"Чеб.ру" сайтри сӑн

Шупашкарти «Университет» микрорайонти ҫӗкленекен шкул 70 процент хатӗр. Тӳре-шара ӗнентернӗ тӑрӑх, унта ачасем кӑҫал авӑнӑн 1-мӗшӗнче вӗренме тытӑнӗҫ. Нумаях пулмасть объекта Патшалӑх Думин депутачӗ Алла Салаева, вӗренӳ министрӗ Дмитрий Захаров, строительство министрӗ Михаил Коледа, Шупашкар пуҫлӑхӗн тивӗҫӗсене пурнӑҫлакан Владимир Дорохотов ҫитсе курнӑ.

«ТУС» строительство компанийӗн директорӗ Николай Угаслов шкулти ӗҫсене утӑн 1-мӗшӗччен вӗҫлессине пӗлтернӗ. Тепӗр уйӑхран вара территорие хӑтлӑлатас ӗҫ вӗҫленмелле.

Палӑртмалла: 1500 вырӑнлӑ шкула 2022 ҫулхи авӑн уйӑхӗнче тума пуҫланӑ.

"Контактри" сӑн

Красноармейски муниципаллӑ округӗнчи Трак вӑтам шкулӗнче вӗренекен Елизавета Семенова шкул ачисен хушшинче китай чӗлхипе иртнӗ Пӗтӗм Раҫҫейри олимпиадӑн пӗтӗмлетӳ тапхӑрӗнче призер пулнӑ. Пӗлтӗр вӑл пӗтӗмлетӳ тапхӑрӗн ҫӗнтерӳҫин ятне илтнӗ.

Елизавета китай чӗлхине чӑннипех те лайӑх пӗлнине кӑҫал та кӑтартнӑ. Хальхинче вӑл призер пулни ҫакна ҫирӗплетет.

Палӑртмалла: Елизавета Семенова китай чӗлхине пӗрремӗш ҫул вӗренмест, унпа тахҫанах интересленет.

https://vk.com/wall-219005681_808 сӑнӳкерчӗкӗ

Суту-илӗвӗн пысӑк агрегаторӗн сайтӗнче пуш уйӑхӗн 21-мӗшӗнче Етӗрне муниципаллӑ округӗнчи Хучашри шкулӑн ҫуртне (тӗрӗсрех каласан, унччен вӗренӳ учрежденийӗ пулнӑскере) сутса ярасси пирки пӗлтернӗ. Суту-илӳ ака уйӑхӗн 19-мӗшӗнче иртмелле.

Пуҫламӑш хак — 9,18 миллион тенкӗ. Ҫав хакпа икӗ хутлӑ ҫурта ҫеҫ мар, ҫӗр лаптӑкне те сутӗҫ.

Сӑмах май каласан, 2022 ҫулта Хучашри шкула Тури Ачакри шкулпа пӗрлештернӗ.

Комсомольскинче авариллӗ тесе йышӑннӑ 2-мӗш шкул вырӑнне ҫӗнӗ ҫурт хӑпартма йышӑннӑ. Ӗҫ кӑҫӑлах пуҫланма пултарать.

Шкула 2026 ҫулта туса пӗтермелле. Кун валли 1,5 миллиард тенкӗ уйӑрма палӑртнӑ.

Сӑмах май, Комсомольскинчи 2-мӗш шкула авариллӗ тесе йышӑннӑ хыҫҫӑн хупнӑ. Ҫурт – 1994 ҫулта хӑпартнӑскер. 2023 ҫултанпа ачасем Комсомольскинчи 1-мӗш шкулта вӗренеҫҫӗ.

Ҫавӑн пекех Вӑрнарти 1-мӗш шкулта хушма ҫурт тума палӑртнӑ. Кун валли 364,1 миллион тенкӗ кирлӗ.

t.me/chuvashenkalasat сӑнӳкерчӗкӗ

Чӑваш Енри муниципаллӑ округсенче тӗллевлӗ вӗренме кӗрекенсене унччен уйӑхсерен сахалтан та 500 тенкӗ стипенди тӳленӗ. Халӗ студентсене 3 е 5 пин тенкӗрен ытларах тӳлени пирки «Чӑваш Ен калаҫать» телеграмм-канал пӗлтерет.

Тӗллевлӗ вӗренессипе ҫыхӑннӑ программӑра студентсене пурӑнмалли вырӑнпа тивӗҫтересси те пур-мӗн. Ӗҫлеме вырнаҫас текен ҫамрӑксене хальлӗхе Улатӑр, Вӑрнар, Хӗрлӗ Чутай, Пӑрачкав, Вӑрмар тата Ҫӗрпӳ тӑрӑхӗсем ҫеҫ ку ҫӑмӑллӑхпа пулӑшма хатӗр. Ҫитес вӑхӑтра пур округӑн та ҫавӑн пек пулӑшмалла.

Тӗллевлӗ вӗренмелли программӑна хутшӑнас кӑмӑллисем валли 2025-2028-мӗш ҫулсенче 891 вырӑн пӑхса хӑварнӑ.

Прокуратура тунӑ сӑн

Куславкка районӗн прокуратури Куславкка хулинчи икӗ шкула тӗрӗсленӗ. Стандартпа тата санитари правилисемпе килӗшӳллӗн, туалетпа столовӑйӗнче кӑна мар, ятарлӑ вӗренӳ класӗсенче те вӗри шыв пулмалла. Ҫав шута 1-4-мӗш классен пӳлӗмӗсем, физика, хими, биологи пӳлӗмӗсем, лабарантски кӗреҫҫӗ. Ҫав икӗ шкулта вара ҫак йӗркесене пӑхӑнман.

Прокуратура суда икӗ тавӑҫ тӑратнӑ. Унта ведомство шкулсенчи пӳлӗмсене вӗри шывпа тивӗҫтерме ыйтнӑ.

cheb.ws сайтри сӑн

Паян Шупашкарти «Садовый» микрорайонти ҫӗнӗ шкула ачасем вӗренме кайнӑ. Ку – пӗрремӗш кун!

Ҫынсем ачасем шкула утнине видео ӳкерсе халӑх тетелне вырнаҫтарнӑ. Хальлӗхе унта миҫемӗш классем вӗреннине каламан. Аса илтерер: микрорайонти 1650 вырӑнлӑх шкул 64-мӗш шкулӑн корпусӗ пулса тӑнӑ. Хальлӗхе шкула уҫни пирки официаллӑ информаци пулман.

Палӑртмалла: ку шкула 2020 ҫулта тума пуҫланӑ. Унтанпа темиҫе подрядчик те улшӑннӑ.

cap.ru сӑнӳкерчӗкӗ

Шупашкарти «Садовый» микрорайонти шкул халӗ ачасене йышӑнса вӗренӳ ӗҫне кӳлӗнме пултарать. Нумаях пулмасть вӑл лицензи илнӗ. Кун пирки ЧР Вӗренӳ министерстви пӗлтерет.

Шкул хулари 64-мӗш шкулӑн вӗренӳ корпусӗ пулса тӑнӑ. Санитарипе эпидемиологи пӗтӗмлетӗвӗ те килнӗ. Ҫак кунсенче ведомство ӗҫченӗсем шкул коридорӗпе утса тухнӑ, классене, акт залне, столовӑя пӑхса ҫаврӑннӑ. «Юлашки штрихсем юлнӑ», ҫапла пӗлтернӗ вӗренӳ министрӗ Дмитрий Захаров телеграм-каналӗнче.

cap.ru сӑнӳкерчӗкӗ

Чӑваш патшалӑх аграри университечӗн вӗрентекенӗсем Александр Семенов тата Алексей Новиков Пӗтӗм Раҫҫейри «Ҫулталӑк инженерӗ» конкурса хутшӑнса ҫӗнтернӗ. Вӗсене ҫӗршыври профессионал инженерсен реестрне кӗртнӗ.

Александр Семенов «Машиностроени» номинацире мала тухнӑ. Алексей Новиков вара «Агроинженери» номинацире ҫӗнтернӗ. Ҫапла вӗсем «Ҫулталӑк инженерӗ» хисеплӗ ята тивӗҫнӗ.

Палӑртмалла: аграри университечӗ малтан Чӑваш патшалӑх ял хуҫалӑх академийӗ пулнӑ.

Анна Егорован халӑх тетелӗнчи страницинчен илнӗ сӑнӳкерчӗк

И.Н.Ульянов ячӗллӗ Чӑваш патшалӑх университетӗнче «Тӑван чӗлхепе тӑван литературӑна чи лайӑх вӗрентекен» конкурсӑн 2-мӗш кунӗ иртнӗ.

Конкурса 21 вӗрентекен хутшӑннӑ. «Иккӗшӗ тӑван вырӑс чӗлхи вӗрентекенсем, виҫҫӗшӗ пуҫламӑш шкул вӗрентекенӗсем, ыттисем тӑван чӑваш чӗлхи вӗрентекенсем», – тесе хыпарланӑ Анна Егорова халӑх тетелӗнчи хӑйӗн страницинче.

Чи маттурисен йышӗнче: Анна Вельдяева (Улатӑр тӑрӑхӗнчи Алтышево шкулӗнче вырӑс чӗлхи вӗрентекен); Алевтина Димитриева (Муркаш тӑрӑхӗнчи Ярапайкасси шкулӗнче чӑваш чӗлхи вӗрентекен); Ксения Леонтьева (Ҫӗрпӳ хулин 2-мӗш шкулӗнче чӑваш чӗлхи вӗрентекен); Людмила Николаева (Шупашкар хулин 62-мӗш шкулӗнче чӑваш чӗлхи вӗрентекен);

Алёна Алена (Йӗпреҫ посёлокӗн 2-мӗш шкулӗнче чӑваш чӗлхи вӗрентекен).