Ҫурла уйӑхӗн 6-мӗшӗнче Улатӑр хулинче каҫхи 8 сехет те 40 минутра мопедпа пынӑ ашшӗпе ывӑлӗ ҫул ҫинчи тӑпра купи ҫине пырса кӗнӗ. Ҫав урамри ҫул ҫинче юсав ӗҫӗсем пынӑ. Мопед купа ҫине пырса кӗрсен ҫаврӑнса ӳкнӗ. Ашшӗпе ывӑлӗ иккӗшӗ те шлемпа пулнӑ. Анчах ку 12 ҫулти ачан пурнӑҫне ҫӑлайман, вӑл каярахпа пульницӑра вилнӗ.
39 ҫулти ашшӗ аманнӑ. Руль умӗнче ларнӑскер урах пулнӑ.
Халӗ йӗрке хуралҫисем ӗҫ-пуҫа уҫӑмлатаҫҫӗ.
Ҫурла уйӑхӗн 4-мӗшӗнче Канаш районӗнчи Сухайкассинче шкул ачи пӗчӗк ачана мопедпа ҫапса хӑварнӑ. Пӑтӑрмах хыҫҫӑн яш инкек вырӑнӗнчен тапса сикнӗ.
Каҫхи 8 сехет тӗлӗнче пулса иртнӗ пӑтӑрмахра 5 ҫулти ача шар курнӑ.
Ҫул-йӗр хӑрушсӑрлӑх патшалӑх автоинспекцийӗн ӗҫченӗсем мопедпа ҫула тухнӑ яша часах тупса палӑртнӑ. Вӑл ҫав ялти 13 ҫулти ача пулнӑ. Вӑл ашшӗн мопедне аслинчен ирӗк илмесӗр хускатса тухнӑ-мӗн.
Халӗ асӑннӑ яш тата унӑн ашшӗ-амӑшӗпе тӗлӗшпе ҫул ҫитменнисемпе ӗҫлекен инспекторсем ӗҫлӗҫ.
39 ҫулти арҫын сусӑр ачишӗн алимент тӳлеме шухӑшламан та. Унӑн уйӑхсерен 6,4 пин тенке яхӑн куҫарса тӑмалла пулнӑ. Анчах ҫакна вӑл пурнӑҫламан – парӑм 1 миллион тенке ҫитнӗ.
Приставсем ҫав арҫынна шыраса тупнӑ. Халӗ унӑн решетке хыҫӗнче 2 эрне ирттерес хӑрушлӑх пур. Ӑна парӑмӗшӗн темиҫе хутчен те ӗҫлеттернӗ, административлӑ майпа арестленӗ, уголовлӑ майпа темиҫе хутчен явап тыттарнӑ. Анчах кун хыҫҫӑн та вӑл алимент тӳлесси пирки шутламан.
Халӗ ҫав арҫынна 2 ҫуллӑха тӗрмене хупма пултараҫҫӗ.
Малашне амӑшӗн капителӗн укҫипе харпӑр усламӑҫем уҫнӑ шкул умӗнхи вӗренӳ организацийӗшӗн те тӳлеме май пулӗ. Ку хушӑва РФ Президенчӗ Владимир Путин ҫурла уйӑхӗн 4-мӗшӗнче алӑ пуснӑ.
Анчах ҫав вӗренӳ организацийӗн ку енӗпе ӗҫлеме ирӗк паракан лицензи пулмалла. Аса илтерер: капитал укҫипе ҫурт-йӗр туянма, ачана вӗрентме, сусӑр шӑпӑрлан реабилитаци тухнӑшӑн тӳлеме юрать. Ҫавӑн пекех амӑшӗ нухрата пенсие яма, иккӗмӗш ачи 3 ҫул тултариччен капиталти укҫана уйӑхсерен илсе тӑма пултарать.
Сӑмах май, пӗрремӗш ача ҫуралнашӑн – 524,5 пин, иккӗмӗшӗшӗн 693,1 пин тенкӗ параҫҫӗ.
Ҫӗнӗ Шупашкарта ҫамрӑк арҫынна 6 ҫулти хӗрача ҫумне ҫулӑхнӑ тесе тытса чарнӑ. Ун тӗлӗшпе пуҫиле ӗҫ пуҫарнӑ. Тӗпчевҫӗсем ҫав этем ытти чух та ҫавӑн пек хӑтланса ҫӳремен-ши тесе шанмаҫҫӗ. Арҫын усал ӗҫ тунӑран шар курнисене пӗлтерме ыйтаҫҫӗ.
РФ Следстви комитечӗн Чӑваш Енри управленийӗнче пӗлтернӗ тӑрӑх, утӑ уйӑхӗн 31-мӗшӗнче Ҫӗнӗ Шупашкарта 6 ҫулти хӗрача хӑйӗн килӗнчен инҫе мар скверта выляса ҫӳренӗ. Ҫавӑн чухне ӑна ют арҫын тӗмсем хушшине астарса чӗннӗ. Унта вӑл ача ҫумне ҫулӑхнӑ.
Чӑваш Енре шӑпарлан саккӑрмӗш хутран ӳксе чӗрӗ юлнӑ.
Инкек Ҫӗнӗ Шупашкарта ҫурла уйӑхӗн 1-мӗшӗнче пулса иртнӗ. Ҫӳллӗ хутран персе аннӑ ачана ҫийӗнчех больницӑна илсе кайнӑ.
Хӗрача 10-мӗш пиллӗкҫуллӑх урамӗнчи 5-мӗш ҫурт чӳречинчен тухса ӳкнӗ. Пӗчӗкскер кипкепе ҫуралнӑ тейӗн – вӑл вилмен. Анчах хытах аманнӑ. Халӗ ача реанимацире выртать.
Инкек сӑлтавне пӗлместпӗр те, анчах ҫулла пӗчӗк ачасем уҫӑ чӳречерен тухса ӳкнӗ тӗслӗхсем пулкалани вӑрттӑнлӑх мар. Ҫавӑнпа та аслисен питӗ тимлӗ пулмалла.
Ҫу пуҫланнӑранпа Республикӑн ача-пӑча клиника больницине 7 ачана ҫӗлен сӑхнӑран илсе пынӑ. Вӗсене хура ҫӗлен сӑхнӑ. Шар курнисенчен чылайӑшӗ — 10 ҫула ҫитичченхи ачасем. Вӗсене пурне те тухтӑрсем тивӗҫлӗ пулӑшу кӳнӗ.
«Хура ҫӗлен сӑхнӑ пациентсене пурне те наркӑмӑшран ятарлӑ сывортка янӑ. Ачана больницӑра мӗн чухлӗ вӑхӑт тытасси унӑн сывлӑхӗнчен килет», — ӑнлантарса панӑ йышӑну уйрӑмӗн заведующийӗ Надежда Жукова.
Сӑмах май каласан, ҫӗлене курсан ӑна пырса тӗкӗнмелле мар, шӑппӑн кӑна айккинелле пӑрӑнмалла.
Ҫӗнӗ Шупашкарта пляжа хирӗҫ, Атӑлта, матрассем ҫинче пыракан хӗрарӑмпа виҫе ачана шыв юххи илсе кайнине ҫынсем асӑрханӑ. Вӗсемех ҫӑлавҫӑсене чӗннӗ.
Ку ӗнер, утӑ уйӑхӗн 25-мӗшӗнче, пулнӑ. Ҫӑлавҫӑсем моторлӑ кимӗпе вырӑна хӑвӑртах ҫитнӗ. Икӗ матрас ҫинче хӗрарӑм тата 18 ҫул тултарман 3 ҫамрӑк пулнӑ.
Ҫӑлавҫӑсем вӗсене кимӗ ҫине лартса ҫыран хӗррине илсе тухнӑ. Юрать-ха, никам та шар курман.
Иртнӗ канмалли кунсенче республикӑра 9 ҫын пиҫсе кайнӑ. Ҫапла пӗлтерет ЧР Сывлӑх сыхлавӗн министерстви.
2 ҫулти ача кран уҫса вӗри шывпа пиҫсе кайнӑ. Тепӗр икӗ шӑпӑрлан ҫине вӗри чей тӑкӑнса кайнӑ.
Пӗр арҫын газ ҫутма тӑнӑ та конфорка сирпӗннӗ. Унӑн ӳчӗн 66 проценчӗ пиҫсе кайнӑ. Кӳршисем часрах васкавлӑ медпулӑшу чӗннӗ. Анчах арҫыннӑн сывлӑхӗ йывӑр пулнине кура ӑна тухтӑрсене хирӗҫ хӑйсен машинипе илсе кайнӑ.
Мунча хутнӑ чухне бензин сапса пиҫсе каякан та пулнӑ. Тепӗр ҫын вара перчетке тӑхӑнмасӑр наркӑмӑшлӑ пултӑран ҫулнӑ.
Тухтӑрсем пӗтӗм пациента медпулӑшу панӑ. Шар курнисем пульницӑра сипленеҫҫӗ.
Ҫӗртме уйӑхӗнче Хулари 1-мӗш клиника пульницинче чӗре чирӗпе йывӑр чирлекен ача ҫуралнӑ. Тухтӑрсем ӑна васкавлӑ операци кирлине пӗлтернӗ.
Чӑваш Ен тухтӑрӗсем Пензӑри чӗрепе юн тымарӗсен хирургийӗн федераци центрӗпе ҫыхӑннӑ. Ачан сывлӑхне кӑшт йӗркене кӗртсен ӑна Пензӑна илсе кайма хатӗрленӗ. Пӗчӗкскере реанимобильпе илсе кайнӑ, реанматологсем пӗрлех пулнӑ. Вырӑна ҫитсен ачана унти кардиохирургсен аллине панӑ.
Ача 6 кунра чухне операци тунӑ. Вӑл ӑнӑҫлӑ иртнӗ.
Ача халӗ килтех, Чӑваш Енрех.
-2.7 °C