Чӑваш Ен ертӳҫисем кӑгшӑлвируспа ҫине кӗрешни пирки МИХсенче хыпарласах тӑраҫҫӗ-ха. Ҫынсен хӑйсен яваплӑ пулмалла тесе асӑрхаттараҫҫӗ.
Паян Чӑваш Республикин Правительствинче кӑшӑлвируспа кӗрешекен оперштаб ларӑвӗ иртнӗ. Унта республикӑн сывлӑх сыхлав министрӗ Владимир Степанов чирлекенсен йышӗ ӳснине каланӑ.
Паян пире республикӑра пин ытла ҫын чирлет. Ҫав шутра — сакӑр ача. Ӳпкене искусствӑлла майпа сывлаттаракан аппаратпа 28 ҫынна пулӑшаҫҫӗ.
Кӑшӑлвируспа чирлекенсем тупӑннипе Пӑрачкаври шкулта вӗренекенсене каникула янӑ.
Тутар чӗлхине Японире вӗрентме пуҫланӑ. Токиори ют чӗлхесен институтӗнче Юто Хиcияма ҫамрӑк ӑсчах вӗрентет.
Вӑл журналистсене пӗлтернӗ тӑрӑх, тутар чӗлхине вӗрентме тахҫанах ӗмӗтленнӗ. Каччӑ хӑй вӑхӑтенче тутар чӗлхипе тата литературипе пӗтӗм тӗнчери олимпиадӑра ҫӗнтернӗ. Хусанти университетӑн магисиратуринче вӗреннӗ. Унта тутар чӗлхипе диссертаци хӳтӗленӗ.
Халӗ Юто Хиcияма тутарла ирӗклӗн калаҫать ҫеҫ мар, ҫырать те. Тутар грамматикине тӗпченӗ май ӑслӑлӑх статйисем шӑрҫалать. Японири ӑсчах тӗнче тетелӗнчи халӑх ушкӑнӗсенче аккаунтсене тутар чӗлхипе йӗркелет, тутарсемпе Тутарстан ҫинчен хӑйӗн ҫӗршыв ҫыннисене каласа кӑтартать.
Пӗтӗм вырӑссен диктанчӗ ҫуркунне иртмеллеччӗ. Анчах кӑшӑлвируса пула ӑна кӗркуннене куҫарма тивнӗ.
Йӗркелӳҫӗсем диктанта хӑҫан ирттерссине палӑртнӑ. Вӑл юпа уйӑхӗн 17-мӗшӗнче, шӑматкун, иртӗ. Ҫак кун Раҫҫейӗпех акци иртӗ. Пӗтӗм Раҫҫейри акцин штабӗнче лару-тӑру мӗнле аталанма пултарнине шута илсе виҫӗ сценари хатӗрленӗ: аудиторире, проектӑн сайтӗнче онлайн-мелпе, тата килте (#пишемдома хэштегпа, кун пекки пӗрремӗш хут пулать) ҫырма пулать.
Аудиторире маскӑпа пулмалла, ҫынсене дистанице пӑхӑнса лартса тухӗҫ.
«Хыпар» издательство ҫурчӗн директорӗ — тӗп редакторӗнче нумай ҫул ӗҫленӗ Алексей Леонтьев истори ӑслӑлӑхӗсен кандидачӗ пулса тӑнӑ. Ҫавӑн ҫинчен калакан хушӑва РФ Ӑслӑлӑх тата аслӑ вӗренӳ министерстви юпа уйӑхӗн 2-мӗшӗнче алӑ пуснӑ.
Алексей Петрович — Раҫҫей Федерацийӗн Писательсен Союзӗн пайташӗ. Чӑвашсен пӗрремӗш хаҫачӗн «Хыпарӑн» йӗркелӳҫи тата редакторӗ Николай Никольский пурнӑҫӗпе пултарулӑхне тата «Хыпар» хаҫат кун-ҫулне нумай тӗпченӗ. Паха ҫав материалсене пухса «Минувшее и настоящее» кӗнеке кӑларнӑ. Вӑл 640 страницӑран тӑрать.
Алексей Леонтьев куҫару ӗҫӗпе те самай тӑрӑшнине пӗлетпӗр. Сӑмахран, Александр Гринӑн хайлавӗсене чӑвашла куҫарса 5 томпа пичетленӗ. Ӗҫе хӑтлама К.В.Иванов ячӗллӗ литература музейне 2014 ҫулта пуҫтарӑнсан педагогика наукисен кандидачӗ Роза Петрова-Ахтимирова: «Чӑвашла хайлавсем Грин хӑй ҫырнинчен те вӑйлӑрах пулса тухнӑ», — тесе ырланӑ.
Кӗҫех ачасем кӗркуннехи каникула кайӗҫ. Вӑл хӑҫан пуҫланӗ? Чир-чӗре пула вӑраха тӑсӑлмӗ-и?
ЧР вӗренӳ министрӗн тивӗҫӗсене пурнӑҫлакан Алла Салаева пӗлтернӗ тӑрӑх, пирӗн республикӑра ачасем каникула графикпе килӗшӳллӗн кайӗҫ. Мускаври ачасем каникулта канаҫҫӗ ӗнтӗ. Вӗсем кӑшӑлвируса пула маларах кайнӑ.
Пирӗн патра каникул чӳкӗн 1-мӗшӗнче пуҫланӗ. Чир-чӗре пула каникул 2 эрнене тӑсӑлма та пултарӗ. Ку ОРВИ тата гриппа сарӑлнипе ҫыхӑннӑ.
Кӗркуннехи каникул тӑсӑлӗ-и е ҫук-и – Роспортебнадзор татса парӗ.
Элӗкре ҫӗнӗ ача пахчи хута яма палӑртнӑ. Ҫавна май район администрацийӗ аукцион ирттересси пирки пӗлтернӗ. Ача пахчи парк урамӗнче пулӗ.
Аукционӑн малтанхи хакӗ – 204 миллион тенкӗ те 383,5 пин тенкӗ. Ҫӗнтерӳҫе юпа уйӑхӗн 12-мӗшӗнче палӑртӗҫ. Подрядчикӑн ача пахчине 2021 ҫулхи юпа уйӑхӗн 1-мӗшӗ тӗлне туса пӗтермелле.
Ача пахчи виҫӗ хутлӑ пулӗ, унта 240 ача ҫӳрӗ. Ҫавӑн пекех унта бассейн тӑвӗҫ.
Республикӑри журналистсем Чӑваш Ен Элтеперӗн Олег Николаевӑн пӗрремӗш вӗрентекенӗпе тӗл пулса калаҫнӑ.
Лидия Власова 19 ҫулта ӗҫе кӳлӗннӗ. Элӗк районӗнчи Ҫирӗккасси ялӗнче ҫуралнӑскер Канашри педагогика училищинчен вӗренсе тухсан Хӗрлӗ Чутай районӗнчи Ҫӗн Атикасси шкулӗнче ӗҫлеме пуҫланӑ.
Пуҫласа шкул урати урлӑ ярса пуснӑ вунӑ хӗрачапа вунӑ арҫын ача хушшинче Чӑваш Енӗн Элтеперӗ пулас шӑпӑрлан та пулнӑ. Пӗчӗк Олег Николаев математикӑна уйрӑмах аван ӑнланнине аса илнӗ Лидия Власова.
Олег Николаевӑн пӗрремӗш вӗрентекенӗ халӗ Шупашкарти 48-мӗш шкулӑн Чантӑрти корпусӗнче ӗҫлет.
Чӑваш Ен Элтеперӗ Олег Николаев Чӑваш Енри техникумсемпе колледжсенче вӗренекен яш-кӗрӗмпе хӗр-упраҫа уйӑхсерен укҫа парса тӑма йышӑннӑ. Хушӑва вӑл иртнӗ эрне вӗҫӗнче алӑ пуснӑ. Ӗҫлӗ хута шӑматкун, авӑн уйӑхӗн 26-мӗшӗнче, республикӑн влаҫ органӗсен официаллӑ порталӗнче вырнаҫтарнӑ.
2020-2021 ҫулсенчи вӗренӳ ҫулӗнче уйӑхсерен 10-шар пин тенкӗ укҫа илсе тӑма тивӗҫнисем ҫаксем: Канашри транспортпа энергетика техникумӗнчи Александр Гурьянов тата Анастасия Константинова, Ҫӗрпӳри аграрипе технологи техникумӗнчи Василий Иванов, Шупашкарти транспорт тата строительство технологийӗсен техникумӗнчи Эльвира Ильина тата Софья Клинцева, Канашри педагогика колледжӗнчи Яна Карпова, Шупашкарти строительство тата хула хуҫалӑхӗн техникумӗнчи Дмитрий Матвеев, Шупашкарти экономика технологий колледжӗнчи Ольга Пантелеймонова, Шупашкарти Н.В. Никольский ячӗллӗ професси колледжӗнчи Снежана Тарасова.
Шупашкарти 7-мӗш ача пахчи «Раҫҫейри чи лайӑх 100 тавар» 2020 ҫулхи конкурсӑн регионти тапхӑрӗнче ҫӗнтернӗ. Шкул ҫулне ҫитменнисен вӗренӳ учрежденийӗ ҫӗршыв шайӗнчи конкурсра ӑмӑртӗ.
Асӑннӑ ача пахчи инклюзив вӗрентӗвне пурнӑҫа кӗртнипе палӑрса тӑрать. Шупашкар хулин администрацийӗн вӗренӳ управленийӗнче палӑртнӑ тӑрӑх, вӗрентӳ учрежденийӗн аталанӑвӗ педагогика коллективӗн квалификацийӗпе унӑн професси шайӗнчен нумай килет. Шупашкарти ача сачӗсем ҫӗршыв шайӗсенчи тӗрлӗ конкурса тӑтӑшах хутшӑнаҫҫӗ, вӗсенче ҫӗнтерсе федераци укҫи-тенкине тивӗҫеҫҫӗ.
Республикӑри икӗ шкулта вируслӑ пневмонипе чирлекенсем нумайланнӑ. Сӑмах – Шупашкарти 55-мӗш шкул тата Элӗк районӗнчи Вутлан шкулӗ пирки.
Вутланри пӗлӳ ҫуртӗнче пӗр класра икӗ ача вируслӑ пневмонипе чирленӗ. Роспотребнадзор ҫак шкулсенче тӗрӗслев ирттерме пуҫланӑ. Ведомство специалисчӗсем пӗлтернӗ тӑрӑх, шкулсенче халӗ ОРВИпе, гриппа чирлекенсем те нумайланаҫҫӗ. Ҫавна май Роспотребнадзор хӑш-пӗр мерӑсем йышӑнма сӗнет. Тӗслӗхрен, класри ачасен 20 проценчӗ чирлесен унта вӗренӗве чарса лартмалла.
-5.7 °C