cap.ru сайтри сӑн

Кӑҫал «Наци кросӗ» авӑн уйӑхӗн 17-мӗшӗнче иртӗ. Унта кашни ҫулах спорта юратакансем, сывӑ пурнӑҫ йӗркине пӑхӑнакансем пухӑнаҫҫӗ.

Унта хутшӑнакансен 1-12 ҫухрӑма чупма май пур. Старта тӗрлӗ ӳсӗмри ҫынсем тухӗҫ. Шупашкарта старт Мускав ҫыранӗ хӗрринче пулӗ.

Йӑлана кӗнӗ тӑрӑх, «Наци кросӗнче» ҫӗнтернисене медальпе, дипломпа, парнепе чыслӗҫ. Вӗсем – РФ Спорт министерствинчен.

Паян, авӑнӑн 7-мӗшӗнче, Чӑваш халӑх сайчӗ ӗҫлеме пуҫланӑранпа 17 ҫул ҫитрӗ. Чӑн та, 2005 ҫултанпа вӑхӑт чылай иртрӗ. Апла пулин те, йывӑрлӑхсем ҫук мар пулсан та, «Чӑваш халӑх сайчӗ» ӗҫлет, кунсерен сире хыпарсемпе паллаштарать, вулама статьясем вырнаҫтарать.

Иртнине тишкерсе

«Чӑваш халӑх сайтне» йӗркеленӗ чухне тӗп тӗллев интернетра чӑвашла портал хатӗрлесси пулнӑччӗ. Унтанпа лару-тӑру чылай улшӑнчӗ ӗнтӗ. Самана та урӑхланчӗ. Енчен те 2005 ҫулта порталсен витӗмӗ питӗ пысӑкччӗ пулсан, паянхи куна илсен тӗрлӗ халӑх тетелӗсем (соцсетьсем), Телеграм йышши мессенджерсем вӑй илсе пыраҫҫӗ. Телеграмсемпе халӑх тетелӗсем вӑй илсе пыраҫҫӗ пулин те Чӑваш халӑх сайчӗ, тӗпрен илсен, хӑйӗн портал структурине сыхласа хӑварчӗ. Паллах, вӑхӑт иртнӗҫемӗн хӑш-пӗр япала ҫухалчӗ, теприсем вара хушӑнчӗҫ.

Калӑпӑр, «Чӑваш халӑх канашлӑвӗ» хупӑнчӗ. Кунта сӑлтавӗ Чӑваш халӑх сайчӗ МИХ шайне куҫнинче те пур, унсӑрӑн пуҫне канашлӑва хутшӑнакансен шайӗ те юлашки вӑхӑтсенче самай чакрӗ: ыйтусене сӳтсе явас вырӑнне пӗр-пӗринпе харкашма пуҫларӗҫ.

Малалла...

«Комсомольски - Елчӗк - Пӑва» ҫулӑн 9,5 ҫухрӑмне юсаса ҫӗнетнӗ.

Ҫулӑн ҫак вырӑнне ҫӗнӗ асфальт сарнӑ, ҫул хӗррине вӗтӗ чул сапнӑ, чарӑнусем лартнӑ, пӑрӑхсене юсанӑ. Ҫӗнӗ асфальта термопластикпа паллӑ туса тухмалли ҫеҫ юлнӑ. ЧР Транспорт министерстви пӗлтернӗ тӑрӑх, пӗтӗм ӗҫе авӑн уйӑхӗн 20-мӗшӗччен вӗҫлӗҫ.

Ҫула «Воддорстрой» 269 миллион тенкӗпе юсанӑ.

Палӑртмалла: ку ҫула 2 ҫул каяллах юсама палӑртнӑ, аукцион ирттерме йышӑннӑ. Анчах ӑна пӑрахӑҫласа ҫӗнӗ аукцион ирттернӗ.

чувашинформ.рф сайтран илнӗ сӑнӳкерчӗк

Юлашки темиҫе уйӑхра пирӗн ҫӗршыв тӗрлӗ санкцие парӑнмасӑр экономикӑна аталантарма ҫине тӑрса тӑрӑшать. Пирӗн патра ӗҫлеме пӑрахнӑ пысӑк усламҫӑсем вырӑнне вырӑнтисем йӑпӑр-япӑр йышӑнаҫҫӗ.

Шупашкарта, ав, «Букет Чувашии» фирма «Кока-Кола» тата «Фанта» евӗр пылак шыв кӑларма тытӑннӑ. Газлӑ ҫав шыва авӑн уйӑхӗн 1-мӗшӗнче кӗленчене пуҫласа тултарнӑ.

«Кока-Кола» тата «Фанта» евӗр тутиллӗ пылак шыва хальлӗхе Шупашкарти лавккасенче, «Дикий Лось» тата «Сахарок» суту-илӳ сечӗсен магазинӗсенче сутаҫҫӗ. Ҫывӑх вӑхӑтра продукцие федерацин Атӑлҫи тӑрӑхӗнчи регионӗсене ӑсатма палӑртаҫҫӗ.

art-4.ru сӑнӳкерчӗкӗ

Чӑваш наци музейӗ Чӑваш тӗррин шкулне 2021 ҫулхи чӳк уйӑхӗн 13-мӗшӗнче ӗҫлеттерсе янӑччӗ. Культура учрежденийӗ ырӑ йӑлана кӑҫал та манӑҫа кӑларасшӑн мар. Ҫӗнӗ курс кӑҫалхи юпа уйӑхӗн 1-мӗшӗнче уҫӑлӗ та 2023 ҫулхи ака уйӑхӗн 30-мӗшӗччен пырӗ.

Тӗрлеме вӗренес ӗмӗтлисемпе занятисене чӑваш халӑх ӳнерӗпе чӑваш тумӗн чӑн-чӑн ӑстисем ирттерӗҫ. Вӗсен йышӗнче — Геннадий Иванов-Орков искусствовед, Чӑваш Енӗн культурӑпа ӳнер институчӗн халӑх ӳнер пултарулӑхӗн кафедрин заведующийӗ Раиса Васильева, Николай Балтаев тата Любовь Вазюкова ӑстасем, «Кӗмӗл Чӑваш Ен» проект ертӳҫи Светлана Константинова, тӗрӗ художникӗ Татьяна Петрова, Людмила Шуркина художник-модельер, Шупашкарти ӳнер училищин преподавателӗ Ольга Голованева, «Паха тӗрӗ» фабрикӑн тата «Облик» вӗренӳ центрӗн специалисчӗсем, Чӑваш наци музейӗн ӗҫченӗсем.

Курса 12 ҫын ҫырӑнайӗ. Вӗренӳ хакӗ — 8 пин тенкӗ. Ыйтса пӗлмелли телефон номерӗ — 8-996-851-25-95.

Тӗнче тетлӗнчи халӑх ушкӑнӗсенчен пӗринчи «Кугеси | Общественный совет» (чӑв. Кӳкеҫ|Общество канашӗ) пабликра Шупашкар районӗнчи вӗренӳ заведенийӗсенчи лару-тӑру пирки паян икӗ пост вырнаҫтарнӑ. Пӗри пирки эпир маларах хыпарларӑмӑр-ха. Унта сӑмах Апашри шкул пирки пыратчӗ. Тепринче Кӳкеҫри 1-мӗш вӑтам шкул пирки каланӑ.

Пост авторне ӗненсен, шкул столовӑйӗ ыран ӗҫлемӗ, ҫавӑнпа уроксем 30 минута ҫеҫ тӑсӑлӗҫ тесе хыпарланӑ-мӗн.

Столовӑй ӗҫлеменнин сӑлтавӗ вара поварсем ҫуккипе ҫыхӑннӑ-мӗн. Шкул автобусӗсем те йӗркелллӗ ӗҫлемеҫҫӗ-мӗн. Виҫӗ автобусран пӗри ҫеҫ ҫӳрет.

Сергей Ефимов паян вырнаҫтарнӑ пост

Тӗнче тетелӗнчи «SAVANMA» проекта тытса тӑма ҫӗнӗ хуҫана шыраҫҫӗ. Кун пирки Сергей Ефимов тӗнче тетелӗнчи халӑх ушкӑнӗсенчен пӗри пӗлтернӗ. Вӑл хыпарланӑ тӑрӑх, «http://savanma.ru сайт ҫӗнӗ хуҫа шырать».

«SAVANMA» проект — чӑвашла социаллӑ сеть. Унта ытти социаллӑ сетьри пекех «ҫынсем хӑйсен ӑсталӑхне кӑтартма пултараҫҫӗ, ҫыравҫӑсем хӑйсен хайлавӗсемпе паллаштараяҫҫӗ, ӳнерҫӗсемпе фотографсем хӑйсен илемлӗ ӳкерчӗкӗсене хушаяҫҫӗ, юрӑҫсем ҫӗнӗ юррисене итлеттерме пултараҫҫӗ, кулинари ӑстисем рецептсем хушаяҫҫӗ, историксем иртни пирки каласа пама пултараҫҫӗ тата ытти те...

Хушакан текстсене чӑвашла ҫырмалла.

Сайтпа ӗҫлеме пуҫлама чи малтан регистрациленмелле».

vk.com/kugesionline страницӑран илнӗ скриншот

Шупашкар районӗнчи Апашри шкулта икӗ автобусран пӗри кӑна ачасене турттарать. Ку хыпара тӗнче тетелӗнчи халӑх ушкӑнӗсенчен пӗринче паян пӗлтернӗ.

Пост авторӗ хыпарланӑ тӑрӑх, икӗ шкул автобусӗнчен пӗри кӑна хутланӑран ачасен транспорт чылай вӑхӑт кӗтме тивет.

Пост авторӗ шкул столовӑйӗнчи апат пахалӑхне те хурласа ҫырнӑ. Унсӑр пуҫне вӑл шкулта укҫа пухаҫҫӗ тесе пӑшӑрханнӑ.

Поста вуланисенчен пӗри, Ольга Владимировна ятлӑ хӗрарӑм, шкула хӳтӗлесе ҫырнӑ. Вӑл: «Ачӑра машинӑпа турттарӑр е маршруткӑпа ҫӳретӗр», — тесерех касса татнӑ. Ӗҫ тетрачӗсене ывӑл-хӗрне ашшӗ-амӑшӗ туянса пани те йӗркеллӗ япала тесе хирӗҫленӗ.

cheboksari.bezformata.com сайтри сӑн

Мари Элте пурӑнакан, ача кӗтекен хӗрарӑма Шупашкарти Президент пепкелӗх центрӗн тухтӑрӗсем пулӑшнӑ. Ҫав хӗрарӑм ЭКО тунӑ, ӑна икӗ эмбрион лартнӑ, кайран варта лешсем тата икке пайланнӑ. Ҫапла унӑн варӗнче 4 пепке аталанма тытӑннӑ.

Анчах ҫак хӗрарӑм сывлӑхне кура тӑватӑ пепкене йӑтса ҫӳрейменнине палӑртнӑ. Ҫавна май тухтӑрсем иккӗшне ҫеҫ хӑварма йышӑннӑ. Кунашкал операцие вара – эмбрионсен редукцине – ятарлӑ пепкелӗх центрӗсем ҫеҫ тӑваяҫҫӗ. Ҫапла Мари Эл хӗрарӑмӗ Шупашкара лекнӗ. Пирӗн хулара вӑл – пӗрремӗш хут.

Операци ӑнӑҫлӑ иртнӗ. Хӗрарӑма киле кӑларнӑ. Халӗ вӑл йӗкӗреш ҫут тӗнчене килессе кӗтет.

"Чеб.медиа" сӑнӳкерчӗкӗ. 2019 ҫул

Паян Константин Ишутов блогер юсанмалли колонирен тухнӑ. «Ҫыхӑнура» портал пӗлтернӗ тӑрӑх, айӑплав срокӗ унӑн паян тухнӑ.

Аса илтерер: 2019 ҫулта блогера нацизма реабилитациленӗшӗн тата ача-пӑча порнографине сарнӑшӑн ЧР Аслӑ сучӗ пӗтӗмӗшле режимла колоние 3,5 ҫуллӑха ӑсатма йышӑннӑ. Константин Ишутов судра айӑпне йышӑнман, айӑплав унӑн журналист ӗҫӗпе ҫыхӑннӑ тесе палӑртнӑ.