӑран килсен аванах хыпса лартнӑ. Вӑл ҫул хӗрринчи кафене кӗрсе кайнӑ та ларнӑ ҫӗртех ҫывӑрса кайичченех ӗҫнӗ.
Ҫурҫӗр иртсен вӑранса кайнӑ та карас телефонӗ ҫуккине асӑрханӑ. Телефон чехолӗнче темиҫе банк картти пулнӑ. Ҫухатнӑ пуль тесе арҫын карттӑсенчен укҫа илмелле мар туса хунӑ, ҫӗнӗ телефонпа сим-карта туяннӑ.
Кӑштахран ун патне банк карттисенчен укҫа касса кайни ҫинчен хыпарсем килсе тулнӑ. Ҫавӑн хыҫҫӑн арҫын йӗрке хуралҫисенчен пулӑшу ыйтнӑ.
Пакунлисем банк карттисемпе Шупашкарти Ҫӗнӗ Кӑнтӑр районӗнчи лавккасемпе пӗчӗк кафесенче такам татӑлнине палӑртнӑ. Видеокамерӑсене пӑхнӑ та — вӗсемпе пӗр ҫын тӳленине ӑнланса илнӗ. Ҫухалнӑ телефона хулари ломбардсенчен пӗринче тупнӑ.
Кӗҫех вӑрра тупса палӑртнӑ. Судпа унччен те айӑпланнӑ 32 ҫулти арҫын телефона ҫул хӗрринчи кафери пукан ҫинчен (телефон хуи ҫав вӑхӑтра ҫывӑрнӑ) илнӗ. Халӗ унӑн каллех суд тенкелӗ ҫине ларма тивӗ.
-1.7 °C