14-22 ҫулсенчи ҫамрӑксене «Пушкин карттине» усӑ курма май туса пани питӗ аван. Ҫак карттӑна аслӑрах ҫынсене те пама тытӑнасшӑн.
Ҫапла сӗннӗ РФ Патшалӑх Думин ҫутӗҫ комитечӗн председателӗн ҫумӗ Михаил Берулав. Вӑл «Пушкин карттине» 14-45 ҫулсенчи ҫынсене памалла тӑвасшӑн. Депутат палӑртнӑ тӑрӑх, ку культура шайне ӳстерме пулӑшӗ.
Аса илтерер: хальхи вӑхӑтра ҫак карттӑпа 14-22 ҫулсенчи ҫамрӑксем музея, театра е курава тӳлевсӗрех ҫӳреме пултараҫҫӗ.
РФ Патшалӑх Думин депутачӗ Анатолий Аксаков шалӑвне цифрӑллӑ тенкӗпе илме тытӑнӗ. Депутат халӑх тетелӗнче пӗлтернӗ тӑрӑх, вӑл ку енӗпе тӗнчери пӗрремӗш ҫын пулӗ.
Сӑмах май, цифрӑллӑ тенкӗпе анлӑ усӑ курассине Раҫҫейре 2026 ҫулхи авӑн уйӑхӗнчен пуҫласшӑн. 2028 ҫулхи авӑн уйӑхӗнчен вара унпа мӗнпур банк тата пысӑк компанисем усӑ курма пултарӗҫ.
Иртнӗ канмалли кунсенче Шупашкарти шкул ачине «Голос. Дети» кӑларӑмра кӑтартнӑ.
15 ҫулти Дмитрий Еремеев жюри умне Евгений Трофимов репертуарӗнчи «Самолеты» юрӑпа тухнӑ.
Анчах, шел те, пирӗн ентеш тепӗр тапхӑра лекеймен. Владимир Пресняков унӑн куҫӑм тапхӑрӗ пулнӑ май сасси улшӑнса пынине каланӑ. Дима Билан пирӗн ентеше мухтанӑ, ӑнӑҫу суннӑ.
Агродиктант ҫырса пӗлӗве тӗрӗслес килет-и? Апла Пӗтӗм Раҫҫейри акцие хутшӑнӑр.
Вӑл юпа уйӑхӗн 8-12-мӗшӗсенче пӗрремӗш хут иртӗ. Ӑна кирек мӗнле те ҫырма пулать: лапама килсе те, агродиктант.рф сайтра онлайн майпа та.
Акцие Ял хуҫалӑх ӗҫченӗн кунне халаллӗҫ. Унта хутшӑнакансен 30 ыйтӑва хуравлама тивӗ: вӗсем ӳсен-тӑран ҫитӗнтерессипе, выльӑх ӗрчетессипе, хальхи агротуризмпа тата органика ҫӗр ӗҫӗпе ҫыхӑннӑ.
Раҫҫей Федерацийӗнче паян пӗрремӗш хут Раҫҫей халӑхӗсен чӗлхисен кунне уявлаҫҫӗ.
Ку уяв чи ҫамрӑк уявсенчен пӗри — йӗркелессе ӑна кӑҫал ҫӗртмен 5-мӗшӗнче йӗркеленӗ. Уяв кунӗ валли Расул Гамзатов ҫуралнӑ кунне суйланӑ.
Уява йӗркеленӗ май Раҫҫей халӑхӗсен чӗлхисене упрасси тата вӗсене аталантарасси, патшалӑх енчен системӑллӑ пулӑшу парасси, ҫӗршывӑн чӗлхе уҫлӑхне пӗтӗмӗшле хӳтӗлесси питӗ пӗлтерӗшлӗ ӗҫ пулнине асӑннӑ.
Эпир те, Чӑваш халӑх сайчӗ, сире ҫак уявпа саламлатпӑр! Пирӗн чӑваш чӗлхи ытти чӗлхесемпе тан аталанса пытӑр тесе пӗтӗм вӑя хурӑпӑр!
Тӗплӗнрех уяв ҫинчен РУВИКИн чӑваш уйрӑмӗнче вуласа пӗлме пулать.
Сӑмах май, ӗнер, авӑнӑн 7-мӗшӗнче, Чӑваш халӑх сайчӗ 20 ҫул тултарчӗ. Икӗ уяв ҫумма ҫуммӑн пыни пирӗн халӑхшӑн питӗ аван пулӑм пулнине палӑртмалла.
Паян Уйӑх йӑлтах тӗтӗмленнине курма май пулӗ. Кун пекки астрономире – сайра тӗл пулакан тӗслӗх. Уйӑх тӗтӗмленнине 18:28 сехетрен пуҫласа 23:12 сехетчен курма пулать. Чи вӑйлӑ тӗттӗмленнӗ вӑхӑт – 21:12 сехетре.
Тӗттӗмленнӗ вӑхӑтра Уйӑх хӗп-хӗрлӗ тӗслӗ пулӗ. Ҫакна «юнлӑ Уйӑх» та теҫҫӗ.
Астрономсем палӑртнӑ тӑрӑх, Уйӑх тӗттӗмленнине ахаль куҫпах курма пулать. Хулари ҫутӑран аяккарах сӑнасан вӑл тата лайӑхрах курӑнӗ.
Шупашкарти дальнебойщик Новосибирскран Мускава кайнӑ чухне ҫухалнӑ. Вӑл ӑҫта пулнине ҫурла уйӑхӗн 18-мӗшӗнченпе пӗлмеҫҫӗ.
Евгений Кудряшов М-5 ҫул ҫинче ҫухалнӑ. Мускава кайнӑ чухне вӑл ирхине аварие лекнӗ – унӑн фури кювета тухса кайнӑ. Иртен-ҫӳрен водитель чарӑнса ӑна пулӑшу сӗннӗ, анчах вӑл хирӗҫленӗ. Тепӗр 20 минутран ҪҪХПИ ӗҫченӗсем килнӗ, анчах унта никам та пулман. Докуменчӗсем, банк карттисем ҫавӑнтах юлнӑ.
3-4 кунран водителе шырама пуҫланӑ. Арӑмӗ каланӑ тӑрӑх, авариччен 2 сехет маларах вӑл упӑшкипе телефонпа калаҫнӑ, унӑн кӑмӑлӗ аванах пулнӑ.
Ҫывӑхри вӑрманта йӑлтах шыранӑ. Авари вырӑнне арӑмӗ те килнӗ. Анчах водителе тупайман. Арӑмӗн шухӑшӗпе, упӑшкине укҫа ыйтса илес тӗлӗшпе вӑрланӑ.
Паянтан Раҫҫейре ҫӗнӗ саккун вӑйра. Вӑл эрех-сӑра сутассине пырса тивет.
Унччен эрех-сӑрана 8-23 сехетсенче сутнӑ пулсан халӗ – 9-22 сехетсенче кӑна. Постановление ҫу уйӑхӗн 29-мӗшӗнчех алӑ пуснӑ, документ паян, 2025 ҫулхи авӑнӑн 1-мӗшӗнчен, вӑя кӗнӗ.
Ҫавӑн пекех нумай хваттерлӗ ҫуртсенче, лавккана кӗмелли алӑк подъезд енчен пулсан, эрех-сӑра сутма юрамасть.
Чӑваш Енри ӑста повар Александр Гониашвили «Профессире — чи лайӑххи» Пӗтӗм Раҫҫейри конкурсра палӑрнӑ.
Вӑл Вологда хулинче иртнӗ, тупӑшӑва тӗрлӗ регионти 15 повар хутшӑннӑ.
Вологда облаҫӗнчи Константин Балдышев ҫӗнтерӳҫӗ ятне тивӗҫнӗ. Ӑна 1 миллион тенкӗпе хавхалантарнӑ. Свердловск облаҫӗнчи Михаил Осовалюк 500 пин тенке тивӗҫнӗ. Александр Гониашвили вара виҫҫӗмӗш вырӑна тухнӑ. Ӑна 300 пин тенкӗ парса чысланӑ.
Шупашкарти трактор историйӗн музейӗ Ленинград облаҫӗнче чӑн-чӑн шоу кӑтартнӑ.
Унта сухалас енӗпе Раҫҫейӗн уҫӑ чемпионачӗ иртнӗ. Шупашкарти музей 22 раритет трактор тата ӗҫ хатӗрӗ кӑтартнӑ. Элӗк округӗнчи «Валинкке» халӑх ансамблӗн артисчӗсем вара юрӑ-ташӑпа савӑнтарнӑ. Вӗсем костюм тӑхӑнса пирӗн йӑх-несӗлсем ҫурлапа, кӗреплепе епле ӗҫленине кӑтартса панӑ.
Паша Ангелина ячӗллӗ хӗрарӑмсен трактор бригадине куракансем уйрӑмах хапӑлласа йышӑннӑ. Хӗрарӑмсем техникӑна «итлеттернӗ» май юрланӑ та, ташланӑ та.
-7.7 °C