Шупашкарта 4 ҫулти ача чирлесе ӳксен хӑйне япӑх туйнӑ. Унӑн ӳт температури хӑпарнӑ, лайӑх анман. Унтан ӳслӗк пуҫланнӑ, вӑйӗ пӗтнӗ.
Тухтӑрсем унӑн ӳпки икӗ енчен те шыҫнине палӑртнӑ. Анализсем ачан «сысна грипӗ» пулнине те ҫирӗплетнӗ. Пульницӑна вырттарсан та унӑн сывлӑхӗ хавшасах пынӑ. Компьютер томографийӗ ӳпкин 75 проценчӗ шыҫӑннине кӑтартнӑ.
Хӗрачана реанимацие вырттарнӑ. Унта вӑл 13 кун выртнӑ. Кайран ӑна педиатри уйрӑмне куҫарнӑ, тепӗр 6 кунран киле кӑларнӑ.
Шупашкарта пурӑнакан 12 ҫулти Володя Майоров юр тасатмалли машинӑпа ярӑнса курма ӗмӗтленнӗ. Вӑл мӗн пӗчӗкренех техникӑпа кӑсӑкланать.
Унӑн ӗмӗтне РФ Президенчӗн Атӑлҫи федераци тӑрӑхӗнчи тулли праваллӑ элчи Игорь Комаров пурнӑҫланӑ. Володя патне Хӗл мучипе Юрпике килнӗ, Ҫӗнӗ ҫулпа саламласа пылак парне панӑ. Унтан КамАЗ водителӗ ачана кабинӑна лартнӑ. Ҫапла Володя юр мӗнле тасатнине паллашма пултарнӑ.
Володя хӑй те, унӑн амӑшӗ те Елена Майорова питӗ савӑннӑ. Амӑшӗ «Ӗмӗтсен чӑрӑшӗ» питӗ лайӑх акци пулнине палӑртнӑ.
Сургутри ачасем чӑваш халӑх эткерлӗхне ӑша хываҫҫӗ. Ханты-Манси автономи округӗнче пурӑнакан маттур чӑвашсем ҫинчен Телеграмри чӑвашла каналсенчен пӗринче пӗлтернӗ.
Унта хыпарланӑ тӑрӑх, «Туслӑх» общество организацийӗнче «Чӑваш тӑрӑхӗн эткерлӗхӗ» студи ӗҫлет. Унта ҫӳрекен ачасен йышӗ ӳссех пырать-мӗн. Нумаях пулмасть студие 19-мӗш шкулта вӗренекенсем пухӑннӑ. Вӗсем тӑмран матрёшка ӑсталанӑ. Вырӑссен йывӑҫран касса хатӗрленӗ ҫав теттене Сургутри ачасем чӑвашлатнӑ — матрёшкӑна чӑвашла эрешсемпе капӑрлатнӑ.
Чӑваш Енре кӑҫалхи 11 уйӑхра чылай хӗрарӑм 25 ҫулта пӗрремӗш хутчен амӑшӗ пулса тӑнӑ. Унашкаллисем – 290-ӑн.
Пӗлтӗр ҫак тапхӑрта пӗрремӗш пепкине ҫуратнӑ хӗрарӑмсенчен ытларахӑшӗ 24 ҫулта пулнӑ. Иккӗмӗш ачине чылай амӑшӗ 30 ҫулта ҫуратнӑ. Ун пеккисем – 259-ӑн.
Виҫҫӗмӗшне ҫуратнӑ хӗрарӑмсенчен ытларахӑшӗ – 34 ҫулта. Ун пеккисем – 222-ӗн.
Ҫамрӑк хӗрарӑм кӑкӑр ачипе Ҫӗмӗрлерен Шупашкара кайма тухнӑ. Анчах ҫул ҫинче унӑн машинин урапи шӑтнӑ. Ӑна ЧР ШӖМӗн ӗҫченӗсем пулӑшнӑ.
Путруле тухсан инспекторсем Элӗк районӗнче, «Шупашкар – Сӑр» автоҫул ҫинче, ҫул хӗрринче ларакан «Грантӑна» асӑрханӑ, унӑн урапи шӑтнӑ.
Полици лейтенанчӗ Александр Рыбаков тата полицин кӗҫӗн лейтенанчӗ Александр Краснов хӗрарӑма урапа улӑштарма пулӑшнӑ. Ӗҫне пӗтерсен вӗсем ӑна телейлӗ ҫул сунса ӑсатнӑ.
Тутарстанри Олимпиада центрӗнче тӑван чӗлхесен олимпиади иртнӗ. Ӑна раштав уйӑхӗн 19-21-мӗшӗсенче йӗркеленӗ.
Ӑс-тӑнпа пултарулӑха, тавҫӑрулӑхпа мал ӗмӗтлӗхе кӑтартса пама май паракан ӑмӑртӑва Тутарстанра пурӑнакан тӗрлӗ халӑх ачисем хутшӑннӑ. Ҫавсен йышӗнче мордвасем, удмуртсем, марисем пулнӑ. Чӑваш ачисем те тантӑшӗсенчен кая юлас темен — олимпиадӑна ҫунатлансах хутшӑннӑ.
Чи пултаруллисене ӑшӑ сӑмахпа ҫеҫ мар, тав хучӗсемпе те хавхалантарнӑ.
Ӗнер Канашра гараж ҫуннӑ. Инкеклӗ лару-тӑру министерстви пӗлтернӗ тӑрӑх, Чукунҫул урамӗнчи икӗ хутлӑ харпӑр ҫурт айӗнчи гаражра ҫулӑм тухнӑ.
Ҫӑра тӗтӗм пӳртри пӳлӗмсене те кӗнӗ. Ӑна пула 10 ҫулти арҫын ача шар курнӑ. Тӗтӗмпе наркӑмӑшланнӑскере Шупашкара, Республикӑри ача-пӑча клиника пульницине, илсе ҫитернӗ.
Чӑваш Енре сысна грипӗпе чирленӗ тӗслӗхсене тупса палӑртнӑ. Иртнӗ эрнере унпа 41 ҫын чирленӗ.
Чӳкӗн 21-27-мӗшӗсенче 2 тӗслӗх пулнӑ, чӳкӗн 28-мӗшӗнчен пуҫласа раштавӑн 4-мӗшӗччен 20 ҫын чирленӗ. Ытларахӑшӗ - ачасем.
Сысна грипӗпе чирленине мӗнле пӗлмелле? Ӳт температури пысӑк, апат лайӑх анмасть. Паллах, диагноз пирки тухтӑра чӗнсен кӑна тӗрӗс пӗлме пулать.
Сӑмах май, юлашки вӑхӑтра ОРВИпе чирлекенсем нумайланса пыраҫҫӗ.
Шупашкарти 12 класс карантина хупӑннӑ. Ку – 5 шкулта. Кун пирки Шупашкар хула администрацийӗн вӗренӳ управленийӗ пуҫлӑхӗ Елена Сахарова пӗлтернӗ.
Юлашки темиҫе кунра шкулсенче чирлекенсем нумайланнӑ. Ачасем ОРВИпе, гриппа аптӑраҫҫӗ. Ҫавна пула 5 шкулти 12 класа карантина хупма тивнӗ. Хальлӗхе ача пахчисем йӗркеллех ӗҫлеҫҫӗ.
Роспотребнадзор пӗлтернӗ тӑрӑх, раштавӑн 5-11-мӗшӗсенче Шупашкарта 8014 ҫын ОРВИпе чирленӗ.
Шупашкарти Калинин районӗн администрацийӗн ЗАГС пайӗ хӑйне евӗр ята регистрациленӗ. Вӑл – ача ячӗ. Ашшӗ-амӑшӗ ӑна Ярасвет тесе чӗнеҫҫӗ.
Ку – арҫын ача ячӗ. Вӑл славян чӗлхинчен кӗнӗ, «Яросвет» «Ярила ҫути /хӗвел/» тенине пӗлтерет.
Палӑртмалла: кӑҫал Калинин районӗн администрацийӗн ЗАГС пайӗнче пӗр арҫын ачана кӑна Ярасвет ят хунӑ.
+6.3 °C