Ҫурла уйӑхӗн 15-мӗшӗнче Республикӑри офтальмологи клиника пульницине амӑшӗ икӗ уйӑхри ачине йӑтса пынӑ. Пепкен куҫӗ хӗрелнӗ, мӑкӑль тухнӑ. Пӗчӗкскер канӑҫсӑрланса макӑрнӑ.
Пӗчӗк пациента пӗр тӑхтамасӑр операци тунӑ. Ҫапла тухтӑрсем куҫҫуль юхмалли канала ӗҫлеттерсе янӑ. Виҫӗ талӑк иртсенех ачан куҫӗ йӗркене кӗнӗ. Тепӗр эрнерен вара ачапа амӑшне киле янӑ.
Елчӗк ачисем этнос фестивалӗнче пулса курнӑ.
Елчӗкри ача-пӑча ӳнер шкулӗнче вӗренекен Джамиля Савинова тата Диана Максимова Калуга облаҫӗнче иртнӗ «Этноритмы» этнос музыкин фестивальне хутшӑннӑ. Мероприяти ҫурла уйӑхӗн 18-21-мӗшӗсенче иртнӗ. Ачасемпе инҫе ҫула О.А. Архипова преподаватель тухнӑ.
Этнос музыкн фестивальне Калуга облаҫӗнче ҫулсеренех йӗркелеҫҫӗ-мӗн. Ӑна унти «Этномир» этнографи паркӗнче – музейӗнче ирттереҫҫӗ. Фестиваль вӑхӑтӗнче тӗрлӗ халӑхӑн йӑли-йӗркипе паллашма тата канма май пур.
Калуга облаҫӗнчи фестивале хутшӑннӑ ачасем унччен «Чӑваш Ен ахахӗсем» конкурсра ҫӗнтернӗ. Ачасем чӑвашла виҫӗ номерпе тӗрлӗ сцена ҫине тухнӑ.
Паян НТВ телеканалпа Чӑваш Енри Даниэль пирки сюжет кӑтартнӑ. Арҫын ачана пулӑшу кирлӗ.
Ҫулталӑк каялла ача 3-мӗш хутран ӳкнӗ. Темиҫе эрне вӑл комӑра выртнӑ. Кайран тӑна кӗнӗ. Анчах ҫӳллӗшӗнчен ӳкни ахаль иртмен - Даниэлӗн куҫӗ суккӑрланса пырать. Ҫавӑнпа ӑна пӗр тӑхтамасӑр имплант лартмалла. Кун валли вара 2 миллион тенкӗ кирлӗ. Операцие Хусанта тума хатӗр. Амӑшӗн вара ун чухлӗ укҫа ҫук, вӑл 5 ачана пӗчченех ура ҫине тӑратать. Инкек хыҫҫӑн упӑшки ҫемьерен тухса кайнӑ.
«Чечексем вырӑнне - ачасем». Аня Чижова ячӗллӗ ыркӑмӑллӑх фончӗ ҫакнашкал акцие авӑнӑн 1-мӗшӗнче ирттересси йӑлана кӗнӗ. Унпа килешӳллӗн, ачасем вӗрентекене класс ятӗнчен пӗр чечек ҫыххи парнелеҫҫӗ. Перекетленӗ укҫа-тенке вара йывӑр чирпе нушаланакан ачасене сиплеме параҫҫӗ.
Ку акцие ҫултан-ҫул ытларах та ытларах шкул хутшӑнать. Кӑҫал 30 шӑпӑрлана пулӑшма палӑртнӑ. Пӗтӗмпе 2 миллион ытла тенкӗ пухасшӑн. Нимеҫӗсем шкулсем кӑна мар, усламҫӑсем те пулӑшасса шанаҫҫӗ.
Пӗлтӗр акцие Чӑваш Енри 350 класс хутшӑннӑ. Йӗркелӳҫӗсем авӑнӑн 1-мӗшӗнче шкулсенче «Ыркӑмӑллӑх урокӗ» ирттерме сӗнеҫҫӗ. Унта чирлӗ ачасене пулӑшни мӗн тери кирлӗ пулнине каласа кӑтартчӑр.
Ҫурла уйӑхӗн 26-мӗшӗнче Республикӑн клиника офтальмологи больницинче ачасем валли Уҫӑ алӑксен кунӗ иртӗ.
Ҫамрӑк пациентсене комплекслӑ тӗрӗслӗҫ, офтальмологсем кирлӗ сӗнӳ-канаш парса пулӑшӗҫ, епле сипенмеллине каласа кӑтартӗҫ.
10 сехетре больницӑра ачасем валли анимаци программи пуҫланӗ.
Ҫамрӑк пациентсене Шупашкарти Ашмарин урамӗнчи 85-мӗш ҫуртра кӗтеҫҫӗ. Уҫӑ алӑксен кунне (8352) 51-36-54 телефонпа шӑнкӑравласа ҫырӑнмалла.
Йышӑнӑва пынӑ чухне ҫумра паспорт, ҫурални ҫинчен калакан свидетельство, страхлакан медицина полисӗ, СНИЛС пулмалла.
Комсомольски районӗнчи Урмаелте пурӑнакан Ильгиз Пахалов шкул ачисем валли авӑнӑн 1-мӗшӗ тӗлне чӑн-чӑн парне тунӑ. Вӑл юханшыв урлӑ кӗпер хывнӑ. Ҫапла ачасем малашне шкула кӗске ҫулпа ҫӳреме пултараҫҫӗ. Унччен шӑпӑрлансем шкула тавран кайнӑ, темиҫе ҫухрӑм парӑнтарнӑ.
Кӗпер Ҫырма тата Сенгерей урамӗсене ҫыхӑнтарать. Ильгиз Пахалов кӗпере хӑйӗн укҫипе тунӑ. Ку ӗҫе Урмаел ял тӑрӑхӗн пуҫлӑхӗ Айрат Ямалетдинов пуҫарӑвӗпе пурнӑҫланӑ.
Шупашкар хулин Кӑнтӑр-Хӗвеланӑҫ районӗнче ачана кушак ҫыртса илнӗ хыҫҫӑн карантин туса хунӑ. Асӑннӑ йӗрке Киров урамӗнчи 17-мӗш ҫурт тавралла пулӗ.
Карантина ҫурла уйӑхӗн 18-мӗшӗнче йышӑннӑ. Вӑл йӗрке республика Элтеперӗ ятарлӑ йышӑну кӑларичченех пырӗ.
Кушак урнӑ чирпе чирлине республикӑн ветеринари служби палӑртнӑ. Халӗ ача сипленет.
Чӑваш Енре ҫитес ҫул пӗр ҫынна пӗр уйӑхра пурӑнма мӗн чухлӗ укҫа кирлине палӑртаҫҫӗ. Вӑл, кӑҫалхипе танлаштарсан, 7,3 процент пысӑкрах пулӗ, 13271 тенкӗпе танлашӗ. Кӑҫал вӑл 12363 тенкӗ пулнӑ.
Уйрӑм категорири ҫынсем валли те ку виҫе ӳсӗ. Ӗҫлекен ҫынсем валли – 14465 тенкӗ, тивӗҫлӗ канурисем валли – 11413 тенкӗ, ачасем валли 12873 тенкӗ пулӗ.
Палӑртмалла: тӗрлӗ пособи, тӳлев илме документсем тӑратнӑ чухне ҫак виҫесене шута илеҫҫӗ.
Шупашкарти хӗрарӑм ача ҫуратмалли ҫуртра мар, килтех ҫӑмӑлланма шутланӑ. Ҫапла тухтӑрсем пулӑшмасӑрах ҫут тӗнчене арҫын ача килнӗ.
Пепкене Шупашкарти Ленин районӗн ЗАГС пайӗнче регистрациленӗ. Кун пек чухне кӳнтелен кирлӗ. Ачан ашшӗ-амӑшӗ ӑна илсе килнӗ. Саккунпа килӗшӳллӗн, кӳнтеленӗн ача пульницӑра мар, килте ҫуралнине ӗнентерсе хут ҫырмалла.
Шупашкарта ҫуралнӑ хӗрачана хӑйне евӗр ят панӑ. Ашшӗ-амӑшӗ ӑна Калинин район администрацийӗн ЗАГС пайӗнче регистрациленӗ. Хӗрача Аврелия ятлӑ.
Аврелия – латин чӗлхинчен килнӗ, Юлий Цезарӗн амӑшӗ ҫапла ят пулнӑ. Вӑл «Аврелий» арҫын ятӗнчен пулса кайнӑ, «ылтӑн» тенине пӗлтерет.
ЗАГС ӗҫченӗсем каланӑ тӑрӑх, Калинин районӗнче кунашкал ята юлашки икӗ ҫулта регистрацилемен.
+13.2 °C