Ҫу уйӑхӗ ҫитрӗ те ҫул-йӗрҫӗсем ҫине тӑрса ҫул-йӗр юсама пикенчӗҫ. Ку ӗҫе хуласенче те пурнӑҫлаҫҫӗ. Республикӑмӑрӑн тӗп хулинче ҫак ӗҫе пуш уйӑхӗн вӗҫӗнчех пуҫланӑ. Хула мэрийӗнче пӗлтернӗ тӑрӑх, ҫапла тума ҫутҫанталӑк май панӑ.
Паянхи куна илсен асфальта 9 ҫӗрте ҫӗнӗрен сараҫҫӗ: М.Горький проспектӗнче; Диагностика центрӗ тӗлӗнчи Мускав проспектӗнче; Спиридон Михайлов, Талвир, Волков, Никитин, Коллективлӑ, Киров, Магницкий урамӗсенче.
Ашмарин урамне тӗплӗн юсама тытӑннӑ, Октябрь кӗперне юсасси малалла пырать, Граждан урамӗнче ӗҫсем вӗҫленсе пыраҫҫӗ.
Хула администрацийӗнче ӗнентернӗ тӑрӑх, ҫул-йӗрҫӗсем ӗҫе хӑвӑрт тата пысӑк пахалӑхпа пурнӑҫлама тӑрӑшаҫҫӗ.
Шупашкар хулинче пурӑнакан 56 ҫулти арҫын 2,5 миллион тенкӗсӗр тӑрса юлнӑ. Йӑлтах — ҫынна шаннипе.
Арҫын йӗрке хуралҫисене пӗтернӗ тӑрӑх, пуш уйӑхӗнче ун патне Мускаври право хуралӗн тытӑмӗнче ӗҫлекен ҫын (шӑнкӑравлаканни хӑйӗнпе ҫавӑн пек паллаштарнӑ) ҫыхӑнни ҫинчен каласа кӑтартнӑ. Хӗрарӑм унран тӗнче тетелӗ урлӑ медицина таварӗ туяннипе кӑсӑкланнӑ. Арҫын илнине пӗлтерсен сутуҫӑна явап тыттарассине, фирма клиенчӗсене ҫур миллион тенкӗ компенсаци тӳлессине пӗлтернӗ.
Арҫынтан тӗрлӗ сӑлтав тупса икӗ уйӑх хушши укҫа ыйтнӑ, ҫывӑх вӑхӑтра ун патне инкассатор машини ярса пама шантарнӑ, вӑл вара компенсаци укҫине тавӑрса парӗ тесе ӗнентернӗ.
Арҫын тусӗсемпе пӗлӗшӗсенчен 2,5 миллион тенке яхӑн кивҫен илсе палламан ҫынсем каланӑ счётсем ҫине куҫарса янӑ. Ултавҫӑсен капкӑнне лекнине вӑл хӑйӗнчен тата тепӗр ҫур миллион тенкӗ ыйтсан тӗшмӗртсе илнӗ.
Шупашкарта пурӑнакан ватӑсем хатха-йога занятине пуҫтарӑнаҫҫӗ. Ӑна хулари халӑха социаллӑ пулӑшу кӳрекен комплекслӑ центрӑн «Манӑн социаллӑ центр» клубӗнче йӗркеленӗ.
Занятие тава тивӗҫлӗ канури Валентина Горычева ирттерет.
«Хатха-йогӑна ватӑ ҫынсем те тума пултараҫҫӗ. Вӑл ҫулланнисемшӗн те питӗ усӑллӑ», – тет тренер.
Хатха-йога кӑмӑл-туйӑма та лайӑхлатма пулӑшать. Ҫакна занятие хутшӑнакан ватӑсем те ҫирӗплетсе параҫҫӗ. «Хатха-йога хыҫҫӑн шӑм-шак ҫӑмӑллансах каять, чунра савӑнӑҫ хуҫаланма тытӑнать», – тет 82 ҫулти Мария Сироткина.
Чӑваш Ене кӑҫалхи пӗрремӗш кварталта туристсем ытларах килнине палӑртнӑ. Ҫакна пӗлтӗрхи пӗрремӗш кварталпа танлаштарнӑ. Кӑҫал туристсен хисепӗ 2,2 хут ытларах пулнӑ.
Отельсенче, хӑна ҫурчӗсенче те ҫӗр каҫакансем 82 процент нумайрах пулнине палӑртнӑ.
Сӑмах май, пӗлтӗр Шупашкарти юханшыв порчӗ 449 теплохода йышӑннӑ. Пӗтӗмпе вӗсемпе 65133 турист килнӗ.
Паян 20 сехет 6 минутра Шупашкарта хӗр 7-мӗш хутран ӳкнӗ. Кун пирки "Про Город" хаҫата халӑх корреспонденчӗ пӗлтернӗ.
Ку пӑтӑрмах Ленин Комсомолӗн 34/8-мӗш ҫуртӑн 1-мӗш корпусӗнче пулнӑ. Хӗр ӳксен хускалнӑ - чӗрӗ пулнӑ. Вӑл 30-35 ҫулсенчи пек курӑннӑ. Вырӑна кӗҫех васкавлӑ медпулӑшу ҫитнӗ.
Шупашкарти больницӑсене пӗрлештересшӗн. Ҫу уйӑхӗн 12-мӗшенче хула администрацийӗн акт залӗнче ҫав ыйтупа халӑх итлевӗ иртнӗ. Унта пухӑннисем Хулари 1-мӗш клиника больниципе Иккӗмӗш хула больницине тата П.Н. Осипов ячӗллӗ пӗрремӗш хула больницине пӗрлештерес ыйтӑва сӳтсе явнӑ.
Республикӑн влаҫ органӗсен официалӑ порталӗнче пӗлтернӗ тӑрӑх, халӑх итлевне хулара пурӑнакансем, общество организацийӗсен хастарӗсем, тухтӑрсем, депутатсемпе тӳре-шара таранах хутшӑннӑ.
Республикӑн Сывлӑх сыхлав министерствинче ӗнентернӗ тӑрӑх, виҫӗ больницӑна пӗрлештернӗшӗн медперсонал йышӗ чакмӗ, ҫынсене тухтӑрсем унчченхиллех пулӑшӗҫ.
Ҫу уйӑхӗн 26-мӗшӗнчен пуҫласа ҫӗртмен 1-мӗшӗччен Шупашкарта Пӗтӗм тӗнчери кинофестиваль иртесси пирки унччен хыпарланӑччӗ. Кӑҫал вӑйӑ киновӗн конкурсне 7 ҫӗршыври 11 кинолента хутшӑнӗ: Таджикистанран, Иранран, Арменирен, Норвегирен, Сербирен тата Раҫҫейрен. Пирӗн ҫӗршывран 5 ӗҫ пулӗ. Ку конкурс жюри пайташӗсене Австрире кинофестиваль пуҫарнӑ Николай Максимов ертсе пырӗ.
Этника тата регион фильмӗсен конкурсне 19 ӗҫ хутшӑнӗ, документлӑ фильмсен конкурсне - 14 ӗҫ.
Кинофестивалӗн тӗп лапамӗ "Волжский" кинотеатр пулӗ.
Шупашкарта 9 ҫулти ача газ сӗрӗмӗпе вилнӗ тӗслӗх тӗлӗшпе пуҫиле ӗҫ пуҫарнӑ. Следстви шухӑшӗпе, ҫурта пӑхса тӑракан должноҫри ҫынсем саккуна пӑснӑ: шыв ӑшӑтакан хатӗр тата вентиляци тытӑмӗ йӗркеллӗ ӗҫлессине тивӗҫтермен.
Аса илтерер: ҫу уйӑхӗн 12-мӗшӗнче Декабристсен урамӗнчи пӗр хваттерте 9-ти ача газ сӗрӗмӗпе наркӑмӑшланса вилнӗ. Вӑл хваттертех сывлама пӑрахнӑ. Амӑшне вырӑнтах медпулӑшу панӑ. Ачан иккӗмӗш сыпӑкри пиччӗшне, 18-ти каччӑна, реанимацие илсе кайнӑ.
Паян Шупашкарти Ярославль урамӗнчи 64-мӗш ҫуртра инкек пулнӑ. Ирхи 10 сехетре пӗр хваттерти 3 ҫын газ сӗрӗмӗпе наркӑмӑшланни пирки пӗлтернӗ.
Шел те, 9 ҫулти арҫын ача вилмеллех наркӑмӑшланнӑ. Унӑн 38 ҫулти амӑшне пульницӑна илсе ҫитернӗ. Арҫын ачан иккӗмӗш сыпӑкри пиччӗшӗ, 18 ҫулти каччӑ, реанимацире. Унӑн сывлӑхӗ йывӑр.
Ҫакӑ паллӑ: хваттерте шыв ӑшӑтмалли газ колонки пур. Малтанлӑха пӗлтернӗ тӑрӑх, вентиляци лайӑх ӗҫлемен. Халӗ ӗҫ-пуҫа тишкерӗҫ, ҫурта пӑхса тӑракан управляющи компанийӗн, газ службин ӗҫне хак парӗҫ.
Пӗлтӗрхи кӗркунне Шупашкарти пӗр арҫын 8 пин тенкӗ тӑракан телефонне ҫухатнӑ. 33 ҫулти арҫын Энтузиастсен урамӗнчи гараж комплексӗнче пулнӑ. Телефона водитель алӑкне питӗрсе илмен машинӑри прибор панелӗ ҫинче 20 минутлӑха хурса хӑварнӑ.
Хаклӑ япалана Етӗрне районӗнчи 25 ҫулти каччӑ вӑрласа кайнӑ иккен. Вӑло ӑна телефон юсакан ӑстана сутса янӑ.
Телефона халӗ хуҫине тавӑрса панӑ.
Вӑрӑ ӗҫӗпе унччен те пӑтӑрмаха темиҫе хутчен ҫакланнӑ каччӑ тӗлӗшпе пуҫиле ӗҫ пуҫарнӑ.
-3.7 °C