21.мвд.рф сӑнӳкерчӗкӗ

Шупашкар хулинчи лавккасенчен пӗри хаклӑ эрехсӗр тӑрса юлнӑ. Ӑна пӗр арҫын вӑрланӑ тесе шухӑшланӑран Чӑваш Енӗн Шалти ӗҫсен министерствин сайтӗнче ҫавӑн сӑнӳкерчӗкне вырнаҫтарнӑ.

Элита шутланакан эрех кӗленчисӗр тӑрса юлнӑ суту-илӳ точки хулари Трактор тӑвакансен культура керменӗнче вырнаҫнӑ иккен. Ҫав эрех 10 пине яхӑн тенкӗ тӑнӑ.

Элита эрехе лавккари камера ҫине лекнӗ арҫын вӑрламан-ши тесе шухӑшлаҫҫӗ. Сӑнран пӑхсан вӑл 35-40 ҫулсенче, 170 сантиметр ҫӳллӗш, вӑтам пӳ-силлӗ. Шурӑ толстовка, хура шӑлавар, тӗксӗм бейсболка тӑхӑннӑ.

Арҫынна уйӑрса илнисене йӗрке хуралҫисене 8-927-668-70-35, 8 (8352) 63-00-02 е 102 телефон номерӗсемпе шӑнкӑравласа систерме ыйтаҫҫӗ.

21.мвд.рф сӑнӳкерчӗкӗ

Чӳк уйӑхӗн 13-мӗшӗнче Шупашкар хулинчи йӗрке хуралҫисенчен 43 ҫулти хӗрарӑм пулӑшу ыйтма пынӑ. Вӑл вӗсене ӑнлантарнӑ тӑрӑх, лавккана кайсан карас телефонне ҫухатнӑ.

Хӗрарӑм Университет урамӗнчи суту-илӳ центрӗсенчен пӗринче пулнӑ. Унта вӑл телефона кӑларса ӳкернӗ.

Йӗрке хуралҫисем палӑртнӑ тӑрӑх, 20 пин тенкӗ тӑракан ҫухалнӑ аппарата пӗр каччӑ илнӗ. Сӑнран пӑхсан вӑл 25-30 ҫулсенче, 170-175 сантиметр ҫӳллӗш, вӑтам пӳ-силлӗ. Хӑй сӑрӑ тӗслӗ курткӑпа, кӑвак джинс шӑлавар тӑхӑннӑ.

Каччӑна уйӑрса илнисене йӗрке хуралҫисене ҫак номерсемпе: 8 (8352) 24 09 27 е 102 — пӗлтерме ыйтаҫҫӗ.

rossaprimavera.ru сӑнӳкерчӗкӗ

Шупашкар районӗнчи Вӑрманкас Тӑрӑн ялӗнче Водопровод урамӗнчи пӗр ҫуртра икӗ ҫын виллине тупнине Чӑваш халӑх сайчӗ пӗлтернӗччӗ. Аса илтерер: чӳк уйӑхӗн 13-мӗшӗнче пулнӑ пӑтӑрмахра 41 ҫулти тата 58 ҫулти арҫынсем вилнӗ. 64-ри хӗрарӑма пульницӑна илсе кайнӑ. Вырӑнта йӗрке хуралҫисем ӗҫленӗ. Ҫынсем контрафактлӑ эрехпе наркӑмӑшланнӑ тесе шухӑшлаҫҫӗ.

Чӑн та, инкек вырӑнне Шупашкар районӗн прокурорӗн ҫумӗ Дмитрий Семёнов та ҫав кунах тухса кайнӑ. Чӑваш Ен прокуратуринче пӗлтернӗ тӑрӑх, инкек сӑлтавне тӗпчӗҫ, тивӗҫлӗ мера йышӑнӗҫ.

Тепӗр ҫул, 2022 ҫулта Чӑваш патшалӑх академи драма театрӗ валли Ленинградри театр, музыка тата кинематографи институтӗнчен чӑваш студийӗ вӗренсе килни 50 ҫул ҫитет, ҫур ӗмӗр. 1972-мӗш ҫулта Чӑваш академи драма театрӗ валли 19 хӗрпе каччӑ вӗренсе килнӗ вӑл институтран. 8 артист Чӑваш театрӗнче нумай ӗҫлеймен, тӳррех тӗрлӗ еннелле саланнӑ. Вӗсен хушшинче талантлӑ артист Владимир Бурмистров та, Вӑрнар район каччи. Чӑваш театрӗнче ӗҫлеме пултарайман ытти артистсен ячӗсене те асӑнса хӑварам, вӗсем: Зинаида Андреева, Альберт Белков, Валентина Громова, Иосиф Дмитриев, Николай Ильин, Владимир Маломайкин, Леонид Трифонов.

«Шупашкарта пире асӑрхануллӑ кӗтсе илчӗҫ. Тӗрлӗ театрсене пайласа салатрӗҫ, хваттер тата йӑла ыйтӑвӗсене йӗркелемесӗр хӗстерме пуҫларӗҫ. Эпир парӑнас темерӗмӗр, хула ӗҫтӑвкомӗн председателӗ патне кайса пӗр чӗлхе тупма пултартӑмӑр. Анчах пире панӑ хваттерсене урӑххисене салатрӗҫ», — тет 1972-мӗш ҫулхи вӑхӑтсене аса илсе Владимир Бурмистров. «Ман хыҫҫӑн театртан Валя Громова тухса кайрӗ, ӑна ушкӑнри чи талантлӑ артистка тетчӗҫ.

Малалла...

v-kurse.ru сайтри сӑн

Иртнӗ уйӑхра Чӑваш Енре кӑшӑлвируспа чирлисене сиплеме медицина кислорочӗ сахалли пирки калаҫрӗҫ. Дефицит пулнӑ май «Химпром» ӑна кӑлармалли калӑпӑша пысӑклатса пырать.

Кӑшӑлвирус енӗпе лару-тӑру халӗ те лӑпках мар, чирлекенсем сахалланмаҫҫӗ. Вӗсене сиплеме кислород ҫитменни пирки нумаях пулмасть калаҫма пуҫларӗҫ. «Химпром» кӑларнӑ шӗвӗ кислорода пӗр предприятие хатӗрлесе ҫитерме параҫҫӗ, унтан вӑл ЧР Сывлӑх сыхлавӗн министерствин пульницисене ҫитет.

Хальхи вӑхӑтра «Химпром» талӑкра 10-11 тонна кислород кӑларать. Ҫавна май, тӳре-шара ӗнентернӗ тӑрӑх, ҫитес вӑхӑтра ку енӗпе дефицит пулмалла мар.

Чӳк уйӑхӗн 14-мӗшӗнче ирхине Шупашкарта патрульпе пост службин машинине сехӗрленсе ӳкнӗ хӗрарӑм чарнӑ. Вӑл каланӑ тӑрӑх, нумай хваттерлӗ ҫурт балконӗ хӗрринче, пиллӗмӗш хутра, хӗрарӑм тӑнӑ.

Полици лейтенанчӗ Александр Григорьев часрах подъезда чупса кӗнӗ /алӑка кӳршисем уҫнӑ/, миҫемӗш хваттер пулма пултарнине шутласа тупнӑ. Шаккасан балкон ҫинче тӑракан хӗрарӑмӑн ҫывӑх ҫыннисем уҫнӑ. Вӗсем хӗрӗ хӑрушлӑхра пулнине пӗлмен те.

Ҫав вӑхӑтра полици лейтенанчӗ Дмитрий Ярлыкин урамра хӗрарӑмпа калаҫса тӑнӑ, хӑрушӑ утӑм тӑвасран ӳкӗтленӗ. Александр Григорьев хваттере кӗрсен хӗрарӑма вӑйпах каялла илсе кӗнӗ. Ӑна васкавлӑ медрулӑшу тухтӑрӗсем пульницӑна илсе кайнӑ.

М-7 ҫул ҫинче, Чулхула облаҫӗнчи Лысково районӗнче, йӗкӗреш арҫынсем аварире шар курнӑ. Вӗсем - Чӑваш Енрен.

Авари Хакасирен тиев илсе килекен грузовик волительне пула пулнӑ. Водитель дистанцие пӑхӑнман, малта пыракан машина ҫине пырса кӗнӗ.

Вӑл Чӑваш Енри иномаркӑпа ҫапӑннӑ. Салонра йӗкӗреш арҫынсем тата вӗсен 46 ҫулти пӗлӗшӗ пулнӑ. Руль умӗнче ларнӑ арҫын аллине хуҫнӑ, малта ларса пыракан тепӗр йӗкӗреш пуҫне, питне суранлатнӑ. 46-ри арҫын та аманнӑ.

Инстаграмри @aerocheb сӑнӳкерчӗкӗ

Ҫул ҫӳреме юратакансене Шупашкарти аэропорт ырӑ хыпар пӗлтерет. Чӑваш Енӗн тӗп хулинчен хӗлле те ҫӗршывӑн тӗрлӗ хулине вӗҫейӗпӗр.

Шупашкарти аэропортӑн расписанийӗнче Мускавпа Питӗрсӗр пуҫне Минеральные Воды, Ҫӗнӗ Уренгой, Краснодар тата Екатеринбург хулисем пур. Малтан асӑннӑ виҫӗ хулана «ИрИэро», Екатеринбурга «Руслайн» авиакомпани турттарӗҫ.

Минеральные Воды хулине самолёт ытларикунсерен ирхи 8 сехетре вӗҫсе кайӗ, Ҫӗнӗ Уренгоя – юнкунпа вырсарникунсерен – 8 сехет те 10 минутра, Краснодара – шӑматкунсерен 10 сехет те 20 минутра, Екатеринбурга – тунтикунпа эрнекунсерен – 19 сехет те 25 минутра.

Асӑннӑ рейссене регионти вӗҫевсене субсидилесси ҫинчен калакан программӑпа килӗшӳллӗн укҫа уйӑрса пулӑшӗҫ.

Сӑмах май каласан, ҫитес вӑхӑтра Дон ҫинчи Ростов хулипе ыйту уҫӑмланмалла. Самолётсем, тен, унта та Шупашкартан вӗҫме пуҫлӗҫ. Субсидилемелли рейссен списокӗнче асӑннӑ хула та пур.

culture.cap.ru сӑнӳкерчӗкӗ

Чӳк уйӑхӗн 19-мӗшӗнче К.В. Иванов ячӗллӗ Чӑваш патшалӑх академи драма театрӗн режссёр-постановщикӗн, Чӑваш Республикин тава тивӗҫлӗ артисткин Наталия Сергееван пултарулӑх каҫӗ иртӗ.

Наталия Алексеевна «Чӗнтӗрлӗ чаршав» республика шайӗнчи театр конкурсӗн лауреачӗ, Екатеринбургра иртнӗ хальхи вӑхӑтри драматругин «Коляда-PLAYS» VII театр фестивалӗн гран-прине тивӗҫнӗ.

Режиссерӑн юбилейне халалланӑ каҫ театрта «Вӑйлӑ хӗрарӑм» спектакль кӑтартӗҫ. Ӑна Ярослава Пулиновичӑн пьеси тӑрӑх лартнӑ. Жанна ролӗнче – юбиляр.

Юбилей каҫе 18 сехетре пуҫланӗ.

vedtver.ru сайтри сӑн

Чӑваш Енре кӑшӑлвирусран вакцинациленесси чакнӑ. ЧР Элтеперӗ Олег Николаев пӗлтернӗ тӑрӑх, ковид-каникулччен кунсерен 5,5-6 пин ҫын прививка тунӑ. Юлашки эрнере вара ку 4,8-4,9 пин ҫын анчах вакцинациленнине палӑртнӑ.

Планпа килӗшӳллӗн, республикӑра пурӑнакансен 80 процентне вакцинацилемелле. Ку 761,814 пин ҫынпа танлашать. Ку таранччен 459,4 пин ҫын прививка тунӑ. Ку планӑн 60,3 проценчӗпе танлашать.

Тӑвай, Муркаш, Элӗк, Вӑрнар, Улатӑр, Вӑрмар, Ҫӗрпӳ районӗсенче, Улатӑр тата Ҫӗмӗрле хулисенче вакцинациленессин кӑтартӑвӗ пӗчӗк. Тӳре-шара пӗлтернӗ тӑрӑх, республикӑра вакцина ҫителӗклех. «Спутник Лайт» тӗлӗшпе ҫеҫ йывӑрлӑхсем пур.