Татьяна Комендантова – спортсменка пулнӑ, халӗ стюардессӑра ӗҫлет. Нумаях пулмасть вӑл «Стюардессӑсен Топӗ» пӗтӗм тӗнчери конкурс ҫурма финалне тухнӑ.
Татьяна Чӑваш Енре ҫуралса ӳснӗ, Олимп резервӗсен шкулӗнче спорт енӗпе аталаннӑ. 9 ҫул каялла вара Мускава куҫса кайнӑ.
Спорт хыҫҫӑн вӑл патшалӑх тытӑмӗнче ӗҫленӗ, унта ӑнӑҫлӑ карьера тума пултарнӑ. Анчах унӑн чунӗнче урӑх ӗмӗт тӗвӗленнӗ: стюардесса пуласси. 32-е чухне Татьяна профессие улӑштарнӑ. Пиллӗкмӗш ҫул ӗнтӗ вӑл бортпроводницӑра ӗҫлет. Халӗ Татьяна Мароккӑра иртекен ҫӑмӑл атлетика чемпионатне хутшӑнма хатӗрленет.
Спортсменсем Атӑл урлӑ ишсе каҫнине курас килет-и?
Шупашкарта «CHEBSWIM-2025» ӑмӑрту ҫӗртме уйӑхӗн 28-мӗшӗнче иртӗ. Унта профессионал спортсменсем тата ишме кӑмӑллакансем хутшӑнӗҫ. Вӗсем 2200 метр парӑнтарӗҫ.
Палӑртса хӑварар: хальччен Артур Димитриевӑн рекордне ҫӗнетекен пулман. Вӑл – тӗнче класлӑ спорт мастерӗ. Артур Атӑл урлӑ 29 минут та 52 ҫеккунтра ишсе каҫнӑ.
Раҫҫейӗн битатлонистсен союзӗ ҫӗнӗ, 2025-2026 ҫулти, ӑмӑртусен календарь планне ҫирӗплетнӗ. Хальхинче биалтонистсем 40 хутчен ӑмӑртӗҫ. Иртсе кайнӑ тапхӑрта календарьти плана 45 ӑмӑрту кӗртнӗччӗ. Спортсменсене ун чухлӗ ӑмӑртӑва хутшӑнма ҫӑмӑл мар. Иртсе кайнӑ тапхӑрта пӗртен-пӗр спортсмен, Тамара Дербушева, ҫеҫ кашнине хутшӑнса пынӑччӗ. Арҫынсем те сиктерннӗччӗ.
Пирӗншӗн, Чаваш Республикишӗн, ырӑ хыпар та пур. Раҫҫейӗн битатлонистсен союзӗн президенчӗ Виктор Майгуров 2026 ҫулхи нарӑс уйӑхӗнче Пӗтӗм Раҫҫейри ӑмӑртӑва пирен патра ирттерессине пӗлтернӗ. Унта Сочире иртекен Содружество кубокӗн Альфа-Банк тапхарне кайманнисем килӗҫ.
Шупашкарта пурӑнакан 13 ҫулти Кирилл Александров ҫак кунсенче Раҫҫей чемпионатӗнче палӑрнӑ. Вӑл Калуга хулинче иртнӗ ӑмӑртура 100 метр дистанцие ишсе кӗмӗл медаль ҫӗнсе илнӗ.
Палӑртмалла: Кирилл – спорт мастерӗн кандидачӗ, Раҫҫейӗн юниорсен пӗрлештернӗ командин резервӗн пайташӗ. Вӑл Мускавра Сергей Жилкин тренер патӗнче ӑсталӑхне туптать. Халӗ Кирилл 2028 ҫулта иртекен Паралим вӑййисене хатӗрленет.
Тухӑҫ ҫар ҫапӑҫӑвӗ енӗпе Раҫҫей спорт мастерӗ Александр Максимов спорт историне кӗрсе юлӗ. Вӑл Эноэда Кубокне ҫӗнсе илнӗ. Ӑна «ката» тата «кумитэ» дисциплинӑсенче пысӑк кӑтартусемпе палӑрнӑ спортсменсем тивӗҫеҫҫӗ. Арҫынсен хушшинче ӑна 2002 ҫултанпа илекен пулман.
Трофея Мускав облаҫӗнчи Видное хулинче панӑ. Унта Раҫҫей чемпионачӗ иртнӗ, 36 регионти 800 яхӑн спортсмен вӑй виҫнӗ. Пирӗн ентеш «кумитэ» дисциплинӑра – ылтӑн медаль, «ката» дисциплинӑра пӑхӑр медаль ҫӗнсе илнӗ. Халӗ вӑл 2026 ҫулта Маврикий утрав ҫинче иртекен тӗнче чемионатне хатӗрленет.
Чӑваш Ен тата Мускав ҫывӑхӗн чысне хӳтӗлекен Денис Гаврилов Колумбири Калире иртнӗ ҫӑмӑл атлетика ӑмӑртӑвӗнче ылтӑн медаль ҫӗнсе илнӗ.
Пирӗн ентеш куҫ япӑх куракан спортсменсен йышӗнче 5 пин ҫухрӑма чупса финиша пӗрремӗш ҫитнӗ.
Сӑмах май, 2024 ҫулта Денис Гаврилов Чӑваш Енрен Парижри Паралимп вӑййисене хутшӑннӑ пӗртен-пӗр спортсмен пулнӑ. Медаль ҫӗнсе илме ӑна ун чухне 7 ҫеккунт ҫеҫ ҫитмен. Вӑл 2021 ҫулта Токиора иртнӗ Паралимп вӑййисене те хутшӑннӑ.
Олимп резервӗсен 3-мӗш спорт шкулӗнче ӑсталӑхне туптакан Савелий Фролов триатлон енӗпе иртнӗ Раҫҫей ӑмӑртӑвӗнчен ылтӑн медальпе таврӑннӑ.
Вӑл 13-14 ҫулсенчи спортсменсемпе «дуатлон-спринт» дисциплинӑра ӑмӑртнӑ. Вӑл 25:42 кӑтартупа пурне те парӑнтарса пьедесталӑн ҫӳлти картлашки ҫине хӑпарнӑ.
Палӑртса хӑварар: Савелий Фролов Сергей Сусметов тренер патӗнче ӑсталӑхне туптать.
Куҫӗ курмасан та уншӑн нимӗнле чӑрмав та ҫук. Мария Мамаева нумаях пулмасть Калугӑра ишес енӗпе иртнӗ Раҫҫей чемпионатӗнче тӳрех икӗ пӑхӑр медаль ҫӗнсе илнӗ.
Мария икӗ дистанцире вӑй виҫнӗ. 23 регионтан килнӗ 100 ытла спортсменран вӑл финиша виҫҫӗмӗш ҫитнӗ. Вӑйлӑ спортсменсене те парӑнтарнӑ вӑл.
Маттур спортсменкӑна ЧР спорт министрӗ Василий Петров та саламланӑ, малашне те ҫитӗнӳсем тума суннӑ.
Чӑваш Енри спортсмен Сергей Смолев «Dagestan Wild Trail» сумлӑ ӑмӑртура ҫӗнтернӗ. Вӑл ту ҫинчи 35 ҫухрӑм дистанцие 3 сехет те 18 минут та 11 ҫеккунтра парӑнтарнӑ. Ҫапла ылтӑн медаль ҫӗнсе илнӗ. Иккӗмӗш вырӑна – Свердловск облаҫӗнчи Андрей Солнцев, виҫҫӗмӗш вырӑна Абхазири Денис Поляков йышӑннӑ.
Ӑмӑрту Дагестанра иртнӗ, унта 2 пин ытла спортсмен хутшӑннӑ.
Шупашкарти Олимп резервӗн 2-мӗш спорт шкулӗн воспитанникӗсем 4 медальпе таврӑннӑ. Вӗсем Мурманскра иртнӗ «Праздник севера» (чӑв. Ҫурҫӗр уявӗ) йӗлтӗр марафонне хутшӑннӑ. Старта 360 спортсмен тухнӑ.
Йӗлтӗрпе ирӗклӗ стильпе ярӑнакансенчен 18 ҫулти спорстменсем хушшинче ылтӑн тата кӗмӗл медальсене Антон Петров тата Кирилл Петров ҫӗнсе илнӗ. Вӗсем 25 километр тӑрршӗне ӑмӑртнӑ. 23 ҫулхисем хушшинче Даниил Акимов мала тухнӑ.
Абсолютлӑ ӑмӑртура Антон Петров виҫҫӗмӗш вырӑн йышӑннӑ.
-24.7 °C