cap.ru сӑнӳкерчӗкӗ

Шупашкар хула администрацийӗ раштав уйӑхӗн вӗҫӗнче Тӑван ҫӗршыв вӑрҫин ветеранӗн Михаил Сорокинӑн хваттерӗнче юсав ӗҫӗсем тунӑ. Кун валли 403,4 пин тенкӗ тӑкакланӑ.

Михаил Сорокин 97 ҫулта. Вӑл вӑрҫа хутшӑннӑ, Хусан хӳтӗлев чиккине чавнӑ. Вӑл мӑшӑрӗпе икӗ ывӑл ӳстернӗ.

Администраци уйӑрнӑ укҫапа ветеранӑн хваттерӗнче стенасене ҫӗнетнӗ, линолеум сарнӑ, обой ҫыпӑҫтарнӑ, алӑксемпе чӳречесене улӑштарнӑ. Ҫавӑн пекех ҫӗнӗ сантехника, газ плити лартнӑ.

culture.cap.ru сӑнӳкерчӗкӗ

Ҫеҫпӗл Мишши ячӗллӗ Чӑваш патшалӑх ҫамрӑксен театрӗ иртсе кайнӑ ҫулталӑка пӗтӗмлетнӗ.

Пӗлтӗр культура ӳнер учрежденийӗнче 7 ҫӗнӗ постановка лартнӑ. Вӗсене ачасем тата аслисем валли хатӗрленӗ. Раштавӑн 15-мӗшӗнче, сӑмахран, театрта «Яту сан ӗмӗре ҫуталтӑр» музыкӑпа поэзи каҫӗ иртнӗ. Ӑна Казахстанӑн культура тава тивӗҫлӗ ӗҫченӗ, Чӑваш Республикин искусствӑсен тава тивӗҫлӗ ӗсченӗ Иосиф Дмитриев (Трер) ҫуралнӑранпа 75 ҫул ҫитнине халалланӑ. Ҫав кун тӗлне Лолита Чекушкина композитор Иосиф Трерӑн «Ӑрӑм» поэми тӑрӑх оратори хатӗрленӗ. Проекта Чӑваш патшалӑх оперӑпа балет театрӗпе пӗрле пурнӑҫа кӗртнӗ.

culture.cap.ru сӑнӳкерчӗкӗ

Ыран, кӑрлач уйӑхӗн 4-мӗшӗнче, 12 сехетре Чӑваш Енӗн Наци вулавӑшӗнче Лев Куракова асра тытнине палӑртса пухӑнӗҫ.

Лев Кураков — паллӑ учёнӑй-экономист, общество тата патшалӑх ӗҫченӗ, экономика наукисен докторӗ, профессор, Раҫҫей вӗрентӗвӗн академийӗн чӑн членӗ.

Лев Кураков пурӑннӑ пулсан ыран 80 ҫул тултаратчӗ. Вӑл ҫуралнӑ кун вулавӑшра унӑн вӗренекенӗсем, ӗҫтешӗсем, унпа пӗр шухӑшлӑ пулнисем асӑну каҫне пуҫтарӑнӗҫ.

culture.cap.ru сӑнӳкерчӗкӗ

Комсомольски районӗнчи тӗп вулавӑшра кӑҫал этнобиблиотека уҫӑлӗ. Ун валли федераци хыснинчен 10 миллион тенкӗ укҫа уйӑрса парӗҫ.

Ҫӗнӗ йышши вулавӑшра нацисем хушшинчи ҫыхӑнӑва аталантарма ӗмӗтленеҫҫӗ, ҫав шутра чӑвашсенне те тесе шанас килет.

Вулавӑша кӑҫал тӗплӗн юсаса ҫӗнетӗҫ, вулав залӗсене, кӗнеке упракан вырӑнсене ҫӗнӗлле йӗркелӗҫ.

Унта электрон- тата аудиокӗнекесемпе те паллашма май килӗ, Брайль шрифчӗпе кӑларнӑ кӑларӑмсем те пулӗҫ.

culture.cap.ru сӑнӳкерчӗкӗ

2023 ҫулта Чӑваш Енре виҫӗ автоклуб туянӗҫ.

Республикӑн Культура министерстви пӗлтернӗ тӑрӑх, Чӑваш Енре 1729 ял-хула, вӗсенчен 1720-шӗ — ялтисем. Ялсенче культурӑпа кану ҫурчӗсен шучӗ ҫулсерен чакса пырать. Паянхи куна илсен ун пеккисем — 668.

«Культура» наци проекчӗпе килӗшӳллӗн ҫӗршывра автоклубсене аталантараҫҫӗ. Ӑна туянмалли конкурса хутшӑнса пирӗн республикӑри виҫӗ район ҫӗнтернӗ. Ҫав йышра — Ҫӗрпӳ муниципалитет округӗ, Элӗк муниципалитет округӗ, Ҫӗмӗрле муниципалитет округӗ.

Кӑрлач уйӑхӗ ӑшӑ ҫанталӑкран пуҫланчӗ. Ку уйӑх мӗнле иртессине синоптиксем палӑртнӑ.

Кӑрлач 4 пая пайланӗ, кашни эрнере ҫанталӑк улшӑнӗ. Кӑрлачӑн 8-мӗшӗччен ӑшӑ пулӗ, юр ҫӑвӗ.

Кайран пирӗн пата антициклон килӗ, вӑл чӑннипех те сивӗ ҫанталӑк илсе килӗ. Кӑрлачӑн 10-11-мӗшӗсенче 30 градус таранах сивӗтме пултарӗ. Ун чухне уяр ҫанталӑк тӑрӗ.

Кӑрлачӑн 17-мӗшӗнче каллех юр ҫума, ҫил-тӑман вӗҫтерме тытӑнӗ. Кун пек ҫанталӑк 7 кун тӑрӗ. Кӑрлачӑн юлашки эрни каллех сивӗ пулӗ. Термометр Шупашкарта та 35 градус таран кӑтартма пултарӗ. Анчах кун пек ҫанталӑк пулмасан та пултарӗ.

Кӑрлач уйӑхӗнче 20 сантиметр хулӑнӑш юр ҫӑвӗ.

ҪҪХПИ тунӑ сӑн

Ҫӗрпӳре лавкка вӑррисене ӑнсӑртран тытса чарнӑ. Ҫӗнӗ ҫул каҫхине ҫул-йӗр инспекторӗсем ҫул урлӑ правилӑсене пӑсса каҫакан икӗ арҫынна асӑрханӑ. Ҫитменнине, вӗсем ӳсӗр пулнӑ.

Хайхи арҫынсем - Шупашкартан тата Ҫӗнӗ Шупашкартан. Вӗсен кутамккинче апат-ҫимӗҫ, эрех пулнӑ.

Каярахпа ҫакна палӑртнӑ: 20-ри тата 34 ҫулти арҫынсем апат-ҫимӗҫе Ҫӗрпӳри супермаркетран вӑрланӑ. Пӗтӗмпе - 2 пин тенке яхӑн.

Ҫак арҫынсем Шупашкарти лавккасенчен те вӑрланӑ тесе шухӑшлаҫҫӗ. Вӗсен тӗлӗшпе пуҫиле ӗҫ пуҫарнӑ.

Мускав ҫывӑхӗнче пӑр скульптурисен Подольск фестивалӗ иртет. Унта пирӗн ентеш те хутшӑнать. Вӑл - Шупашкарти Андрей Молоков.

Пӑр скульптурӑсен фестивальне 12 ӑста хутшӑнать. Фестивале Мускавран, Рязаньтен, Питӗртен, Дон ҫинчи Ростовран, Амур ҫинчи Комсомольскинчен, Тюменьтен, Якутскран, Минскран тата Шупашкартан ӑстасем килнӗ.

Андрей Молоков Садко пирки калакан халапа тӗпе хурса пӑртан композици касса кӑларнӑ.

Чӑваш Енре Ҫӗнӗ ҫул каҫхине пӗр ача кӑна ҫуралнӑ. Кун пирки Хулари 1-мӗш клиника пульници пӗлтерет.

Пепке ҫур ҫӗр иртни 1 сехетре кун ҫути курнӑ. Вӑл - арҫын ача, ҫӳлерех асӑннӑ пульницӑра ҫуралнӑ.

Ача 4 килограма яхӑн тайнӑ, 56 сантиметр тӑршшӗ пулнӑ. Кӑҫалхи иккӗмӗш ача Ҫӗнӗ Шупашкарта ирхи 9 сехет те 34 минутра ҫуралнӑ. Вӑл та арҫын ача.

Кӑҫал пӗрремӗш хӗрача 13 сехет те 57 минутра Президент пепкелӗх центрӗнче кун ҫути курнӑ.

"Про Город" сайтӗнчи сӑн

Паян 10 сехетре Вӑрнар райойӗнчи Ершепуҫ ялӗнче микровтобус ҫунма тытӑннӑ. Вӑл Шупашкартан Йӗпреҫе каяканскер пулнӑ.

Водитель ҫухалса кайман - ҫулӑма сӳнтерме пуҫланӑ. Салонра пассажирсем пулнӑ. Вӗсем те юр сапса ҫулӑма сӳнтерме пулӑшнӑ.

Телее, никам та шар курман.