Мускавра аэропортра пӑтӑрмах пулса иртнӗ. Шереметьево аэропортӗнче. Паян ирпе. Пӗр сехет тӗлӗнче.
«Северный ветер» (Nordwind) авиокомпанин самолечӗ Еревана вӗҫмелле пулнӑ. Сывлӑша хӑпарса ӗлкӗреймен «Boeing 737».
Вырӑнтан хускалнӑ вӑл. Ҫав вӑхӑтра пилотсен кабинине тӗтӗм пирки хыпар ҫитнӗ.
173 пассажир тата экипаж членӗсем 6 ҫын пулнӑ салонта.
Вӗрсе хӑпартмалли трампа вӗсене пурне те самолетран кӑларнӑ. Сакӑр ҫын аманнӑ. Икӗ пассажира пульницӑна илсе кайнӑ. Ыттисене терминала илсе кайнӑ. Унта вӗри апат ҫитернӗ. Ирхи тӑватӑ сехет ҫурӑра тепӗр самолета лартса янӑ.
Мускавран Еревана каяс тенисенчен 28 ҫын ҫула тухма килӗшмен.
Шереметьево аэропорчӗ унчченхи йӗркепех ӗҫлет. Самолет салонӗнче тӗтӗм тухнин сӑлтавне специалистсем палӑртӗҫ. Авиакомпание Ространснадзор тӗрӗслӗ.
Полицейскисем Киров облаҫӗнчи икӗ арҫынна шыраҫҫӗ. Вӗсем йывӑр преступлени тунӑ. Чӑваш Республикинче усал ӗҫ тунӑ.
Тарса ҫӳрекен икӗ арҫынна куракансенсене йӗрке хуралҫисене часрах пӗлтерме ыйтаҫҫӗ.
Павел Сергеевич Мосунов 1998 ҫулта ҫуралнӑ. Николай Аркадьевич Арсентьев 1982 ҫулта ҫуралнӑ. «Мускав—Хусан» ҫулпа ҫуран утма пултараҫҫӗ. Сад юлташлӑхӗсен территорийӗсенче пулма пултараҫҫӗ.
Павел Сергеевич Мосуновпа Николай Аркадьевич Арсентьева курнисен 8(83530) 2-13-39 номерпе Красноармейски районӗнчи шалти ӗҫсен пайне шӑнкӑравламалла. Е 8-927-859-36-02, е 102 номерсемпе.
Шӑнкӑравлакансен ятне никама та пӗлтермӗҫ. Усал ӗҫ тунӑ ҫынсем ӑҫти пирки пӗлтерсен укҫа тӳлӗҫ.
Леонид Волков экс-полпред Чӑваш Ен хыснинчен укҫа шыраса илмӗ. Хӑйӗн тӗлӗшпе пуҫиле ӗҫ пуҫаричченех, 2015 ҫулта, вӑл хӑйӗн премине тавӑрса панӑ. Ытлашшипех. Ҫакӑн пирки вӑл «Правда ПФО» тӗнче тетелӗнчи хаҫата паян пӗлтернӗ. Экс-полпред преми илсе чӑнах та йӑнӑшрӑм, хыснана тӑкак кӳтӗм пуль тесе шухӑшланӑран ҫапла тунӑ. Хӑйӗнчен шыраса илес тенинчен миллион тенкӗ ытларах куҫарса панӑ.
Ӗнер Леонид Волкова суд тинех ирӗке кӑларнӑ. Экс-полпред тӗлӗшпе пуҫарнӑ пуҫиле ӗҫе вара чарса лартнӑ, Леонид Волкова 40 пин тенкӗ штраф панипе ҫырлахнӑ.
Бюджета ытлашшипех тавӑрса панӑ укҫана экс-полпред шыраса илесшӗн мар. «Эпӗ укҫашӑн ҫунакан ҫын мар. Чӑваш Ен вара дотацилле республика. Следстви вӑхӑтӗнче ҫавна темиҫе те палӑртрӗҫ. Нихҫан сӳнми ҫулӑм палӑк патне хума гвоздика туянса Чӑваш Ен хыснине самай тӑкак кӳнӗ терӗҫ. Ҫавна пулах ӗҫе Мускава парасшӑн марччӗ. Эпӗ ытлашшипех тӳленӗ укҫа республика хыснине пулӑшни пулчӗ тесе шутлӑпӑр», — тенӗ Леонид Волков.
Чӑваш Енӗн Раҫҫей Президенчӗ ҫумӗнчи тулли праваллӑ элчи пулнӑ Леонид Волкова ирӗке кӑларнӑ. Ку хыпара эпир халь ҫеҫ илтрӗмӗр.
Леонид Волкова ӗҫ вырӑнӗпе усӑ курса преми илнӗ тесе айӑпласшӑннине Чӑваш халӑх сайчӗ унччен пӗлтернӗччӗ. Ӗҫе Шупашкарта тишкересшӗнччӗ, анчах каярах Мускава куҫарма май килнӗ-килнех. Ҫапла тума Леонид Волковпа унӑн хӳтӗлевҫи ҫине тӑнӑ. Вӗсем кунти суда шанман.
Леонид Волков следстви изоляторӗнче чылайранпа ларчӗ. Полпредпа ҫыхӑннӑ суд ларӑвӗсене Тимӗр Акташ Чӑваш халӑх сайчӗн вырӑсла пайӗнче хыпарласах тӑнӑччӗ-ха. Вӑл хальхинче те пӗлтерессе шанатпӑр.
Паян эпир экс-полпреда ирӗке кӑларнине илтрӗмӗр. Те следстви изоляторӗнчен ирӗке кӑларнӑ, те айӑплӑ мар тесе йышӑннӑ. Ҫак самантра тӗплӗн калаймӑпӑр.
Мускавра Челепи облаҫӗнче пурӑнакан ҫынна тытса чарнӑ. Хайхискер 18 ҫул тултарман хӗре чуралӑха сутма хӑтланнӑ тесе шутлаҫҫӗ, ҫавна май ун тӗлӗшпе пуҫиле ӗҫ пуҫарнӑ.
Следовательсем пӗлтернӗ тӑрӑх, утӑ уйӑхӗн 9-мӗшӗнче ҫак арҫын кафере 2003 ҫулта ҫуралнӑ хӗре 500 пин тенкӗпе сутма хӑтланнӑ. Рен ТВ пӗлтернӗ тӑрӑх, вӑл Чӑваш Енри пӗр поселокра ҫуралса ӳснӗ. Кафере клиентпа калаҫса татӑлнӑ чухне арҫынна полици ӗҫченӗсем тытса чарнӑ.
Ҫакӑ паллӑ: арҫын халӑх тетелӗсенче хупӑ ушкӑнсенче хӗрсене тата ҫамрӑк хӗрарӑмсене сутма пуян клиентсем тупнӑ. Лешсем вӗсене ясар шухӑшӗсене пурнӑҫлас тӗллевпе туянма палӑртнӑ.
Арҫын халӑх тетелӗнче Чӑваш Енри 18 ҫул тултарман хӗрпе паллашнӑ та ӑна Мускава илсе килнӗ. Арҫынна тытса чарнӑ хыҫҫӑн ӑна ашшӗ-амӑшне париччен сиплев учрежденийӗнче тытаҫҫӗ.
Мускавра Чӑваш Ен ҫыннин пурнӑҫӗ татӑлнӑ. Кун пирки РЕН ТВ сайтӗнче хыпарланӑ.
1983 ҫулта Чӑваш Республикинче ҫуралнӑ арҫын Мускавра бизнес-центр тунӑ ҫӗрте ӗҫленӗ. Инкек асӑннӑ хулари Мир проспектӗнче пулнӑ. Пирӗн ентеш унта каменщикре тӑрӑшнӑ. Вӑл виҫҫӗмӗш хутран аялалла ӳкнӗ, урай шӑтӑкне анса кайнӑ. Йывӑр суранланнӑ арҫын ҫавӑнтах сывлама пӑрахнӑ.
Халӗ следовательсем ӗҫ-пуҫа уҫӑмлатаҫҫӗ.
Аса илтерер: нумаях пулмасть Чӑваш халӑх сайтӗнче Ҫӗнӗ Шупашкарти пӗр ҫурт подъездӗнче икӗ арҫын виллине тупнине пӗлтернӗччӗ. Ку ӗҫ тӗлӗшпе пуҫиле ӗҫ пуҫарнӑ, ҫак тискер ӗҫе тума пултарнӑ ҫынна тытса чарнӑ.
РФ экономика аталанӑвӗн министрӗ Максим Орешкин Чӑваш Ен урлӑ «Ладӑпа» иртсе кайӗ. Руль умӗнче вӑл хайех пулӗ. Кун пирки вӑл Инстаграмри страницинче пӗлтернӗ.
Министр Тольятти хулине монохуласен форумне кайма пуҫтарӑннӑ. «Эпӗ машинӑпа кайӑп, руль умӗнче хамах пулӑп. Мускав – Владимир – Чулхула – Шупашкар – Хусан – Самар – Тольятти маршрут пулӗ», - ҫапла ҫырнӑ министр хӑйӗн страницинче.
Министр ҫула май ҫынсемпе калаҫма палӑртнӑ. Мускав – Хусан маршрутпа тӳлевлӗ ҫул тума, М-7 ҫула тӗпрен реконструкцилеме палӑртнӑ. Шӑпах ҫак тӗллевпе министр руль умне ларса ҫула тӗрӗслӗ. Хусана ҫити тӳлевлӗ ҫул чӑнах та кирлӗ-и? Ҫак ыйтӑва та татса парасшӑн вӑл.
Ҫак кунсенче Мускавра «Раҫҫейри чи лайӑх вӗрентекен» конкурсӑн финалисчӗсен семинарӗ иртет. Унта Чӑваш Енри педагог та хутшӑнать.
Аса илтерер, ака уйӑхӗн 19-мӗшӗнче пирӗн республикӑри чи лайӑх вӗрентекене палӑртнӑччӗ. Муниципалитет тапхӑрне 700 педагог хутшӑннӑччӗ, вӗсенчен 129-ӗшӗ финала тухнӑччӗ. Вӑрнарти 2-мӗш шкулти акӑлчан чӗлхин вӗрентекенӗ Ольга Физер халӗ Мускавра иртекен ӑсталӑх сехечӗсене, лекцисемпе консультацисене хутшӑнать.
Финалистсен семинарӗ утӑ уйӑхӗн 1-5-мӗшӗсенче иртӗ. Конкурсӑн куҫӑн тапхӑрӗ вара Чечен Республикин тӗп хулинче, Грозныйра, темиҫе куна тӑсӑлӗ. Вӑл авӑн уйӑхӗн 21-юпа уйӑхӗн 2-мӗшӗсенче пулӗ. Ҫӗнтерӳҫӗне юпа уйӑхӗн 4-мӗшӗнче Кремльте чыслӗҫ.
Ӗнер Мускаври ентешӗмӗрсем Акатуя пухӑнчӗҫ. Ҫанталӑк кӗрхи пек сивӗ тӑнине тата ҫапса ҫумӑр ҫунине пӑхмасӑрах халӑх уявра савӑнчӗ.
Мускаври Акатуя Чӑваш Енри профессионал ҫыравҫӑсен пӗрлешӗвӗн пайташӗсен пӗр ушкӑнӗ те хутшӑнчӗ. Йышра правлени ертӳҫи Лидия Филиппова, ҫавӑн пекех Анатолий Кипеч, Светлана Асамат, Улькка Эльмен, Альбина Юрату, Светлана Гордеева, Ольга Васильева, Раиса Воробьева, Лидия Сарине, Елена Светлая, Владимир Мишшан, Дмитрий Суслин, Владислав Николаев, Чӗмпӗрти чӑваш ҫыравҫи Николай Ларионов пулчӗҫ. Чӑваш халӑх артистки Людмила Семенова, Роза Степанова юрӑҫ, Зоя Яковлева телеоператор та ҫак йышраччӗ.
Акатуйпа саламлама политиксем, тӗрлӗ-шайри тӳре-шара, ҫавӑн пекех Питӗрти, Чӗмпӗр тата Иркутск облаҫӗсенчи, Пушкӑртстанри тата, паллах, чӑвашсем пырса ҫитнӗччӗ.
Чӑваш Енӗн Раҫҫей Президенчӗ ҫумӗнчи полномочиллӗ элчелӗхӗнче чӑваш ҫыравҫисен кӗнекисен вулавӑшне йӗркелесшӗн. Республикӑри поэтсемпе писательсене ҫапла сӗнӳпе Пётр Чекмарёв савӑнтарчӗ.
Эрнекун, ҫӗртме уйӑхӗн 28-мӗшӗнче, Мускаври национальноҫсен ҫуртӗнче Чӑваш поэзийӗн каҫӗ иртрӗ. Ӑна Чӑваш Енри профессионал ҫыравҫӑсен пӗрлешӗвӗ (правлени ертӳҫи — Лидия Филиппова) полпредство пулӑшнипе ирттерчӗ.
Мускаври каҫа йӗркелес енӗпе Елчӗк ҫӗрӗ ҫинче ҫуралса ӳснӗ Анатолий Волков хастар чӑваш питӗ нумай пулӑшнине уйрӑммӑн палӑртмалла. Вӑл — Мускаври чӑвашсен обществин правленийӗн ертӳҫин ҫумӗ, Раҫҫейри чӑвашсен автономийӗн хастар ертӳҫисенчен пӗри. Ӳркенмен ентешӗмӗрех, сӑмах май, Чӑваш Ен делегацине кӗтсе илчӗ, пирӗн йыш Мускавран тухса киличченех пӗрле пулчӗ.
Поэзи каҫӗнче Раҫҫейри писательсен пӗрлешӗвӗн правленийӗн ертӳҫи Николай Иванов Чӑваш Енри профессионал ҫыравҫӑсен пӗрлешӗвӗн правленийӗн ертӳҫине Лидия Филипповӑна обществӑлла ҫак ӗҫре хавхаланса та пӗтӗм чуна парса ӗҫленӗшӗн ырларӗ. Чӑваш поэзийӗн каҫне хутшӑннӑ Пётр Чекмарёв та пултаруллӑ чӑваш ҫыравҫисене тата чӑвашсене кӑмӑлтан ырласа калаҫрӗ.
-0.7 °C